Qhubeka Uyithemba Inhlanganiso KaJehova

1. Abantu bakaJehova babehlelwe njani ngesikhathi sabaphostoli?

NXA uJehova engapha abantu bakhe umsebenzi uyabe ekhangelele ukuthi bawenze ngendlela ehlelekileyo. (1 Khor. 14:33) Ngokwesibonelo, uNkulunkulu ufuna ukuthi izindaba ezinhle zitshunyayelwe emhlabeni wonke. (Mat. 24:14) Ubeke uJesu ukuthi akhokhele emsebenzini wokutshumayela futhi uJesu uba leqiniso lokuthi umsebenzi lo wenziwa ngendlela ehlelekileyo. Ngesikhathi kuvulwa amabandla ezindaweni ezitshiyeneyo ngesikhathi sabaphostoli, kwabekwa abadala ukuthi bakhokhele njalo batshele abantu lokho okukhangelelwe ukuthi bakwenze. (Imiseb. 14:23) EJerusalema kwakulequla labadala elalibunjwa ngabaphostoli lamadoda amadala elalisenza izinqumo okwakumele zilandelwe ngamabandla wonke. (Imiseb. 15:2; 16:4) Abafowethu labodadewethu bayilalela imilayo ababeyitshelwa futhi lokho kwenza ukuthi ‘amabandla aqhubeke eqiniswa ekukholweni labazalwane besanda.’—Imiseb. 16:5.

2. Kusukela ngo-1919 ngobani uJehova abebasebenzisa ukuthi bakhokhele abantu bakhe futhi babanike ukudla okuqinisa ukholo?

² UJehova uqhubeka ehlela abantu bakhe lalamuhla. Kusukela ngo-1919 uJesu ubesebenzisa iqembu elincane lamadoda agcotshiweyo ukuthi lihlele umsebenzi wokutshumayela lokuthi linike abalandeli bakhe ukudla okuqinisa ukholo, okutsho ulwazi olusekelwe eBhayibhilini.a (Luk. 12:42) Kuyacaca ukuthi uJehova uyawubusisa umsebenzi wamadoda la.—Isaya. 60:22; 65:​13, 14.

3-4. (a) Nika isibonelo esitshengisa ukuthi kunceda ngani ukuhleleka. (b) Sizaxoxa ngani esihlokweni lesi?

³ Aluba inhlanganiso ibingahlelekanga besingasoze senelise ukwenza umsebenzi uJesu asinika wona. (Mat. 28:​19, 20) Ngokwesibonelo, nxa abazalwane bengahleli ukuthi insimu yebandla izatshunyayelwa njani abamemezeli bangacina betshumayela loba ngaphi lapho abafuna khona. Lokhu kungenza ukuthi ezinye indawo zitshunyayelwe kanenginengi kodwa ezinye zihlale isikhathi eside zingatshunyayelwa. Kukhona yini okunye ongakucabanga okutshengisa indlela esincedakala ngayo nxa sihlelekile?

⁴ Njengoba nje uJesu wayehlela abalandeli bakhe ngesikhathi esemhlabeni, lalamuhla uqhubeka ehlela inhlanganiso kaNkulunkulu. Esihlokweni lesi sizaxoxa ngendlela uJesu ayesenza ngayo izinto ngesikhathi esemhlabeni langendlela inhlanganiso emlingisela ngayo lamuhla. Sizaphinda sixoxe langokuthi singatshengisa njani ukuthi siyayithemba inhlanganiso kaJehova.

INHLANGANISO YETHU ILANDELA LOKHO OKWAKUSENZIWA NGUJESU

5. Yiphi eyinye indlela inhlanganiso elandela ngayo lokho okwakusenziwa nguJesu? (UJohane 8:28)

⁵ Lokho uJesu ayekwenza lalokho ayekukhuluma wayekufundiswe nguYise osezulwini. Inhlanganiso kaJehova ilingisela uJesu ngokusebenzisa iLizwi likaNkulunkulu ukuthi isitshele lokho okulungileyo lokungalunganga kanye lalokho okukhangelelwe ukuthi sikwenze. (Bala uJohane 8:28; 2 Thim. 3:​16, 17) Sihlala sikhunjuzwa ukuthi sibale iLizwi likaNkulunkulu lokuthi sikusebenzise esikubala kulo. Kusinceda njani lokho?

6. Yiphi eyinye indlela eqakathekileyo esincedakala ngayo nxa sitaditsha iBhayibhili?

⁶ Ukutaditsha iBhayibhili sisebenzisa amabhuku enhlanganiso kuyasinceda kakhulu. Siyenelisa ukuqathanisa lokho okufundiswa liBhayibhili lalokho inhlanganiso esitshela khona isebenzisa amabhuku ethu. Nxa sibona ukuthi lokho esikutshelwa yinhlanganiso kaJehova kusekelwe eMibhalweni, siyayithemba kakhulu.—Rom. 12:2.

7. UJesu wayetshumayela ngani futhi inhlanganiso kaJehova lamuhla imlingisela njani?

⁷ UJesu wayetshumayela “izindaba ezinhle zoMbuso kaNkulunkulu.” (Luk. 4:​43, 44) Kanti njalo walaya abafundi bakhe ukuthi batshumayele ngoMbuso. (Luk. 9:​1, 2; 10:​8, 9) Lamuhla bonke abantu abasenhlanganisweni kaJehova batshumayela izindaba ezinhle zoMbuso. Lokhu bakwenza kungelani lokuthi bahlala ngaphi kumbe ukuthi benza msebenzi bani enhlanganisweni.

8. Yisiphi isibusiso esilaso?

⁸ Sikubona kuyisibusiso ukutshela abanye iqiniso elimayelana loMbuso kaNkulunkulu! Kodwa isibusiso lesi ayisiso sikawonkewonke. Ngokwesibonelo, ngesikhathi uJesu esemhlabeni kazange awavumele amadimoni ukuthi atshumayele ngaye. (Luk. 4:41) Lalamuhla umuntu uqala ahlolwe engakavunyelwa ukuthi atshumayele labantu bakaJehova. Sitshengisa ukuthi siyasiqakathekisa isibusiso lesi ngokutshumayeza abantu loba ngaphi esiyabe sikhona ngaloba yisiphi isikhathi. Lathi inhloso yethu iyafanana lekaJesu, sifuna ukuhlanyela inhlanyelo yeqiniso loMbuso ezinhliziyweni zabantu sibe sesiyithelela.—Mat. 13:​3, 23; 1 Khor. 3:6.

9. Inhlanganiso yenzani ukuze abantu balazi ibizo likaNkulunkulu?

⁹ UJesu wayefundisa abantu ngebizo likaNkulunkulu. UJesu wathi ethandaza kuYise osezulwini wathi: “Sengenze balazi ibizo lakho.” (Joh. 17:26) Inhlanganiso kaJehova ilingisela uJesu ngokwenza konke engakwenza ukuze incedise abantu ukuthi balazi ibizo likaNkulunkulu. Eyinye indlela ekwenza ngayo lokhu yikuhumutsha iNguqulo Yomhlaba Omutsha YeMibhalo Engcwele. IBhayibhili leli libuyisela ibizo likaNkulunkulu kuzo zonke izindawo lapho okumele litholakale khona. Khathesi selitholakala ngezindimi ezedlula 270 ligcwele kumbe liyingxenye. KuSengezo A4 lo-A5 eBhayibhilini leli uzathola okunengi mayelana lokubuyiselwa kwebizo likaNkulunkulu. ISengezo C esitholakala eBhayibhilini lesiNgisi okuthiwa yi-Study Bible silobufakazi obunengi obuveza ukuthi ibizo likaNkulunkulu kumele litholakale izikhathi ezingu-237 eMibhalweni YamaKhristu YesiGrikhi.

10. Ufundani kulokho okwakhulunywa ngowesifazana ohlala eMyanmar?

¹⁰ Lathi njengoJesu sifuna ukuncedisa abantu abanengi kakhulu ukuthi balazi ibizo likaNkulunkulu. Omunye owesifazana oleminyaka engu-67 ohlala eMyanmar wathi esizwa ukuthi uNkulunkulu ulebizo waqalisa ukukhala, wathi: ‘Lokhu ngokokuqala empilweni yami ukuzwa ukuthi ibizo likaNkulunkulu nguJehova. Lingifundise into eqakatheke kakhulu.’ Okwenzakala kowesifazana lo kutshengisa ukuthi nxa abantu bangafunda ngebizo likaNkulunkulu impilo zabo zingatshintsha.

QHUBEKA UYITHEMBA INHLANGANISO

11. Abadala bangatshengisa njani ukuthi bayayithemba inhlanganiso kaJehova? (Khangela lomfanekiso.)

¹¹ Yiphi eyinye indlela abadala abangatshengisa ngayo ukuthi bayayithemba inhlanganiso kaNkulunkulu? Nxa inhlanganiso ingabanika imilayezo kumele bayibale ngonanzelelo njalo benze konke okusemandleni abo ukuthi bakwenze lokho abayabe bekutshelwa. Ngokwesibonelo, bayatshelwa ukuthi kumele bayiqhube njani imihlangano yebandla lokuthi kumele bakhuleke njani phambi kwebandla, baphinde batshelwe lokuthi kumele baziphathe njani izimvu zikaKhristu. Nxa abadala belandela konke abakutshelwa yinhlanganiso, abafowethu labodadewethu bayabona ukuthi uJehova uyabathanda lokuthi ulendaba labo.

12. (a) Kungani kumele silalele abakhokhelayo? (UHebheru 13:​7, 17) (b) Kungani kungamelanga sihlale sikhangela lokho okuphanjaniswa ngabasikhokhelayo?

¹² Nxa abadala besitshela lokho okumele sikwenze, kumele sizimisele ukukwenza. Lokhu kuzakwenza ukuthi kube lula ukuthi labo abasikhokhelayo bawenze kuhle umsebenzi wabo. IBhayibhili lisikhuthaza ukuthi sibalalele abasikhokhelayo futhi sizehlise kubo. (Bala uHebheru 13:​7, 17.) Ukwenza lokhu kungaba nzima ngezinye izikhathi. Ngenxa yani? Ngenxa yokuthi abadala labo bayawenza amaphutha. Kodwa nxa singahlala sikhangela lokho abakuphambanisayo kulokuthi sikhangele okuhle abakwenzayo kuyabe sekufanana lokuthi sisekela izitha zethu. Kungani sisitsho njalo? Izitha zethu zifuna sithandabuze ukuthi uJehova usikhokhela esebenzisa inhlanganiso yakhe. Yikho nxa singahlala sikhangela okuphanjaniswa ngabadala singacina singasayithembi inhlanganiso kaNkulunkulu. Singenzani ukuze siwananzelele amanga akhulunywa yizitha zethu futhi singathatheki ngawo?

UNGAVUMI UKUTHI ABANYE BAKWENZE UCINE UNGASAYITHEMBI INHLANGANISO KAJEHOVA

13. Izitha zikaNkulunkulu zizama njani ukwenza ukuthi izinto ezinhle ezenziwa yinhlanganiso zikhanye angathi zimbi?

¹³ Izitha zikaNkulunkulu zizama ngamandla ukuthi izinto ezinhle ezenziwa yinhlanganiso zikhanye angathi zimbi. Ngokwesibonelo, iBhayibhili lisifundisa ukuthi uJehova ukhangelele ukuthi labo abamkhonzayo bahlanzeke, baziphathe kuhle futhi bamkhonze ngendlela ayifunayo. Lithi loba ngubani oqhubeka esenza izinto ezimbi futhi engaphenduki kumele asuswe ebandleni. (1 Khor. 5:​11-13; 6:​9, 10) Izitha zethu zithi asibathandi abantu nxa silalela umlayo lo ovela eBhayibhilini. Zithi sibahlulela kubi futhi sifuna baphile ngendlela thina esiyifunayo.

14. Ngubani omemethekisa amanga mayelana lenhlanganiso kaJehova?

¹⁴ Zwisisa ukuthi ngubani sibili ohlasela inhlanganiso. USathane uDeveli nguye omemethekisa izindaba ezingamanga ngenhlanganiso. IBhayibhili lithi ‘unguyise wamanga.’ (Joh. 8:44; Gen. 3:​1-5) Ngakho asimangali nxa esebenzisa izitha zethu ukuthi amemethekise amanga ngenhlanganiso kaJehova. Lokhu wakwenza langesikhathi sikaJesu lesamaKhristu akuqala.

15. Abakhokheli benkolo bamenzani uJesu njalo babenzani abalandeli bakhe?

¹⁵ Lanxa iNdodana kaNkulunkulu yayingelasono futhi isenza izimangaliso ezinengi, uSathane wasebenzisa abantu bakhe ukuthi baqambe amanga ngayo. Ngokwesibonelo, abakhokheli benkolo batshela abantu ukuthi uJesu wayekhipha amadimoni esebenzisa amandla ayewaphiwa ‘ngumbusi wamadimoni.’ (Mak. 3:22) Ngesikhathi uJesu ethonisiswa, abakhokheli benkolo bathi wayethuke uNkulunkulu futhi babetshotshozela abantu ukuthi bathi uJesu abulawe. (Mat. 27:20) Ngokuhamba kwesikhathi abalandeli bakaKhristu bathi betshumayela izindaba ezinhle, izitha zabo ‘zayenga abantu, zenza ukuthi baphikisane’ labo ukuze babahlukuluze. (Imiseb. 14:​2, 19) INqabayokulinda kaDecember 1, 1998 yachasisa imiSebenzi 14:2 yathi: “Izitha ezazingamaJuda zazingafuni ukulalela lokho okwakukhulunywa ngamaKhristu futhi zaphinda zatshotshozela abantu bezinye izizwe ukuthi labo bangawalaleli lokuthi bawazonde.”

16. Kuyini okufanele sikukhumbule nxa singezwa izindaba ezingamanga?

¹⁶ USathane ulokhu ewaqamba amanga. Lalamuhla ulokhu ‘edukisa umhlaba wonke.’ (Isam. 12:9) Nxa ungezwa izinto ezimbi mayelana lenhlanganiso kumbe abafowethu abakhokhelayo, khumbula ukuthi izitha zikaNkulunkulu zamphatha njani uJesu kanye lamaKhristu akuqala. Lamuhla abantu bakaNkulunkulu bayahlukuluzwa futhi baqanjelwe amanga njengoba nje iBhayibhili latsho. (Mat. 5:​11, 12) Asisoze sidukiswe zindaba ezingamanga nxa singananzelela ukuthi ngubani ozimemethekisayo njalo siphangise ukutshiyana lazo. Singenzani ukuze sizivikele ezindabeni ezingamanga?

17. Singenzani ukuze singaphanjaniswa zindaba ezingamanga? (U-2 Thimothi 1:13) (Khangela lebhokisi elithi “Okumele Ukwenze Nxa Ungezwa Indaba Engamanga.”)

¹⁷ Xwaya izindaba ezingamanga. Umphostoli uPhawuli wakubeka kwacaca lokho okumele sikwenze nxa singezwa izindaba ezingamanga. Watshela uThimothi ukuthi ‘alaye abathile ukuthi bangalaleli izindaba ezingamanga.’ (1 Thim. 1:​3, 4; 4:7) Abantwana bajayele ukudobha izinto phansi bazifake emlonyeni kodwa abantu abadala ngeke bakwenze lokhu ngoba bayakwazi ukuthi kuyingozi. Lathi siyazixwaya izindaba ezingamanga ngoba siyakwazi ukuthi zivela kubani. Sibambelela ‘emazwini aqondileyo’ eqiniso.—Bala u-2 Thimothi 1:13.

18. Singatshengisa njani ukuthi siyayithemba inhlanganiso kaJehova?

¹⁸ Sixoxe ngendlela ezintathu inhlanganiso kaJehova elingisela ngazo uJesu. Nxa utaditsha iBhayibhili zama ukunanzelela ezinye indlela inhlanganiso elingisela ngazo uJesu. Ncedisa abanye ebandleni ukuthi labo baqhubeke beyithemba. Kanti njalo qhubeka utshengisa ukuthi uyayithemba inhlanganiso ngokuba qotho kuJehova langokulalela konke esikutshelwa yinhlanganiso yakhe ayisebenzisayo ukuthi enze intando yakhe. (Hubo. 37:28) Kwangathi singahlala sisiqakathekisa isibusiso sokuba senhlanganisweni kaJehova elabantu abaqotho labalothando.