UJehova Uthethelela Njani?

1. Kungani kunzima ukuzwisisa indlela abantu abathethelela ngayo?

AKE sithi wenze into ezwise omunye umuntu ubuhlungu. Ubungezwa njani nxa angathi, “Sengikuthethelele”? Lokhu bekungenza uhlaliseke sibili. Kodwa uyabe esitshoni umuntu nxa esithi, “Sengikuthethelele?” Kambe angabe esitsho ukuthi selizaphinda lizwanane ngendlela ebelizwanana ngayo yini kumbe utsho ukuthi kasafuni kuphinda azwe ngendaba leyo? Yikuthi nje khona kunzima ukuzwisisa ukuthi umuntu uyabe esitshoni nxa esithi, “Sengikuthethelele.”

2. IBhayibhili liyichasisa njani indlela uJehova athethelela ngayo? (Khangela lamabala angaphansi.)

² Indlela uJehova asithethelela ngayo itshiyene kakhulu lendlela thina esithethelelana ngayo. Akula ngitsho loyedwa umuntu ongathethelela njengoJehova. Umhubi wakhuluma ngoJehova wathi: “Wena uyathethelela sibili, ukuze abantu bakwesabe.”a (Hubo. 130:4) Leli liqiniso, uJehova “uyathethelela sibili.” Sifunda kuye indlela okumele sithethelele ngayo abanye. Kwamanye amavesi abalobi beBhayibhili babesithi nxa bekhuluma ngokuthethelela kukaJehova basebenzise elinye ibala lesiHebheru ababengalisebenzisi nxa bekhuluma ngokuthethelela kwabantu.

3. Indlela uJehova athethelela ngayo itshiyene njani leyabantu? (U-Isaya 55:​6, 7)

³ Nxa uJehova ethethelela umuntu, uhle acitshe isono sakhe baphinde babe ngabangane. Indlela uJehova asithethelela ngayo iyamangalisa njalo siyambonga kakhulu ngoba kadinwa ngokusithethelela.—Bala u-Isaya 55:​6, 7.

4. UJehova usinceda njani ukuthi siyizwisise indlela athethelela ngayo?

⁴ Kuyini okungasinceda sizwisise indlela uJehova athethelela ngayo njengoba indlela thina esithethelela ngayo itshiyene leyakhe? UJehova wasebenzisa imizekeliso ethinta inhliziyo ukuze achasise ukuthi uthethelela kangakanani. Esihlokweni lesi sizaxoxa ngeminye yakhona. Imizekeliso le izasitshengisa ukuthi uJehova uzisusa njani izono zethu aphinde asenze sibe ngabangane bakhe. Ukuxoxa ngayo kuzasinceda ukuthi simthande kakhulu uBaba wethu ohlala esithethelela.

UJEHOVA USUSA IZONO ZETHU

5. Kwenzakalani nxa uJehova angasithethelela izono zethu?

⁵ Izikhathi ezinengi iBhayibhili lifanisa izono lemithwalo esindayo. INkosi uDavida yathi: “Sengicwile phakathi kwezono zami, zinjengomthwalo osindayo, angisenelisi ukuzithwala.” (Hubo. 38:4) Kodwa uJehova uyabathethelela abavuma izono zabo baphenduke. (Hubo. 25:18; 32:5) Ibala lesiHebheru elihunyutshwe ngokuthi “ukuthethelela” litsho “ukuthwala” kumbe “ukuphakamisa.” Ngamanye amazwi uJehova singambona njengendoda elamandla efika iphakamise isono esisithwalise nzima ibisisithwala ihambe laso.

6. UHubo 103:12 usifundisani ngendlela uJehova asithethelela ngayo?

⁶ IHubo 103:12 lithi: “Uthethe izono zethu wazibeka khatshana lathi, njengokuqhelelana kwempumalanga lentshonalanga.” Lo ngomunye umzekeliso otshengisa indlela uJehova athwala ngayo izono zethu azise khatshana le. Impumalanga lentshonalanga akusoze kwafa kwahlangana. Lokhu kutshengisa ukuthi uJehova uthatha izono zethu azibeke khatshana kakhulu lathi. Kuyasiduduza ukwazi ukuthi nxa angasithethelela kuyabe sekuphelile sibili!

7. IBhayibhili likuchasisa njani lokho uJehova akwenzayo ngezono zethu nxa angasithethelela? (UMikha 7:​18, 19)

⁷ Nxa uJehova angasusa izono zethu azibeke khatshana uyazibuyelela yini? Hatshi. INkosi uHezekhiya yathi: “Izono zami zonke usuziphosele ngemva kwakho.” Amabala angaphansi omutsho lo athi izono zami zonke “usuzisusile phambi kwakho.” (Isaya. 38:​9, 17; amabala angaphansi) Umzekeliso lo utshengisa ukuthi uJehova uthatha izono zabantu abaphendukayo aziphosele khatshana lapho angasoze aphinde azibuyelele khona. Umutsho lo ungahunyutshwa langokuthi: “Wenze angathi kangizange ngike [ngone].” IBhayibhili liyawugcizelela umcijo lo komunye umzekeliso obhalwe kuMikha 7:​18, 19. (Bala.) Amavesi la athi uJehova uphosela izono zethu enzikini yolwandle. Kudala kwakungelandlela yokuthi into ephoselwe enzikini yolwandle iphinde itholakale.

8. Kuyini esesikufundile?

⁸ Imizekeliso le isifundisa ukuthi nxa uJehova angasithethelela akusamelanga sitshone sizithonisisa ngoba uyabe esezisusile izono zethu. Aliqiniso sibili amazwi kaDavida athi: “Bayathokoza abaxolelwe izenzo zabo zokwephula umthetho kanye lalabo abazono zabo zithethelelwe. Uyathokoza umuntu uJehova angasoze ambalele isono sakhe loba sekutheni.” (Rom. 4:​7, 8) Lokhu yikho ukuthethelela sibili!

UJEHOVA UYAZESULA IZONO

9. Yiphi imizekeliso esetshenziswa nguJehova ukuze asitshengise ukuthi usithethelela kangakanani?

⁹ Kuleminye imizekeliso uJehova ayisebenzisayo ukuze asincedise sizwisise ukuthi uzesula njani izono zabantu abaphendukayo esebenzisa inhlawulo. Kulamanye amavesi akhuluma ngokuthi uJehova uyagezisa, aphinde ahlambulule izono. Lokhu kwenza isoni sisale simsulwa. (Hubo. 51:7; Isaya. 4:4; Jer. 33:8) UJehova uyasitshela ukuthi ukwenza njani lokho. Uthi: “Lanxa izono zenu zibomvu gebhu, zizakwenziwa zibe mhlophe njengongqwaqwane. Lanxa zibomvu njengegazi, zizakuba mhlophe nke njengoboya bezimvu.” (Isaya. 1:18) Nxa into ebomvu ingachithekela elenjini elimhlophe, kuba nzima kakhulu ukuthi iphume. UJehova usebenzisa umzekeliso lo ukuze asiqinisekise ukuthi nxa angahlambulula izono zethu kusala kungasakhanyi lokuthi sike sawona.

10. Yiwuphi omunye umzekeliso otshengisa indlela uJehova asithethelela ngayo?

¹⁰ Esihlokweni esidlulileyo sibonile ukuthi izono zifaniswa ‘lezikwelede.’ (Mat. 6:12; Luk. 11:​4, amabala angaphansi.) Sonke isikhathi nxa sisonela uJehova isikwelede sethu siyangezeleleka. Silenkalakatha yesikwelede kuJehova. Nxa uJehova esithethelela kuyabe kungathi uyasicitsha lesosikwelede. Nxa angasithethelela kuyabe sekuphelile, kaphindi azivuse izono zethu. Umzekeliso lo wenza sibone ukuthi nxa uJehova angasithethelela sisala sihlanzekile.

11. Kutshoni ‘ukwesulwa’ kwezono zethu? (ImiSebenzi 3:19)

¹¹ UJehova kacitshi izono zethu kuphela, kodwa uyazesula. (Bala imiSebenzi 3:19.) Nxa umuntu ecitsha isikwelede angadweba umzila phezu kwemali ebhaliweyo. Lanxa umzila uyabe usudwetshiwe, inani lemali yesikwelede lisala likhanya. Kodwa ukwesula isikwelede kutshiyene lokusicitsha. Okuzasinceda siwuzwisise umzekeliso lo yikukhumbula ukuthi i-inki okwakubhalwa ngayo kudala kwakulula ukuthi umuntu ayesule. Umuntu wayethatha ilembu elimanzi esule okubhaliweyo. Ngakho kwakusithi nxa isikwelede ‘singesulwa’ singaphindi sithonisiswe. Okwakubhaliwe kwakusala kungasakhanyi ngitsho. Akulamuntu owayengaphinda asilandelele. Kuyasiduduza kakhulu ukwazi ukuthi uJehova uyazicitsha izono zethu aphinde azesule, kube angathi kasizange siwone!—Hubo. 51:9.

12. Umzekeliso weyezi elijiyileyo usifundisani?

¹² Kulomunye futhi umzekeliso uJehova awusebenzisayo ukuze asicacisele indlela acitsha ngayo izono zethu. Uthi: “Ngizacitsha iziphambeko zakho, kube angathi zivalwe liyezi, ngesule izono zakho ngeyezi elijiyileyo.” (Isaya. 44:22) Nxa uJehova angasithethelela kuyabe kungathi uvale izono zethu ngeyezi elijiyileyo ukuze zingaphindi zibonakale.

13. Uzwa njani ngokuthi uJehova uyakuthethelela?

¹³ Imizekeliso le isifundisani? Nxa uJehova angasithethelela akumelanga siqhubeke sizithonisisa. Zonke izikwelede esilazo kuNkulunkulu ziyabe seziphelile, esezesule ngegazi likaJesu Khristu. Kuyabe sekungathi kasizange siwone. Le yindlela uJehova asithethelela ngayo nxa singaphenduka njalo sivume izono zethu.

UJEHOVA UPHINDA ASAMUKELE

14. Kungani kungamelanga sithandabuze ukuthi uJehova uyasithethelela sibili? (Khangela imifanekiso.)

¹⁴ Nxa uJehova angasithethelela uyasamukela siphinde sibe ngabangane bakhe. Indlela uJehova asithethelela ngayo iyasinceda ukuthi singaqhubeki sizithonisisa. Akumelanga sesabe sizitshela ukuthi uJehova usibambele isikhwili lokuthi udinga izindlela zokusijezisa. Lokho akusoze kwafa kwenzakala. Kuyini okungenza singathandabuzi ukuthi uJehova uyasithethelela sibili? UJehova watshela umphrofethi uJeremiya wathi: “Ngizabathethelela icala labo njalo angisoze ngibe ngisasikhumbula isono sabo.” (Jer. 31:34) UPhawuli wacupha amazwi la wabhala wathi: “Angisoze ngibe ngisazikhumbula izono zabo.” (Heb. 8:12) Kutshoni lokhu?

15. Kutshoni ukuthi uJehova kasoze aphinde akhumbule izono zethu?

¹⁵ Kwamanye amavesi, ibala elithi “khumbula” litsho ukwenza into ethile hatshi ukucabanga into oyabe usuyikhohliwe kumbe eyenzakala kudala. Isigebenga esasilengiswe eceleni kukaJesu sathi: “Jesu, ungikhumbule nxa ufika eMbusweni wakho.” (Luk. 23:​42, 43) Sasingaceli ukuthi uJesu asicabange nje kuphela nxa efika eMbusweni. Indlela uJesu aphendula ngayo isigebenga lesi yayitshengisa ukuthi uzasivusa. Nxa uJehova esithi kasoze aphinde azikhumbule izono zethu uyabe esitsho ukuthi ngeke aphinde asithonisise kumbe asijezisele zona.

16. IBhayibhili liyichasisa njani inkululeko esiba layo nxa singathethelelwa?

¹⁶ IBhayibhili lisebenzisa omunye umzekeliso ukuze lisincede sizwisise ukuthi nxa uJehova angasithethelela sisala sikhululekile. Lithi ‘siyizigqili zesono’ ngenxa yokuthi sizelwe silaso. Siyambonga kakhulu uJehova ngoba uyasithethelela. Sesinjengezigqili ezikhululiweyo ngoba ‘sakhululwa esonweni.’ (Rom. 6:​17, 18; Isam. 1:5) Nxa sesikwazi ukuthi uJehova uyasithethelela, siyathokoza kakhulu njengesigqili esikhululiweyo.

17. Ukuthethelelwa kusisilisa njani? (U-Isaya 53:5)

¹⁷ Bala u-Isaya 53:5. Umzekeliso wokucina esizaxoxa ngawo usifanisa labantu abalomkhuhlane omubi. UJehova wasihlawulela ngeNdodana yakhe ukuze sisiliswe emkhuhlaneni lo. (1 Phet. 2:24) Nxa singawona, siyabe siphambanisa ubungane bethu loJehova, kodwa inhlawulo yenza sibuyisane laye siphinde sibe ngabangane bakhe. Nxa umuntu olomkhuhlane omubi angasila, uyathokoza. Lathi siyathokoza kakhulu nxa uJehova angasithethelela siphinde sibe ngabangane bakhe.

UKUTHETHELELA KUKAJEHOVA KUSINCEDA NJANI?

18. Imizekeliso ekhuluma ngokuthethelela kukaJehova isifundiseni? (Khangela lebhokisi elithi “UJehova Usithethelela Njani?”)

¹⁸ Imizekeliso eseBhayibhilini ekhuluma ngokuthethelela kukaJehova isifundiseni? Nxa angasithethelela kuyabe sekungathi izono lezo kazisekho futhi kasoze aphinde asijezisele zona. Lokhu kwenza sibe ngabangane loBaba wethu osezulwini. Kodwa kumele sihlale sikhumbula ukuthi okwenza uJehova asithethelele luthando lwakhe lomusa wakhe omkhulu, hatshi ukuthi silelungelo lokuthi asithethelele.—Rom. 3:24.

19. (a) Kungani kumele simbonge uJehova? (URoma 4:8) (b) Sizaxoxa ngani esihlokweni esilandelayo?

¹⁹ Bala uRoma 4:8. Siyambonga kakhulu uJehova uNkulunkulu ngenxa yokuthi “uyathethelela sibili”! (Hubo. 130:4) Kodwa kulokunye okuqakathekileyo okumele sikwenze ukuze asithethelele. UJesu wathi: “Nxa lingabaxoleli abanye iziphambeko zabo, loYihlo kasoze alixolele iziphambeko zenu.” (Mat. 6:​14, 15) Ngakho kuyacaca ukuthi lathi kumele sithethelele njengoJehova. Kodwa singakwenza njani lokho? Umbuzo lo uzaphendulwa esihlokweni esilandelayo.