Ungathandabuzi Ukuthi UJehova Usekuthethelele

1-2. Kumele senzeni ukuze uJehova asithethelele? (Khangela lomfanekiso ongaphandle)

INKOSI uDavida yazithonisisa ngenxa yezono ezinkulu eyayizenzile. (Hubo. 40:12; 51:​3, isethulo) Lanxa kunjalo yaphenduka ngenhliziyo yonke futhi uJehova wayithethelela. (2 Sam. 12:13) UDavida wazizwa esethulwe umthwalo ngemva kokuthethelelwa nguJehova futhi lokho kwamenza wathokoza.—Hubo. 32:1.

² Lathi sizathokoza nxa uJehova angasitshengisa isihawu futhi asithethelele. Nxa singenza isono esikhulu besesisivuma kuJehova, siphenduke ngenhliziyo yonke futhi sizimisele ukungasiphindi lesosono, uJehova uzasithethelela. (Zaga. 28:13; Imiseb. 26:20; 1 Joh 1:9) Nxa uJehova engathethelela umuntu kuyabe kungani umuntu lowo kazange enze isono.—Hez. 33:16.

3-4. UJennifer wayecabangani ngezono ayezenzile futhi sizaxoxa ngani esihlokweni lesi?

³ Abanye abantu bathwala nzima ukukholwa ukuthi uJehova angabathethelela. Lokhu yikho okwakucatshangwa nguJennifer. Lanxa abazali bakhe bamfundisa ngoJehova esakhula yena wakhetha ukwephulela izigodo endlebeni. Uthi: “Ngangingaziphathanga, ngiyisidakwa futhi ngilolaka. Engangikuqakathekisa yikudinga imali kuphela. Ngangikwazi sibili ukuthi iBhayibhili lithi nxa ngingaphenduka ngenhliziyo yonke uJehova uzangithethelela esebenzisa inhlawulo kaJesu kodwa ngangingakholwa ukuthi inganginceda lami.” Ngokuhamba kwesikhathi uJennifer watshintsha indlela ayephila ngayo wasezinikela kuJehova wabhabhathizwa.

⁴ Nxa kuyikuthi wake wenza izono ezinkulu kuyake kukuthwalise nzima yini ukukholwa ukuthi uJehova sowakuthethelela? Nxa kunjalo, hlala ukhumbula ukuthi uJehova uzakuthethelela njengoba nje wathethelela inceku yakhe uDavida. Esihlokweni lesi sizaxoxa ngokuthi kungani kungamelanga sithandabuze ukuthi uJehova uyathethelela.

UNGATHANDABUZI UKUTHI UJEHOVA USEKUTHETHELELE

5. Kuyini uSathane afuna sikucabange? Nika isibonelo.

⁵ Ukukholwa ukuthi uJehova usesithethelele kuzasenza singawakholwa amanga kaSathane. USathane wenza konke akwenelisayo ukuze aphambanise ubungane bethu loJehova. Ufuna sicabange ukuthi izono zethu zinkulu kakhulu okokuthi uJehova ngeke asithethelele. Ake sixoxe ngalokho okwenzakala kweyinye indoda eyasuswa ebandleni leKhorinte ngenxa yokungaziphathi. (1 Khor. 5:​1, 5, 13) Ngokuhamba kwesikhathi indoda le yaphenduka kodwa uSathane wayengafuni ukuthi abazalwane bayixolele kumbe ukuthi bayamukele ebandleni. Okunye ayekufuna yikuthi indoda le eyayonile ikhulelwe yikudana ize ikhalale lokukhonza uJehova. USathane lokhe ekwenza lokhu lalamuhla. Ufuna sicabange ukuthi uJehova ngeke asixolele kodwa asivumi kuqilwa ngoba amacebo akhe siyawazi.—2 Khor. 2:​5-11.

6. Ukungathandabuzi ukuthi uJehova usesithethelele kuzasinceda njani?

⁶ Ukukhohlwa ukuthi uJehova usesithethelele kuzasenza sithokoze. Kungokwemvelo ukuthi nxa singenza isono sizithonisise futhi lokho yinto enhle. (Hubo. 51:17) Umzwangedwa wethu uyabe usitshela ukuthi kulalapho okumele silungise khona. (2 Khor. 7:​10, 11) Kodwa nxa kuyikuthi siyaqhubeka silokhe sizithonisisa thina sesitshintshile singacina sesikhalala ukukhonza uJehova. Nxa sikukholwa ngenhliziyo yonke ukuthi uJehova usesithethelele kuyabe kungamelanga sizikhathaze ngesono esasenzayo. UJehova ufuna simkhonze ngomzwangedwa ohlanzekileyo futhi sithokoza. (Kol. 1:​10, 11; 2 Thim. 1:3) Kodwa kuyini okungasenza sikholwe sibisibili ukuthi uJehova usesithethelele?

OKUNGASINCEDA SIKHOLWE UKUTHI UJEHOVA USESITHETHELELE

7-8. UJehova wamtshelani uMosi futhi lokhu kusifundisani? (U-Eksodusi 34:​6, 7)

⁷ Cabangisisa ngokuthi uJehova nguNkulunkulu onjani. Usakhumbula yini ukuthi uJehova wamtshelani uMosi ngesikhathi esentabeni iSinayi.a (Bala u-Eksodusi 34:​6, 7.) Phakathi kwezinto ezinengi uJehova ayengakhetha ukuzitshela uMosi wamtshela ukuthi ‘unguNkulunkulu olozwelo lesihawu.’ Manje uNkulunkulu onjalo angehluleka yini ukuxolela isoni esiphenduka ngenhliziyo yonke? Ngitsho lakancane. Nxa kuyikuthi uJehova kabathetheleli abantu abaphenduka ngenhliziyo yonke uyabe elolunya kodwa thina siyakwazi ukuthi uNkulunkulu wethu kanjalo.

⁸ Siyamkholwa uJehova nxa esithi unguNkulunkulu olesihawu ngoba yena kaqambi manga. (Hubo. 31:5) Nxa kuyikuthi lokhe uzithonisisa ngezono owazenza kudala zibuze imibuzo le: ‘Ngiyakukholwa yini ukuthi uJehova nguNkulunkulu olozwelo lesihawu ongeke ayekele ukuthethelela umuntu ophenduka ngenhliziyo yonke? Manje kungani ngithandabuza ukuthi uJehova usengithethelele?

9. Siyizwisisa njani indlela uJehova athethelela ngayo? (IHubo 32:5)

⁹ Cabangisisa ngamavesi akhuluma ngokuthethelela kukaJehova. UDavida wayichasisa kuhle kakhulu indlela uJehova athethelela ngayo. (Bala iHubo 32:5.) Ibala lesiHebheru elihunyutshwe ngokuthi ukuthethelela elisevesini le lingatsho ukuphakamisa kumbe ukuthwala ulutho oluthile uhambe lalo. Yikho ngesikhathi uJehova ethethelela uDavida kwakungani uthwele izono zakhe wahamba lazo. Lokho kwenza uDavida wazizwa ethulwe umthwalo osindayo emahlombe. (Hubo. 32:​2-4) Nxa kuyikuthi lawe wenza isono esikhulu kodwa wasuphenduka ngenhliziyo yonke ungaphinda uthokoze njengoDavida. Nxa uJehova esesithethelele akumelanga siqhubeke sizithonisisa ngoba uyabe esesilahlele khatshana lesosono.

10-11. Amazwi athi uJehova “uzimisele ukuthethelela” asifundisani? (IHubo 86:5)

¹⁰ Bala iHubo 86:5. Evesini le uDavida uthi uJehova “uzimisele ukuthethelela.” Ivesi le ikwenza kucace ukuthi uJehova kaphangisi ukuzonda kodwa uyaphangisa ukuthethelela labo abaphenduka ngenhliziyo yonke. Kungani uJehova esenza njalo? Ivesi le iqhubeka isithi: “Uhlala elothando oluqotho kubo bonke abambizayo.” Esihlokweni esidlulileyo sibonile ukuthi uJehova ubathanda ngothando oluqotho labo abamthandayo. Lokho kutsho ukuthi ngeke abatshiye abangane bakhe. Uthando lwakhe oluqotho yilo olwenza uJehova ‘amthethelele ngendlela enkulu’ loba ngubani ophenduka ngenhliziyo yonke. (Isaya. 55:7) Nxa kukuthwalisa nzima ukukholwa ukuthi uJehova uyathethelela nansi imibuzo ongazibuza yona: ‘Ngiyakholwa yini ukuthi uJehova uzabatshengisa isihawu bonke abaphenduka ngenhliziyo yonke? Manje kuyini okungenza ngithandabuze ukuthi lami usengithethelele?’

¹¹ Kuyasiduduza kakhulu ukwazi ukuthi uJehova uyazwisisa ukuthi singabantu abalesono. (Hubo. 139:​1, 2) Asiqhubekeni sixoxa ngamanye amavesi atshengisa ukuthi uJehova uyafuna sibili ukusithethelela.

UJEHOVA UYAKWAZI UKUTHI SILESONO

12-13. Kuyini uJehova akwaziyo ngathi futhi lokhu kumenza enzeni? (IHubo 103:14)

¹² Bala iHubo 103:14. UDavida wathi uJehova “uyakhumbula ukuthi siluthuli.” Amazwi kaDavida asenza sizwisise ukuthi kungani uJehova ezimisele ukuthethelela abantu abaphenduka ngenhliziyo yonke. UJehova ukwazi mhlophe ukuthi sonke sizelwe silesono. Ukuze sikuzwisise ngcono lokhu ake sihlolisise amazwi la akhulunywa nguDavida.

¹³ UDavida wathi uJehova “uyakwazi ukuthi sibunjwe njani.” UJehova wabumba u-Adamu “ngothuli lomhlabathi.” Lokhu kutsho ukuthi uyakwazi ukuthi abantu kumele baphefumule, badle njalo balale ukuze baqhubeke bephila futhi yikho kanye labantu abapheleleyo okwakumele bakwenze. (Gen. 2:7) Amazwi kaDavida akwenza kucace ukuthi uJehova uzahlala esitshengisa isihawu futhi asithethelele nxa siphenduka ngenhliziyo yonke ngoba uvele uyakwazi ukuthi singabantu abalesono.—Hubo. 78:​38, 39.

14. (a) UDavida wathi uJehova uthethelela njani? (IHubo 103:12) (b) Indlela uJehova athethelela ngayo uDavida isifundisani? (Khangela ibhokisi elithi “UJehova Angathethelela Uyahle Akhohlwe Ngakho.”)

¹⁴ Kuyini okunye esikwaziyo ngendlela uJehova athethelela ngayo? (Bala iHubo 103:12.) UDavida wathi nxa uJehova ethethelela umuntu kuyabe kungani uthethe isono sakhe wasibeka khatshana le njengokuqhelelana kwempumalanga lentshonalanga. Manje lokho kutshengisani ngendlela uJehova athethelela ngayo? Indlela uJehova athethelela ngayo iyamangalisa kakhulu ngoba impumalanga lentshonalanga akusoze kwafa kwahlangana. Elinye ibhuku elichasisa ivesi le lize lithi nxa uJehova angakhetha ukuthethelela umuntu kuyabe kungani ukhiphe iphunga kanye lomkhondo walesosono okokuthi ngeke aphinde asilonde. Ake ucabange ukuthi iphunga lilamandla angakanani, ungathi ulizwa nje uhle ucabange into eyenzakala kudala. Kodwa nxa uJehova ethethelela uhle esule konke, ngeke aphinde ayivuse indaba yakhona.—Hez. 18:​21, 22 Imiseb. 3:19.

15. Kuyini okungasinceda nxa sizithonisisa ngezono esazenza kudala?

¹⁵ IHubo 103 lingakunceda njani nxa uthandabuza ukuthi uJehova usekuthethelele? Nxa kuyikuthi lokhe uzithonisisa ngezono owazenza kudala nansi imibuzo ongazibuza yona: ‘Ngiyakukholwa yini ukuthi uJehova uyakwazi ukuthi ngilesono lokuthi uyabathethelela abantu abaphenduka ngenhliziyo yonke? Kungani ngizikhathaza ngezono uJehova angasazikhumbuliyo?’ UJehova kahlali ekhumbula izono esazenza kudala, yikho lathi akumelanga sizihluphe ngazo. (Hubo. 130:3) Nxa sikholwa ukuthi uJehova usesithethelele akumelanga sizithonisise kodwa kuyabe kumele siqhubeke simkhonza sithokoza.

16. Kungani kuyingozi ukuqhubeka sicabanga ngezono esazenza kudala? (Khangela lomfanekiso.)

¹⁶ Ukuzithonisisa ngezono esazenza kudala kungaba yingozi kakhulu. Kufanana lokutshayela imota ngapha uthe nhlo esibukweni esitshengisa izinto ezenzakala emuva. Akukubi ukuthi ube usithi jeqe esibukweni lapha lalaphaya kodwa kuyabe kumele ukhumbule ukuthi wena uya phambili. Phela ungaqhubeka ukhangele esibukweni ungacina usenza ingozi. Ukucabanga ngamaphutha esake sawenza kungasinceda sizimisele ukungawaphindi kodwa ukugxila kuwo kungasiqeda amandla sicine singasamkhonzi kuhle uJehova. Ngakho-ke kasiqhubekeni sikhangele phambili emgwaqweni oya emhlabeni omutsha lapho esingasoze siphinde sikhathazwe yizono esazenza kudala.—Isaya. 65:17; Zaga. 4:25.

KHOLWA UKUTHI UJEHOVA UYATHETHELELA

17. Kungani kumele siqhubeke sikholwa ukuthi uJehova uyasithanda lokuthi uyasithethelela?

¹⁷ Akumelanga sithandabuze ukuthi uJehova uyasithanda lokuthi uyasithethelela. (1 Joh. 3:19) Ngenxa yani? Ngenxa yokuthi uSathane ufuna sikholwe ukuthi uJehova kasithandi lokuthi kasoze asithethelele. Usebenza nzima imini lobusuku eletha izilingo ezitshiyeneyo efuna sikhalale ukukhonza uJehova. (Isam. 12:12) Lanxa kunjalo akumelanga sivume ukuthi asidukise kodwa kumele siqhubeke sikhonza uJehova.

18. Isihloko lesi sikuncede njani?

¹⁸ Esihlokweni esidlulileyo sibonile ukuthi kuyini okungakunceda ubone ukuthi uJehova uyakuthanda. Isihloko lesi sisincede sabona indlela uJehova athethelela ngayo. Qhubeka ucabangisisa ngamavesi akhuluma ngendlela uJehova athethelela ngayo. Hlala ukhumbula ukuthi uJehova uyakwazi ukuthi ulesono njalo uhlala ebaphatha ngesihawu abantu bakhe. Nxa uJehova angathethelela umuntu ophendukayo uhle asilahlele khatshana isono sakhe angaphindi asikhumbule. Nxa usuzwisisa indlela uJehova athethelela ngayo lawe uzathokoza futhi umbonge uJehova ngesihawu sakhe esikhulu.—Hubo. 32:5.