Isandla SikaJehova Kasisifitshane

1. UMosi watshengisa njani ukuthi ulokholo ngesikhathi ekhokhela abako-Israyeli bephuma eGibhithe?

IBHUKU lamaHebheru lisitshela ngabantu ababelokholo futhi phakathi kwabo kuqanjwa loMosi indoda eyayilokholo oluqinileyo. (Heb. 3:​2-5; 11:​23-25) Kazange amesabe uFaro lebutho lakhe kodwa watshengisa ukuthi ulokholo ngokukhokhela ama-Israyeli ukuze aphume eGibhithe. Wakhokhela abantu bedabula elwandle olubomvu njalo wabakhokhela lalapho sebesenkangala ngenxa yokuthi wayemthemba uJehova. (Heb. 11:​27-29) UJehova kazange amdanise uMosi. Wanika ama-Israyeli ukudla lamanzi enkangala eyayome qha.a—Eks. 15:​22-25; Hubo. 78:​23-25.

2. Kungani uJehova wabuza uMosi wathi: “Kambe isandla sikaJehova sifitshane yini”? (AmaNani 11:​21-23)

² Lanxa uMosi wayelokholo oluqinileyo, kwathi sekudlule umnyaka owodwa ngemva kokuthi uJehova ekhulule abako-Israyeli eGibhithe, waqalisa ukuthandabuza. Wayesezibuza ukuthi kambe uJehova wayezakwenelisa yini ukunika abantu bakhe inyama. Phela abako-Israyeli babebanengi kakhulu befika kumamiliyoni. Yikho uMosi wayebona angani uJehova ngeke enelise ukunika abantu bonke laba inyama, ikakhulu njengoba babesenkangala. UJehova wabuza uMosi wathi: “Kambe isandla sikaJehova sifitshane yini?” (Bala AmaNani 11:​21-23.) “Isandla sikaJehova” ngumoya ongcwele kaNkulunkulu kumbe amandla akhe awasebenzisayo ukuze enze intando yakhe. Lapha kwakungani uJehova ubuza uMosi ukuthi, ‘Ubona angani angilawo amandla okwenza loba yini engiyifunayo?’

3. Ukucabangisisa ngombuzo uJehova awubuza uMosi oku-AmaNani 11:23 kuzasinceda ngani?

³ Uyake uzibuze ukuthi uJehova uzenelisa yini ukukunakekela wena lemuli yakho? Kungelani lokuthi ucabangani ngendaba le, asixoxeni ngokuthi kuyini okwenza uMosi lama-Israyeli bangathembi ukuthi uJehova uzabanakekela. Sizaxoxa langamanye amavesi azasinceda sikholwe ukuthi isandla sikaJehova kasisifitshane.

SIFUNDANI KUMOSI LAKUMA-ISRAYELI?

4. Kuyini okwenza abantu bathandabuza ukuthi uJehova wayezaqhubeka ebanakekela?

⁴ Kuyini okwenza uMosi lamanye ama-Israyeli bathandabuza ukuthi uJehova wayebanakekela? Ama-Israyeli “lexuku labantu abatshiyeneyo” bahamba enkangala okwesikhathi esithile besuka eGibhithe besiya eLizweni Lesithembiso. (Eks. 12:38; Dute. 8:15) Kukhanya imana yayisiwadakile ama-Israyeli amanengi kanye lexuku labantu abatshiyeneyo ababehamba lalo, okwenza bacina bekhonona kuMosi. (Nani. 11:​4-6) Abantu laba basebezikhumbulela inyama lokunye ukudla ababekudla eGibhithe. UMosi wayesekubona kungumthwalo wakhe ukudingela abantu bonke laba inyama njengoba babekhonona kuye.—Nani. 11:​13, 14.

5-6. Kuyini okungenza singakuqakathekisi lokho uJehova asinika khona?

⁵ Kukhanya angani ixuku labantu abatshiyeneyo elalihamba lama-Israyeli lalingakuqakathekisi elalikwenzelwa nguJehova. Yikho lama-Israyeli athatheka lawo aseqalisa ukukhonona. Into efananayo ingenzakala lakithi. Nxa kungaba labanye abangakuqakathekisiyo lokho abakwenzelwa nguJehova lathi singacina sesibalingisela. Kungabalula ukuthi siqalise ukukhonona nxa singakhumbula izinto esasilazo kudala kumbe nxa singaba lomhawu ngalokho abanye abalakho. Okuzasinceda ukuthi sihlale sithokoza yikusuthiseka kungelani lokuthi silani empilweni.

⁶ Ama-Israyeli kwakumele akhumbule ukuthi uNkulunkulu wayewathembise ukuthi ayezathola izinto ezinhle kakhulu nxa angafika eLizweni Lesithembiso. Lokho ayebathembise khona wayezakwenza sebefike eLizweni Lesithembiso, hatshi besasendleleni enkangala. Esikufundayo lapha yikuthi akumelanga sitshone sizikhathaza ngezinto esingelazo khathesi, kodwa kumele sicabangisise ngalokho uJehova athembisa ukusenzela khona emhlabeni omutsha. Okunye esingakwenza yikucabangisisa ngemibhalo engasinceda ukuthi simthembe kakhulu uJehova.

7. Kuyini okungenza singathandabuzi ukuthi uJehova uyenelisa ukusincedisa?

⁷ Kuyini okunye okungabe kwenza uJehova wabuza uMosi wathi: “Kambe isandla sikaJehova sifitshane yini?” UJehova wayefuna uMosi azwisise izinto ezimbili, (1) wayefuna abone ukuthi amandla akhe makhulu kakhulu, (2) lokuthi uyenelisa ukuncedisa abantu bakhe kungelani lokuthi bangaphi. UJehova wayengenelisa ukunika ama-Israyeli inyama enengi kungelani lokuthi ayesenkangala. UJehova watshengisa ukuthi ‘isandla sakhe silamandla futhi uyenelisa ukwelula ingalo yakhe’ asize abantu bakhe. (Hubo. 136:​11, 12) Ngakho nxa uphakathi kohlupho ungakhohlwa ukuthi isandla sikaJehova siyenelisa ukukuncedisa kungelani lokuthi ungaphi.—Hubo. 138:​6, 7.

8. Kuyini okungasinceda ukuthi singabi ngamagovu njengama-Israyeli ngesikhathi esenkangala? (Khangela lomfanekiso.)

⁸ Lakanye uJehova wabanika abantu bakhe inyama, wabanika izagwaca ezinengi kakhulu. Kodwa bona kabazange bambonge ngalokho ayebenzele khona. Babayizihwaba, babutha inyama enengi kakhulu. Basebesebenza emini lebusuku bebutha izagwaca. UJehova wabazondela labo “ababetshengisa ukuba ngamagovu,” wasebajezisa. (Nani. 11:​31-34) Kuyini esikufundayo? Sifunda ukuthi kuqakathekile ukuthi sinanzelele ukuze singacini sesingamagovu. Kumele siqakathekise kakhulu ukubuthelela “inotho ezulwini,” kungelani lokuthi sinothile kumbe singabayanga. Lokhu sikwenza ngokuqhubeka sisondela kuJehova loJesu, sibe ngabangane babo. (Mat. 6:​19, 20; Luk. 16:9) Nxa singakwenza lokhu kasisoze sithandabuze ukuthi uJehova uzasinakekela.

9. Kuyini uNkulunkulu angasoze ayekele ukukwenza?

⁹ Lalamuhla uJehova uyaselula isandla sakhe ukuze ancede abantu bakhe. Kodwa lokhu akutsho ukuthi asisoze sihlaselwe yindlala kumbe siswele imali.b Kutsho ukuthi uJehova akasoze asilahle, uzaqhubeka esincedisa kuloba yibuphi ubunzima esingaba phakathi kwabo. Singatshengisa njani ukuthi siyamthemba kakhulu uJehova? Asixoxeni ngezinto ezimbili ezingenzakala. Sizaxoxa ngesingakwenza (1) nxa sidinga imali ukuze sinakekele izimuli zethu, (2) lalapho sikhathazeke ngokuthi sizaphila ngani nxa sesigugile.

NXA SIDINGA IMALI UKUZE SONDLE IZIMULI ZETHU

10. Yiziphi inhlupho ezingasivelela?

¹⁰ Sikhangelele ukuthi ezomnotho zizaqhubeka zisiba nzima njengoba umumo lo wezinto ususiya komlindi uyacina. Singavuka siphelelwe ngumsebenzi, sesilahlekelwe yimpahla yethu, kumbe singasela ndawo yokuhlala ngenxa yeziphithiphithi zezombusazwe, izimpi ezingavuka kumbe izingozi zemvelo loba imikhuhlane ememethekayo. Lokhu kungenza sicine sicabanga ukudinga omunye umsebenzi kumbe ukuthi sithuthe lezimuli zethu siye lapho okungathi kungconywana khona. Kuyini okungasinceda ukuthi senze izinqumo ezitshengisa ukuthi siyamthemba uJehova nxa izinto sezimi manzonzo?

11. Kuyini okungasinceda ukuthi singakhathazeki kakhulu ngezomnotho? (ULukha 12:​29-31)

¹¹ Into eqakathekileyo okumele siyenze yikubikela uJehova indubo zethu. (Zaga. 16:3) Mcele akunike ukuhlakanipha ukuze wenze izinqumo eziqondileyo lokuthi akwenze uhlaliseke, ‘ungakhathazeki kakhulu.’ (Bala uLukha 12:​29-31.) Mncenge ukuthi akuncedise usuthiseke ngalokho olakho. (1 Thim. 6:​7, 8) Zinike isikhathi sokuhlolisisa ukuthi amabhuku esiwaphiwa yinhlanganiso yethu athini nxa sikhathazeka ngemali. Amacebo atholakala ku-jw.org asencede abantu abanengi ukuthi bangakhathazeki kakhulu ngezomnotho.

12. Yiphi imibuzo umKhristu ngamunye okumele azibuze yona?

¹² Abanye abafowethu labodadewethu bavuma ukwenza imisebenzi eyayibenza bathuthe bayehlala khatshana lezimuli zabo, kodwa ngokuhamba kwesikhathi bananzelela ukuthi babengakhethanga kuhle. Nxa ungathola umsebenzi onjalo, ungacabangi kuphela ngemali ozabe usuyihola kodwa cabanga langokuthi wena lemuli yakho lizaqhubeka limkhonza kuhle yini uJehova. (Luk. 14:28) Zibuze: ‘Kuzakwenzakalani nxa ngingahlala isikhathi eside ngikhatshana lomkami? Ngizenelisa yini ukuyingena yonke imihlangano yebandla, ngitshumayele njalo ngibe lesikhathi sokuxoxa labafowethu labodadewethu?’ Nxa ulabantwana nanku okuqakathekileyo okumele uzibuze khona: ‘Nxa ngikhatshana ngizabakhulisa njani abantwabami ngokulaya langokuxwayisa okuvela kuJehova?’ (Efe. 6:4) Nxa sekumele ukhethe ukuthi uzakuyasebenzela khatshana yini, dinga ukuthi uJehova uthini ngendaba leyo. Ungalandeli lokho okutshelwa yizihlobo kumbe ngabangane abangalandeli lokho okuseMibhalweni.c UTony ohlala entshonalanga ye-Asia wabizelwa imisebenzi etshiyeneyo elemali kwamanye amazwe. UTony lomkakhe bathandaza ngendaba le, baxoxisana ngayo, babona kungcono ukuthi uTony angahambi emazweni kodwa behlise izindleko zabo. Nxa uTony ecabangisisa ngesinqumo abasenzayo uthi: “Ngenxa yokuthi kangisayanga emazweni ngibe lesibusiso sokuncedisa abantu abanengi ukuthi bafunde ngoJehova, labantwabami bayalithanda kakhulu iqiniso. Mina lemuli yami sesifundile ukuthi nxa singalandela lokho uJesu akutshoyo kuMathewu 6:​33, uJehova uzasinakekela.”

NXA SIKHATHAZEKA NGOKUTHI SIZAPHILA NGANI NXA SESIGUGILE

13. Kuyini esingakwenza khathesi ukuze singathwali nzima nxa sesigugile?

¹³ Uyake ukhathazeke yini ngokuthi uzaphila ngani nxa usugugile? Lokhu ngokunye okungenza kube nzima ngezinye izikhathi ukuthi siqhubeke sithemba ukuthi uJehova uzasinakekela. IBhayibhili lisikhuthaza ukuthi sisebenze nzima ukuze sizinakekele njalo sigcinele lelakusasa. (Zaga. 6:​6-11) Kungaba kuhle ukuthi nxa izimo zivuma sibe lokuyimadlana esikubeka eceleni ukuze kusincede kusasa. Phela iBhayibhili liyatsho ukuthi imali iyavikela. (Umtshu. 7:12) Lanxa kunjalo, lokhu akutsho ukuthi sokumele siphilele ukudinga imali kumbe inotho.

14. Kungani kumele sikhumbule amazwi akuHebheru 13:5 nxa sicabanga ngelakusasa?

¹⁴ UJesu wasebenzisa umzekeliso ukuze asincede sizwisise ukuthi kuyibuthutha ukugijimisa imali lenotho emhlabeni thina singanothanga kuNkulunkulu. (Luk. 12:​16-21) Phela akulamuntu olaziyo elakusasa. (Zaga. 23:​4, 5; Jak. 4:​13-15) UJesu waphinda wathi bonke abafisa ukuba ngabalandeli bakhe kumele bazimisele ‘ukutshiya’ yonke impahla abalayo bamlandele. (Luk. 14:33) Lokhu yikho kanye okwenziwa ngamaKhristu akuqala aseJudiya ngesikhathi sabaphostoli. (Heb. 10:34) Lalamuhla abanye abafowethu balahlekelwa yizinto abalazo ngenxa yokungangeneli kwezombusazwe. (Isaya. 13:​16, 17) Kuyini okubenza bazimisele ukwenza lokhu? Yikuwakholwa ngenhliziyo yonke amazwi akhulunywa nguJehova athi: “Angisoze ngikutshiye loba sekutheni, angisoze ngikulahle loba sekutheni.” (Bala uHebheru 13:5.) Liqiniso ukuthi senza konke esingakwenza ukuze silungiselele elakusasa, kodwa nxa izinto zingaphonguthi phendu, asithandabuzi ukuthi uJehova uzaqhubeka esincedisa.

15. Kuyini okungamelanga abazali abangamaKhristu bakukhangelele ebantwaneni babo? (Khangela lomfanekiso.)

¹⁵ Kwezinye izindawo abanye abantu abatshadileyo bakhetha ukuba labantwana bezitshela ukuthi abantwana labo yibo abazabanakekela nxa sebegugile. Kodwa iBhayibhili lithi abazali yibo okumele banakekele abantwababo. (2 Khor. 12:14) Liqiniso sibili ukuthi abanye abazali bangadinga ukuncediswa ngabantwababo nxa sebegugile futhi abantwana abanengi bayakwenza lokhu. (1 Thim. 5:4) Okumele kuthokozise abazali abangamaKhristu yikuncedisa abantwababo ukuthi bakhule bethanda uJehova hatshi ukubakhulisa belenhloso yokuthi babe lemali enengi ukuze babanakekele kusasa.—3 Joh. 4.

16. Abazali bangabancedisa njani abantwababo ukuthi benelise ukuzimela kusasa? (u-Efesu 4:28)

¹⁶ Okwenzayo njengomzali kunganceda abantwabakho ukuthi bamthembe uJehova ukuthi uzabanakekela. Phela sigoqwa sisesemanzi, yikho bafundise ukusebenza nzima besesebancane. (Zaga. 29:21; bala u-Efesu 4:28.) Kumele ubafundise lokuthi babophe ziqine, bangadlali esikolo. Abazali abangamaKhristu kumele bachwayisise, badinge okukhulunywa yinhlanganiso yethu lezimiso eziseBhayibhilini ukuze bancede abantwababo babone ukuthi imfundo yabo bangayisebenzisa njani ukuze bazinakekele njalo benze okunengi emsebenzini kaJehova.

17. Kuyini okungamelanga sikuthandabuze?

¹⁷ Izinceku zikaJehova akumelanga zithandabuze ngitsho lakancane ukuthi uzahlala ezinakekela. Sokuseduze ukuthi umumo lo wezinto uphele, yikho lezinto ziqhubeka zisiba nzima kakhulu. Lanxa kunjalo sizimisele ukuqhubeka simthemba uJehova. Asithandabuzi ngitsho lakancane ukuthi uzasebenzisa ingalo yakhe elamandla njalo elule isandla sakhe ukuze asisize kungelani lokuthi singaphi.