Asisodwa

1-2. (a) Kuyini okwenza singathandabuzi ukuthi uJehova uzahlala esincedisa? (b) Sizaxoxa ngani esihlokweni lesi?

NXA inhlupho zibuya zibelethene singabona angathi sekumnyama emuva laphambili siswele lokuthi siqonde ngaphi. Nxa kuyikuthi uyake uzwe njalo ungaboni angathi usulahlelwe iganga, uBaba wethu osezulwini uyabubona bonke ubunzima ophakathi kwabo futhi uzimisele ukukuncedisa. Nanku uJehova akuthembisa khona, uthi: ‘Ngizakuncedisa.’—Isaya. 41:10.

² Esihlokweni lesi sizaxoxa ngendlela ezine uJehova asincedisa ngazo. Sizaxoxa ngokuthi: (1) usikhokhela njani, (2) usinakekela njani, (3) usivikela njani lokuthi (4) usiduduza njani. UJehova usithembisa ukuthi kuloba yibuphi ubunzima esizahlangana labo yena kasoze asilahle. Yikho akumelanga sithandabuze ukuthi uzahlala esincedisa.

UJEHOVA UYASIKHOKHELA

3-4. UJehova usikhokhela njani? (Hubo 48:14)

³ Bala iHubo 48:14. UJehova uyakwazi ukuthi abantu kabenelisi ukuzikhokhela. Nguye kuphela okumele abakhokhele. Pho-ke ubakhokhela njani abantu abamkhonzayo? Usebenzisa iLizwi lakhe iBhayibhili. (Hubo. 119:105) Yikho kuqakathekile ukuthi sisebenzise lokhu asitshela khona eBhayibhilini nxa sisenza izinqumo. Lokhu kuzakwenza ukuthi sithokoze khathesi futhi sibe lethemba lokuthola ukuphila okungapheliyo.a UJehova usifundisa ukuthi singabambi izikhwili, sithembeke kukho konke esikwenzayo futhi sithande abanye ngenhliziyo yonke. (Hubo. 37:8; Heb. 13:18; 1 Phet. 1:22) Nxa singazama ukukwenza lokhu sizakuba ngabazali abathanda abantwababo, sibaphathe kuhle omkethu futhi sibe ngabangane abaqotho.

⁴ IBhayibhili liphinda lisitshele ngabantu abahlangana lenhlupho ezitshiyeneyo lokuthi inhlupho lezo zazibenza bazizwe njani. (1 Khor. 10:13; Jak. 5:17) Ukucabangisisa ngezinto ezenzakala empilweni zabantu laba kuzasinceda njani? Okokuqala, kuzasinceda sibone ukuthi inhlupho lezo aziqalisi ngathi, kulabanye abadlula kuzo ngoba uJehova wayebancedisa. (1 Phet. 5:9) Okwesibili, sifunda lalokho esingakwenza ukuze siqhubeke sithokoza lanxa sisebunzimeni.—Rom. 15:4.

5. Ngobani abasetshenziswa nguJehova ukuze basikhokhele?

⁵ UJehova uphinde wasinika abafowethu labodadewethu ukuze basincedise.b Usebenzisa ababonisi beziqinti abasivakatshelayo emabandleni ukuze basikhuthaze. Intshumayelo zabo ziyasinceda ukuthi sibe lokholo oluqinileyo futhi sihlale simanyene. (Imiseb. 15:40–16:5) Abadala abasemabandleni basebenza nzima ukuze bancedise ummemezeli ngamunye ukuthi ahlale elokholo oluqinileyo. (1 Phet. 5:​2, 3) Abazali bafundisa abantwababo ukuthi bathande uJehova, benze izinqumo ezinhle futhi babe lobuntu. (Zaga. 22:6) Odadewethu abaqinileyo ekukhonzeni bancedisa odadewethu abasesebatsha. Bayabakhuthaza njalo babacebise.—Tit. 2:​3-5.

6. Kumele senzeni ukuze sitshengise ukuthi siyayiqakathekisa indlela uJehova asikhokhela ngayo?

⁶ UJehova usinike konke okusinceda ukuthi senze izinqumo ezinhle futhi sithokoze. Manje singatshengisa njani ukuthi siyakuqakathekisa lokhu asinike khona? IZaga 3:​5, 6 zithi: “Themba uJehova ngenhliziyo yakho yonke, ungathembi okwakho ukuzwisisa.” Nxa singamthemba ‘uzaqondisa izindlela zethu’ okutsho ukuthi uzasincedisa sibone okumele sikwenze ukuze sibalekele inhlupho ezinengi njalo sithokoze. Simbonga singaqedi uJehova ngamacebo asinika wona atshengisa ukuthi uyasithanda.—Hubo. 32:8.

UJEHOVA UYASINAKEKELA

7. UJehova usinakekela njani? (Filiphi 4:19)

⁷ Bala uFiliphi 4:19. UJehova kapheleli ekusincediseni ukuthi sibe lokholo oluqinileyo kodwa uphinda asinakekele ngezinto esizidingayo njengokudla, izigqoko lendawo yokuhlala. (Mat. 6:33; 2 Thes. 3:12) Siyake sikhathazeke sibili ngokuthi sizazithola ngaphi izinto zokuziphilisa kodwa uJehova usikhuthaza ukuthi singakhathazeki kakhulu ngezinto lezi. (Mat. 6:25.) Kungani kungamelanga sikhathazeke ngezinto lezi? Ngoba uBaba wethu uthembisa ukuthi kasoze asilahle loba sekutheni. (Mat. 6:8; Heb. 13:5) Yikho kumele sikukholwe lokho asitshela khona

8. UJehova wamnakekela njani uDavida?

⁸ Asixoxeni ngendlela uJehova ancedisa ngayo uDavida. Ngesikhathi uDavida ebalekela izitha zakhe uJehova wamnakekela, yena lamadoda ayehamba lawo. Ngemva kweminyaka eminengi uDavida wayelokhu eyikhumbula indlela uJehova ayemnakekele ngayo. Wabhala wathi: “Ngangimncane, khathesi sengimdala, kodwa angikaze ngibone olungileyo elahliwe loba abantwabakhe beswele ukudla.” (Hubo. 37:25) Engxenye lawe usuke wabona indlela uJehova anakekela ngayo abantu bakhe ngezikhathi ezinzima.

9. UJehova ubancedisa njani abantu bakhe nxa behlelwe ngumonakalo? (Khangela lemifanekiso.)

⁹ UJehova uphinda anakekele abantu bakhe nxa behlelwe ngumonakalo. Ngokwesibonelo, kwaba lendlala eJerusalema ngesikhathi samaKhristu okuqala. Amanye amaKhristu athi ekuzwa lokhu ahle aqoqa ukudla akuthumela amanye amaKhristu ayelapho indlala eyayibhahe khona. (Imiseb. 11:​27-30; Rom. 15:​25, 26) Lokhu yikho kanye okwenziwa ngabantu bakaJehova lamuhla. Nxa kungavele kube lomonakalo basukumela phezulu bancedise abanye babo ngokudla, amanzi, izigqoko kanye lemithi. Abanye bahle baqalise ukulungisa izindlu zabafowethu labodadewethu kanye lamaWolu oMbuso ayabe edilikile. Abantu bakaJehova baphinda bancedise labo abehlelwe ngumonakalo ukuthi bahlale belokholo oluqinileyo futhi bahlaliseke.c

10-11. Ufundani endabeni kaBorys?

¹⁰ UJehova unakekela bonke abantu okugoqela lalabo abangamkhonziyo. Lathi siyazama ukuba lomusa ebantwini abangamkhonziyo. (Gal. 6:10) Nxa singenza njalo singabanceda ukuthi bafunde ngoJehova. Asixoxeni ngokunye okwake kwenzakala komunye umphathisikolo ohlala e-Ukraine okuthiwa nguBorys. UBorys wayebaphatha kuhle abantwana abangoFakazi bakaJehova futhi ebahlonipha. Kwathi sokulempi e-Ukraine uBorys wabalekela lapho okwakungathi kungcono khona futhi abafowethu bamncedisa. Ngelanga leSikhumbuzo wahamba wayangena iSikhumbuzo. Nanku okwakhulunywa nguBorys ngemva kokungena iSikhumbuzo sokufa kukaJesu. Wathi: “Ngiyababonga kakhulu oFakazi bakaJehova ngendlela abangamukela ngayo futhi batshengisa ukuthi balendaba lami.”

¹¹ Kumele silingisele uBaba wethu osezulwini olesihawu ngokutshengisa abanye ukuthi siyabathanda kungelani lokuthi bangoFakazi bakaJehova loba hatshi. (Luk. 6:​31, 36) Nxa singabatshengisa ukuthi siyabathanda bangacina besiba ngabalandeli bakaKhristu. (1 Pet. 2:12) Kungelani lokuthi bona bakhethani thina kumele sithokoziswe yikuthi senze lokhu uJehova afuna sikwenze.—Imiseb. 20:35.

UJEHOVA UYASIVIKELA

12. UJehova ubathembisani abantu bakhe? (Hubo 91:​1, 2, 14)

¹² Bala iHubo 91:​1, 2, 14. UJehova uthembisa ukusivikela ukuze kungabi lolutho olusiphambanisayo ekukhonzeni. Kasoze avume ukuthi uSathane aphambanise ukukhonza kweqiniso. (Joh. 17:15) Asithandabuzi ngitsho lakancane ukuthi langesikhathi sokuhlupheka okukhulu uJehova uzasivikela futhi asincedise ukuthi sihlale silokholo oluqinileyo.—Isam. 7:​9, 14.

13. UJehova ukuvikela njani?

¹³ UJehova umvikela njani umuntu ngamunye? Usebenzisa iLizwi lakhe iBhayibhili ukuze asincedise sibone okulungileyo lokungalunganga. (Heb. 5:14) Nxa singasebenzisa lokho esikufunda eLizwini likaNkulunkulu sizahlala singabangane bakhe futhi asisoze senze izinqumo ezizasithela emanyaleni. (Hubo. 91:4) UJehova uphinda asivikele esebenzisa ibandla. (Isaya. 32:​1, 2) Kumele sizinike isikhathi sokuba labafowethu labodadewethu ngoba bayamthanda uJehova futhi bazasikhuthaza. Nxa singenza njalo asisoze siphanjaniswe ngabangane ababi.—Zaga. 13:20.

14. (a) Kungani uJehova evumela ezinye izinto ezimbi zisenzakala kithi? (b) IHubo 9:10 lisinceda njani? (Khangela lamabala angaphansi.)

¹⁴ Ngezinye izikhathi uJehova wayevikela izinceku zakhe ukuthi zingalinyazwa kumbe zingabulawa. Kodwa wayengahlali esenza njalo. IBhayibhili lifundisa ukuthi loba ngubani angehlelwa yingozi elibele. (Umtshu. 9:11) UJehova wayevumela ukuthi ezinye izinceku zakhe zihlukuluzwe. Ezinye zaze zabulawa futhi kwavela egcekeni ukuthi uSathane ungumqambimanga. (Jobe. 2:​4-6; Mat. 23:34) Lanxa uJehova engasoze ahle aziqede khathesi zonke inhlupho zethu, esikwaziyo yikuthi kasoze abatshiye labo abamthandayo.d—Hubo. 9:10.

UJEHOVA UYASIDUDUZA

15. Kusikhuthaza njani ukuthandaza, ukubala iLizwi likaNkulunkulu lokuba labafowethu labodadewethu? (2 Khorinte 1:​3, 4)

¹⁵ Bala u-2 Khorinte 1:​3, 4. Kwezinye izikhathi singahlulukelwa, sikhathazeke kumbe sidane. Mhlawumbe sikhuluma nje uphakathi kobunzima obukuqeda amandla okokuthi usuze ubona angathi akulamuntu ongakuncedisa. Kambe ukuthi kulomuntu oyizwisisayo yini indlela ozizwa ngayo? Ye ukhona. NguJehova. UJehova uyabuzwa ubuhlungu esibuzwayo futhi ‘uyasiduduza kuzo zonke inhlupho zethu.’ Ukwenza njani lokhu? Usithembisa ukuthi nxa singathandaza kuye simcele ukuthi asincedise uzasinika ‘ukuthula kwakhe okwedlula konke ukuzwisisa.’ (Flp. 4: 6, 7) Okunye okungasiduduza yikubala iLizwi likaNkulunkulu iBhayibhili. ELizwini lakhe usitshela ukuthi uyasithanda kakhulu futhi okukulo kusenza sihlakaniphe njalo sibe lethemba. Okunye okusincedayo yikuba semihlanganweni yebandla ngoba kulapho esiduduzwa khona ngabafowethu labodadewethu langeLizwi likaNkulunkulu.

16. Okwenzakala kuNathan loPriscilla kukufundisani?

¹⁶ Asixoxeni ngalokhu okwenzakala kuNathan loPriscilla abahlala e-United States ukuze sibone ukuthi uJehova usiduduza njani esebenzisa iLizwi lakhe. Eminyakeni eyadlulayo bathuthela lapho okulabamemezeli abalutshwana khona. UNathan uthi: “Sasimthemba uJehova ukuthi uzasibusisa ngenxa yalokhu esasifuna ukumenzela khona.” Bathi sebefike khonale kwabanzima ukuthi bathole umsebenzi kanti lokugula kwaqala ukubahlasela. Babona kungcono ukuthi baphindele emuva kodwa lakhonale abazange bawuthole umsebenzi. UNathan uqhubeka esithi: “Ngangizibuza ukuthi kungani uNkulunkulu engasibusisanga ngendlela ebesiyikhangelele. Ngacabanga ukuthi kulento engiyenzileyo engamthokozisanga uNkulunkulu.” Kodwa ngokuhamba kwesikhathi uNathan loPriscilla bananzelela ukuthi uNkulunkulu wayengazange abalahle. UNathan uthi: “Ngalesosikhathi salibala okuzwayo iBhayibhili sathola lamacebo asincedayo. Ukucabanga ngendlela uJehova asincedisa ngayo kulokukhathazeka ngenhlupho esasiphakathi kwazo kwasinceda ukuthi sibe lokholo oluqinileyo.”

17. UJehova umduduze njani udadewethu okuthiwa nguHelga? (Khangela lomfanekiso.)

¹⁷ Abafowethu labodadewethu labo bangasiduduza. Bangakwenza njani lokhu? Ake sixoxe ngoHelga ohlala eHungary. Okweminyaka eminengi wayephakathi kwenhlupho ezazimenza akhathazeke futhi azibone engasimuntu walutho. Kodwa nxa ebisela ingqondo emuva uyabona ukuthi uJehova wayemduduza esebenzisa abafowethu labodadewethu. Udadewethu uthi: “Kulalapho engangizizwa sengiphela khona amandla ngenxa yokuthi ngangisebenza nzima, nginakekela lomntanami ogulayo futhi ngihlangana lobunye ubunzima kodwa uJehova wayehlala engincedisa. Kuyo yonke iminyaka engu-30 edlulileyo akula ngitsho lelilodwa ilanga lapho engingathi uJehova kazange angiduduze khona. Ujayele ukusebenzisa abafowethu labodadewethu abangitshela amazwi akhuthazayo. Izikhathi ezinengi nxa ngidanile ngibona sengibhalelwe imeseji kumbe sengithunyelwe ikhadi.”

18. Singabaduduza njani abanye?

¹⁸ Silesibusiso sokulingisela uNkulunkulu wethu ngokududuza abanye. Sikwenza njani lokhu? Kumele sibalalele nxa besitshela okubakhathazayo, sibatshele amazwi azabaduduza futhi sibancede ngalokho esenelisa ukukwenza. (Zaga. 3:27) Sihlala sizimisele ukududuza bonke abasebunzimeni okugoqela lalabo abangamkhonziyo uNkulunkulu. Nxa abanye befelwe, begula kumbe bekhathazekile siyabavakatshela, sibalalele futhi sibabalele amavesi azabaduduza. Nxa singalingisela uJehova “uNkulunkulu wenduduzo yonke” sizanceda abafowethu labodadewethu ukuthi baqinisele ebunzimeni. Besesinceda lalabo abangamkhonziyo ukuthi bamukele iqiniso.—Mat. 5:16.

UJEHOVA UZAHLALA ESINCEDISA

19. UJehova usincedisa njani futhi singamlingisela njani?

¹⁹ UJehova uyabathanda kakhulu labo abamkhonzayo. Kasilahli nxa sesiphakathi kobunzima. Umzali omthandayo umntanakhe uyamnakekela, amvikele futhi amduduze. Lokhu yikho okwenziwa nguJehova ezincekwini zakhe ezithembekileyo. Siyabe silingisela uBaba wethu osezulwini nxa sincedisa futhi sikhuthaza abanye abayabe besebunzimeni. Lanxa singehlelwa zinhlupho ezitshiyeneyo asithandabuzi ukuthi uJehova uzahlala elathi. Ungathandabuzi ngitsho lakancane ukuthi uJehova uzahlala ekuncedisa. Khumbula ukuthi ukuthembiseni. Uthi: “Ungesabi ngoba ngilawe.” (Isaya. 41:10)