Lingisela Izingilosi

1-2. (a) Sitshiyene njani lezingilosi? (b) Sihambelana njani lezingilosi?

UJEHOVA wathi ekudonsela eqinisweni wakungenisa emulini enkulu elabafowenu labodadewenu abalothando kanye lamamiliyoni ezingilosi ezithembekileyo. (Dan. 7:​9, 10) Izingilosi zitshiyene kakhulu lathi. Ngokwesibonelo, zona sekulesikhathi eside kakhulu zikhona. (Jobe. 38:​4, 7) Zilamandla kakhulu ukwedlula thina, zingcwele futhi zilunge kakhulu ukwedlula thina abantu abalesono.—Luk. 9:26.

² Lanxa sitshiyene lezingilosi kulalapho esihambelana khona. Siyenelisa ukuba lobuntu obunjengobukaJehova njengezingilosi. Silenkululeko yokuzikhethela njengazo. Lathi silamabizo, lobuntu obutshiyeneyo kanye lemisebenzi yenkonzo etshiyeneyo njengezingilosi. Kanti njalo silesifiso sokukhonza uMdali wethu njengazo.—1 Phet. 1:12.

3. Okwenziwa zingilosi kungasifundisani?

³ Okwenziwa zingilosi kungasikhuthaza kuphinde kusifundise okunengi njengoba kulalapho esihambelana khona lazo. Izingilosi zithobekile, ziyabathanda abantu, ziyabekezela futhi zenza konke okusemandleni azo ukuthi zigcine ibandla limsulwa. Yikho esihlokweni lesi sizabona ukuthi singazilingisela njani.

IZINGILOSI ZITHOBEKILE

4. (a) Izingilosi zitshengisa njani ukuthi zithobekile? (b) Kungani izingilosi zithobekile? (IHubo 89:7)

⁴ Izingilosi zithobekile. Zazi izinto ezinengi, zilamandla futhi zihlakaniphile. Lanxa kunjalo ziyamlalela uJehova. (Hubo. 103:20) Nxa zisenza imisebenzi yazo kazizikhukhumezi njalo kazisebenzisi amandla azo ukuthi zibukwe ngabantu. Zenza intando kaNkulunkulu zithokoza lanxa amabizo azo engasoze aziwe.a (Gen. 32:​24, 29; 2 Amakho. 19:35) Kazivumi ukudunyiswa ngoba ziyakwazi ukuthi udumo kumele luye kuJehova. Kungani izingilosi zithobeke kangaka? Yikuthi ziyamthanda uJehova futhi ziyamhlonipha kakhulu.—Bala iHubo 89:7.

5. Ingilosi yatshengisa njani ukuthi ithobekile ngesikhathi ikhuza uJohane? (Khangela lomfanekiso.)

⁵ Ake sixoxe ngokunye okwake kwenzakala okutshengisa ukuthi izingilosi zithobekile. Kwakungaba ngumnyaka ka-96 C.E., eyinye ingilosi engaqanjwanga ngebizo yanika umphostoli uJohane umbono omangalisayo. (Isam. 1:1) UJohane wenzani esetshengiswe umbono lo? Wayikhothamela efuna ukuyikhonza kodwa ingilosi le eyayithembekile yahle yamkhuza yathi: ‘Nanzelela! Ungakwenzi lokho! Mina ngiyinceku nje esebenza lawe labafowenu. Khonza uNkulunkulu!’ (Isam. 19:10) Ingilosi le yayithobeke okwamagama. Yayingafuni ukuphiwa udumo, yikho yahle yatshela uJohane ukuthi akhonze uJehova uNkulunkulu. Lanxa kunjalo kayizange imeyise uJohane. Ingilosi le yayisilesikhathi eside ikhonza uJehova futhi ilamandla amakhulu kodwa yazithoba yamtshela ukuthi iyinceku nje esebenza laye. Lanxa yamkhuza uJohane kayizange imtshingele, yakhuluma laye kuhle. Kumele ukuthi yananzelela ukuthi uJohane wayeyethukile.

6. Singenzani ukuze sithobeke njengezingilosi?

⁶ Singenzani ukuze sithobeke njengezingilosi? Nxa sisenza imisebenzi yenkonzo akumelanga sizikhukhumeze njalo sizifunele udumo. (1 Khor. 4:7) Nxa sesilesikhathi eside sikhonza uJehova kumbe siphiwe imisebenzi yenkonzo abanye abangelayo, akumelanga sizibone singcono kulabo. Nxa singaphiwa imisebenzi eminengi yikho lapho okumele sithobeke kakhulu khona. (Luk. 9:48) Kumele sizimisele ukuncedisa abanye njengezingilosi. Asifuni ukwenza abanye bacabange ukuthi siqakathekile ukwedlula bona.

7. Singatshengisa njani ukuthi sithobekile nxa kumele sikhuze umuntu kumbe simeluleke?

⁷ Lathi singatshengisa ukuthi sithobekile nxa kumele sikhuze umuntu kumbe simeluleke kungelani lokuthi ngesikhonza laye kumbe ngumntanethu. Nxa sikhuza umuntu akumelanga sitshaye inja sifihla umphini. Lathi singalingisela okwenziwa yingilosi ngesikhathi ikhuza uJohane, sikhuze umuntu singambhodi kodwa singamenzi azizwe angathi kasenguye muntu walutho. Nxa singaziboni angathi singcono kulabanye sizasebenzisa iBhayibhili nxa sibakhuza futhi sibahloniphe njalo sibe lozwelo.—Kol. 4:6.

IZINGILOSI ZIYABATHANDA ABANTU

8. (a) ULukha 15:10 utshengisa njani ukuthi izingilosi ziyabathanda abantu? (b) Kuyini okwenziwa zingilosi emsebenzini wokutshumayela? (Khangela lomfanekiso .)

⁸ Izingilosi ziyabathanda abantu futhi aziziboni ziqakathekile kulabo. Ziyathokoza nxa izoni ziphenduka, okutsho ukuthi nxa imvu elahlekileyo ibuyela kuJehova, kumbe nxa umuntu etshintsha indlela abephila ngayo abeseqalisa ukumkhonza. (Bala uLukha 15:10.) Okunye okwenziwa zingilosi yikusincedisa emsebenzini wokutshumayela ngoMbuso. (Isam. 14:6) Lanxa kungayisizo ezitshumayeza abantu ziyasiqondisa ebantwini abafuna ukwazi iqiniso. Okunye uJehova akusebenzisayo ukuze ancede abantu lokuthi aqondise izinceku zakhe ngumoya wakhe ongcwele. (Imiseb. 16:​6, 7) Yikho singeke sitsho zikhathi zonke ukuthi nxa sithole umuntu wokufunda laye siqondiswe zingilosi. Lanxa kunjalo uyazisebenzisa kakhulu izingilosi ukuthi zisincedise emsebenzini wokutshumayela. Ngakho nxa sitshumayela izindaba ezinhle asithandabuzi ukuthi izingilosi ziyasisekela.—Khangela ibhokisi elithi “Imithandazo Yabo Yaphendulwa.”b

9. Singatshengisa njani ukuthi siyabathanda abantu njengezingilosi?

⁹ Singatshengisa njani ukuthi siyabathanda abantu njengezingilosi? Nxa singezwa ukuthi omunye umuntu usebuyiselwe ebandleni kumele sithokoze njengezingilosi. Kumele simamukele njalo simqinisekise ukuthi siyamthanda. (Luk. 15:​4-7; 2 Khor. 2:​6-8) Eyinye indlela esingalingisela ngayo izingilosi yikukhuthala emsebenzini wokutshumayela. (Umtshu. 11:6) Singadinga izindlela zokuthi singabancedisa njani abafowethu labodadewethu emsebenzini wokutshumayela izindaba ezinhle njengoba lezingilosi zisincedisa ukwenza umsebenzi lo. Ngokwesibonelo, singahlela ukutshumayela lomuntu osanda kuba ngummemezeli. Okunye esingakwenza yikuncedisa asebekhulile kumbe abangezwa kuhle ukuthi labo benelise ukutshumayela.

10. Sifundani kulokho okwenziwa nguSara?

¹⁰ Singenzani nxa singenelisi ukwenza okunengi emsebenzini wokutshumayela? Singadinga ezinye izindlela zokusebenza lezingilosi. Cabanga ngalokho okwenziwa ngomunye udadewethu okuthiwa nguSarac ohlala e-India. Wathi esephayone okweminyaka engaba ngu-20 wagula okokuthi wayengasenelisi lokuhamba, esetshona elele. Lokhu kwakumkhathaza kakhulu kodwa kancane kancane uSara wacina esethokoza ngenxa yokuncediswa ngabafowethu labodadewethu kanye lokubala iBhayibhili nsuku zonke. Kodwa kwasekumele enze okusemandleni akhe emsebenzini wokutshumayela. Wayesetshumayela ngokufonela abantu kuphela njengoba wayengenelisi ukuvuka abhale izincwadi ayezisebenzisa ekutshumayeleni. Wafonela impindela zakhe zasezimlayela lakwabanye ababefuna ukufunda. Lokhu kwaphetha ngani? Kungakayi ngaphi wayesefunda labantu abangu-70 iBhayibhili. Kwasekunzima ukuthi aqhubeke efunda labo bonke, yikho wabona kungcono ukuthi abanye abanike abanye abamemezeli ebandleni. Khathesi abanengi babo bayangena imihlangano yebandla. Kumele ukuthi izingilosi ziyathokoza nxa zisebenza labafowethu labodadewethu abanjengoSara abenza konke okusemandleni abo emsebenzini wokutshumayela.

IZINGILOSI ZIYABEKEZELA

11. Izingilosi ezithembekileyo zitshengise njani ukuthi ziyabekezela?

¹¹ Izingilosi ziyabekezela sibili. Sekuleminyaka eminengi zibona abantu bephathwa kubi futhi besenza okubi. Izingilosi ezithembekileyo zabona uSathane lezinye izingilosi ezinengi zihlamukela uJehova. (Gen. 3:1; 6:​1, 2; Jud. 6) IBhayibhili lisitshela ngeyinye ingilosi ethembekileyo eyalwisana lelinye idimoni elilamandla okwensuku ezinengi. (Dan. 10:13) Kusukela u-Adamu lo-Eva behlamuka, izingilosi sezibone abantu abanengi bengafuni ukukhonza uJehova. Lanxa kunjalo izingilosi lezi ezithembekileyo ziqhubeka zithokoza futhi zikukhuthalele ukukhonza uJehova. Ziyakwazi ukuthi ngesikhathi esifaneleyo uNkulunkulu uzabasusa bonke abaphatha abanye kubi.

12. Kuyini okuzasinceda ukuthi siqinisele?

¹² Singatshengisa njani ukuthi siyabekezela njengezingilosi? Lathi singahlukuluzwa kumbe siphathwe kubi. Kodwa njengezingilosi siyaqiniseka ukuthi uNkulunkulu uzakuqeda konke okubi. Ngakho ‘kasiyekeli ukwenza okuhle.’ (Gal. 6:9) Kanti njalo uNkulunkulu uzasincedisa ukuthi siqinisele. (1 Khor. 10:13) Singathandaza kuJehova sicela ukuthi asinike umoya ongcwele ozasinceda ukuthi sibekezele njalo sithokoze. (Gal. 5:22; Kol. 1:11) Kodwa ungenzani nxa abanye bekuthwalise nzima ngenxa yokukhonza uJehova? Ungesabi, themba uJehova ngenhliziyo yakho yonke yena uzahlala ekusekela futhi ekuqinisa.—Heb. 13:6.

IZINGILOSI ZISEBENZA NZIMA UKUZE IBANDLA LIHLALE LIMSULWA

13. Yiwuphi umsebenzi oqakathekileyo ophiwe izingilosi ensukwini lezi zokucina? (UMathewu 13:​47-49)

¹³ UJehova unike izingilosi umsebenzi oqakathekileyo ezinsukwini lezi zokucina. (Bala uMathewu 13:​47-49.) Abantu abanengi futhi abemihlobo etshiyeneyo bayasilalela nxa sitshumayela indaba ezinhle. Abanye babo bayatshintsha babe ngamaKhristu eqiniso kodwa abanye kabatshintshi. Yikho izingilosi ziphiwe umsebenzi ‘wokwehlukanisa ababi kwabalungileyo.’ Lokhu kutsho ukuthi zilomsebenzi wokuvikela ibandla ukuthi lihlale limsulwa. Kodwa akutsho ukuthi wonke umuntu otshiya ibandla ngenxa yezizatho ezithile kasoze wafa waphenduka njalo akutsho ukuthi akusoze kube lenhlupho ebandleni. Esikwaziyo yikuthi izingilosi zisebenza nzima ukuze amabandla ahlale emsulwa.

14-15. Singazilingisela njani izingilosi ukuze ibandla lihlale limsulwa? (Khangela lemifanekiso.)

¹⁴ Singazilingisela njani izingilosi ukuze ibandla lihlale limsulwa? Kumele senze konke okusemandleni ethu ukuze kungabi lento ephambanisa indlela esikhonza ngayo lokuthi sihlale siziphethe kuhle. Lokho singakwenza ngokukhetha abangane abathanda uJehova langokubalekela loba yini engaphambanisa ubungane bethu laye. Singenza njalo ibandla lizahlala limsulwa. (Hubo. 101:3) Okunye esingakwenza yikuncedisa esikhonza labo ukuthi baqhubeke bethembekile kuJehova. Singenzani nxa omunye esikhonza laye angenza isono esikhulu? Singatshengisa ukuthi siyamthanda ngokumkhuthaza ukuyabikela abadala ngakwenzileyo. Nxa angayekela ukwenza njalo kuyabe kumele sihambe thina siyetshela abadala indaba yakhe. Sifuna loba ngubani osephambuka ancediswe masinyane.—Jak. 5:​14, 15.

¹⁵ Kuyadanisa ukuthi abanye abenza izono ezinkulu bacina besusiwe. Nxa bangasuswa kuyabe kumele ‘siyekele ukuba lobudlelwano’ labo.d (1 Khor. 5:​9-13) Lokhu kuyalinceda kakhulu ibandla ukuthi lihlale limsulwa. Nxa singakhetha ukungabi lobudlelwano labantu abasusiweyo siyabe sitshengisa ukuthi siyabathanda. Lokhu kungabanceda bananzelele ukuthi kumele babuyele kuJehova. Nxa bangaphenduka siyathokoza njalo uJehova lezingilosi labo bayathokoza.—Luk. 15:7.

16. Uzazilingisela njani izingilosi?

¹⁶ Kuyisibusiso esikhulu ukuthi uJehova uyasivumela ukuthi sifunde ngezinto ezisezulwini ezigoqela lezingilosi lokuthi sisebenze lazo. Kwangathi singazimisela ukulingisela izingilosi, sithobeke, sithande abantu, sibekezele, siziphathe kuhle njalo sibe leqiniso lokuthi asenzi izinto eziphambanisa ubungane bethu loJehova ukuze ibandla lihlale limsulwa. Nxa singalingisela izingilosi ezithembekileyo lathi sizaba ngamalunga emuli kaJehova kuze kube nini lanini.