ISIFUNDO 19
INGOMA 22 UMbuso Usubusa—Kawuze!
Kuyini Esikwaziyo Ngendlela UJehova Azakwahlulela Ngayo Abantu?
‘UJehova kafisi ukuthi loba ngubani abhujiswe.’—2 PHET. 3:9.
ESIZAKUFUNDA
Asithandabuzi ukuthi nxa uJehova esesahlulela abantu esikhathini esizayo uzabahlulela kuhle.
1. Yiziphi izinto ezenzakala esikhathini esiphila kuso?
ESIKHATHINI lesi esiphila kuso kuleziphrofetho ezinengi eziseBhayibhilini esizibona zigcwaliseka. Ngokwesibonelo, sibona “inkosi yaseningizimu” ‘lenkosi yasenyakatho’ zilwisana zifuna ukubusa umhlaba wonke. (Dan. 11:40) Sibona lezindaba ezinhle zoMbuso kaNkulunkulu zitshunyayelwa ezindaweni ezinengi kakhulu emhlabeni njalo kulamamiliyoni abantu akhetha ukukhonza uJehova. (Isaya. 60:22; Mat. 24:14) Kanti njalo sithola lolwazi olunengi oluvela eBhayibhilini olufaniswa lokudla futhi siluthola “ngesikhathi esifaneleyo.”—Mat. 24:45-47.
2. Kuyini esingakuthandabuziyo njalo kuyini okumele sikunanzelele?
2 UJehova uqhubeka esincedisa ukuthi sizwisise ngcono izenzakalo eziqakathekileyo esezizakwenzakala. (Zaga. 4:18; Dan. 2:28) Ukuhlupheka okukhulu kuzabe kuyisikhathi esinzima, kodwa asithandabuzi ukuthi ngesikhathi kuqalisa sizabe sesikwazi konke okuzasinceda ukuthi siqinisele futhi sihlale sithembekile. Lanxa kunjalo kumele sinanzelele ukuthi kulezinye izinto esingazaziyo mayelana lalokho okuzakwenzakala esikhathini esizayo. Esihlokweni lesi sizaqalisa sixoxe ngokuthi kungani sesitshintshe indlela esizwisisa ngayo ezinye izinto ezizakwenzakala. Ngemva kwalokho sizaxoxa ngezinye izinto esizaziyo ezizakwenzakala esikhathini esizayo siphinde sibone lokuthi uBaba wethu osezulwini uzakwenzani.
ESINGAKWAZIYO
3. Kuyini esasisithi kuzakwenzakala ekuqaliseni kokuhlupheka okukhulu njalo kungani sasisitsho njalo?
3 Kuqala sasisithi nxa ukuhlupheka okukhulu kungaqalisa, abantu abangakholwayo bayabe bengaselalo ithuba lokufunda ngoJehova kanye lokumkhonza. Kanti njalo sasisithi bayabe bengasoze basinde empini ye-Amagedoni. Okwakusenza sitsho njalo yikuthi sasikholwa ukuthi indaba kaZamcolo yayimela okuthile okuzakwenzakala esikhathini esizayo. Ngokwesibonelo, sasisithi njengoba uJehova wavala umnyango uZamcolo engakaqalisi ukuze kungasabi lomunye umuntu ongenayo, kutsho ukuthi lasekuqaliseni kokuhlupheka okukhulu kuzaba angathi uvale umnyango ukuze kungabi lomuntu ongakholwayo othola ithuba lokufunda ngaye abesesindiswa.—Mat. 24:37-39.
4. Kungani singasathi indaba kaZamcolo yayimela okuthile okuzakwenzakala esikhathini esizayo?
4 Kuqondile yini ukuthi sithi okwenzakala ngesikhathi sikaZamcolo kumela okuthile okuzakwenzakala? Hatshi. Kungani sisitsho njalo? Akulalutho esiluthola eBhayibhilini olungenza sitsho njalo.a Lanxa uJesu wafanisa “insuku zikaNowa” lesikhathi sokuba khona kwakhe, kazange akhulume amazwi atshengisa ukuthi abantu bangalesosikhathi kanye lalokho okwenzakala ngesikhathi sikaZamcolo kwakumela okuthile. Kanti njalo kazange athi ukuvalwa komnyango womkhumbi kwakumela okuthile. Lanxa kunjalo kukhona esingakufunda endabeni kaNowa lekaZamcolo.
5. (a) Kuyini okwenziwa nguNowa uZamcolo engakafiki? (UHebheru 11:7; U-1 Phetro 3:20) (b) Umsebenzi wokutshumayela esiwenza lamuhla uhambelana njani lowawusenziwa nguNowa?
5 UNowa watshengisa ukuthi wayelokholo ngoba wathi esethole isixwayiso esivela kuJehova wakha umkhumbi. (Bala uHebheru 11:7 lo-1 Phetro 3:20.) Lalamuhla abantu esibatshela izindaba ezinhle ezimayelana loMbuso kaNkulunkulu kumele bakwenze esiyabe sibatshela khona. (Imiseb. 3:17-20) UPhetro wathi uNowa ‘wayengumtshumayeli wokulunga.’ (2 Phet. 2:5) Lanxa kunjalo kasikwazi ukuthi uNowa watshumayeza wonke umuntu owayesemhlabeni yini uZamcolo engakafiki, njengoba nje sibonile esihlokweni esidlulileyo. Lathi lamuhla sizama ngazo zonke indlela ukutshumayeza abantu bonke futhi sikhuthele emsebenzini lo. Kodwa lanxa singaze sisebenze nzima njani, asisoze senelise ukutshumayeza wonke umuntu ukuphela kungakafiki. Kungani sisitsho njalo?
6-7. Kungani sisithi kasisoze senelise ukutshumayeza wonke umuntu ukuphela kungakafiki?
6 Cabanga ngokuthi uJesu wathini ngomsebenzi wethu wokutshumayela. Wathi izindaba ezinhle zazizatshunyayelwa “emhlabeni wonke ukuze kube lobufakazi ezizweni zonke.” (Mat. 24:14) Lamuhla isiphrofetho lesi sigcwaliseka ngendlela emangalisayo. Izindaba ezinhle zoMbuso zitholakala ngezindimi ezedlula 1 000 njalo abantu abanengi bayenelisa ukungena kuwebhusayithi yethu i-jw.org ukuze bafunde okunengi ngoMbuso kaNkulunkulu.
7 UJesu watshela abafundi bakhe ukuthi wayezaze abuye ‘bengakawabhodi wonke amadolobho’ kumbe bengakatshumayezi umuntu wonke. (Mat. 10:23; 25:31-33) Okwakhulunywa nguJesu yikho okuzakwenzakala lasesikhathini sethu. Lamuhla kulamamiliyoni abantu abahlala ezindaweni esingenelisi ukutshumayela sikhululekile kuzo. Kanti njalo umzuzu ngamunye kuzalwa abantwana abanengi. Senza konke okusemandleni ethu ukuthi sitshumayeze abantu “kuzo zonke izizwe, lezizwana, lezindimi.” (Isam. 14:6) Lanxa kunjalo kasisoze senelise ukutshumayeza abantu bonke ukuphela kungakafiki.
8. Kuyini esingazibuza khona ngendlela uJehova azakwahlulela ngayo abantu esikhathini esizayo? (Khangela lemifanekiso.)
8 Esesixoxe ngakho kungenza sizibuze ukuthi kuzakwenzakalani kulabo abangazange bathole ithuba lokuzwa izindaba ezinhle ukuhlupheka okukhulu kungakaqalisi. UJehova leNdodana yakhe ayiphe umsebenzi wokwahlulela bazabenzani? (Joh. 5:19, 22, 27; Imiseb. 17:31) Umbhalo okusekelwe kuwo isihloko lesi uthi uJehova “kafisi ukuthi loba ngubani abhujiswe” kodwa ufuna ukuthi “abantu bonke baphenduke.” (2 Phet. 3:9; 1 Thim. 2:4) Lanxa sikwazi lokhu, uJehova kakavezi ukuthi uzabahlulela njani abantu abangasoze bathole ithuba lokuzwa izindaba ezinhle. Phela akudingeki ukuthi asitshele lokho asekwenzile lalokho azakwenza.
UJehova uzabahlulela njani labo abangasoze bathole ithuba lokuzwa izindaba ezinhle ukuhlupheka okukhulu kungakaqalisi? (Khangela indima 8)c
9. Kuyini uJehova asivezele khona eBhayibhilini?
9 IBhayibhili liyasitshela okunye uJehova azakwenza. Ngokwesibonelo, lisitshela ukuthi uJehova uzavusa abantu abangazange bathole ithuba lokufunda izindaba ezinhle lokutshintsha indlela ababephila ngayo. IBhayibhili libabiza ngokuthi ‘ngabangalunganga.’ (Imiseb. 24:15; Luk. 23:42, 43) Lokhu kwenza sibe leminye futhi imibuzo.
10. Yiphi eminye imibuzo esingaba layo?
10 Kuzakwenzakalani ngalabo abazakufa ngesikhathi sokuhlupheka okukhulu? Kuzabe sekuphelile ngabo yini? IMibhalo ikubeka kucace ukuthi empini ye-Amagedoni, uJehova lamabutho akhe bazabhubhisa abantu abangamlaleliyo njalo abantu labo abasoze bavuswe. (2 Thes. 1:6-10) Kodwa kuzakwenzakalani ngabanye abazakufa ngesikhathi sokuhlupheka okukhulu njengalabo abazabulawa yimikhuhlane, lokuguga lezingozi kumbe abazabulawa ngabanye abantu? (Umtshu. 9:11; Zak. 14:13) Kambe ukuthi abanye babo bazakuba phakathi kwabantu ‘abangalunganga’ abazavuswa emhlabeni omutsha? Kasikwazi.
ESIKWAZIYO
11. Abantu bazakwahlulelwa njani ngesikhathi sempi ye-Amagedoni?
11 Kulokunye esikwaziyo mayelana lezinto ezizakwenzakala esikhathini esizayo. Ngokwesibonelo, siyakwazi ukuthi ngempi ye-Amagedoni abantu bazakwahlulelwa kusiya ngendlela ababephatha ngayo abafowabo bakaKhristu. (Mat. 25:40) Abazakwahlulelwa kuthiwe yizimvu yilabo abasekela abagcotshiweyo kanye loKhristu. Okunye esikwaziyo yikuthi abanye abagcotshiweyo bazaqhubeka besemhlabeni nxa ukuhlupheka okukhulu sekuqalisile lokuthi bazakuya ezulwini sekuzaqalisa impi ye-Amagedoni. Nxa abagcotshiweyo besasekhona emhlabeni, abanye abantu abalenhliziyo eziqotho kungenzeka bathole ithuba lokubasekela lokuncedisa emsebenzini abawenzayo. (Mat. 25:31, 32; Isam. 12:17) Kuqakatheke ngani konke lokhu?
12-13. Abanye bangenzani sebebona “iBhabhiloni Enkulu” ibhujiswa? (Khangela lemifanekiso.)
12 Ngesikhathi ukuhlupheka okukhulu sekuqalisa kungenzakala ukuthi kube labanye abazathi bebona ukubhujiswa ‘kweBhabhiloni Enkulu’ bakhumbule ukuthi oFakazi bakaJehova babeke bakhuluma ngokuthi lokho kwakuzakwenzakala. Kungenzakala yini ukuthi abanye babo batshintshe besebekholwa kuJehova?—Isam. 17:5; Hez. 33:33.
13 Nxa lokho kungenzakala, kuyabe kuhambelana lalokho okwenzakala eGibhithe ngesikhathi sikaMosi. Khumbula ukuthi ‘ixuku labantu abatshiyeneyo’ lahamba labako-Israyeli ngesikhathi bephuma eGibhithe. Kungenzakala ukuthi abanye babo baqalisa ukukholwa kuJehova ngesikhathi bebona okwakukhulunywe nguMosi mayelana lenhlupho ezilitshumi kugcwaliseka. (Eks. 12:38) Nxa kungenzakala into enjengaleyo ngemva kokubhujiswa kweBhabhiloni Enkulu kungasidanisa yini ukuthi abanye abantu babambana lathi i-Amagedoni isizaqalisa nje? Ngeke kusidanise. Sifuna ukulingisela uBaba wethu osezulwini, “uNkulunkulu olozwelo lesihawu, ophuza ukuthukuthela, ogcwele uthando oluqotho kanye leqiniso.”b—Eks. 34:6.
Kulabanye abazabona ukubhujiswa ‘kweBhabhiloni Enkulu’ besebekhumbula ukuthi oFakazi bakaJehova babeke bakhuluma ngokuthi lokho kuzakwenzakala (Khangela indima 12 lo-13)d
14-15. Ukuthi umuntu uzathola ukuphila okuphakade kumbe hatshi kuya ngokuthi uzakufa nini kumbe ukuthi uhlala ngaphi yini? Chasisa. (IHubo 33:4, 5)
14 Ngezinye izikhathi abanye abafowethu kumbe odadewethu abalezihlobo ezafa zingakhonzi bangacabanga ukuthi kungcono ukuthi zafa ukuhlupheka okukhulu kungakaqalisi ngoba zilethemba lokuvuswa. Okungenza bacabange njalo yikuthi babezithanda izihlobo zabo. Kodwa ukuthi umuntu uzakuthola ukuphila okuphakade akuyi ngokuthi ufe nini. UJehova nguMahluleli ongelasici njalo uhlala esahlulela kuhle. (Bala iHubo 33:4, 5.) Asithandabuzi ukuthi “uMahluleli womhlaba wonke” uzakwenza okulungileyo.—Gen. 18:25.
15 Kulengqondo ukuthi siphethe ngalokhu: Ukuthi umuntu uzathola ukuphila okungapheliyo yini kumbe hatshi akuyi ngokuthi uhlala ngaphi. Kulamamiliyoni abantu ahlala ezindaweni lapho okungelathuba lokuzwa izindaba ezinhle zoMbuso. Ngakho uJehova ngeke ahle athi abantu laba ‘bazimbuzi.’ (Mat. 25:46) UMahluleli olungileyo womhlaba wonke uyabathanda kakhulu abantu laba ukwedlula indlela thina esingabathanda ngayo. Asikwazi ukuthi uJehova uzazihambisa njani izinto ngesikhathi sokuhlupheka okukhulu. Mhlawumbe ngesikhathi uJehova esesenza izizwe zonke ukuthi zibekwazi ukuthi ungcwele, abanye phakathi kwabantu laba bazathola ithuba lokufunda ngaye, babe lokholo kuye besebemkhonza.—Hez. 38:16.
Ngesikhathi ukuhlupheka okukhulu sekuqalisa, kungenzakala yini ukuthi abanye batshintshe besebekholwa kuJehova?
16. Kuyini esikwaziyo ngoJehova? (Khangela lomfanekiso.)
16 Ukutaditsha iBhayibhili kusincede sazwisisa ukuthi uJehova uyayiqakathekisa kakhulu impilo yomuntu. Wanikela ngempilo yeNdodana yakhe ukuze sonke sibe lethemba lokuphila okuphakade. (Joh. 3:16) Sonke siyake sikubone ukuthi uJehova uyasithanda kakhulu kanye lokuthi ulozwelo. (Isaya. 49:15) Wazi munye ngamunye wethu ngebizo. Nxa singafa kuyabe kungasoze kumthwalise nzima ukusivusa ngoba usazi mhlophe okokuthi uyakwazi konke okumayelana lathi lakho konke okusezingqondweni zethu. (Mat. 10:29-31) Silazo sibili izizatho zokukholwa ukuthi uBaba wethu osezulwini osithandayo uzasahlulela kuhle sonke ngendlela elungileyo futhi abe lesihawu kithi.—Jak. 2:13.
Asithandabuzi ukuthi uJehova uzasahlulela kuhle sonke ngendlela elungileyo futhi abe lesihawu kithi (Khangela indima 16)
17. Sizaxoxa ngani esihlokweni esilandelayo?
17 Imfundiso lezi esezilungisisiwe zenza sibone ukuthi umsebenzi wethu wokutshumayela uqakatheke kakhulu lamuhla. Kungani sisitsho njalo? Kuyini okusikhuthaza ukuthi singayekeli ukutshumayela indaba ezinhle? Sizaxoxa ngempendulo zemibuzo le esihlokweni esilandelayo.
INGOMA 76 Wena Uzizwa Njani?
a Ukuze ubone ukuthi kungani satshintsha indlela esasizwisisa ngayo, khangela isihloko esithi “Lokhu Kwakuyikuthanda Kwakho” ku-Nqabayokulinda kaMarch 1, 2015, ikhasi 8-12.
b Ngemva kokubhujiswa kweBhabhiloni Enkulu, ukholo lwezinceku zikaJehova zonke luzalingwa ngoba zizahlaselwa nguGogi waseMagogi. Kanti njalo bonke abazabambana labantu bakaNkulunkulu labo bazalingwa.
c OKUSEMFANEKISWENI: Imifanekiso emithathu etshengisa ukuthi kungani kungaba nzima ukuthi abanye bazithole izindaba ezinhle: (1) Owesifazana ohlala endaweni lapho okungavunyelwa khona ezinye inkolo, (2) indoda lomkayo abahlala elizweni lapho okuyingozi khona ukuthi batshunyayezwe njengoba kungekho emthethweni, (3) indoda ehlala endaweni okunzima kakhulu ukufika kuyo.
d OKUSEMFANEKISWENI: Owesifazana osakhulayo owayesetshiye ukukhonza uyakhumbula lokho akufundiswayo mayelana lokubhujiswa ‘kweBhabhiloni Enkulu.’ Ukhetha ukubuyela kuJehova abesesiya kubazali bakhe abangoFakazi. Nxa izinto ezinjalo zingenzakala sifuna ukulingisela uBaba wethu osezulwini olesihawu lozwelo njalo sithokoze ngokuthi isoni siyabe sesiphendukile.