Thandaza Ngenhliziyo Yonke

1-2. (a) Kuyini okungenza sesabe ukuthandaza? (b) Kuyini okwenza singathandabuzi ukuthi uJehova uyasilalela nxa sithandaza?

KUYINI ojayele ukukwenza nxa uthandaza? Ujayele ukuphindaphinda izinto ezifananayo yini kumbe ujayele ukuthandaza ujahe ukuqeda? Nxa kunjalo woba kwazi ukuthi ayisuwe wedwa. Zinengi izinto esizenzayo empilweni ezingenza siswele isikhathi sokuthandaza. Ngesinye isikhathi singesaba ukuthandaza kuJehova sizitshela ukuthi ngeke asilalele.

² IBhayibhili lisifundisa ukuthi uJehova uqakathekisa imithandazo esuka enhliziyweni, kalandaba lokuthi singamagabazi okukhuluma. IHubo 10:17 lithi ‘uyabezwa abamnene nxa becela kuye.’ UJehova uyakuzwa konke esimtshela khona nxa sithandaza ngoba uyasithanda.—Hubo. 139:​1-3.

3. Yiphi imibuzo esizayiphendula esihlokweni lesi?

³ Esihlokweni lesi sizaphendula imibuzo elandelayo: Kungani kungamelanga sesabe ukuthandaza kuJehova? Singenzani ukuze imithandazo yethu ibe ngesuka enhliziyweni? Imithandazo yezinceku zikaJehova ebhalwe eBhayibhilini ingasinceda njani? Singenzani nxa kuyikuthi siphakathi kobunzima obenza siswele ukuthi sithandaze sisithini?

KUNGANI KUNGAMELANGA SESABE UKUTHANDAZA KUJEHOVA?

4. Kuyini okuzasinceda ukuthi singesabi ukuthandaza kuJehova? (IHubo 119:145)

⁴ Ukukhumbula ukuthi uJehova nguBaba wethu osithandayo kuzasinceda singesabi ukumtshela loba yini esikhathazayo. Umlobi weHubo 119 wayelenhlupho ezinengi njengathi futhi abantu babekhuluma amanga ngaye. Lanxa kunjalo wayengathandabuzi ukuthi uJehova uyamthanda lokuthi uyamlalela nxa ethandaza. (Hubo. 119:​23, 69, 78) Kwezinye izikhathi wayeke adane ngenxa yamaphutha ayewenza. (Hubo. 119:5) Lanxa kunjalo wayengesabi ukuthandaza kuJehova—Bala iHubo 119:145.

5. Kungani kungamelanga sibe lenhloni zokuthandaza? Nika umzekeliso.

⁵ UJehova ufuna ukuthi lalabo abenze isono bangesabi ukuthandaza kuye. (Isaya. 55:​6, 7) Ake sithi usulahlekile eguswini elimnyama tshu futhi awusakwazi ukuthi uqonde ngaphi. Uthi usalibele ubone umuntu tshazi bucwadlana. Ubuzakuba lenhloni zokumnqolonga yini umcela ukuthi akulayele indlela? Ngitsho lakancane! Yikho akumelanga ube lenhloni zokuthandaza kuJehova nxa wenze isono ngoba yena uyafuna ukukuncedisa.—Hubo. 119:​25, 176.

SINGENZANI UKUZE IMITHANDAZO YETHU IBE NGESUKA ENHLIZIYWENI?

6-7. Ukucabangisisa ngokuthi uJehova nguNkulunkulu onjani kuzakunceda njani? Nika isibonelo. (Khangela lamabala angaphansi.)

⁶ Nxa singatshela uJehova konke okusezinhliziyweni zethu lalokho esikucabangayo sizasondela kuye futhi sibe ngabangane bakhe. Manje singenzani ukuze imithandazo yethu ibe ngesuka enhliziyweni?

⁷ Cabangisisa ngokuthi uJehova nguNkulunkulu onjani.a Ukuhlala sicabangisisa ngokuthi uJehova nguNkulunkulu onjani kuzasenza singesabi ukumtshela loba yini. (Hubo. 145:​8, 9, 18) Omunye udadewethu okuthiwa nguKristine wakhuliswa ngubaba owayelolaka futhi elesihluku. Uthi: “Indlela engakhuliswa ngayo yayisenza ngithandabuze ukuthi uJehova ngubaba ongithandayo lokuthi uyangilalela nxa ngithandaza. Ngangizitshela lokuthi akwenzi ukuthi uJehova athande umuntu onjengami.” Manje kuyini okwanceda udadewethu lo? Uqhubeka esithi: “Ukucabangisisa ngokuthi uJehova ulothando oluqotho kwenza ngingesabi ukuthandaza kuye. Ngikhululekile ukumtshela izinto ezingikhathazayo lezingithokozisayo. Ngiyakwazi ukuthi loba ngingaze ngiphambanise kasoze angitshiye kodwa uzahlala engincedisa.”

8-9. Yiphi imibuzo ongazibuza yona ungakathandazi futhi lokho kuzakunceda ngani? Nika isibonelo.

⁸ Cabanga ngozakutsho. Nansi eminye imibuzo ongazibuza yona ungakathandazi: Yiluphi uhlupho engiphakathi kwalo khathesi? Kulomuntu engimbambele isikhwili yini okumele ngimxolele? Kulento esanda kwenzakala yini empilweni yami engifuna ukuthi uJehova angincedise kuyo? (2 Amakho. 19:​15-19) Okunye okumele sikwenze nxa sithandaza yikulandela lokho esakufundiswa nguJesu. Wathi sithandazele ukuthi ibizo likaYise lingcweliswe, uMbuso wakhe uze njalo lentando yakhe yenziwe emhlabeni njengasezulwini.—Mat. 6:​9, 10.

⁹ Omunye udadewethu okuthiwa ngu-Aliska uthi kwasekumthwalisa nzima ukuthandaza kuJehova ngemva kokuzwa ukuthi umkakhe wayeselemvukuzane. Uthi: “Ngangikhathazeke kakhulu ngomkami okokuthi ngangiswela lokuthi ngithini kuJehova nxa ngithandaza.” Manje kuyini okumncedileyo? Uqhubeka esithi: “Ngingakathandazi ngiyaqala ngicabange ukuthi kuyini engizakutshela uJehova ukwenzela ukuthi umthandazo wami ungabi mayelana lami lokugula komkami kuphela. Lokhu kuyanginceda ukuthi ngihlaliseke futhi ngenelise ukuqamba izinto ezitshiyeneyo nxa sengithandaza.”

10. Kungani kungamelanga sijahe ukuqeda nxa sikhuleka? (Khangela lemifanekiso)

¹⁰ Ungajahi. UJehova uyayiqakathekisa imithandazo yethu kungelani lokuthi ngemide kumbe ngemifitshane. Kodwa imithandazo ezaqinisa ubungane bethu loJehova yileyana emide esiyenza sisodwa simthululela konke okusezinhliziyweni zethu.b U-Elija umka-Aliska uthi: “Ngithandaza kuJehova kanengi ngelanga ngimthululela okusesifubeni sami futhi lokhu sokungincede ngasondela kakhulu kuye. Ngiyakwazi ukuthi uJehova kadinwa yikulalela imithandazo yami futhi uyabe engajahanga ukuthi ngiqede.” Nanku okunye ongakwenza: Dinga indawo ethuleyo lesikhathi esizakuvumela ukuthi utshele uJehova konke okusenhliziyweni yakho. Nxa kusenza khuleka ngelizwi elizwakalayo futhi lokhu akube yinto ohlala uyenza.

IMITHANDAZO ESEBHAYIBHILINI INGAKUNCEDA NJANI?

11. Ukucabangisisa ngemithandazo yezinceku zikaJehova ebhalwe eBhayibhilini kungakunceda njani? (Khangela lebhokisi elithi “Cabangisisa Ngezimo Ababekuzo”)

¹¹ Ukucabangisisa ngemithandazo lezingoma zokudumisa ezitholakala eBhayibhilini kungakunceda ukuthi uthuthukise imithandazo yakho. Phela amazwi asezingomeni lasemithandazweni leyo angabe ehambelana lesimo oyabe ukuso. Yikho lawe uyabe ukhululekile ukuwasebenzisa emithandazweni yakho. Lokhu kuzakunceda ukuthi wenelise ukutshela uJehova okusenhliziyweni yakho.

12. Yiphi imibuzo ongazibuza yona nxa ubala imithandazo eseBhayibhilini?

¹² Nansi eminye imibuzo ongacabangisisa ngayo nxa ubala umthandazo oseBhayibhilini: ‘Ngubani owayekhuleka futhi kuyini okwakusenzakala kuye ngalesosikhathi? Okwakusenzakala kuye kuhambelana njani lokwenzakala kimi khathesi? Kuyini engikufunda emthandazweni lo?’ Kwesinye isikhathi kungadingeka ukuthi uchwayisise ngomuntu lowo ukuze wenelise ukuphendula imibuzo le. Khathesi asixoxeni ngeminye imithandazo ebhalwe eBhayibhilini.

13. Sifundani emthandazweni kaHana? (U-1 Samuyeli 1:​10, 11) (Khangela lomfanekiso ongaphandle.)

¹³ Bala u-1 Samuyeli 1:​10, 11. Kwakutheni uHana aze athandaze ngale indlela kuJehova? Uzakhumbula ukuthi uHana wayeyinyumba njalo unyanewabo uPhenina wayemthwalise amagabha avuzayo. (1 Sam. 1:​4-7) Manje kuyini ongakufunda emthandazweni kaHana nxa kuyikuthi ulohlupho osulubekezelele okwesikhathi eside? Okwanceda uHana wahlaliseka yikutshela uJehova konke okwakumkhathaza layekufisa. (1 Sam. 1:​12, 18) Lathi nxa singatshela uJehova khona kanye okusikhathazayo, sizahlaliseka futhi sizezwa angathi sethulwe umthwalo osindayo.—Hu. 55:22.

14. (a) Kuyini okunye esingakufunda kuHana? (b) Ukucabangisisa ngamavesi aseBhayibhilini kungayithuthukisa njani imithandazo yethu? (Khangela amabala angaphansi.)

¹⁴ UJehova wawuphendula umthandazo kaHana wambusisa ngendodana ayeyicelile njalo wayinika ibizo elithi Samuyeli. Yathi isikhulakhulile wayihambisa eShilo kumphristi omkhulu u-Eli ukuze iyesebenzela uJehova. (1 Sam. 1:​24-28) UHana waphinda wathandaza ebonga uJehova ngokuthi uyabavikela futhi abanakekele abantu bakhe.c (1 Sam. 2:​1, 8, 9) Kungenzeka ukuthi uPhenina wayelokhu emthwalele ubhulo kodwa uHana wayehlala ecabanga ngendlela uJehova ayemncedisa ngayo. Manje sifundani? Okuzasinceda ukuthi sibekezele yikucabangisisa ngendlela uJehova aqhubeka esincedisa ngayo.

15. Sifundani kumphrofethi uJeremiya? (UJeremiya 12:1)

¹⁵ Bala uJeremiya 12:1. Umphrofethi uJeremiya laye wake wakhathazeka. Phela wayebona abantu ababi bephumelela njalo amanye ama-Israyeli ayemchothoza. (Jer. 20:​7, 8) Lathi kuyasidanisa ukubona abantu ababi bephumelela futhi sizwa ubuhlungu nxa abantu besichothoza. UJeremiya wathandaza kuJehova emtshela okwakumhlupha kodwa kazange amsole ngoba wayekwazi ukuthi uJehova uhlala esenza okuqondileyo. UJeremiya wamthemba kakhulu uJehova ngoba wabona indlela ajezisa ngayo labo ababemhlamukela. (Jer. 32:19) Lathi sikhululekile ukutshela uJehova ubuhlungu esibuzwayo nxa abanye besiphatha kubi. Lokhu kuyabe kutshengisa ukuthi siyamthemba ukuthi uzalungisa izinto ngesikhathi sakhe.

16. Sifundani kumLevi owabhala iHubo 42? (IHubo 42:​1-4) (Khangela lemifanekiso.)

¹⁶ Bala iHubo 42:​1-4. IHubo leli labhalwa ngumLevi owayethunjiwe. Indoda le yayikhathazeke ngokuthi yayingenelisi ukuyakhonza uJehova ethempelini. Abanye abafowethu labodadewethu bayehluleka ukungena imihlangano yethu, mhlawumbe ngenxa yokuthi bayagula kumbe babotshiwe futhi lokho kungabadanisa. Kodwa okungabanceda yikuthandaza kuJehova. UJehova nguye ongabancedisa ukuthi bahlaliseke lanxa besebunzimeni. UmLevi wananzelela ukuthi wayesenelisa ukudumisa uJehova kungelani lokuthi ungaphi. (Hubo. 42:5) Waphinda wacabangisisa ngendlela uJehova ayemnakekela ngayo. (Hubo. 42:8) Ukuthandaza kuJehova kuzasinceda ukuthi sivumelane lesimo, sihlaliseke futhi siqhubeke sibekezela.

17. (a)  Sifundani emthandazweni kaJona? (UJona 2:​1, 2 (b) Amanye amavesi asebhukwini lamaHubo angasinceda njani? (Khangela lamabala angaphansi.)

¹⁷ Bala uJona 2:​1, 2. UJona wakhuleka kuJehova esesiswini senhlanzi. Lanxa wayezenzele okwekhanda lakhe wangalaleli lokho uJehova ayemtshele khona wakhuleka engathandabuzi ukuthi uJehova uzawuzwa umthandazo wakhe. Amazwi amanengi asemthandazweni wakhe ayatholakala lakumaHubo.d Lokhu kutshengisa ukuthi wayewazi kuhle amahubo njalo ecabangisisa ngawo. Yikho wayengathandabuzi ukuthi uJehova uzamncedisa. Lathi kumele sizimisele ukubamba amavesi atshiyeneyo ngekhanda ngoba azasiduduza futhi sizenelisa ukucupha kuwo nxa sesithandaza kuJehova ngezikhathi ezinzima.

HLALA UTHANDAZA

18-19. URoma 8:​26, 27 usinceda njani? Nika isibonelo.

¹⁸ Bala uRoma 8:​26, 27. Kwezinye izikhathi singakhathazeka kakhulu size sehluleke lokutshela uJehova indlela esizizwa ngayo. Kodwa ngezikhathi ezinjalo uNkulunkulu uyasincedisa ngomoya wakhe ongcwele. Phela uJehova wasebenzisa umoya ongcwele ukuze kubhalwe imithandazo etshiyeneyo eLizwini lakhe. Yikho nxa sesiswele lokuthi simchazele njani indlela esizizwa ngayo, yena angakhetha ukusebenzisa eminye imithandazo eseLizwini lakhe ayamukele angathi ivela kithi.

¹⁹ Amavesi la anceda omunye udadewethu okuthiwa nguYelena ohlala eRussia. Udadewethu lo wabotshwa ngenxa yokuthi ukhonza uJehova futhi lokhu kwamkhathaza kakhulu okokuthi wayesesehluleka lokuthandaza. Uthi: “Ngezinye izikhathi ngangiswela lokuthi ngithandaze ngisithini. Kodwa ukukhumbula ukuthi ngezikhathi lezo, uJehova uyenelisa ukubona eminye imithandazo eseBhayibhilini angathi ivela kimi kwangiduduza futhi kwanginceda kakhulu.”

20. Kuyini okungasinceda ukuthi senelise ukuthandaza nxa sikhathazekile?

²⁰ Kwezinye izikhathi kungenzakala ukuthi ingqondo izulazule ngapha sikhuleka. Lokhu kungabangelwa yikuthi siyabe sikhathazeke kakhulu. Manje kuyini okungasinceda ngezikhathi ezinjalo? Mhlawumbe singalalela ibhuku lamaHubo elirekhodiweyo loba sibhale phansi indlela esizizwa ngayo njengalokho okwenziwa yiNkosi uDavida. (Hu. 18, 34, 142; Izethulo zamaHubo.) Ukuzama ukwenza lokhu kungasinceda ukuthi ingqondo ingazulazuli ngesikhathi sikhuleka. (Hu. 141:2) Kulamacebo atshiyeneyo angakunceda nxa uthandaza, ukhululekile ukukhetha okukusebenzelayo.

21. Kungani kumele sithandaze ngenhliziyo yonke?

²¹ Kuyasiduduza kakhulu ukwazi ukuthi uJehova uyakwazi ukuthi sizwa njani lanxa siyabe singakamtsheli. (Hu. 139:4) Kodwa uyathokoza kakhulu nxa simthululela okusenhliziyweni zethu. Yikho-ke zimisele ukuhlala uthandaza kuYihlo osezulwini. Cabangisisa ngemithandazo etholakala eLizwini lakhe ubususebenzisa amanye amazwi atholakala lapho ukuze uthuthukise imithandazo yakho. Ungesabi ukumtshela izinto ezikukhathazayo lalezo ezikwenza uthokoze. Hlala ukhumbula ukuthi uJehova uhlezi ethiye indlebe ukuze alalele imithandazo yakho.