Thandazela Abanye

1. Kuyini okutshengisa ukuthi uJehova uyayiqakathekisa imithandazo yethu?

UJEHOVA unike izingilosi imisebenzi etshiyeneyo. (Hubo. 91:11) Uphinde wanika iNdodana yakhe imisebenzi eqakathekileyo. (Mat. 28:18) Lanxa kunjalo nguJehova ngokwakhe olalela imithandazo yethu. (Hubo. 65:2) Lokhu kutshengisa ukuthi siqakatheke kakhulu kuJehova.

2. Sifundani kumphostoli uPhawuli?

² Sikhululekile ukutshela uJehova konke okusikhathazayo kodwa akumelanga sikhohlwe ukuthandazela abanye. Lokhu yikho kanye okwakusenziwa ngumphostoli uPhawuli. Watshela abazalwane ababesebandleni le-Efesu wathi: “Ngiqhubeka ngilithandazela.” (Efe. 1:16) UPhawuli wayephinda athandazele umuntu ngamunye. Ngokwesibonelo watshela uThimothi wathi: “Ngiyambonga uNkulunkulu. Ngikukhumbula zikhathi zonke nxa ngithandaza ngincenga ubusuku lemini.” (2 Thim. 1:3) Lanxa uPhawuli wayelenhlupho, kazange akhohlwe ukuthandazela abanye.—2 Khor. 11:23; 12:​7, 8.

3. Kuyini okungenza sikhohlwe ukuthandazela abanye?

³ Ngezinye izikhathi singakhohlwa ukuthandazela abanye. Omunye udadewethu okuthiwa nguSabrinaa uthi: “Zinengi kakhulu inhlupho ezisehlelayo okokuthi kwesinye isikhathi siyakhohlwa ukuthandazela abanye. Siyabe sicabanga ngobunzima esiphakathi kwabo besesikhohlwa ngabanye.” Wena uyake ukhohlwe yini ukuthandazela abanye? Nxa kunjalo isihloko lesi sizakunceda kakhulu. Sizaxoxa ngokuthi kungani kuqakathekile ukuthandazela abanye lokuthi singakwenza njani lokho.

KUNGANI KUMELE SITHANDAZELE ABANYE?

4-5. Ukuthandazela abanye kuyanceda yini? Chasisa. (UJakhobe 5:16)

⁴ Ukuthandazela abanye kuyabanceda. (Bala uJakhobe 5:16.) Ukuthandazela abanye kuyanceda yini? Ye! UJesu wayekwazi ukuthi umphostoli uPhetro wayezamphika, lanxa kunjalo wamtshela wathi: “Sengikuthandazele ngikuncengela ukuthi ukholo lwakho lungapheli njalo nxa usuphendukile uqinise abafowenu.” (Luk. 22:32) Umphostoli uPhawuli laye wayekwazi ukuthi ukuthandazelwa ngabanye kuyanceda. Ngesikhathi ebotshiwe eRoma wabhalela uFilimoni wathi: “Ngilethemba lokuthi ngizabuyiselwa kini ngenxa yemithandazo yenu.” (Filim. 22) Lakanye umphostoli uPhawuli wakhululwa ejele waseqhubeka ngomsebenzi wokutshumayela.

⁵ Kumele sikhumbule ukuthi nxa sithandazela abanye siyabe singatsheli uJehova okokwenza. Nxa sithandazela abanye, uJehova uyabona ukuthi siyabathanda kodwa kukuye ukuthi uyiphendula njani imithandazo yethu. Ukukhumbula lokhu kuzasinceda ukuthi sibathandazele ngenhliziyo yonke abanye futhi singathandabuzi ukuthi uJehova uyayazi indlela engcono yokubancedisa.—Hubo. 37:5; khangela u-2 Khorinte 1:11.

6. Ukuthandazela abanye kuzasinceda njani? (U-1 Phetro 3:8)

⁶ Ukuthandazela abanye kuyasinceda ukuthi sibe lozwelo. (Bala u-1 Phetro 3:8.) Umuntu olozwelo uyananzelela ubunzima omunye umuntu aphakathi kwabo abesedinga indlela yokumncedisa. (Mak. 1:​40, 41) Omunye umdala webandla okuthiwa nguMichael uthi: “Ukuthandazela abanye kuyanginceda ukuthi nginanzelele ubunzima abakubo futhi ukubona indlela abaqinisela ngayo kwenza ngibathande.” Omunye futhi umdala webandla okuthiwa nguRichard yena wathi: “Sengananzelela ukuthi nxa ungathandazela omunye umuntu uzwa sekusithi umncedise. Nxa sincedisa umuntu ebesimthandazela kuyabe kungani sincedisa uJehova ukuthi aphendule umthandazo wethu.”

7. Ukuthandazela abanye kuphinda kusincede njani? (UFiliphi 2:​3, 4) (Khangela lemifanekiso.)

⁷ Ukuthandazela abanye kuyasinceda ukuthi singahlali sicabanga ngenhlupho zethu. (Bala uFiliphi 2:​3, 4.) Wonke umuntu ulenhlupho ahlangana lazo emhlabeni lo obuswa nguSathane. (1 Joh. 5:19; Isam. 12:12) Ukuhlala sithandazela abanye kuzasenza singakhohlwa ‘ukuthi inhlupho esiphakathi kwazo zehlela bonke abazalwane’ kungelani lokuthi bangaphi. (1 Phet. 5:9) Udadewethu oliphayona okuthiwa nguKatherine uthi: “Ukuthandazela abanye kuyanginceda ngikhumbule ukuthi ayisimi ngedwa engilenhlupho. Khonalokho kwenza ngingazikhathazi kakhulu ngobunzima engikubo.”

ABANTU OKUMELE SIBATHANDAZELE

8. Ngobani okumele sibathandazele?

⁸ Abanye okumele sibathandazele ngabagulayo, asebegugile kanye labasakhulayo abathwele nzima ngenxa yokuhlutshwa ngabanye esikolo. Abanye okungamelanga sibakhohlwe ngabafowethu labodadewethu abathwele nzima ngenxa yokukhonza uJehova. Bangabe bephikiswa ngohulumende kumbe ngabemuli. (Mat. 10:​18, 36; Imiseb. 12:5) Abanye okumele sibakhumbule emithandazweni yethu ngabafowethu labodadewethu abathwele nzima ngenxa yezingozi zemvelo, lalabo ababaleka emizini yabo ngenxa yeziphithiphithi kumbe izimpi. Lanxa singabe singabazi abafowethu labodadewethu laba kumele sibathandazele. Lokho kuyabe kutshengisa ukuthi siyabathanda.—Joh. 13:34.

9. Kungani kumele sithandazele abafowethu abakhokhelayo labomkabo?

⁹ Abanye okumele sibathandazele ngabafowethu abakhokhelayo enhlanganisweni kaJehova. Laba bagoqela abafowethu beQula Elikhokhelayo labasizi babo, abafowethu abakumaKhomithi Amagatsha, abakhokhelayo emisebenzini eyenziwa eBhetheli, ababonisi beziqinti, abadala bamabandla kanye lezinceku ezikhonzayo. Iqiniso yikuthi inhlupho kazibacezi kodwa basebenza nzima ukuze bancedise abantu bakaJehova. (2 Khor. 12:15) Omunye umbonisi wesiqinti okuthiwa nguMark uthi: “Okunye okungikhathazayo yikuthi abazali bami sebekhulile njalo mina ngikhatshana kakhulu. Udadewethu lomkakhe benza konke okusemandleni abo bebanakekela. Kodwa ngiyake ngidane sibili ngenxa yokuthi ngiyafisa ukuthi aluba lami ngiseduze ukuze ngibancedise lapha lalaphayana.” Kungelani lokuthi siyabe sikwazi ukuthi abafowethu laba bangabe bephakathi kwabuphi ubunzima loba hatshi kumele sihlale sibathandazela. (1 Thes. 5:​12, 13) Akumelanga sikhohlwe ukuthandazela amakhosikazi abafowethu laba ngoba yiwo abasekelayo ukuze bayenze kuhle yonke imisebenzi abayiphiweyo.

10-11. UJehova uyezwa yini nxa sithandazela abafowethu labodadewethu singazange sabaqamba ngamabizo?

¹⁰ Sesibonile ukuthi kumele sithandazele abafowethu labodadewethu abaphakathi kwenhlupho ezitshiyeneyo. Ngokwesibonelo, singacela ukuthi uJehova ancedise abafowethu abasemajele kumbe abafelweyo singazange sibaqambe ngamabizo. Omunye umdala webandla okuthiwa nguDonald uthi: “Banengi kakhulu abafowethu labodadewethu abaphakathi kobunzima yikho kwezinye izikhathi sijayele ukubathandazela singabaqambanga ngamabizo.”

¹¹ Liqiniso sibili ukuthi uJehova uyayizwa imithandazo enjalo. Phela ngeke sibekwazi ukuthi umfowethu kumbe udadewethu ngamunye engabe ekhathazwa kuyini. (Joh. 17:20; Efe. 6:18) Nxa sibathandazela abafowethu labodadewethu siyabe sitshengisa ukuthi siyabathanda.—1 Phet. 2:17.

BAQAMBE NGAMABIZO

12. Ukuba lelihlo elibukhali kuzasinceda njani?

¹² Woba lelihlo elibukhali. Kulomfowethu loba udadewethu osetshukane lomkhuhlane okwesikhathi eside yini ebandleni lenu? Ukhona yini osakhulayo okhanya edanile ngenxa yokuthi uhlutshwa ngabanye esikolo? Kulomzali omaziyo yini ozama ukufundisa umntanakhe ukuthi akhule ethanda uJehova? (Efe. 6:4) Nxa ulelihlo elibukhali kuzaba lula ukuthi ubabone abantu laba futhi ubaqambe ngamabizo nxa usuthandaza.b—Rom. 12:15.

13. Kuyini okungasinceda ukuthi sibaqambe ngamabizo abafowethu ladodadewethu emithandazweni yethu?

¹³ Baqambe ngamabizo. Siyenelisa ukuthandazela labantu esingabaziyo sibaqamba ngamabizo. Abanye bakhona ngabafowethu labodadewethu abasemajele eCrimea, e-Eritrea, eRussia laseSingapore. Amabizo abafowethu labodadewethu abasemajele ayatholakala ku-jw.org.c Omunye umbonisi wesiqinti okuthiwa nguBrian uthi: “Ngijayele ukubhala phansi ibizo lomfowethu kumbe udadewethu osejele engiyabe ngifuna ukumthandazela besengizama ukulibiza ukuze ngilikhumbule nxa sengithandaza.”

14-15. Kuyini okunye esingakwenza ukuze sithuthukise imithandazo yethu?

¹⁴ Qamba khona kanye ofisa uJehova abenzele khona. Umfowethu okuthiwa nguMichael esike sakhuluma ngaye uthi: “Nxa ngibala ngabafowethu abasemajele, ngiyazama ukucabanga ukuthi aluba bekuyimi engisejele bengingafuna ukuncediswa njani. Ngiyakwazi ukuthi bengizabe ngikhathazeke kakhulu ngomkami. Lokhu kuyangisiza ngibekwazi ukuthi ngizathini nxa sengithandazela abafowethu abatshadileyo abasemajele.”—Heb. 13:3.

¹⁵ Nxa singacabangisisa ngobunzima abafowethu labodadewethu abasemajele abahlangana labo nsuku zonke sizenelisa ukuthandaza sicela khona kanye esifisa ukuthi uJehova abenzele khona. Ngokwesibonelo singacela ukuthi abalindi bamajele bangabahlukuluzi lokuthi iziphathamandla zibavumele ukuthi bathole amaBhayibhili njalo baxoxele ezinye izibotshwa ngoJehova. (1 Thim. 2:​1, 2) Singathandazela lokuthi uJehova aqinise lalabo abaseleyo ebandleni ukuthi bangapheli amandla kodwa balingisele ukholo lomfowethu kumbe udadewethu oyabe esejele. Okunye esingakuthandazela yikuthi uJehova ancedise labantu emphakathini bakubone okuhle okwenziwa ngabafowethu abasemajele. Phela lokho kungabanceda ukuthi bazimisele ukulalela nxa sebetshunyayezwa. (1 Phet. 2:12) Amacebo esixoxe ngawo lapha ayasebenza kungelani lokuthi sithandazela abasemajele kumbe abaphakathi kwezinye nje inhlupho. Nxa singaba lelihlo elibukhali, sibaqambe ngamabizo esibathandazelayo njalo siqambe khona kanye esifisa ukuthi uJehova abenzele khona siyabe sitshengisa ukuthi ‘siyabathanda kakhulu.’—1 Thes. 3:12.

OKUMELE SIKUKHUMBULE

16. Kuyini okumele sikukhumbule ngemithandazo yethu? (UMathewu 6:8)

¹⁶ Sesibonile ukuthi ukuthandazela abanye kuyanceda sibili kodwa kulezinto okumele sizikhumbule. Nxa sithandaza akumelanga sicabange ukuthi sitshela uJehova into angayaziyo ngoba uvele uyakwazi ukuthi thina kumbe labo esibathandazelayo bafunani. (Bala uMathewu 6:8.) Kumele sikukhumbule lokuthi nguJehova okwazi ngcono ukuthi uzasincedisa njani. Manje kungani kuqakathekile ukuthandazela abanye? Ukubathandazela kutshengisa ukuthi siyabathanda njalo kuthokozisa uJehova.

17-18. Sebenzisa umzekeliso otshengisa ukuthi uJehova uyathokoza nxa sithandazela abanye.

¹⁷ Lanxa uJehova engasoze aphendule yonke imithandazo yethu ngendlela esingabe siyikhangelele, kumele sikhumbule ukuthi uyathokoza nxa esibona sithandazela abanye. Ake sithi kulemuli elabantwana abancane ababili, umfana lenkazana. Ngelinye ilanga umfana abesegula aze alale phansi. Oyinkazana abesesithi kuyise: “Baba ngicela uncedise umnawami, uyagula!” Uyise uyabe evele emncedisa umntanakhe futhi emnakekela ngoba emthanda. Kodwa kuyamthokozisa kakhulu ukuzwa umntanakhe oyinkazana ekhuluma amazwi la ngoba kutshengisa ukuthi uyamthanda sibili umnawakhe.

¹⁸ UJehova ufuna sibathande futhi sibathandazele abafowethu labodadewethu. Ukwenza njalo kuyabe kutshengisa ukuthi asicabangi ngenhlupho zethu kuphela kodwa siyabazwela labanye abasebunzimeni. UJehova kasoze loba nini ayikhohlwe imithandazo enjalo. (2 Thes. 1:3; Heb. 6:10) Kasizimiseleni ukubathandazela ngenhliziyo yonke abanye ngoba imithandazo yethu iyabanceda kakhulu.