Ukubulawa Kwabantu Abangelacala Ezimpini—IBhayibhili Lithini Ngakho?

I-United Nations ithi:

• Kusukela mhlaka 7 October kusiya ku-23 October 2023, impi ephakathi kweGaza le-Israel isibulele abantu abedlula 6 400 futhi yalimaza abangu-15 200. Abanengi babo yizakhamizi nje ezingelacala. Kanti njalo izinkulungwane zabantu sezibalekile zatshiya imizi yazo.

• Kusiyafika umhlaka 24 September 2023, impi ephakathi kweRussia le-Ukraine isibulele abantu abangelacala abangu-9 701 yalimaza abangu-17 748 e-Ukraine.

IBhayibhili libathembisani labo abathwele nzima ngenxa yezimpi?

Okungenza sibe lethemba

IBhayibhili lithi uNkulunkulu ‘uzaziqeda izimpi emhlabeni wonke.’ (IHubo 46:9) Uzasebenzisa umbuso wakhe loba uhulumende osezulwini ukuthi asuse bonke ohulumende abakhona. (UDanyeli 2:44) UMbuso kaNkulunkulu uzakwenza ukuthi abantu bahlale ngokuthula.

Zwana ukuthi uJesu Khristu oyiNkosi yoMbuso kaNkulunkulu uzakwenzani:

• “Izalamulela umyanga okhalela uncedo, ilamulele lomuntukazana kanye laloba ngubani ongelamuntu ongamsiza. Izazwela umuntukazana lomyanga, isindise abadubekayo. Izabakhulula ekuhlukuluzweni lasebantwini abalodlakela.”—IHubo 72:12-14.

UNkulunkulu uzaqeda bonke ubuhlungu kanye lokuhlupheka okubangelwa yizimpi lodlakela esebenzisa uMbuso wakhe.

• “Uzakwesula zonke izinyembezi emehlweni abo. Ukufa akusoze kuphinde kubekhona, loba ukulila loba ukukhala loba ubuhlungu ngeke kusabakhona. Izinto ebezisenzakala sezidlulile.”—ISambulo 21:4.

Sekuseduze ukuthi uMbuso kaNkulunkulu ulungise wonke umonakalo osemhlabeni. IBhayibhili lavele latsho ukuthi kuzakuba ‘lezimpi kanye lemibiko yezimpi’ okuyikho okwenzakalayo khathesi. (UMathewu 24:6) Izimpi lezi kanye lokunye nje okwenzakalayo kutshengisa ukuthi siphila “ezinsukwini zokucina” zokubusa kwabantu.—2 KuThimothi 3:1.