Abantu Abasabathembi Abezombusazwe—⁠IBhayibhili Lithini Ngendaba Le?

Kukhanya ngomnyaka ka-2024 amazwe amanengi azabe elokhetho. Kodwa lanxa kunjalo abantu abanengi abasabathembi ngitsho abezombusazwe.

• Okunye ukuchwayisisa okwenziwe e-America kutshengisa ukuthi “abezombusazwe abanengi baqakathekisa ukuthi izinto zibahambele bona,” abazihluphi ngokunceda umphakathi.a—Pew Research Center, September 19, 2023.

Abasakhulayo abanengi labo abasabathembi abezombusazwe.

• “Abasakhulayo bafuna ukubona inhlupho ziqedwa kodwa sebenanzelele ukuthi abezombusazwe abazihluphi ngitsho ngokudinga ukuthi inhlupho lezo zingaqedwa njani.”—The New York Times, January 29, 2024.

• “Ukuhlolisisa okwenziweyo kutshengisa ukuthi abasakhulayo bathemba abantu abafaka amavidiyo ku-social media futhi belabalandeli abanengi kulokuthi bathembe abezombusazwe.”—The Korea Times, January 22, 2024.

Kambe ukuthi abezombusazwe bangenelisa ukuqeda inhlupho esizibonayo? Ngubani esingamthemba?

Ungathembi loba ngubani

Abantu kumele bananzelele sibili ukuthi bathemba bani. IBhayibhili lithi “umuntu ongelalwazi ukholwa loba yini ayizwayo, kodwa okhaliphileyo uyacabangisisa ngawo wonke amanyathelo akhe.”—IZaga 14:15.

• Ukuze uthole amacebo angakunceda ukuthi uhlolisise indaba ozizwayo, bala isihloko esithi “Zivikele Ezindabeni Ezingamanga.”

Elinye iqiniso esingeke siliphike yikuthi lanxa abanye abezombusazwe belenhloso ezinhle futhi bethembekile, abalawo amandla okutshintsha izinto. Yikho iBhayibhili lisixwayisa lisithi:

• “Lingabeki ithemba lenu eziphathamandleni, endodaneni yomuntu okungekho kuyo usindiso.”—IHubo 146:3, TBS.

Umkhokheli ongamthemba

IBhayibhili lisitshela ukuthi uNkulunkulu usebeke uJesu Khristu ukuthi abe ngumkhokheli ngoba ulamandla futhi uthembekile. (ULukha 1:32, 33) UJesu uyiNkosi yoMbuso kaNkulunkulu, okutsho uhulumende osezulwini.—UMathewu 6:10.

• Ukuze ubone ukuthi kungani singamthemba uJesu lokuthi kuyini azakwenza ukuze aqede inhlupho ezisehlelayo, bala isihloko esithi “Ngubani INkosi YoMbuso KaNkulunkulu?” lesithi “UMbuso KaNkulunkulu Uzabenzelani Abantu?”