UJesu Usisindisa Njani?

Impendulo yeBhayibhili

UJesu wasindisa abantu ngesikhathi enikela ukuphila kwakhe ukuze kube yinhlawulo yabanengi. (UMathewu 20:28) Yikho iBhayibhili lisithi uJesu “nguMsindisi womhlaba.” (1 UJohane 4:14) Liphinda lithi: “Kakho omunye okulensindiso kuye; phela kalikho elinye ibizo ngaphansi kwezulu elaphiwa abantu ukuthi sisindiswe ngalo.”​—ImiSebenzi 4:12.

UJesu ‘wezwa ukufa ngenxa yabantu bonke’ abalokholo kuye. (KumaHebheru 2:9; UJohane 3:16) Ngemva kwalokho “uNkulunkulu wamvusa kwabafileyo” futhi wabuyela ezulwini eseyisidalwa somoya. (ImiSebenzi 3:15) Njengoba esesezulwini ‘uyenelisa ukubasindisa ngokupheleleyo labo abeza kuNkulunkulu ngaye, ngoba uhlezi ephilela ukubancengela.’​—KumaHebheru 7:25.

Kungani sidinga ukuthi uJesu asincengele?

Ngoba silesono. (KwabaseRoma 3:23) Futhi isono lesi senza kube lokuhlukana phakathi kwethu loNkulunkulu njalo siholela ekufeni. (KwabaseRoma 6:23) Kodwa uJesu ‘uyabakhulumela’ labo abalokholo emhlatshelweni wakhe. (1 UJohane 2:1) Uyabancengela kuNkulunkulu ukuthi azwe imithandazo yabo futhi abathethelele izono ngesisekelo somhlatshelo. (UMathewu 1:21; KwabaseRoma 8:34) UJehova uyakulalela ukuncenga kukaJesu ngoba kuhambelana lentando yakhe. Wathumela uJesu ukuze ‘umhlaba usindiswe ngaye.’​—UJohane 3:17.

Ukholo yilo lodwa yini oludingakalayo ukuze sisindiswe?

Hatshi. Ukuba lokholo nje kuphela akwenelanga. (ImiSebenzi 16:30, 31) IBhayibhili lithi: “Njengoba umzimba ongelamoya ufile, ngokunjalo ukukholwa okungelamisebenzi kufile.” (UJakhobe 2:26) Nanku okumele sikwenze ukuze sisindiswe:

• Kumele sifunde ngoJehova loJesu.​—UJohane 17:3.

• Kumele sibe lokholo kubo.​—UJohane 12:44; 14:1.

• Kumele sitshengise ukuthi silokholo ngokulalela imilayo abasinika yona. (ULukha 6:46; 1 UJohane 2:17) UJesu wathi akusibo bonke abambiza “Nkosi” abazasindiswa kodwa yilabo ‘abenza intando kaBaba osezulwini’ kuphela.​—UMathewu 7:21.

• Kumele siqhubeke sitshengisa ukuthi silokholo lanxa sihlangana lobunzima. UJesu wakucacisa lokho lapho esithi: “Lowo oma aqine kuze kube sekupheleni uzasindiswa.”​—UMathewu 24:13.