IBhayibhili Lithini Ngama-Dinosaur?

Impendulo YeBhayibhili

Akulandawo eBhayibhilini lapho okukhulunywa khona ngama-dinosaur. Elisitshela khona yikuthi uNkulunkulu “wadala izinto zonke.”a (ISambulo 4:11) Lanxa iBhayibhili lingaziqambi ngamabizo inyamazana lezi, liyasitshela ngeminye imihlobo yenyamazana okungenzakala ukuthi yiwo ama-dinosaur.

• “Izidalwa ezinkulu zolwandle.”​—UGenesisi 1:21.

• “Zonke izinanakazana ezihuquzela emhlabathini.”​—UGenesisi 1:25.

• “Izinyamazana zeganga.”​—UGenesisi 1:25.

Ama-dinasour avela kwezinye inyamazana yini?

Ubufakazi butshengisa ukuthi ama-dinasour awazange avele kwezinye izinyamazana. Abahlola izinto ezaphila kudala bayakuvuma ukuthi inyamazana lezi zazikhona. Lokhu kuvumelana lalokho okutshiwo liBhayibhili mayelana lokuthi uNkulunkulu nguye owadala zonke izinyamazana. Ngokwesibonelo iHubo 146:6 lithi uNkulunkulu ‘nguMenzi wezulu lomhlaba, ulwandle lakho konke okulapho.’

Zaphila nini inyamazana lezi?

IBhayibhili liveza ukuthi inyamazana eziselwandle lezisemhlabeni zadalwa ngosuku lwesihlanu lolwesithupha.b (UGenesisi 1:20-25, 31) Yikho kuyakhanya ukuthi ama-dinasour ake aphila sibili okwesikhathi eside.

ULeviyathani ngelinye ibizo lama-dinasour yini?

Hatshi. Kasingeke sitsho ukuthi inyamazana le okukhulunywa ngayo kuJobe yayiyinyamazana bani. Loba kunjalo ubufakazi butshengisa ukuthi uLeviyathani yingwenya. Lokhu kuyavumelana lalokho okutshiwo yiMibhalo. (UJobe 41:1, 14-17, 31) Yikho ibizo elithi Leviyathani kalitsho ama-dinasour ngoba phela uNkulunkulu watshela uJobe ukuthi ayikhangelisise kuhle inyamazana le. Kwakungeke kube ngama-dinasour ngoba ngesikhathi uJobe aphila ngaso kwasekuyiminyaka eminengi aphela.​—UJobe 40:16; 41:8.

Kwenzakalani ezinyamazaneni lezi?

IBhayibhili alisitsheli ukuthi kwaphetha njani ngezinyamazana lezi. Lanxa kunjalo lithi zonke izinto zadalwa ‘ngentando kaNkulunkulu’ okuveza ukuthi kwakulesizathu esenza uNkulunkulu wadala ama-dinasour. (ISambulo 4:11) Lapho inhloso kaNkulunkulu isifezekile ngawo, kwakungasadingakali ukuthi aqhubeke ekhona.