KwabaseKholose 3:23—“Langabe Kuyini Elikwenzayo Kusebenzeni Ngenhliziyo Yenu Yonke”

“Loba kuyini elikwenzayo kwenzeni ngomphefumulo wonke, angathi lisebenzela uJehova hatshi abantu.”—KwabaseKholose 3:23, INguqulo Yomhlaba Omutsha.

“Langabe kuyini elikwenzayo kusebenzeni ngenhliziyo yenu yonke, njengokusebenzela iNkosi, hatshi abantu.”—KwabaseKholose 3:23, Holy Bible in Ndebele.

Okutshiwo nguKholose 3:23

UmKhristu kumele azimisele ukusebenza ngamandla akhe wonke kuloba yiwuphi umsebenzi awenzayo ngoba uyakwazi ukuthi uJehova ulindele ukuthi enze njalo.

“Loba kuyini elikwenzayo.” Labo abakhonza uJehova bayazama ukulandela lokho okutshiwo liBhayibhili kukho konke abakwenzayo. Bakhuthele njalo bathembekile kuloba yiphi imisebenzi abayenzayo kungaba ngekhaya, emsebenzini kumbe esikolo.—IZaga 11:13; KwabaseRoma 12:11; KumaHebheru 13:18.

“Kusebenzeni ngenhliziyo yenu yonke.” Umutsho othi “ngenhliziyo yenu yonke” uvela emutshweni wesiGrikhi “ochaza indlela umuntu azimisele ngayo ukwenza intando kaNkulunkulu ngamandla akhe wonke.”a Umuntu onjalo usebenza ngamandla akhe wonke futhi ufaka ingqondo yakhe yonke kulokho akwenzayo ukuze kuphume kuhle kakhulu.

“Angathi lisebenzela uJehova hatshi abantu.” Labo abakhonza uNkulunkulu bayayiqakathekisa yonke imisebenzi abayenzayo ngoba bayakwazi ukuthi uJehova uyayibona indlela abasebenza ngayo. Abasebenzeli ukuthokozisa abaqhatshi babo nje kuphela kumbe omunye umuntu kodwa benzela ukuthokozisa uJehova. Ukukhuthala kwabo emsebenzini kwenza abanye abantu badumise uNkulunkulu futhi ‘kwenza ibizo lakhe lingakhulunyelwa kubi.’—1 KuThimothi 6:1; KwabaseKholose 3:22.

Amanye amavesi asinceda sizwisise uKholose 3:23

Umphostoli uPhawuli wabhala ibhuku labaseKholose ebhalela amaKhristu ayehlala edolobheni lakudala okwakuthiwa yiKholose.b Kukhanya walibhala ngesikhathi ebotshiwe okokuqala eRoma ngabo-60-61 C.E.

Okusebhukwini labaseKholose kunceda wonke amaKhristu ukuthi akhonze uNkulunkulu emanyene kungelani lokuthi adabuka ngaphi, ukuthi anothile yini kumbe angabayanga. (KwabaseKholose 3:11) Ibhuku leli lisikhuthaza lokuthi sibe lothando, umusa kanye lesihawu. (KwabaseKholose 3:12-14) Liphinda lisitshele lokuthi kumele sibaphathe kuhle abanye ukuze ubungane bethu loNkulunkulu buhlale buqinile.—KwabaseKholose 3:18–4:1.

Bukela ividiyo le emfitshane ukuze ubone okumunyethwe libhuku likaKholose.