UMakho 11:24—“Konke Elikukhulekelayo Lelikucelayo, Kholwani Ukuthi Selikwamukele”

“Yikho ngilitshela ukuthi zonke izinto elithandaza lizicela, kholwani ukuthi selizamukele, lingenza njalo lizazamukela.”—UMakho 11:24, INguqulo Yomhlaba Omutsha.

“Ngakho ngithi kini: Konke elikukhulekelayo lelikucelayo, kholwani ukuthi selikwamukele, lizakuba lakho.”—UMakho 11:24, The Holy Bible in Ndebele.

Okutshiwo nguMakho 11:24

Ngokutsho amazwi asevesini le, uJesu wayenceda abalandeli bakhe ukuthi babone ukuqakatheka kokukholwa ukuthi umthandazo ulamandla. Wabaqinisekisa ukuthi uNkulunkulu uyayilalela sibili imithandazo yabo futhi ayiphendule. Umuntu othandaza elokholo njalo lokho akuthandazelayo kuhambelana lentando kaNkulunkulu angaqiniseka ukuthi uNkulunkulu uzamenzela akucelayo. Kuyabe kungani umthandazo wakhe usuphenduliwe.

UJesu wagcizelela lokuqakatheka kokungathandabuzi nxa sithandaza. Wathi umuntu othandazayo akumelanga ‘athandabuze enhliziyweni yakhe kodwa kumele abe lokholo lokuthi kuzakwenzakala.’ (UMakho 11:23) Phela lowo othandabuzayo “akumelanga akhangelele ukwamukela loba yini evela kuJehova.”a—UJakhobe 1:5-8.

Umuntu olokholo uyathandaza zikhathi zonke kungelani lokuthi ukusiphi isimo. (ULukha 11:9, 10; KwabaseRoma 12:12) Nxa esenza njalo uyabe etshengisa ukuthi uyakufuna sibili lokho akucelayo lokuthi uyakholwa ukuthi uNkulunkulu uzayiphendula imithandazo yakhe. Lanxa kunjalo uyakwazi ukuthi uNkulunkulu angakhetha ukuphendula umthandazo wakhe ngendlela yena ayabe engayikhangelelanga kumbe awuphendule ngesikhathi esitshiyene laleso angabe esikhangelele.—Kwabase-Efesu 3:20; KumaHebheru 11:6.

Kodwa amazwi kaJesu awatsho ukuthi loba ngubani othandaza kuNkulunkulu uyabe ezakuthola lokho akucelayo. UJesu wathi esitsho amazwi la wayekhuluma labalandeli bakhe ababelokholo futhi bezama ngamandla abo wonke ukukhonza uJehova uNkulunkulu ngendlela ayifunayo. IBhayibhili lithi uJehova ulalela kuphela imithandazo evumelana lentando yakhe. (1 UJohane 5:14) Kayilaleli imithandazo yalabo abangafuni ukwenza lokho abatshela khona kumbe eyalabo abaqhubeka besenza okubi bengaphenduki. (U-Isaya 1:15; UMikha 3:⁠4; UJohane 9:31) Ukuze ufunde okunengi ngokuthi uNkulunkulu ulalela imithandazo enjani, bukela ividiyo le emfitshane.

Amanye amavesi asinceda sizwisise uMakho 11:24

Sekusele amalanga amalutshwane ukuthi uJesu abulawe, watshela abafundi bakhe ngokuqakatheka kokutshengisa ukuthi balokholo kuNkulunkulu. Wasebenzisa umzekeliso ukuze agcizelele umcijo lo. Wathi esiya eJerusalema wabona isihlahla somkhiwa esasesilamahlamvu aluhlaza wasesondela kuso wasithola singelazithelo yikho wasiqalekisa. (UMakho 11:12-14) Isizwe sako-Israyeli sasinjengesihlahla lesi ngoba sasisenza angani sikhonza uNkulunkulu kodwa singelakholo ngitsho. (UMathewu 21:43) UJesu wenza ukuthi isihlahla lesi esingatheliyo some ukuze atshengise ukuthi sizaphetha ngani isizwe lesi esingelakholo.—UMakho 11:19-21.

UJesu wayengathandabuzi ukuthi abalandeli bakhe abasoze benze njengabantu bako-Israyeli. Babezakuba lokholo olwaluzabanceda ukuthi bamelane laloba yibuphi ubunzima abahlangana labo futhi benze lemisebenzi emangalisayo. (UMakho 11:22, 23) Kwabanceda sibili abafundi ukuthi uJesu akhulume ngendaba yokuthandaza ngesikhathi lesi ngoba maduzane babezahlangana lobunzima obabuzanyikinya ukholo lwabo. Babezafelwa yiNkosi yabo futhi bahlukuluzwe ngenxa yomsebenzi wokutshumayela. (ULukha 24:17-20; ImiSebenzi 5:17, 18, 40) Lalamuhla abalandeli bakaJesu bangenelisa ukumelana laloba yibuphi ubunzima nxa bangaba lokholo kuNkulunkulu bathandaze kuye bengathandabuzi ukuthi uyayizwa imithandazo yabo.—UJakhobe 2:26.

Bukela ividiyo le emfitshane ukuze ubone okumunyethwe libhuku likaMakho.