Vuma Ukukhokhelwa NguJehova Zikhathi Zonke

1. Kungani kumele sivume ukukhokhelwa nguJehova? Nika umzekeliso.

AKE sithi ulahlekile eguswini. Igusu lelo liyingozi kakhulu ngoba lilezinyamazana zeganga lenyoka lenkume. Akuthandabuzwa ukuthi ungathokoza kakhulu nxa kungathutsha umuntu olazi kuhle igusu lelo abesekuncedisa ukuthi ungayi lapho okulezinto lezi eziyingozi! Umhlaba lo unjengegusu leli. Ugcwele izinto eziyingozi ezingaxegisa ukholo lwethu. Lanxa kunjalo asesabi ngoba siloMkhokheli wethu uJehova. Uyasikhokhela asisuse lapho okulezingozi khona asise endleleni yokuphila okungapheliyo emhlabeni omutsha.

2. UJehova usikhokhela njani?

² UJehova usikhokhela njani? Akusebenzisa kakhulu liLizwi lakhe iBhayibhili. Uphinda asebenzise labantu ukuze asikhokhele. Ngokwesibonelo, usebenzisa “inceku ethembekileyo lehlakaniphileyo” ukuze asinike ukudla okuqinisa ukholo okusinceda ukuthi sikhethe kuhle empilweni. (Mat. 24:45) UJehova usebenzisa lamanye amadoda afaneleyo ukuze asikhokhele. Ngokwesibonelo, ababonisi beziqinti labadala bamabandla bayasikhuthaza futhi basinike amacebo angasinceda ukuthi siqinisele ngezikhathi ezinzima. Siyambonga kakhulu uJehova ngokuthi usikhokhela kuhle ezinsukwini lezi zokucina ezinzima! Lokhu kuyasinceda ukuthi sihlale singabangane bakhe njalo siqhubeke sihamba endleleni eya ekuphileni.

3. Sizaxoxa ngani esihlokweni lesi?

³ Lanxa uJehova esikhokhela kuhle, kwezinye izikhathi kungaba nzima ukuthi senze lokho akutshoyo, ikakhulu nxa sikutshelwa ngabafowethu abasebenzisayo abalesono. Kuyini okwenza kube nzima? Kungenzakala ukuthi bayabe besitshela izinto esiyabe singafuni ukuzenza. Kwezinye izikhathi singabona angani lokho abakutshoyo akulangqondo besesicabanga ukuthi akuveli kuJehova. Nxa kungaba njalo kuyabe kumele sikhumbule ukuthi uJehova nguye okhokhela abantu bakhe lokuthi nxa singalalela lokho abakutshoyo uzasibusisa. Isihloko lesi sizasinceda singakuthandabuzi lokho. Sizaxoxa ngokuthi uJehova wayebakhokhela njani abantu bakhe kudala, langokuthi usikhokhela njani lamuhla siphinde sixoxe langokuthi ukuvuma ukukhokhelwa nguye kuzasinceda njani.

UJEHOVA WAYESIKHOKHELA NJANI ISIZWE SAKO-ISRAYELI?

4-5. UJehova watshengisa njani ukuthi wayesebenzisa uMosi ukuze akhokhele abako-Israyeli? (Khangela umfanekiso ongaphandle.)

⁴ UJehova wabeka uMosi ukuthi akhokhele ama-Israyeli ngesikhathi ephuma eGibhithe. Wawanika ubufakazi obabutshengisa ukuthi nguye owayesebenzisa uMosi ukuthi awakhokhele. Ngokwesibonelo, kwakusiba lensika yeyezi emini, kuthi ebusuku kube lensika yomlilo. (Eks. 13:21) UMosi wayelandela insika leyo njalo yabakhokhela yabasa eLwandle Olubomvu. Abantu bethuka becabanga ukuthi bazatshabalala njengoba phambili kwakulolwandle, emuva kulebutho labaseGibhithe elalibaxotshanisa. Basebecabanga ukuthi uMosi wayeyenze iphutha ngokubaletha eLwandle Olubomvu. Kodwa wayengalukhuthanga ugatsha, uJehova nguye owayeyenze ukuthi uMosi abakhokhele ebasa eLwandle Olubomvu. (Eks. 14:2) UNkulunkulu wabasindisa ngendlela emangalisayo.—Eks. 14:​26-28.

⁵ Okweminyaka engu-40 eyalandelayo, uMosi wayelokhu elandela insika yeyezi ukuthi akhokhele abantu bakaNkulunkulu enkangala.a Okwesikhathi esithile uJehova wamisa insika le phezu kwetende likaMosi lapho bonke abako-Israyeli ababesenelisa ukuyibona khona. (Eks. 33:​7, 9, 10) UJehova wayekhuluma loMosi esensikeni yeyezi, uMosi abesesiyatshela abantu amazwi kaJehova. (Hubo. 99:7) Ama-Israyeli ayelobufakazi obucacileyo bokuthi uJehova wayesebenzisa uMosi ukuze abakhokhele.

6. Ama-Israyeli ayevuma yini ukukhokhelwa nguJehova? Chasisa. (AmaNani 14:​2, 10, 11)

⁶ Kuyadanisa ukuthi lanxa kwakulobufakazi obunengi obabutshengisa ukuthi uJehova wayesebenzisa uMosi ukuthi abe ngummeli wakhe, ama-Israyeli amanengi kawazange akwamukele lokho. (Bala amaNani 14:​2, 10, 11.) Izikhathi ezinengi ayengavumi ukuthi uJehova wayesebenzisa uMosi ukuthi awakhokhele. Ngenxa yalokho uJehova kazange awavumele ama-Israyeli lawo ukuthi angene eLizweni Lesithembiso.—Nani. 14:30.

7. Nika izibonelo zalabo abavuma ukukhokhelwa nguJehova. (AmaNani 14:24) (Khangela lomfanekiso.)

⁷ Kulamanye ama-Israyeli ayevuma ukukhokhelwa nguJehova. Ngokwesibonelo, uJehova wathi: ‘UKhalebhi ubelokhu engilandela ngenhliziyo yonke.’ (Bala amaNani 14:24.) UNkulunkulu wamnika umvuzo uKhalebhi waze wamvumela ukuthi azikhethele lapho ayefuna ukuhlala khona eLizweni Lesithembiso. (Josh. 14:​12-14) Isizukulwane sama-Israyeli esalandelayo laso sasivuma ukukhokhelwa nguJehova. UJoshuwa wathi esebekiwe ukuthi akhokhele, ama-Israyeli ‘amhlonipha kakhulu okwempilo yakhe yonke.’ (Josh. 4:14) Ngenxa yalokho uJehova wawabusisa ngokuwavumela ukuthi angene elizweni ayewathembise lona.—Josh. 21:​43, 44.

8. Chasisa ukuthi uJehova wayebakhokhela njani abantu bakhe ngesikhathi kubusa amakhosi. (Khangela lomfanekiso.)

⁸ Ngemva kweminyaka eminengi uJehova waqalisa ukubeka abahluleli ukuthi bakhokhele abantu bakhe. Kwathi sekulamakhosi ayebusa ko-Israyeli, uJehova wayebeka abaphrofethi ukuthi bakhokhele abantu bakhe. Amakhosi ayethembekile ayebalalela abaphrofethi. Ngokwesibonelo, iNkosi uDavida yazithoba yavuma ukuqondiswa ngumphrofethi uNathani. (2 Sam. 12:​7, 13; 1 Imilan. 17:​3, 4) INkosi uJehoshafathi yakulalela lokho okwakukhulunywa ngumphrofethi uJahaziyeli yasikhuthaza abantu bakoJuda ukuthi ‘babe lokholo kubaphrofethi [bakaNkulunkulu.]’ (2 Imilan. 20:​14, 15, 20) INkosi uHezekhiya yathi ikhathazekile yacela uncedo kumphrofethi u-Isaya. (Isaya. 37:​1-6) Nxa amakhosi ayelalela ayekutshelwa nguJehova ayebusiswa njalo lesizwe sasivikelwa. (2 Imilan. 20:​29, 30; 32:22) Kumele ukuthi kwakucaca ebantwini bonke ukuthi uJehova wayesebenzisa abaphrofethi bakhe ukuthi akhokhele abantu bakhe. Lanxa kunjalo amakhosi amanengi labantu abazange babalele abaphrofethi bakaJehova.—Jer. 35:​12-15.

UJEHOVA WAYEWAKHOKHELA NJANI AMAKHRISTU AKUQALA?

9. Ngobani uJehova ayebasebenzisa ukuze akhokhele amaKhristu akuqala? (Khangela lomfanekiso.)

⁹ NgePhentekhosti lika-33 C.E., uJehova wabumba ibandla lamaKhristu. Wayewakhokhela njani amaKhristu lawo? Wabeka uJesu ukuthi abe yinhloko yebandla. (Efe. 5:23) Kodwa uJesu wayengakhulumi lomKhristu ngamunye emtshela lokho okumele akwenze. Wayesebenzisa abaphostoli lamadoda amadala ayeseJerusalema ukuthi akhokhele. (Imiseb. 15:​1, 2) Kanti njalo kwakulabadala ababekiweyo ababekhokhela emabandleni.—1 Thes. 5:12; Tit. 1:5.

10. (a) AmaKhristu angesikhathi sabaphostoli ayevuma yini ukukhokhelwa ngabantu uJehova ayebasebenzisa? (ImiSebenzi 15:​30, 31) (b) Kuyini okwakusenza ukuthi abanye bangavumi ukukhokhelwa ngabantu ababesetshenziswa nguJehova? (Khangela ibhokisi elithi “Okwakusenza Abanye Bayale Ukukhokhelwa Ngabantu Ababekwe NguJehova.”)

¹⁰ AmaKhristu angesikhathi sabaphostoli ayevuma yini ukukhokhelwa ngabantu ababesetshenziswa nguJehova? Amanengi ayezimisele ukulalela lokho ayekutshelwa. Ngokwesibonelo, athi esebalelwe enye incwadi ‘athokoza ngoba yayikhuthaza.’ (Bala imiSebenzi 15:​30, 31.) Khathesi uJehova ubakhokhela njani abantu bakhe?

UJEHOVA USIKHOKHELA NJANI LAMUHLA?

11. Nika isibonelo esitshengisa ukuthi uJehova uyabancedisa labo abakhokhelayo ngesikhathi sethu.

¹¹ Lalamuhla uJehova ulokhu ebakhokhela abantu bakhe. Ubakhokhela esebenzisa iLizwi lakhe leNdodana yakhe eyinhloko yebandla. Kodwa bukhona yini ubufakazi obutshengisa ukuthi lalamuhla uJehova uyabasebenzisa abantu ukuthi basikhokhele? Ye bukhona. Ngokwesibonelo, cabanga ngokwenzakala sekwedlule umnyaka ka-1870. UCharles Taze Russell labanye bakhe baqalisa ukuzwisisa ukuthi umnyaka ka-1914 wawuzabe uqakatheke kakhulu eMbusweni kaNkulunkulu. (Dan. 4:​25, 26) Okwenza baphuma lomnyaka lo yikuchwayisisa iziphrofetho eziseBhayibhilini. UJehova wayebakhokhela yini ekuchwayisiseni kwabo? Kusegcekeni sibili ukuthi wayebakhokhela. Izinto ezenzakala emhlabeni ngo-1914 zatshengisa ukuthi uMbuso kaNkulunkulu wawusuqalisile ukubusa. Kwaba leMpi Yomhlaba Yokuqala futhi ngemva kwayo kwaba lemikhuhlane emibi, lokuzamazama komhlaba lokuswelakala kokudla. (Luk. 21:​10, 11) Kuyacaca sibili ukuthi uJehova wayesebenzisa amadoda la ayethembekile ukuthi ancedise abantu bakhe.

12-13. Ngesikhathi seMpi Yomhlaba Yesibili kuyini abafowethu abakhokhelayo abakwenzayo ukuze umsebenzi wokutshumayela uqhubekele phambili?

¹² Cabanga langalokho okwenzakala ngeMpi Yomhlaba Yesibili. Ngemva kokuhlolisisa iSambulo 17:​8, abazalwane abakhokhelayo ababesemawofisini ethu amakhulu bazwisisa ukuthi impi leyo yayingasoze ithi iphela, kuhle kube yi-Amagedoni. Kodwa kwakuzakuba lesikhathi sokuthula esasizavumela ukuthi umsebenzi wokutshumayela uqhubekele phambili ezindaweni ezinengi. Inhlanganiso kaJehova yavula isikolo seGiliyadi ukuze iqeqetshe abanali ukuthi bayetshumayela njalo bafundise emazweni amanengi emhlabeni wonke, lanxa ngalesosikhathi lokho kwakungakhanya angani ayisilocebo elihle. Abanali baqalisa ukuthunywa impi isaqhubeka. Kanti njalo inceku ethembekileyo yavula iSikolo Senkonzob emabandleni wonke ukuze kuqeqetshwe abamemezeli ukuthi benelise ukutshumayela lokufundisa kuhle. Izikolo lezi zanceda abantu bakaNkulunkulu ukuthi balungele umsebenzi owawusazokwenziwa.

¹³ Nxa sikhangela izinto lezi ezazisenzakala kuyazicacela ukuthi uJehova wayebakhokhela abantu bakhe ngalesosikhathi esasinzima. Kusukela iMpi Yomhlaba Yesibili yaphela, emazweni amanengi kulokuthula njalo oFakazi bakhululekile ukwenza umsebenzi wokutshumayela. Umsebenzi lo uyaphumelela sibili ngoba banengi abantu asebefunde ngoJehova.

14. Kungani kumele sikuthembe lokho esikutshelwa yinhlanganiso kaJehova kanye labadala ababekiweyo? (ISambulo 2:1) (Khangela lomfanekiso.)

¹⁴ Lamuhla abafowethu beQula Elikhokhelayo baqhubeka bezama ukulandela konke okutshiwo nguKhristu kukho konke abakwenzayo. Bafuna ukuthi konke abakutshela abazalwane kuvumelane lalokho okufunwa nguJehova loJesu. Basebenzisa ababonisi beziqinti labadala ukuze bakhokhele amabandla.c Abadala abagcotshiweyo ‘basesandleni sokudla’ sikaKhristu. (Bala iSambulo 2:1.) Abadala bayake baphambanise ngoba balesono. UMosi loJoshuwa babeke baphambanise ngezinye izikhathi njalo labaphostoli babeke bawenze amaphutha. (Nani. 20:12; Josh. 9:​14, 15; Rom. 3:23) Lanxa kunjalo uKhristu uyayikhokhela inceku ethembekileyo labadala ababekiweyo futhi uzaqhubeka elabo “kuze kube yisiphetho somumo lo wezinto.” (Mat. 28:20) Ngakho kumele sibathembe ngenhliziyo yonke labo uJehova ababekileyo ukuthi basikhokhele.

UKUVUMA UKUKHOKHELWA NGUJEHOVA KUYASINCEDA

15-16. Ufundani kulabo abavuma ukukhokhelwa nguJehova?

¹⁵ UJehova uyasibusisa nxa singahlala sivuma ukukhokhelwa nguye. Ngokwesibonelo, u-Andy loRobyn balalela lokho esikukhuthazwa yinhlanganiso ukuthi singabi lezinto ezinenginengi empilweni. (Khangela umcijo wokutaditsha okuMathewu 6:22 ku-Nguqulo Yomhlaba Omutsha yesiNgisi.) Lokhu kwabanceda ukuthi benelise ukuncedisa ekwakhiweni kwezakhiwo zenhlanganiso. URobyn uthi: “Kwezinye izikhathi siyake sihlale ezindlini ezincane kakhulu eziyabe zingela lekhitshi. Ngathengisa lemitshina yami yokuthatha imifanekiso. Ngangikuthanda kakhulu ukuthatha imifanekiso yikho ngakhala sengiyithengisa. Kodwa ngangizimisele ukukhangela okuphambili hatshi okusemuva njengalokho okwenziwa ngumka-Abrahama uSara.” (Heb. 11:15) Kwabanceda ngani abakwenzayo? URobyn uthi: “Kuyasithokozisa kakhulu ukwazi ukuthi sinikela konke esilakho kuJehova. Ukwenza imisebenzi esiyiphiwa nguJehova kusinika inzwisa yokuthi kuzabe kunjani ukuphila emhlabeni omutsha.” U-Andy yena uthi: “Ukwazi ukuthi senze konke okusemandleni ethu ukuze sisekele umsebenzi woMbuso kusenza sisuthiseke.”

¹⁶ Kuyini okunye esikutholayo nxa siqhubeka sivuma ukukhokhelwa nguJehova? Njengoba sihlala sikhuthazwa ukusebenzela uJehova, omunye udade osakhulayo okuthiwa nguMarcia wathi eqeda isikolo wacabanga ukuthi aphayone. (Mat. 6:33; Rom. 12:11) Uthi: “Ngathola abantu ababezangibhadalela ukuyafunda eyunivesithi okweminyaka emine kodwa ngangifuna ukusebenzela uJehova. Yikho ngakhetha ukufundela umsebenzi wezandla owawuzanginceda ukuthi ngizinakekele ngesikhathi ngiphayona. Angizisoli ngitsho ngalokho engakhetha ukukwenza. Khathesi ngiyakholisa ukuba liphayona lesikhathi sonke. Umsebenzi wami uyangivumela ukuthi ngiyencedisa eBhetheli okwamalanga athile njalo sengisenza leminye imisebenzi eqakathekileyo ekukhonzeni.”

17. Kuyini okunye esikutholayo nxa singahlala sivuma ukukhokhelwa nguJehova? (U-Isaya 48:​17, 18)

¹⁷ Kwezinye izikhathi siyake sicetshiswe ukuthi sinanzelele ukuthi singacini sithanda izinto zomhlaba. Siyake sixwayiswe lokuthi singenzi izinto ezingenza sicine sephule umthetho kaNkulunkulu. Siyancedakala kakhulu nxa silandela lokho esikutshelwa nguJehova. Siba lomzwangedwa ohlanzekileyo futhi asibi lenhlupho ezehlela abantu abangalaleliyo. (1 Thim. 6:​9, 10) Lokhu kwenza senelise ukukhonza uJehova ngenhliziyo yonke futhi sithole intokozo lokuthula kanye lokusuthiseka.—Bala u-Isaya 48:​17, 18.

18. Kungani uzimisele ukuhlala uvuma ukukhokhelwa nguJehova?

¹⁸ Asithandabuzi ukuthi uJehova uzaqhubeka esebenzisa abantu ukuze asikhokhele ngesikhathi sokuhlupheka okukhulu langesikhathi sokubusa kukaJesu kweminyaka eyinkulungwane. (Hubo. 45:16) Sizaqhubeka silalela yini lanxa sitshelwe lokho esiyabe singafuni ukukwenza? Lokho kuzakuya ngokuthi siyavuma yini ukukhokhelwa nguJehova khathesi. Yikho asihlaleni sivuma ukukhokhelwa nguJehova okugoqela ukulalela lokho esikutshelwa ngamadoda akhethwe ukuthi asilinde. (Isaya. 32:​1, 2; Heb. 13:17) Kanti njalo silezizatho zokumthemba uMkhokheli wethu uJehova osisusa ezintweni ezingaphambanisa ubungane bethu laye asise endleleni eya ekuphileni okungapheliyo emhlabeni omutsha.