ISIFUNDO 22
Ungenzani Ukuze Utshele Abanye Izindaba Ezinhle?
Akuthandabuzwa ukuthi uyafisa ukuxoxela abanye iqiniso eliseBhayibhilini! Phela wonke umuntu kumele azazi izindaba ezinhle. Kodwa engxenye uyesaba ukuxoxela abanye osukufundile. Ake sixoxe ngokuthi ungenzani ukuze ube lesibindi njalo ukukholise ukutshumayela izindaba ezinhle.
1. Ungenzani ukuze uxoxele abantu obaziyo osukufundile?
Abafundi bakaJesu bathi: “Asingeke siyekele ukukhuluma ngezinto esizibonileyo lesizizwileyo.” (ImiSebenzi 4:20) Babelithanda iqiniso ababelifundiswe nguJesu yikho babefuna ukulitshela wonke umuntu. Wena uyafuna yini ukuxoxela abanye osukufundile eBhayibhilini? Ungaqalisa ngokuxoxela abangakini labangane bakho.—Bala uKholose 4:6.
Nanku ongakwenza
Nxa ufuna ukuxoxela abangakini osukufundile, ungaqala ngokuthi: “Kulento ebengingayazi engiyifunde eBhayibhilini.”
Balela umngane wakho ogulayo kumbe okhathazekileyo ivesi ezamduduza.
Xoxela osebenza labo ukuthi ufundeni emhlanganweni wethu kumbe ekufundeni kwakho iBhayibhili.
Tshela abangane bakho ngewebhusayithi yethu i-jw.org.
Cela abanye obaziyo ukuthi bakujoyine nxa ufunda iBhayibhili kumbe ubatshele bangene ku-jw.org ukuze bacele ukuvakatshelwa ngoFakazi.
2. Kungani kumele uzimisele ukutshumayela labanye abasebandleni?
Abafundi bakaJesu abazange batshumayeze abantu ababaziyo kuphela. UJesu ‘wabathuma ngababili’ ukuthi bahambe betshumayela ‘kuwo wonke amadolobho.’ (ULukha 10:1) Ukutshumayela ngalindlela kwanika abantu abanengi ithuba lokuzwa izindaba ezinhle. Kwaphinda kwenza labafundi bakukholisa ukwenza umsebenzi lo bendawonye. (ULukha 10:17) Wena uyafisa yini ukuthi ngelinye ilanga utshumayele labanye abasebandleni?
GEBHA UJULE
Engxenyeni le uzabona ukuthi ungenzani ukuze ube lesibindi njalo ukukholise ukutshumayela izindaba ezinhle.
3. UJehova uzakuncedisa
Abanye abantu bayafisa ukutshumayela kodwa bayesaba ukuthi abantu bazathini.
Uyesaba yini ukuxoxela abanye osukufunde eBhayibhilini? Kuyini okukwenza wesabe? Kuyini okwenza ungesabi?
Bukelani IVIDIYO beselixoxa ngombuzo olandelayo.
Abasakhulayo obabone kuvidiyo benzani ukuze banqobe ukwesaba?
Bala u-Isaya 41:10 beselixoxa ngombuzo lo:
Kungani kumele uthandaze kuJehova nxa usesaba ukutshumayela?
Ubukwazi yini?
OFakazi bakaJehova abanengi baqalisa besesaba ukutshumayela izindaba ezinhle. Ngokwesibonelo, uSergey wayezizwa engasimuntu walutho futhi wayethwala nzima ukuxoxa labantu. Kodwa ngemva kokufunda iBhayibhili wathi: “Ngaqalisa ukuxoxela abanye engangikufunda lanxa ngangisesaba. Kancane kancane ngaba lesibindi sokutshumayela futhi lokhu kwaluqinisa ukholo lwami.”
4. Khuluma ngenhlonipho
Nxa utshela abanye izindaba ezinhle kuqakathekile ukunanzelela amazwi akho lendlela okhuluma ngayo. Bala u-2 Thimothi 2:24 lo-1 Phetro 3:15 beselixoxa ngemibuzo le:
Ungakusebenzisa njani okusemavesini la nxa uxoxa labanye ngeBhayibhili?
Kuyini okumele ukwenze nxa abangakini kumbe abangane bakho bengavumelani lezinto ozifunda eBhayibhilini? Kuyini okungamelanga ukwenze?
Kungani kungcono ukusebenzisa imibuzo ezabenza bazwisise iqiniso eliseBhayibhilini kulokubabamba ngamandla ukuthi bakholwe lokho obatshela khona?
5. Ukutshumayela izindaba ezinhle kwenza sithokoze
UJehova wanika uJesu umsebenzi wokutshumayela izindaba ezinhle. UJesu wayewubona njani umsebenzi lo? Bala uJohane 4:34 beselixoxa ngemibuzo le:
Ukudla kusigcina siphila futhi kwenza sithokoze. UJesu wathi ukwenza intando kaNkulunkulu, okuhlanganisa lokutshumayela izindaba ezinhle kunjengokudla kuye. Kungani watsho njalo?
Ubona angani ukutshumayela kungakunceda njani ukuthi uthokoze?
Amacebo angakunceda
Nxa usemhlanganweni esiba lawo phakathi kweviki, nanzelela indlela zokuqalisa ingxoxo ongazilingisela.
Buza lowo okufundisayo ukuthi ungenzani ukuze ubhalise ukwenza inkulumo emhlanganweni waphakathi kweviki. Ukwenza inkulumo lezi kuzakunceda ukuthi ube lesibindi sokutshumayeza abanye abantu.
Phrakthiza ukuthi ungaphendula njani imibuzo kumbe okunye okujayele ukukhulunywa ngabantu usebenzisa ingxenye ethi, “Abanye Bathi” lethi, “Nxa Omunye Angathi.”
NXA OMUNYE ANGATHI: “Wenzani kulezinsuku?”
Ungalisebenzisa njani ithuba lelo ukuthi uhle ukhulume ngalokho osukufundile eBhayibhilini?
ISIFINQO
Ukutshumayela izindaba ezinhle kuzakwenza uthokoze, yikho ungesabeli khatshana ukukwenza.
Ufundeni?
Kungani kumele uxoxele abanye izindaba ezinhle?
Ungakwenza njani ngendlela etshengisa ukuthi uyabahlonipha?
Kuyini ongakwenza nxa usesaba ukutshumayela?
THOLA OKUNENGI
Bukela ividiyo le ukuze ubone indlela ezine ongazisebenzisa ukunika abantu ikhadi le-jw.org.
Intshumayelo Eyisibonelo Yokuhambisa Ikhadi Le-JW.ORG (1:43)
Bala uzwe ngezinto ezine ezizakunceda ukuthi wenelise ukutshumayela izindaba ezinhle.
“Usukulungele Yini Ukuba Ngumgoli Wabantu?” (INqabayokulinda, September 2020)
Bukela ividiyo le ubone ukuthi isibonelo somunye okukhulunywa ngaye eBhayibhilini singakunceda njani ukuthi ube lesibindi sokutshumayela izindaba ezinhle lanxa usesemncane.
Bala isihloko lesi ubone ukuthi ungenzani ukuze wenelise ukuxoxa labangakini ngeBhayibhili.
“Ncedisa Izihlobo Zakho Ukuthi Zifunde Iqiniso” (INqabayokulinda, March 15, 2014)