Uthando Luzakwenza Uqhubeke Utshumayela

1. Safundani emhlanganweni waboFakazi bakaJehova owenziwa minyaka yonke oka-2023?

EMHLANGANWENI waboFakazi bakaJehova owenziwa minyaka yonke oka-2023,a kwacaciswa ezinye izinto esasizikholwa njalo saphiwa lezaziso eziphathelane lenkonzo yethu. Ngokwesibonelo, okunye esakufundayo yikuthi abanye abantu bangathola ithuba lokubambana labantu bakaJehova ngemva kokubhujiswa kweBhabhiloni Enkulu. Saphinda satshelwa lokuthi kusukela ngoNovember 2023 abamemezeli boMbuso bayabe bengasabiki ezinye izinto eziphathelane lenkonzo yethu. Pho utshintsho lolu selusitsho ukuthi umsebenzi wethu wokutshumayela awusaqakathekanga yini? Hatshi!

2. Kungani umsebenzi wethu wokutshumayela usuqakatheke kakhulu khathesi? (UMakho 13:10)

² Nsuku zonke siyakubona ukuthi umsebenzi wethu wokutshumayela uqakatheke kakhulu. Ngenxa yani? Ngenxa yokuthi isihuba sakutsha, ukuphela sekuseduze. Cabanga ngalokho uJesu akukhulumayo mayelana lomsebenzi wokutshumayela owawuzakwenziwa ezinsukwini zokucina. (Bala uMakho 13:10.) Evangelini likaMathewu uJesu wathi izindaba ezinhle zazizatshunyayelwa emhlabeni wonke “ukuphela” kungakafiki. (Mat. 24:14) Ukuphela kutsho ukususwa komumo lo wezinto omubi obuswa nguSathane ungasaphindi ube khona. UJehova uselibekile ‘ilanga lehora’ okuzakwenzakala ngalo izinto lezi. (Mat. 24:36; 25:13; Imiseb. 1:7) Ilanga ngalinye elidlulayo lisisondeza kulesosikhathi. (Rom. 13:11) Kodwa kumele siqhubeke sitshumayela sisalindele ukuthi ukuphela kufike.

3. Kuyini okwenza sitshumayele?

³ Nanku umbuzo oqakathekileyo okumele sonke sicabangisise ngawo: Kungani sitshumayela izindaba ezinhle? Uthando yilo olusenza sitshumayele. Nxa sitshumayela siyabe sitshengisa ukuthi siyazithanda izindaba ezinhle lokuthi siyabathanda abantu. Kanti njalo okuqakatheke kakhulu yikuthi siyabe sitshengisa ukuthi siyamthanda uJehova kanye lebizo lakhe. Asixoxeni ngezinto lezi.

OKWENZA SITSHUMAYELE YIKUTHI SIYAZITHANDA IZINDABA EZINHLE

4. Sizwa njani nxa singemukela izindaba ezinhle?

⁴ Usasikhumbula yini isikhathi lapho owatshelwa khona izindaba ezinhle? Mhlawumbe wawutshelwe ukuthi esinye isihlobo sakho sesilomtwana kumbe ukuthi usuthole umsebenzi. Kumele ukuthi wajabula kakhulu wahle waqalisa ukutshela izihlobo labangane. Ngesikhathi usizwa izindaba ezimayelana loMbuso kaNkulunkulu khona kwahamba njani? Kumele ukuthi wathokoza kakhulu ngoba zona zindaba ezinhle ukwedlula zonke.

5. Wezwa njani ngesikhathi uqalisa ukufunda iqiniso eliseLizwini likaNkulunkulu? (Khangela lemifanekiso.)

⁵ Usakhumbula ukuthi wezwa njani ngesikhathi uqalisa ukufunda iqiniso eliseLizwini likaNkulunkulu? Zinengi sibili izinto owazifundayo. Ngokwesibonelo wafunda ukuthi uYihlo osezulwini uyakuthanda lokuthi ufuna ube semulini yabantu abamkhonzayo. Okunye owakufundayo yikuthi uthembisa ukususa ubuhlungu kanye lokuhlupheka. Wafunda lokuthi ungaba lethemba lokuphinda ubone abantu obathandayo bevuka emhlabeni omutsha. (Mak. 10:29, 30; Joh. 5:28, 29; Rom. 8:38, 39; Isam. 21:3, 4) Kumele ukuthi ukuzwa izinto lezi kwakuthokozisa kakhulu. (Luk. 24:32) Wakuthanda owawukufunda yikho wahle waqalisa ukuxoxela abanye iqiniso leli eliligugu.—Khangela uJeremiya 20:9.

6. Ufundani kulokho okwenziwa ngu-Ernest loRose?

⁶ Asixoxeni ngomunye umzalwane okuthiwa ngu-Ernest.b Wathi eleminyaka engaba ngu-10 wafelwa nguyise. U-Ernest uthi: “Ngangizibuza ukuthi ubaba uye ezulwini yini kumbe ukuthi sekuphelile ngaye. Ngangibahawukela abanye abantwana ababelaboyise.” U-Ernest wayejayele ukuya engcwabeni likayise afike aguqe athandaze esithi: “Nkulunkulu ngiyacela, ngifuna ukwazi ukuthi ubaba ungaphi.” Kwathi sekudlule iminyaka engaba ngu-17 uyise efile, oFakazi bakaJehova bacela ukufunda laye iBhayibhili. Wavuma ukufunda futhi kwamthokozisa kakhulu ukwazi ukuthi abafileyo abazi lutho, banjengomuntu oleleyo. Wafunda lokuthi iBhayibhili lithembisa ukuthi esikhathini esizayo bazavuswa. (Umtshu. 9:​5, 10; Imiseb. 24:15) Wayesezitholile izimpendulo zemibuzo eyayisimhluphe okwesikhathi eside! Iqiniso ayelifunda eBhayibhilini lamthinta kakhulu. Umkakhe uRose laye waqalisa ukufunda iBhayibhili futhi wakuthanda kakhulu ayekufunda. Babhabhathizwa ngo-1978. Babekukhuthalele ukutshela abanye izinto eziligugu ababezifundile okugoqela abangane labemuli. U-Ernest loRose sebencedise abantu abedlula 70 ukuthi bafunde ngoJehova futhi babhabhathizwe.

7. Kuyini okwenzakalayo nxa singalithanda kakhulu iqiniso eliseBhayibhilini? (ULukha 6:45)

⁷ Kuyacaca ukuthi nxa singalithanda ngenhliziyo yonke iqiniso eliseBhayibhilini akuvumi ukuthi sithule. (Bala uLukha 6:45.) Sizizwa njengabafundi bakaJesu abathi: “Kasisoze siyekele ukukhuluma ngezinto esizibonileyo lesizizwileyo.” (Imiseb. 4:20) Siyalithanda kakhulu iqiniso yikho sifuna ukulitshela abantu abanengi.

SIYATSHUMAYELA NGOBA SIYABATHANDA ABANTU

8. Kuyini okwenza sifune ukutshela abantu izindaba ezinhle? (Khangela ibhokisi elithi “Thanda Abantu Ubenze Babe Ngabafundi.”) (Khangela lomfanekiso.)

⁸ Siyabathanda abantu njengoJehova leNdodana yakhe. (Zaga. 8:31; Joh. 3:16) Siyabazwela kakhulu labo abangamaziyo kumbe ‘abangelaye uNkulunkulu’ njalo ‘abangelathemba.’ (Efe. 2:12) Inhlupho zabo zingenza babone angani basegodini elitshonayo kodwa thina silentambo engabanceda ukuthi baphume. Intambo le zindaba ezinhle ezimayelana loMbuso kaNkulunkulu. Siyabathanda kakhulu njalo siyabazwela, yikho sisenza konke okusemandleni ethu ukuthi sibatshele izindaba ezinhle. Iqiniso leli eliligugu lingenza bakhangelele ikusasa elihle, babe lokuphila okungcono khathesi futhi babe lethemba lokuthola “ukuphila koqobo” okutsho ukuphila okungapheliyo emhlabeni omutsha kaNkulunkulu.—1 Thim. 6:19.

9. Kuyini esixwayisa abantu ngakho futhi kungani? (UHezekheli 33:7, 8)

⁹ Ukuthanda abantu kwenza sibaxwayise ukuthi umhlaba lo omubi usuzatshabalaliswa. (Bala uHezekheli 33:​7, 8.) Siyabazwela omakhelwane bethu kanye lezihlobo zethu ezingamkhonziyo uJehova. Abanengi babo abakwazi ukuthi kuzakuba “lokuhlupheka okukhulu okungakaze kube khona kusukela ekuqaleni komhlaba kuze kube khathesi, njalo okungasoze kuphinde kube khona.” (Mat. 24:21) Sifuna babekwazi okuzakwenzakala ngesikhathi sokwahlulela. Phela inkolo yamanga izasuswa njalo umumo lo wezinto uzatshabalaliswa empini ye-Amagedoni. (Isam. 16:​14, 16; 17:​16, 17; 19:​11, 19, 20) Sithandazela ukuthi abantu abanengi balalele nxa sibaxwayisa besebebuya bezokhonza uJehova kanye lathi. Kodwa kuzakwenzakalani kulabo abangasoze basilalele okugoqela lezihlobo zethu?

10. Kungani kuqakathekile ukuthi siqhubeke sixwayisa abantu ngalokho okuzakwenzakala?

¹⁰ Njengoba sibonile esihlokweni esidlulileyo, kungenzeka ukuthi uJehova abasindise labo abazathi sebebone ukubhujiswa kweBhabhiloni Enkulu batshintshe besebekholwa kuye. Yikho kuqakatheke kakhulu ukuthi siqhubeke sixwayisa abantu. Cabanga ngalokhu: Esibatshela khona khathesi kungaba yikho abazakukhumbula ngalesosikhathi. (Khangela uHezekheli 33:33.) Mhlawumbe bazakhumbula lokho esasibaxwayisa ngakho bakhethe ukuzokhonza uJehova kanye lathi bengakaphuzi kakhulu. Njengoba nje umgcinijele weFiliphi watshintsha ‘sekube lokuzamazama komhlaba okukhulu’ kungenzeka ukuthi abanye abangasilaleliyo khathesi batshintshe sebebone ukubhujiswa kweBhabhiloni Enkulu.—Imiseb. 16:​25-34.

SIYATSHUMAYELA NGOBA SIYAMTHANDA UJEHOVA LEBIZO LAKHE

11. UJehova simnika njani inkazimulo lodumo lamandla? (ISambulo 4:11) (Khangela lemifanekiso.)

¹¹ Isizatho esiqakatheke kulazo zonke esenza sitshumayele izindaba ezinhle yikuthi siyamthanda uJehova kanye lebizo lakhe elingcwele. Ukutshumayela sikubona kuyindlela yokudumisa uNkulunkulu wethu esimthandayo. (Bala iSambulo 4:11.) Sivumelana lamazwi la athi: “Ufanele Jehova Nkulunkulu wethu ukwamukela inkazimulo lodumo lamandla.” Siyabe sinika uNkulunkulu inkazimulo lodumo nxa sixoxa labanye sibatshengisa ukuthi nguye ‘owadala zonke izinto’ lokuthi nguye osinika ukuphila. Siyabe sinika uJehova amandla ethu nxa sisebenza nzima, sisebenzisa isikhathi sethu lempahla yethu ukuze senze okunengi emsebenzini wokutshumayela kusiya ngezimo zethu. (Mat. 6:33; Luk. 13:24; Kol. 3:23) Ngamazwi alula nje siyakuthanda ukukhuluma ngoNkulunkulu wethu esimthandayo. Okunye esikuthandayo yikutshela abanye ngebizo lakhe lokuthi unguNkulunkulu onjani. Kungani sikuthanda ukwenza njalo?

12. Silingcwelisa njani ibizo likaJehova nxa sitshumayela?

¹² Ukuthanda uJehova kwenza sifune ukungcwelisa ibizo lakhe. (Mat. 6:9) USathane ubelokhu engcolisa ibizo likaNkulunkulu ngokukhuluma amanga ngaye. Yikho sifuna ukuncedisa abantu babone ukuthi izinto ebezikhulunywa nguSathane zingamanga. (Gen. 3:​1-5; Jobe. 2:4; Joh. 8:44) Nxa sisiya ekutshumayeleni siyabe sizimisele ukumela uNkulunkulu wethu. Loba ngubani osilalelayo simtshela iqiniso ngaye. Sifisa bonke babekwazi ukuthi ubuntu bakhe obuqakathekileyo luthando, lokuthi ubusa ngendlela eqondileyo futhi wahlulela kuhle. Sifisa babekwazi lokuthi sekuseduze ukuthi uMbuso wakhe uqede konke ukuhlupheka ubusuletha ukuthula lentokozo. (Hubo. 37:10, 11, 29; 1 Joh. 4:8) Nxa sitshela abantu izinto lezi ezimayelana loJehova siyabe singcwelisa ibizo lakhe. Lokho kwenza sithokoze ngoba siyabe sisenza khona kanye okutshiwo libizo lethu elithi oFakazi bakaJehova. Kungani sisitsho njalo?

13. Kungani sikubona kuyisibusiso ukuba ngoFakazi bakaJehova? (U-Isaya 43:10-12)

¹³ UJehova usikhethile ukuthi sibe ‘ngofakazi’ bakhe. (Bala u-Isaya 43:10-12.) Eminyakeni eyadlulayo, eyinye incwadi yeQula Elikhokhelayo yathi: “Isibusiso esikhulu kulazo zonke umuntu angasithola ngesokuthi abizwe ngokuthi nguFakazi kaJehova.” Kungani yatsho njalo? Cabanga ngomzekeliso lo: Ake sithi umangalelwe ngokuthi wenze into embi. Nxa udinga umuntu ongakufakazela ukuthi ungumuntu olungileyo lokuthi ngeke wenze into enjalo, ubungakhetha umuntu onjani? Kufanele ukuthi ubuzakhetha umuntu omazi kuhle, omthembayo futhi okuzaba lula ukuthi abantu bamkholwe. UJehova ukhethe thina ukuthi sibe ngoFakazi bakhe ngoba usazi kuhle futhi kathandabuzi ukuthi sizamfakazela ukuthi nguye yedwa uNkulunkulu weqiniso. Sikubona kuyisibusiso esikhulu ukuba ngoFakazi bakhe, yikho lonke ithuba esilitholayo siyalisebenzisa ukutshela abantu ngebizo lakhe lokuveza egcekeni amanga akhulunywa ngaye. Nxa singenza njalo siyabe sisenza khona kanye okutshiwo libizo lethu. Siyazigqaja ngokuba ngoFakazi bakaJehova!—Hubo. 83:18; Rom. 10:​13-15.

SIZAQHUBEKA SITSHUMAYELA KUZE KUBE SEKUCINENI

14. Kuyini esikhangelele ukuthi kungenzakala esikhathini esizayo?

¹⁴ Sikulindele ngabomvu ukubona izinto ezizakwenzakala esikhathini esizayo! Sikhulekela ukuthi uJehova asibusise sibone abantu abanengi besamukela iqiniso ukuhlupheka okukhulu kungakaqalisi. Okunye esikukhangeleleyo yikuthi langesikhathi sokuhlupheka okukhulu abanye abantu bazatshiya umhlaba kaSathane babuye bezokhonza uJehova ndawonye lathi!—Imiseb. 13:48.

15-16. Yiwuphi umsebenzi esizaqhubeka siwenza futhi sizawenza kuze kube nini?

¹⁵ Sisamelele ukuthi konke lokhu kwenzakale kulomsebenzi okumele siqhubeke siwenza. Silesibusiso sokutshumayela izindaba ezinhle zoMbuso kaNkulunkulu emhlabeni wonke njalo umsebenzi lo awusoze uphinde wenziwe. Kanti njalo kumele siqhubeke sixwayisa abantu ngezinto esezizakwenzakala. Abantu kumele babekwazi ukuthi ukuphela komumo lo wezinto sekuseduze kakhulu. Nxa isikhathi sokwahlulela singafika bazakwazi ukuthi sasitshumayela ilizwi elivela kuJehova uNkulunkulu.—Hez. 38:23.

¹⁶ Kuyini esizimisele ukukwenza? Sizimisele ukuqhubeka siwuqakathekisa umsebenzi wokutshumayela futhi siwenza ngentshiseko ngenxa yokuthi siyazithanda izindaba ezinhle futhi siyabathanda abantu. Okuqakatheke kakhulu yikuthi siyamthanda uJehova lebizo lakhe. Umsebenzi lo sizawenza aze athi “Sekwanele!”