Hlala Useduze Lenhlanganiso KaJehova

UMFUNDI uJakhobe wabhala wathi: “Sondelani kuNkulunkulu, laye uzasondela kini.” (Jak. 4:8) UJehova uphakeme sibili kodwa kakhatshana lathi. Lanxa silesono uyayilalela imithandazo yethu. (ImiSeb. 17:27) Singasondela njani kuNkulunkulu? Ngokuthandaza kuye ngenhliziyo yonke ukuze sibe lobungane laye. (Hubo. 39:12) Okunye okungasinceda yikubala iBhayibhili nsukuzonke ngoba kwenza simazi uJehova, sazi injongo yakhe lokuthi kuyini akukhangelele kithi. (2 Tim. 3:16, 17) Singenza njalo sizamthanda kakhulu besesiphila ngendlela emthokozisayo.—Hubo. 25:14.

² UJesu nguye owenza senelise ukusondela kuYise uJehova. (Joh. 17:3; Rom. 5:10) Akulamuntu ongenza simazi ngcono uJehova ngaphandle kukaJesu. Wayeseduze kakhulu loYise yikho wathi: “Kakho okwaziyo ukuthi iNdodana ingubani ngaphandle kukaBaba, futhi kakho okwaziyo ukuthi uBaba ungubani ngaphandle kweNdodana, kanye lalowo iNdodana efuna ukumveza kuye.” (Luk. 10:22) Ngakho ukuhlolisisa amaVangeli ukuze sifunde ngempilo kaJesu kwenza sizwisise indlela uJehova acabanga ngayo besesisondela kuye.

³ Ukuhlala siseduze lenhlanganiso kaJehova eyiyo esinceda ukuthi senze intando yakhe, kutshengisa ukuthi siyazehlisa kuJesu oyiNhloko yebandla lokuthi silobuhlobo obuhle loJehova. Njengoba kwaphrofethwa kuMathewu 24:45-47, iNkosi uJesu ibeke ‘inceku ethembekileyo lehlakaniphileyo’ ukuthi inike izisebenzi zalapha ekhaya ‘ukudla ngesikhathi esifaneleyo.’ Inceku ethembekileyo isinika ukudla okunengi okusiqinisa ukholo. UJehova uyayisebenzisa ukuthi isikhuthaze ukubala iLizwi lakhe nsuku zonke, singene yonke imihlangano njalo sikhuthale ekutshumayeleni ‘izindaba ezinhle zoMbuso.’ (Mat. 24:14; 28:19, 20; Josh. 1:8; Hubo. 1:1-3) Lanxa inceku le ibunjwa ngabantu abalesono, asithandabuzi ukuthi ikhokhelwa nguNkulunkulu. Kufanele sizimisele ukuhlala siseduze lengxenye yasemhlabeni yenhlanganiso kaJehova futhi silandele konke ekutshoyo. Singenza njalo sizahlala siseduze loJehova njalo uzasivikela futhi asiqinise nxa siphakathi kwenhlupho.

KUNGANI INHLUPHO ZISIBA ZINENGI?

⁴ Nxa usuleminyaka eminengi usenhlanganisweni, kumele ukuthi usubekezelele inhlupho ezinengi ukuze uhlale uqotho kuJehova. Lanxa usanda kufunda iqiniso, usukwazi ukuthi uSathane uDeveli umelana laloba ngubani osekela ubukhosi bukaJehova. (2 Tim. 3:12) Kungelani lokuthi usubekezelele inhlupho ezinganani, akumelanga wesabe kumbe udane. UJehova uthembisa ukukuncedisa lokukunika umvuzo wokuphila okungapheliyo ngesikhathi esizayo.—Heb. 13:5, 6; Isam. 2:10.

⁵ Sonke sizahlangana lobunzima kulezinsuku zokucina esiphila kuzo. Khumbula ukuthi uSathane waxotshwa ezulwini ngo-1914 ngesikhathi uMbuso kaNkulunkulu uqalisa ukubusa. Yena lezingilosi zakhe ezimbi baphoselwa emhlabeni njalo abazange bavunyelwe ukubuyela ezulwini. Lokhu kubangele inhlupho emhlabeni kanye lokuhlukuluzwa kwezinceku zikaJehova. Kuyazicacela sibili ukuthi uSathane uzonde kakhulu lokuthi siphila ensukwini zokucina zokubusa kwakhe.—Isam. 12:1-12.

⁶ USathane uyakwazi ukuthi usesalelwe yisikhathi esincane. Yikho yena lamadimoni akhe bazama ngamandla wonke ukuphambanisa umsebenzi wokutshumayela ngoMbuso kanye lokumanyana kwezinceku zikaJehova. Lokhu kwenza sibe sempini yokulwela ukholo lwethu. IBhayibhili lithi empini le “kasilwi lenyama legazi kodwa silwa labohulumende, leziphathamandla, lababusi bomhlaba lo olobumnyama, lezidalwa zomoya ezimbi ezisezindaweni ezisemazulwini.” Nxa sifuna ukunqoba, kuqakathekile ukuthi silwe ngamandla ethu wonke futhi sihlale sigqoke izigqoko zokuzivikela. Kufanele ‘sime siqine ukuze simelane lezenzo zikaDeveli zobuqili.’ (Efe. 6:10-17) Lokhu kutsho ukuthi kumele sibe ngabantu abaqiniselayo.

UKUQINISELA

⁷ Ukuqinisela kutsho “ukwenelisa ukumelana lenhlupho loba ubunzima.” Nxa iBhayibhili likhuluma ngokuqinisela, liyabe lisitsho ukuzimisela ukwenza okuqondileyo lanxa uphakathi kobunzima, uphikiswa, uhlukuluzwa kumbe ukwesinye nje isimo esingaphambanisa ubuqotho bakho. Kuqakathekile ukuthi amaKhristu alwele ukuba ngabantu abaqiniselayo. Kodwa kuthatha isikhathi ukwenza njalo. Nxa singaqinisa ukholo lwethu, sizakwenelisa ukuqinisela ebunzimeni. Ukubekezelela inhlupho ezincane esihlangana lazo nxa sisanda kuba ngamaKhristu, kuzakwenza sibe lamandla okuqinisela nxa sesihlangana lezinkulu. (Luk. 16:10) Ukuba qotho ezintweni ezincane kuzasinceda ukuthi sihlale silokholo oluqinileyo lanxa sisebunzimeni. Akumelanga silindele inhlupho ezinkulu ukuze sitshengise ukuthi sizimisele ukuhlala siqotho kuJehova. Umphostoli uPhetro wabhala ngokuqakatheka kokuba ngabantu abaqiniselayo. Wathi: “Zamani ngamandla wonke ukwengezelela ubuhle ekukholweni kwenu, ebuhleni benu lengezelele ulwazi, elwazini lwenu ukuzibamba, ekuzibambeni kwenu ukuqinisela, ekuqiniseleni kwenu ukuzinikela kuNkulunkulu, ekuzinikeleni kwenu kuNkulunkulu lengezelele uthando lobuzalwane, ethandweni lwenu lobuzalwane lengezelele ukuthanda abantu bonke.”—2 Phet. 1:5-7; 1 Tim. 6:11.

⁸ UJakhobe laye usitshela ngokuqakatheka kokuba ngabantu abaqiniselayo. Wabhala wathi: “Bafowethu, thokozani kakhulu nxa lisehlelwa yizilingo ezitshiyeneyo, njengoba lisazi ukuthi ukholo lwenu oluhlolwe ngendlela le lwenza liqinisele. Kodwa vumelani ukuqinisela kuqede umsebenzi wakho ukuze liphelele, lingabi lesici kukho konke njalo lingasileli ngalutho.” (Jak. 1:2-4) UJakhobe uthi amaKhristu kumele athokoze ngoba inhlupho ahlangana lazo ziwanika ithuba lokuthi afunde ukuqinisela. Wake wakucabanga yini lokhu? UJakhobe uphinda aveze ukuthi ukuqinisela kuthuthukisa ubuntu bethu njalo kuyasinceda ukuthi samukelwe nguNkulunkulu. Yikho inhlupho kanye lezilingo esihlangana lazo nsuku zonke ziyasinceda ukuthi siqinisele. Okuhle yikuthi ukuqinisela kwenza sibe lezinye impawu ezinhle.

⁹ Ukuqinisela kwethu kuyamthokozisa uJehova njalo kuzakwenza asinike umvuzo wokuphila phakade. UJakhobe wathi: “Uyathokoza umuntu oqhubeka eqinisela nxa elingwa ngoba uzathi esemukelwe athole umqhele wokuphila, lowo uJehova awuthembisa labo abaqhubeka bemthanda.” (Jak. 1:12) Amazwi la atshengisa ukuthi kuqakathekile sibili ukuthi siqinisele. Singehluleka ukwenza njalo kuzaba nzima ukuthi siqhubeke siseqinisweni. Nxa singavuma ukwehlulwa zinhlupho zomhlaba lo sizabuyela emuva sicine sitshiya ukukhonza. UJehova kasoze aqhubeke esinika umoya wakhe ongcwele nxa singayekela ukuqinisela njalo asisoze sibe lezithelo zomoya.

¹⁰ Inhlupho ezisehlelayo zisinika ithuba lokutshengisa ukuthi singabantu abaqiniselayo. Khumbula ukuthi uJakhobe wathi: “Thokozani kakhulu.” Kodwa lokhu akulula ngoba obunye ubunzima obusehlelayo buhlanganisa izinto ezisizwisa ubuhlungu emzimbeni kumbe ezenza sihlale sikhathazekile. Kumele sikhumbule ukuthi ukuqinisela kwethu yikho okuzakutsho ukuthi sizakuthola yini ukuphila okungapheliyo kumbe hatshi. Okwenzakala kubaphostoli kwenza sibone ukuthi singenelisa ukuthokoza lanxa sisebunzimeni. IBhayibhili lithi: “Babiza abaphostoli bababhaxabula. Ngemva kwalokho babaqonqosela ukuthi bangakhulumi ngebizo likaJesu, basebebayekela bahamba. Ngakho basuka phambi kwenkundla yeSanihedrini bethokoza ngenxa yokuthi kwakubonakale kufanele ukuthi baphathwe kubi ngenxa yebizo lakhe.” (ImiSeb. 5:40, 41) Abaphostoli babekuzwisisa ukuthi ukuhlukuluzwa kwabo kwakutshengisa ukuthi babesenza khona kanye uJesu ayebathume khona lokuthi babethokozisa uJehova. Ngokuya kwesikhathi uPhetro waphefumulelwa ukuthi akhulume ngobuhle bokuhlupheka ngenxa yokuba ngamaKhristu.—1 Phet. 4:12-16.

¹¹ Esinye isibonelo ngesikaPhawuli loSila. Bathi betshumayela eFiliphi babotshwa njalo betheswa icala lokuphambanisa idolobho lelokufundisa amasiko angekho emthethweni. Ngemva kwalokho batshaywa basebevalelwa ejele. IBhayibhili lisitshela ukuthi “phakathi kwamabili uPhawuli loSila babethandaza futhi behlabela bedumisa uNkulunkulu, izibotshwa zibalalele.” (ImiSeb. 16:16-25) Babekuzwisisa ukuthi ukuhlupheka kwabo ngenxa kaKhristu kwakungatshengisi ukuthi baqotho kuNkulunkulu kuphela kodwa kwakubanika lethuba lokunceda abanye ukuthi bazwe izindaba ezinhle. Ngalobo busuku umgcinijele lemuli yakhe bamukela izindaba ezinhle basebesiba ngabafundi. (ImiSeb. 16:26-34) UPhawuli loSila bathembela kuJehova ukuthi wayezabancedisa ebunzimeni ababekubo. Lakanye uJehova wabasekela.

¹² Lalamuhla uJehova usipha konke esikudingayo ukuze asincede siqinisele nxa siphakathi kwenhlupho. Usinike iLizwi lakhe eliphefumulelweyo ukuze sazi iqiniso mayelana lenjongo yakhe. Ukulibala kuyaluqinisa ukholo lwethu. Okunye njalo okusincedayo yikuhlangana ndawonye ukuze sikhonze uNkulunkulu. Siphinda sibe lesibusiso sokuthandaza kuJehova futhi lokhu kwenza sibe seduze laye. Uyasilalela nxa sithandaza ngenhliziyo yonke simcela ukuthi asisize sihlale sithembekile kuye. (Flp. 4:13) Kanti njalo ukucabangisisa ngethemba eliphambi kwethu kuyasinceda ukuthi sithole amandla okuqinisela.—Mat. 24:13; Heb. 6:18; Isam. 21:1-4.

INHLUPHO ESINGAHLANGANA LAZO

¹³ Lamuhla oFakazi bakaJehova bahlangana lenhlupho ezifanana lalezo amaKhristu akuqala ahlangana lazo. Ngokwesibonelo, bayahlukuluzwa ngabaphikisi abangalaziyo iqiniso ngathi. Njengoba kwakunjalo ngesikhathi sabaphostoli, abakhwezela ukuthi sihlukuluzwe ngabenkolo, abayibo abafundisa izinto ezingasekelwanga eLizwini likaNkulunkulu njalo abaphila ngendlela engavumelani lalokho elikutshoyo. (ImiSeb. 17:5-9, 13) Ezimeni ezinjalo abantu bakaNkulunkulu bajayele ukuzivikela besebenzisa amalungelo abawaphiwe nguhulumende. (ImiSeb. 22:25; 25:11) Kodwa kwezinye izikhathi ohulumende yibo abavimba umsebenzi wethu. (Hubo. 2:1-3) Nxa kungaba njalo kumele silandele isibonelo sabaphostoli abathi: “Kumele silalele uNkulunkulu umbusi kulokuthi silalele abantu.”—ImiSeb. 5:29.

¹⁴ Ezombusazwe zenza kube nzima ukuthi abantu bakaNkulunkulu baqhubeke besenza umsebenzi abawuphiweyo. Loba kunjalo izinceku zikaJehova zihlala zikhumbula isixwayiso esikuSambulo 14:9-12 esimayelana ‘lokukhonza isilo lesithombe saso.’ Ziyakubona sibili ukuqakatheka kwamazwi kaJohane athi: “Lapha yikho okufuneka khona ukuthi abangcwele baqinisele, labo abagcina imilayo kaNkulunkulu lababambelela ekukholweni kukaJesu.”

¹⁵ Izimpi, ukuhlukuluzwa kumbe ukuvinjelwa komsebenzi wethu kungenza kube nzima ukuthi sikhonze uNkulunkulu sikhululekile. Ngokwesibonelo singehluleka ukuhlangana njengebandla, ukuthintana legatsha kumbe kube nzima ukuthi umbonisi wesiqinti avakatshele amabandla. Kanti njalo singehluleka lokuthola amabhuku adindwa yinhlanganiso. Kuyini okufanele ukwenze nxa kungenzakala lokhu?

¹⁶ Zama ukwenza okusemandleni akho. Ngokwesibonelo, zinike isikhathi sokufunda uwedwa. Ungenelisa lokuyahlangana labanye ezindlini zabazalwane futhi kuleyomihlangano eyenziwa ngamaqembu amancane, kungasetshenziswa amabhuku elilawo loba iBhayibhili ngokwalo. Kodwa akumelanga sikhathazeke size siphaphatheke. IQula Elibusayo liyabe lizabona ukuthi lingathintana njani labazalwane abafaneleyo.

¹⁷ Lanxa kungenzakala ukuthi awusenelisi ukuhlangana labafowethu labodadewethu, hlala ukhumbula ukuthi uJehova leNdodana yakhe uJesu Khristu balawe. Qinisa ithemba olalo, njalo uqhubeke uthandaza kuJehova. Uzayilalela imithandazo yakho futhi uzakuncedisa ngomoya wakhe ongcwele aphinde akuqondise. Okunye okungamelanga ukukhohlwe yikuthi uyinceku kaJehova lokuthi ungumlandeli kaJesu Khristu. Yikho sebenzisa loba yiliphi ithuba olitholayo ukuthi utshumayeze abantu. UJehova uzayibusisa yonke imizamo oyenzayo njalo kungenzakala lokuthi abanye obatshumayezayo bacine sebeyizikhonzi zakhe.—ImiSeb. 4:13-31; 5:27-42; Flp. 1:27-30; 4:6, 7; 2 Tim. 4:16-18.

¹⁸ Lanxa usukhangelane lokufa, lingisela abaphostoli uthembe “uNkulunkulu ovusa abafileyo.” (2 Khor. 1:8-10) Ukukholwa ukuthi abafileyo bazavuswa kuzakunceda ukuthi uqinisele nxa uhlukuluzwa. (Luk. 21:19) UJesu Khristu wasitshiyela isibonelo okumele sisilandele. Wayekwazi ukuthi ukuqhubeka ethembekile ngesikhathi esebunzimeni kwakuzanceda labanye ukuthi baqinisele. Nxa ungamlingisela, uzakuba yisibonelo esihle kwabanye.—Joh. 16:33; Heb. 12:2, 3; 1 Phet. 2:21.

¹⁹ Ukuhlukuluzwa lokuphikiswa ayisikho kodwa okumele sikubekezelele. Ngokwesibonelo abanye bakhathazwa yikungalaleli kwabantu ensimini abatshumayela kuyo. Abanye njalo bahlutshwa yikugula loba ezinye nje inhlupho ezibangelwa yisono esilaso. Umphostoli uPhawuli laye wayelohlupho olwalubangela ukuthi athwale nzima enkonzweni yakhe. (2 Khor. 12:7) U-Ephafrodithu owaphila ngesikhathi sabaphostoli njalo edabuka eFiliphi laye wake ‘wahlulukelwa ngoba [abanye bakhe] babezwe ukuthi uyagula.’ (Flp. 2:25-27) Isono esilaso singabangela ezinye inhlupho okungabanzima ukuzibekezelela. Singenza kube lokungazwanani phakathi kwethu lalabo esikhonza labo kumbe labanye emulini. Okungasinceda ukuthi sinqobe futhi siqinisele ezimeni ezinjalo yikulandela lokho okutshiwo liLizwi likaJehova.—Hez. 2:3-5; 1 Khor. 9:27; 13:8; Kol. 3:12-14; 1 Phet. 4:8.

ZIMISELE UKUHLALA UTHEMBEKILE

²⁰ Asizimiseleni ukuqhubeka sibambelele kuJesu Khristu obekwe nguJehova ukuthi abe yiNhloko yebandla. (Kol. 2:18, 19) Kufanele sibambisane ‘lenceku ethembekileyo lehlakaniphileyo’ kanye lalabo ababekwe ukuthi babe ngababonisi. (Heb. 13:7, 17) Nxa singalandela indlela uJehova ahlele ngayo izinto enhlanganisweni njalo silalele abakhokhelayo, sizakwenza intando yakhe ngendlela ehlelekileyo. Kanti njalo kumele sihlale sithandaza kuye. Khumbula ukuthi akulalutho olungenza sehluleke ukukhuluma loBaba wethu osithandayo kumbe olungaphambanisa ukumanyana kwethu, ngitsho lemiduli yejele ngeke ikwenze lokhu.

²¹ Kasiqiniseleni njalo sizimisele ukuqhubeka sikhuthele emsebenzini wokutshumayela uJesu awunika abalandeli bakhe ngesikhathi esithi: “Ngakho-ke hambani liyekwenza abantu bezizwe zonke babe ngabafundi, libabhabhathize ebizweni likaBaba leleNdodana lelomoya ongcwele, libafundise ukulandela izinto zonke engililaye zona.” (Mat. 28:19, 20) Kasizimiseleni ukuqinisela njengoJesu futhi sihlale sicabangisisa ngethemba lokuphila phakade kanye lezibusiso ezizalethwa nguMbuso. (Heb. 12:2) Njengoba singabalandeli bakaKhristu ababhabhathiziweyo, kuyisibusiso ukuthi sincedise ekugcwaliseni isiphrofetho sikaJesu esimayelana ‘lesiphetho somumo lo wezinto.’ Wathi: “Lezizindaba ezinhle zoMbuso zizatshunyayelwa emhlabeni wonke ukuze kube lobufakazi ezizweni zonke, besekufika ukuphela.” (Mat. 24:3, 14) Nxa singawenza ngenhliziyo yonke umsebenzi lo, sizathola isibusiso sokuphila phakade emhlabeni omutsha esiwuthenjiswe nguJehova.