Siyaliqakathekisa Ibizo LikaJehova

1-2. Sikwazi njani ukuthi uJesu uyaliqakathekisa ibizo likaJehova?

ESIHLOKWENI esidlulileyo sibonile ukuthi uJesu uyaliqakathekisa kakhulu ibizo likaYise. Wenza konke okusemandleni akhe ukuze afundise abantu ngoJehova njalo wayelithanda ibizo lelo okokuthi wayezimisele lokulifela. (Mak. 14:36; Heb. 10:​7-9) Ngitsho langemva kokubusa kwakhe okweminyaka eyinkulungwane, uJesu uzabuyisela uMbuso kuYise ukuze angcwelise ibizo lakhe. (1 Khor. 15:​26-28) Konke uJesu akwenzayo ngenxa yebizo likaJehova kutshengisa ukuthi uyamthanda kakhulu.

² UJesu weza emhlabeni ngebizo likaYise. (Joh. 5:43; 12:13) Wancedisa abafundi bakhe bazwisisa ukuthi ibizo lelo litshoni sibisibili. (Joh. 17:​6, 26) Wakwenza kwacaca ukuthi ayekufundisa wayekuthatha kuYise lokuthi nguye owayemnika amandla okwenza izimangaliso. (Joh. 10:25) Ngesikhathi ethandaza wacela ukuthi uJehova avikele abafundi bakhe ‘ngenxa yebizo lakhe [uJehova].’ (Joh. 17:11) Manje kuyavuma yini ukuthi umuntu othi ungumlandeli kaKhristu athi kalazi ibizo likaJehova futhi angalisebenzisi?

3. Sizaxoxa ngani esihlokweni lesi?

³ Lathi siyalithanda futhi siyalihlonipha ibizo likaJehova njengoJesu. (1 Phet. 2:21) Esihlokweni lesi sizaxoxa ngokuthi kungani abantu abatshumayela ‘izindaba ezinhle zoMbuso’ bebizwa ngebizo likaJehova. (Mat. 24:14) Sizaxoxa langokuthi kungani kumele ngamunye wethu aliqakathekise ibizo likaJehova.

“ABANTU BEBIZO LAKHE”

4. (a) UJesu wabatshelani abafundi bakhe engakabuyeli ezulwini? (b) Lokhu kwenza kube lawuphi umbuzo?

⁴ UJesu engakabuyeli ezulwini watshela abafundi bakhe wathi: “Lizakwamukela amandla nxa umoya ongcwele ufika kini njalo lizakuba ngofakazi bami eJerusalema lakulo lonke elaseJudiya leSamariya kuze kuyefika emaphethelweni omhlaba.” (Imiseb. 1:8) Lokhu kutshengisa ukuthi abafundi bakaJesu babengasoze batshumayele ko-Israyeli kuphela kodwa babezachaphela lakwezinye izizwe. Lokhu kwakuzavulela abantu emhlabeni wonke ithuba lokuthi babe ngabalandeli bakaJesu. (Mat. 28:​19, 20) Kodwa uJesu wathi: “Lizakuba ngofakazi bami.” Labo ababesanda kuba ngabafundi bakaJesu kwakumele babelazi yini ibizo likaJehova kumbe babezakuba ngofakazi bakaJesu nje kuphela? Ake sihlole okutholakala ebhukwini lemiSebenzi isahluko 15 sithole impendulo yombuzo lo.

5. Kuyini okwenziwa ngabaphostoli labadala okutshengisa ukuthi babefuna ukuthi abantu babelazi ibizo likaJehova? (Khangela lomfanekiso.)

⁵ Ngo-49 C.E., abaphostoli lamadoda amadala bahlangana eJerusalema ukuze bahlafune udaba lokuthi abantu bezinye izizwe kwakumele basokwe yini ukuze babe ngamaKhristu. Ekuphetheni komhlangano lo, uJakhobe umfowabo kaJesu wathi: “[UPhetro] usesilandisele konke okumayelana lokuthi uNkulunkulu wabakhumbula njani abezinye izizwe ukuze aqalise ukuthatha abantu bebizo lakhe phakathi kwabo.” UJakhobe wayekhuluma ngaliphi ibizo lapha? Wakhuluma lamazwi abhalwa ngumphrofethi u-Amosi athi: “Ukuze abantu abaseleyo bamdinge ngenhliziyo yonke uJehova belabantu bezizwe zonke, abantu ababizwa ngebizo lami, kutsho uJehova.” (Imiseb. 15:​14-18) Abafundi laba abatsha babezafunda ngoJehova baphinde ‘babizwe ngebizo lakhe.’ Lokhu kutsho ukuthi babezatshela abanye abantu ngoJehova futhi labobantu babezakwazi ukuthi abafundi laba abatsha bamela uJehova.

6-7. (a) Yiziphi izizatho ezenza uJesu wabuya emhlabeni? (b) Yisiphi esiqakatheke kulazo zonke?

⁶ Ibizo elithi Jesu litsho ukuthi “uJehova uyasindisa.” Lakanye uJehova wasebenzisa uJesu ukuze asindise bonke abakholwa kuye laseNdodaneni yakhe. UJesu wabuya emhlabeni ukuzofela abantu. (Mat. 20:28) Wavuma ukunikela ngempilo yakhe ukuze abantu bathethelelwe futhi bathole impilo engapheliyo.—Joh. 3:16.

⁷ Kungani kwakumele abantu bahlawulelwe? Indaba yaqalisela ensimini yase-Edeni. Esihlokweni esidlulileyo sibonile ukuthi abazali bethu bokuqala u-Adamu lo-Eva bahlamukela uJehova futhi lokho kwabenza balahlekelwa yisibusiso sokuthola ukuphila okungapheliyo. (Gen. 3:​6, 24) Kodwa into eqakatheke kakhulu eyayilandwe nguJesu emhlabeni kwakungasokukhulula abantu esonweni lasekufeni. Wayezongcwelisa ibizo likaNkulunkulu ngoba uSathane wayelingcolisile. (Gen. 3:​4, 5) Yikho uJesu wayelomlandu wokufundisa abantu ukuthi uJehova unguNkulunkulu ongcwele futhi uyabathanda abantu. Lakanye uJesu wakwenza lokhu.

8. Kuyini abalandeli bakaJesu okwakumele bakuzwisise?

⁸ Bonke ababezatshengisa ukuthi balokholo kuJesu kungelani lokuthi ngamaJuda kumbe ngabezinye izizwe kwakumele babekwazi ukuthi ukusindiswa kwabo kuvela kuJehova uNkulunkulu, uYise kaJesu. (Joh. 17:3) Labo njengoJesu babezabizwa ngebizo likaJehova. Kwakumele bazwisise lokuthi kuqakathekile ukungcwelisa ibizo lelo ngoba lokho kwakuzatsho ukusindiswa kwabo. (Imiseb. 2:​21, 22) Kwakuqakathekile sibili ukuthi abafundi bakaJesu bafunde ngaye langoJehova. Lokhu kwenza siwazwisise kuhle amazwi uJesu aphetha ngawo umthandazo wakhe atholakala kuJohane isahluko 17 athi: “Sengenze balazi ibizo lakho njalo ngizalenza laziwe ukuze uthando owangithanda ngalo lube kubo, lami ngibe munye labo.”—Joh. 17:26.

“LINGOFAKAZI BAMI”

9. Kuyini okumele sihlale sikukhumbula?

⁹ Esesixoxe ngakho kwenza kucace ukuthi abalandeli bakaJesu kumele bakuqakathekise ukungcweliswa kwebizo likaJehova (Mat. 6:​9, 10) Kumele sihlale sikhumbula ukuthi alikho ibizo eliqakatheke ukwedlula elikaJehova. Manje singenzani ukuze sincedise ekungcwelisweni kwebizo likaJehova lokulihlambulula emangeni akhulunywa nguSathane?

10. Kukhulunywa ngani ku-Isaya isahluko 42 kusiya ku 44? (Isaya 43:9; 44:​7-9) (Khangela lomfanekiso.)

¹⁰ Ku-Isaya isahluko 42 kusiya ku-44 sifunda okunengi okumele sikwenze ukuze sitshengise ukuthi sizimisele ukungcwelisa ibizo likaJehova. Ezahlukweni lezi uJehova utshela labo abangamkhonziyo ukuthi babuye lobufakazi bokuthi onkulunkulu babo bayaphila. Kodwa akula ngitsho loyedwa ongaletha lobo bufakazi!—Bala u-Isaya 43:9; 44:​7-9.

11. UJehova wathini ebantwini bakhe ku-Isaya 43:​10-12?

¹¹ Bala u-Isaya 43:​10-12. UJehova watshela abantu bakhe wathi: ‘Lingofakazi bami, mina nginguNkunkulu.’ Waphinda wababuza wathi: “Ukhona yini omunye uNkulunkulu ngaphandle kwami?” (Isaya. 44:8) Lathi kumele siwuphendule umbuzo lo. Izinto esizikhulumayo lesizenza nsuku zonke yizo ezizatshengisa ukuthi siyakukholwa sibili ukuthi akula omunye uNkulunkulu ngaphandle kukaJehova. Ibizo lakhe liphakeme ukwedlula wonke amabizo. Lanxa uSathane angaletha siphi isilingo sizimisele ukuqhubeka sithembekile kuJehova ngoba siyamthanda. Singenza njalo siyabe silingcwelisa ibizo likaJehova.

12. Sagcwaliseka njani isiphrofetho esiku-Isaya 40:​3, 5?

¹² Kumele silwele ibizo likaJehova njengoJesu. U-Isaya waphrofetha ukuthi kwakulomuntu ‘owayezavula [kumbe, ‘acande,’] indlela kaJehova.’ (Isaya. 40:3) Isiphrofetho lesi sagcwaliseka njani? UJohane uMbhabhathizi nguye owavulela uJesu indlela. UJesu wabuya ngebizo likaJehova futhi wayekhuluma ngalo. (Mat. 3:3; Mak. 1:​2-4; Luk. 3:​3-6) Isiphrofetho sika-Isaya saphinda sathi: “Inkazimulo kaJehova izabonakaliswa.” (Isaya. 40:5) Kwenzakala njani lokhu? UJesu wammela kuhle kakhulu uYise lapha emhlabeni okokuthi kwakungani nguJehova ngokwakhe owayesemhlabeni.—Joh. 12:45.

13. Singamlingisela njani uJesu?

¹³ Lathi singofakazi bakaJehova njengoJesu. Sibizwa ngebizo lakhe futhi sitshela abanye ngemisebenzi yakhe emangalisayo. Kodwa ukuze siphumelele ukwenza lokhu, kumele sitshele abanye ngalokho okwenziwa nguJesu ukuze angcwelise ibizo likaJehova. (Imiseb. 1:8) UJesu nguFakazi kaJehova wokuqala futhi lathi sizama ukulingisela lokho ayekwenza. (Isam. 1:5) Yiziphi ezinye izindlela esingatshengisa ngazo ukuthi siyaliqakathekisa ibizo likaJehova?

EZINYE IZINDLELA ESITSHENGISA NGAZO UKUTHI SIYALIQAKATHEKISA IBIZO LIKAJEHOVA

14. Kumele sizwe njani ngebizo likaJehova? (Hubo. 105:3)

¹⁴ Siyazigqaja ngebizo likaJehova. (Bala iHubo 105:3.) UJehova uyathokoza kakhulu nxa ebona sizigqaja ngebizo lakhe. (Jer. 9:​23, 24; 1 Khor. 1:31; 2 Khor. 10:17) “Ukuzigqaja ngoJehova” kutsho ukuthi asilanhloni ngokuthi yena unguNkulunkulu wethu. Siyambonga ngokuthi usinike isibusiso sokutshela abanye ngaye ukuthi unguNkulunkulu ongcwele lohlala esenza izinto eziqondileyo. Akumelanga kusiyangise ngitsho ukutshela esifunda labo, esisebenza labo, omakhelwane bethu labanye ukuthi singoFakazi bakaJehova. UDeveli kafuni ukuthi sitshele abanye ngoJehova. (Jer. 11:21; Isam. 12:17) Yena lalabo abamsekelayo bafuna abantu balikhohlwe ibizo likaJehova. (Jer. 23:​26, 27) Kodwa ngenxa yokuthi thina siyamthanda uJehova, sizahlala sithokoza ngebizo lakhe zikhathi zonke.—Hubo. 5:11; 89:16.

15. Kutshoni ukubiza ibizo likaJehova?

¹⁵ Siqhubeka sibiza ibizo likaJehova. (Jow. 2:32; Rom. 10:​13, 14) Ukubiza ibizo likaJehova akutsho ukulazi lokulisebenzisa nje kuphela. Kodwa kutsho lokubamazi ukuthi nguNkulunkulu onjani, ukumthemba ngenhliziyo yonke lokuhlala simcela ukuthi asincedise. (Hubo. 20:7; 99:6; 116:4; 145:18) Siphinda sitshele abantu ngebizo likaNkulunkulu, sibancedise ukuthi bamthande, baze batshintshe lendlela abaphila ngayo ukuze bamthokozise besebesindiswa.—Isaya. 12:4; Imiseb. 2:​21, 38.

16. Singenzani ukuze siwaveze egcekeni amanga kaSathane?

¹⁶ Sizimisele ukuhlukuluzwa ngenxa yebizo likaJehova. (Jak. 5:​10, 11) Nxa singaqhubeka siqotho kuJehova ngesikhathi sisebunzimeni sizatshengisa ukuthi uSathane ngusomangase. Ezinsukwini zikaJobe uSathane wasola abantu abakhonza uJehova wathi: “Umuntu uzadela konke alakho ukuze avikele impilo yakhe.” (Job. 2:4) Lapha uSathane wayesithi abantu bakhonza uJehova nxa izinto zibahambela kuhle empilweni. Kodwa nxa bengahlangana lobunzima bazakhalala ukumkhonza. Kodwa inceku kaNkulunkulu ethembekileyo uJobe yatshengisa ukuthi lawo kwakungamanga aluhlaza tshoko. Lathi kumele siqhubeke siqotho kuJehova njengoJobe. Kungelani lokuthi sehlelwe zinhlupho ezinganani, asisoze simtshiye uJehova. Sikwazi mhlophe ukuthi uzahlala esivikela ngenxa yokuthi silwela ibizo lakhe.—Joh. 17:11.

17. Yiphi eyinye indlela esingcwelisa ngayo ibizo likaJehova eqanjwa ku-1 Phetro 2:12?

¹⁷ Siyalihlonipha ibizo likaJehova. (Zaga. 30:9; Jer. 7:​8-11) Njengoba abantu bekwazi ukuthi singoFakazi bakaJehova, kumele sikhumbule ukuthi esikwenzayo kungalingcwelisa kumbe kulingcolise ibizo likaJehova. (Bala u-1 Phetro 2:12.) Yikho sisenza okusemandleni ethu ukuthi esikukhulumayo lesikwenzayo kudumise ibizo likaJehova lanxa singabantu abalesono.

18. Yiphi eyinye indlela esingatshengisa ngayo ukuthi siyaliqakathekisa ibizo likaJehova? (Khangela lamabala angaphansi.)

¹⁸ Asizikhathazi kakhulu ngokuthi abantu bacabangani ngathi. (Hubo. 138:2) Kungani lokhu kuqakathekile? Phela indlela esimthanda ngayo uJehova ingenza abanye abantu bangasizwisisi.a UJesu wabulawa njengesigebenga kodwa waqhubeka eqotho ngoba wayefuna ukungcwelisa ibizo likaJehova. Wayengelandaba lokuyangiswa futhi engazihluphi ngokuthi abantu bacabangani ngaye. (Heb. 12:​2-4) Ayecabanga ngakho kakhulu yikwenza intando kaNkulunkulu kuphela.—Mat. 26:39.

19. Uzwa njani ngebizo likaJehova futhi kungani usitsho njalo?

¹⁹ Siyazigqaja ngebizo likaJehova futhi asisithontisi isibusiso sokuba ngoFakazi bakhe. Lokhu kwenza sizimisele ukuhlala siqotho kuye lanxa abanye abantu bengasikhangelela phansi. Kwangathi sonke singazimisela ukuqhubeka sidumisa uJehova kungelani lokuthi uSathane usihlasela njani. Singenza njalo sizatshengisa ukuthi siyaliqakathekisa ibizo likaJehova njengoJesu Khristu.