Uthando LukaNkulunkulu Kalupheli

1-2. Kuyini esingacina sesikuthandabuza nxa siphakathi kwenhlupho?

AKUCABANGE ngenkalakatha yomkhumbi oselwandle. Kuthi kusenjalo kuqubuka isiphepho esilamandla. Amagagasi aqalise ukutshaya umkhumbi ewusa le lale. Kodwa omunye emkhunjini abesejikela isikhonkwane emanzini. Isikhonkwane leso siyehla siyephansi besesibamba umkhumbi ukuthi ungasayi ndawo.

² Ngezinye izikhathi lathi singaba phakathi kwenhlupho ezinengi, ezifanana lamagagasi alamandla aphosela umkhumbi le lale. Singavuka singesabi lutho futhi sikukholwa ukuthi uJehova uyasithanda. Kodwa ngelanga elilandelayo sizithole sesidanile sesibona angani uJehova kaselandaba lathi. (Hubo. 10:1; 13:1) Mhlawumbe umngane wakho angakududuza kodwa kungakayi ngaphi uzizwe usudanile futhi usuthandabuza ukuthi uJehova uyakuthanda. (Zaga. 17:17; 25:11) Manje ungenzani ukuze uhlaliseke futhi ungathandabuzi ukuthi uJehova uyakuthanda?

3. Sifundani ngothando lukaJehova kuHubo 31:7 lo 136:1? (Khangela lomfanekiso.)

³ Ukuhlala sikhumbula ukuthi uJehova uyasithanda kuzasinceda kakhulu nxa siphakathi kwenhlupho. (Bala iHubo 31:7; 136:1.) IBhayibhili lithi uJehova nguNkululunkulu “ogcwele uthando oluqotho.” (Eks. 34:​6, 7) Uthando oluqotho luhlala kuze kube nini lanini futhi kaluyi ngokuthi izimo zinjani. IBhayibhili liphinda lithi uJehova ‘uhlala elothando oluqotho kubo bonke abambizayo.’ (Hubo. 86:5) Amavesi la akwenza kucace ukuthi uJehova kasoze asilahle loba sekutheni. Akula omunye umuntu ongasithanda ngendlela uJehova asithanda ngayo! Ukuhlala sikukhumbula lokhu kuzasinceda ukuthi singanyikinyeki nxa sihlangana laloba yibuphi ubunzima.—IHubo. 23:4.

UJEHOVA UYASITHANDA

4. Yiziphi izinto owaqalisa ukuzifunda eBhayibhilini futhi kungani uzikholwa?

⁴ Okunye okuzasinceda ukuthi singakhalali nxa siphakathi kobunzima yikukhumbula ukuthi iBhayibhili lithi uJehova uyasithanda. Yiziphi ezinye izinto ozikhumbulayo owazifunda eBhayibhilini? Wafunda ukuthi ibizo likaNkulunkulu nguJehova, uJesu yiNdodana kaNkulunkulu ezelwe yodwa, abafileyo kabazi lutho lokuthi umhlaba uzakuba lipharadayisi sihlale kuwo kuze kube nini lanini. (Hubo. 83:18; Umtshu. 9:5; Joh. 3:16; Isam. 21:​3, 4) Okwenza sizikholwe izimfundiso lezi yikuthi ziliqiniso. Elinye iqiniso elingatshintshiyo esilithola eBhayibhilini ngelokuthi uJehova uyasithanda. Ukuzikhumbuza iqiniso lelo kuzasinceda nxa sesiphakathi kobunzima.

5. Kuyini okunganceda umuntu ukuthi atshiyane lezimfundiso ezingamanga?

⁵ Kuyini okwakunceda ukuthi utshiyane lezimfundiso ezingamanga? Mhlawumbe yikuxeganisa lokho okufundiswa liBhayibhili lalokho owawukukholwa. Ake sithi wawukholwa ukuthi uJesu nguNkulunkulu uSomandla kodwa wathi usuqalise ukufunda iBhayibhili wasunanzelela ukuthi uJesu lizibulo kukho konke okwadalwayo lokuthi uyiNdodana kaNkulunkulu ezelwe yodwa. (Kol. 1:15; Joh. 3:18) Wasebenza nzima ukuze utshiye imfundiso ezingamanga ngoba zazingene zagxila enhliziyweni. (2 Khor. 10:​4, 5) Kodwa wakwenza lokho futhi awusoze uphinde ubuyele kizo.—Flp. 3:13.

6. Kuyini okuzakunceda ungathandabuzi ukuthi uJehova uzahlala ekuthanda?

⁶ Kumele wenzeni nxa usuthandabuza ukuthi uJehova uyakuthanda? Kuyabe sekumele ucabangisise ngeqiniso elingatshintshiyo esilithola eBhayibhilini. Ngokwesibonelo iHubo 136:1 lisitshela ukuthi uJehova ulothando oluqotho. Mhlawumbe usungazibuza ukuthi yindaba uJehova esithi ulothando oluqotho. Phela umutsho othi “uthando lwakhe oluqotho luhlala kuze kube nini lanini” utholakala izikhathi ezingu-26 kuHubo 136. Imfundiso ethi uJehova uzahlala esithanda iliqiniso futhi kumele siyikholwe njengoba nje sikholwa lezinye izimfundiso eziseBhayibhilini. Yikho loba nini nxa usucabanga ukuthi uJehova kasakuthandi zama ukuwulahlela khatshana umcabango lowo njengoba nje walahlela khatshana izimfundiso ezingamanga!

7. Yiwaphi amanye amavesi asenza singathandabuzi ukuthi uJehova uyasithanda?

⁷ IBhayibhili lilamavesi amanengi agcizelela ukuthi uJehova uyasithanda. Ngokwesibonelo, uJesu watshela abalandeli bakhe wathi: “Lina liqakatheke kakhulu kulentaka ezinengi.” (Mat. 10:31) Unanzelele yini ukuthi uJesu kazange athi ‘engxenye liqakathekile,’ kodwa wathi “liqakatheke kakhulu”? UJehova ngokwakhe uthi: “Ngizakuqinisa, ngikuncede. Ngizakubamba ngesandla sami sokudla esilungileyo.” (Isaya. 41:10) UJehova kazange athi ‘ngizazama ukukuqinisa’ kodwa uthe “ngizakuqinisa ngikuncede.” Amavesi la asitshiya singathandabuzi ukuthi uJehova uyasithanda. Lokhu akumelanga sikukhohlwe lanxa singaze sihlangane lenhlupho ezinganani ngoba liqiniso elingatshintshiyo. Nxa ungathandaza kuJehova umtshele zonke inhlupho zakho uzazibonela ukuthi aliqiniso amazwi athi: “Sesikwazi njalo sesikholwa ukuthi uNkulunkulu uyasithanda.”a—1 Johane 4:16

8. Kumele wenzeni nxa usuthandabuza ukuthi uJehova uyakuthanda?

⁸ Manje ungenzani nxa uyake ufikelwe ngumcabango wokuthi uJehova kasakuthandi? Kuyabe sekumele uzibuze ukuthi khonokho okucabangayo kuliqiniso yini. Phela indlela esicabanga ngayo iyatshintshatshintsha kodwa iqiniso eliseBhayibhilini kalitshintshi. IBhayibhili likwenza kucace ukuthi uJehova uyakuthanda. Nxa usukuthandabuza lokho kuyabe sekumele utshintshe indlela ocabanga ngayo.—1 Joh. 4:8.

HLALA UKHUMBULA UKUTHI JEHOVA UYAKUTHANDA

9-10. UJesu wabafundisani abafundi bakhe ngendaba yokuthandaza? (UJohane 16:​26, 27) (Khangela lomfanekiso.)

⁹ Ukucabangisisa ngamazwi uJesu awatshela abafundi bakhe kuzasinceda sizwisise indlela uJehova asithanda ngayo. UJesu wabatshela wathi: “UBaba uyalithanda kakhulu.” (Bala uJohane 16:​26, 27.) Kumele ukuthi amazwi la anceda abafundi bakaJesu bazwisisa ukuthi kumele bathandaze kuJehova kuphela.

¹⁰ UJesu watshela abafundi bakhe ukuthi bangakhuleki kuye kodwa bakhuleke ngebizo lakhe. (Joh. 16:​23, 24) Kwakuqakathekile sibili ukuthi indaba le bayizwisise. Phela abafundi babengalingeka ukuthi bathandaze kuJesu ngemva kokuvuswa kwakhe. Babengathandabuzi ngitsho lakancane ukuthi umngane wabo uyabathanda ngoba wayesanda kubafela. Babengazitshela ukuthi njengoba uJesu engumngane wabo, babengathandaza kuye bemtshela izikhalazo zabo yena ebesezidlulisela kuYise. Kodwa uJesu wabafundisa ukuthi uJehova uyabathanda kakhulu futhi kumele bathandaze kuye. Lokhu uJesu akufundisa abafundi bakhe ngendaba yokuthandaza kusifundisani? Kusifundisa ukuthi lanxa simthanda uJesu futhi sikuqakathekisa lokho asenzela khona akumelanga sikhuleke kuye. (Joh. 14:21) Sikhuleka kuJehova kuphela njengalokho okwakusenziwa ngabafundi bakaJesu ngoba siyakwazi ukuthi uJehova uyasithanda kakhulu. Nxa sithandaza kuJehova siyabe sitshengisa ukuthi siyakholwa ukuthi kasithontisi.—1 Joh. 5:14.

KUYINI OKUNGENZA UTHANDABUZE UKUTHI UJEHOVA UYAKUTHANDA?

11. Kuyini uSathane afuna sikuthandabuze?

¹¹ USathane uDeveli ufuna sithandabuze ukuthi uJehova uyasithanda. (1 Pet. 5:8) Okunye afuna sikukholwe yikuthi inhlawulo ngeke isincede. (Heb. 2:9) USathane ufuna sikhalale ukukhonza uJehova njalo uyathokoza nxa esibona sesithandabuza ukuthi uJehova uyasithanda. USathane uliqili sibili! Uyakwazi ukuthi yena uyisitha sikaJehova kodwa ufuna sicabange ukuthi uJehova uzonda thina. (Efe. 6:11) Kodwa thina siyawazi amaqhinga akhe yikho sizimisele ukumelana laye.—Jak. 4:7.

12-13. Kuyini okunye okungenza sithandabuze ukuthi uJehova uyasithanda?

¹² Okunye okungenza sithandabuze ukuthi uJehova uyasithanda yisono esilaso. (Hubo. 51:5; Rom. 5:12) Isono esasithatha ku-Adamu saphambanisa ubungane bethu loJehova futhi yiso esenza sicine sesicabanga izinto ezingayisizo.

¹³ Isono sisithwalise nzima sibili ngoba senza sizithonisise, sikhathazeke futhi sizizwe singahlalisekanga. Imicabango emibi lezinto ezimbi esizenzayo kuhlala kusikhumbuza ukuthi silesono futhi lokho kuyasidanisa kusiqede amandla. (Rom. 8:​20, 21) Thina abantu abalesono sifana lebhayisikili elipontshileyo. Nxa ibhayisikili lingaselamoya litshoveka nzima ngoba vele alenzelwanga ukuthi lihambe lingelamoya. Labantu babengadalelwanga ukuthi baphile belesono. Isono senza impilo ibe nzima. Yikho kwezinye izikhathi sicina sithandabuza ukuthi uJehova uyasithanda. Kodwa kumele sikhumbule ukuthi ‘uJehova uNkulunkulu omkhulu lowesabekayo ubathanda ngothando oluqotho labo abamthandayo labagcina imithetho yakhe.’—Neh. 1:5.

14. Ukucabangisisa ngenhlawulo kuzasinceda njani? (URoma 5:8) (Khangela lebhokisi elithi: “Ungavumi Ukunqotshwa Yisono.”)

¹⁴ Kwezinye izikhathi singabona angani uJehova ngeke athande abantu abanjengathi. Ngenxa yani? Ngenxa yokuthi vele akulalutho esasingalwenza ukuze uJehova asithande. Lanxa kunjalo wanikela ngeNdodana yakhe ukuze atshengise ukuthi uyasithanda. (1 Joh. 4:10) Yikho akumelanga ukhohlwe ukuthi uJesu walanda ukuzofela thina. (Bala uRoma 5:8.) UJehova uyakwazi ukuthi sizahlala siphambanisa ngoba singabantu abalesono. Nxa singahlala sikhumbula ukuthi yisono esenza sicine sicabanga ukuthi uJehova kasithandi sizazimisela ukuthi silwisane laso.—Rom. 7:​24, 25.

HLALA UQOTHO

15-16. Kungani kumele sizimisele ukuhlala siqotho kuJehova? (u-2 Samuyeli 22:26)

¹⁵ UJehova ufuna sihlale siseduze laye. (Dute. 30:​19, 20) Siyakwazi ukuthi nxa singahlala siqotho kuye kasoze asilahle kodwa uzasincedisa kuloba yibuphi ubunzima.—Bala u-2 Samuyeli 22:26.

¹⁶ Esihlokweni lesi sibonile ukuthi uJehova uyasithanda futhi lelo liqiniso elingatshintshiyo. Ukuhlala sikhumbula ukuthi uJehova ulathi kuzasinceda ukuthi simelane laloba yibuphi ubunzima. Nxa usuthandabuza ukuthi uJehova uyakuthanda zibuze ukuthi kuliqiniso yini lokho lokuthi ngubani ofuna ucabange ngaleyondlela. Kwangathi sonke singahlala sikhumbula iqiniso elingatshintshiyo elokuthi uthando lukaJehova oluqotho luhlala kuze kube nini lanini.