Ungathandabuzi Ukuthi UJehova Uyakuthanda

1. Kuyini okwenza wazinikela kuJehova? (Khangela lomfanekiso.)

USALIKHUMBULA yini ilanga owazinikela ngalo kuJehova? Okwenza wazinikela kuye yikuthi wawusumazi futhi usumthanda. Yikho wamthembisa ukuthi uzaphilela ukwenza intando yakhe lokuthi uzamthanda ngenhliziyo yakho yonke, langomphefumulo wonke, langengqondo yakho yonke langamandla akho wonke. (Mak. 12:30) Kungenzakala ukuthi kusukela mhlalokho indlela omthanda ngayo uJehova yaqalisa ukukhula. Kodwa ubungaphendula njani nxa ubungabuzwa ukuthi uyamthanda sibisibili uJehova? Mhlawumbe ubuzahle uphendule uthi: “Akulamuntu engimthanda njengoJehova futhi akula olunye ulutho engiluthanda ukwedlula yena.”

2-3. Kuyini okungamelanga sikuthandabuze futhi sizaxoxa ngani esihlokweni lesi? (UJeremiya 31:3)

² Ubungaphendula usithini nxa umuntu engakubuza ukuthi: “Uleqiniso yini ukuthi uJehova uyakuthanda?” Kambe ukuthi ubungathikaza ukuphendula, uzitshela ukuthi akwenzi ukuthi uJehova athande umuntu onjengawe? Omunye udadewethu owayethwaliswe nzima ngabangakibo futhi ebona angani akulamuntu omthandayo wathi: “Angithandabuzi ngitsho lakancane ukuthi uJehova ngimthanda ngenhliziyo yami yonke. Kodwa engingelaqiniso lakho yikuthi yena uyangithanda yini.” Kuyini okungakunceda ungathandabuzi ukuthi uJehova uyakuthanda?

³ UJehova ufuna ungathandabuzi ukuthi uyakuthanda. (Bala uJeremiya 31:3.) Nguye owakufundisa iqiniso ukuze ube ngumngane wakhe. UJehova wahle wakuthanda ngothando oluqotho kusukela ngelanga owazinikela ngalo. Lokho kutsho ukuthi kasoze akutshiye loba sekutheni. UJehova uthi abantu bakhe abamkhonza bethembekile ‘bayimpahla yakhe eligugu.’ Khonokho kutsho ukuthi lawe uqakathekile. (Mal. 3:17) Umphostoli uPhawuli wayekukholwa ukuthi uJehova uyamthanda, lawe uJehova ufuna ungakuphumputhi ukuthi uyakuthanda. UPhawuli wabhala wathi: “Ngiyaqiniseka ukuthi ngitsho lokufa, loba ukuphila, loba izingilosi, loba ohulumende, loba izinto ezikhona khathesi loba ezizakuza, loba amandla, loba ukuphakama, loba ukutshona, loba yini edaliweyo, akusoze kusehlukanise lothando lukaNkulunkulu asitshengisa lona ngoKhristu uJesu iNkosi yethu.” (Rom. 8:​38, 39) Esihlokweni lesi sizaxoxa ngezindlela ezitshiyeneyo ezizasinceda sibe leqiniso lokuthi uJehova uyasithanda.

KUNGANI KUNGAMELANGA UTHANDABUZE UKUTHI UJEHOVA UYAKUTHANDA?

4. Kuyini uSathane afuna sikukholwe?

⁴ Ukukholwa ukuthi uJehova uyakuthanda kuzakunceda ukuthi ulwisane “lamaqhinga kaDeveli.” (Efe. 6:11) USathane wenza konke okusemandleni akhe ukuze azame ukusiphambanisa ekukhonzeni uJehova. Elinye lamaqhinga awasebenzisayo yikufundisa izinto ezingamanga. Ufuna sikholwe ukuthi uJehova kasithandi. Ungakhohlwa ukuthi uSathane ungena ngenxeba njengempethu. Uhlezi efuna ukusihlasela khonaphana nxa singelamandla. Kungenzakala ukuthi ngalesosikhathi singabe sidaniswe yizinto ezenzakala kudala loba ubunzima esingabe siphakathi kwabo kumbe sikhathazeke ngezinto ezingakenzakali. (Zaga. 24:10) USathane unjengesilwane esicathamela inyamazana engeke izivikele. Yikho angavele abone sidanile uhle alethe izilingo zibhabhulene ehlose ukusiqeda amandla. Kodwa nxa singathandabuzi ukuthi uJehova uyasithanda sizawabona amaqhinga kaDeveli futhi senelise ukumelana laye.—1 Phet. 5:​8, 9; Jak. 4:7.

5. Ukukholwa ukuthi uJehova uyasithanda kuzasinceda njani?

⁵ Ukukholwa ukuthi uJehova uyasithanda kwenza sisondele kuye. Kungani sisitsho njalo? Okwenza senelise ukuthanda abanye yikuthi uJehova wasidala ngomfanekiso wakhe. Kungokwemvelo ukuthi umuntu angatshengisa ukuthi uyasithanda lathi simthande. Yikho nxa sikukholwa ukuthi uJehova uyasithanda lokuthi uyasiqakathekisa lathi sizamthanda kakhulu. (1 Joh. 4:19) Nxa indlela esimthanda ngayo uJehova iqhubeka ikhula laye indlela asithanda ngayo iyabe ilokhe iqhubeka ikhula. IBhayibhili lithi: “Sondelani kuNkulunkulu, laye uzasondela kini.” (Jak. 4:8) Kodwa singenzani ukuze sikukholwe sibili ukuthi uJehova uyasithanda?

OKUNGAKUNCEDA UKHOLWE UKUTHI UJEHOVA UYAKUTHANDA

6. Kuyini okumele sikuthandazele?

⁶ Thandaza ucela uJehova akuncedise uzwisise ukuthi kungani ekuthanda. (Luk. 18:1; Rom. 12:12) Mncenge ukuthi akuncedise uzibone ngendlela yena akubona ngayo. Liqiniso sibili ukuthi akulula ukuthi umuntu ozikhangelela phansi akholwe ukuthi uJehova uyamthanda. Kodwa khumbula ukuthi uJehova wazi ngcono kulawe. (1 Joh. 3:​19, 20) Yena ukwazi ekuqonda futhi uyakubona okuhle okwenzayo lanxa wena ungakuboni. (1 Sam. 16:7; 2 Imilan. 6:30) Ungesabi ‘ukumtshela konke okusenhliziyweni yakho’ lokumncenga ukuthi akuncedise uzwisise ukuthi kungani ekuthanda. (Hubo. 62:8) Nxa usuthandazile ngendaba le zama ukwenza lokho esizaxoxa ngakho ezigabeni ezilandelayo.

7-8. Amanye amavesi akumaHubo asiqinisekisa njani ukuthi uJehova uyasithanda?

⁷ Kholwa lokho uJehova akutshela khona. UJehova waphefumulela abantu ababhala iBhayibhili ukuthi basichasisele ukuthi yena unguNkulunkulu onjani. Zwana ukuthi omunye wabo wathini. Wathi: “UJehova useduze lalabo abalenhliziyo ezidabukileyo, uyabasiza abadanileyo.” (Hubo. 34:18) Nxa kuyikuthi udane kakhulu kulula ukucabanga ukuthi akulamuntu okuthandayo. KuHubo 56:8 uDavida wabhala wathi: “Faka inyembezi zami esigubhini sakho sesikhumba.” UJehova uyakubona nxa usebunzimeni futhi udabukile emoyeni. Uyakuzwela futhi kuyamdanisa ukukubona uthwele nzima. Kuyabe kungathi ufaka inyembezi zakho esigubhini sakhe abesesigcina endaweni evikelekileyo, ngendlela isihambi ebesingagcina ngayo isigubhu saso samanzi ngesikhathi sidabula enkangala. KuHubo 139:​3, uDavida waphinda wathi: “[Jehova] uyazibona zonke izindlela zami.” UJehova uyakubona konke okwenzayo kodwa ilihlo lakhe ulithi nhlo kokuhle okwenzayo. (Heb. 6:10) Kungani esenza njalo? Kungenxa yokuthi uyakuqakathekisa konke okwenzayo ukuze umthokozise.a

⁸ UJehova usebenzisa amavesi anjengalawa ukuze akutshengise ukuthi uyakuthanda njalo uyakuqakathekisa. Kodwa njengoba sibonile ezindimeni ezidlulileyo, uSathane ufuna wena ukholwe ukuthi uJehova kakuthandi. Yikho nxa ungezwa usuthandabuza ukuthi uJehova uyakuthanda, nanku umbuzo okumele uzibuze wona, “Ngizakholwa engikutshelwa nguSathane uyise wamanga yini kumbe nguJehova uNkulunkulu weqiniso?”—Joh. 8:44; Hubo. 31:5.

9. UJehova ubathembisani labo abamthandayo? (U-Eksodusi 20:​5, 6)

⁹ Cabangisisa ngokuthi uJehova ubabona njani labo abamthandayo. Khumbula lokho uJehova akutshela ama-Israyeli. (Bala u-Eksodusi 20:​5, 6.) UJehova uthembisa ukuthi uzahlala ebathanda ngothando oluqotho labo abamthandayo. Akwenzi ukuthi wena uthande uJehova kodwa yena angakuthandi. (Neh. 1:5) Nxa usuthundabuza ukuthi uJehova uyakuthanda zibuze ukuthi wena uyamthanda yini. Nxa kuyikuthi uyamthanda futhi wenza konke okusemandleni akho ukuthi umthokozise qiniseka ukuthi laye kakuthontisi. (Dan. 9:4; 1 Khor. 8:3) UJehova uzahlala ekuthanda ngothando oluqotho futhi kasoze akulahle.

10-11. UJehova ufuna siyibone njani inhlawulo? (UGalathiya 2:20)

¹⁰ Cabangisisa ngenhlawulo. Inhlawulo kaJesu Khristu yisipho uJehova asinika bonke abantu. (Joh. 3:16) Umphostoli uPhawuli wenza izinto ezinengi ezimbi engakabi ngumKhristu njalo wayelwisana lesono asithatha ku-Adamu njengathi sonke. (Rom. 7:​24, 25; 1 Thim. 1:​12-14) Lanxa kunjalo, wakukholwa sibili ukuthi inhlawulo yisipho uJehova ayemnike sona. (Bala uGalathiya 2:20.) UJehova nguye owaphefumulela umphostoli uPhawuli ukuthi abhale amazwi asevesini le futhi konke okuseBhayibhilini kwabhalelwa ukuthi kufundiswe thina. (Rom. 15:4) Amazwi kaPhawuli atshengisa ukuthi uJehova ufuna ukukholwe ukuthi uJesu wabuya ukuzokufela. Wena uyakukholwa yini lokho? Ukukukholwa kuzakunceda ukuthi ungathandabuzi ukuthi uJehova uyakuthanda.

¹¹ Siyambonga kakhulu uJehova ngokuthuma uJesu ukuthi azosifela. Kodwa okunye uJesu ayekulandile emhlabeni yikuzosifundisa iqiniso ngoNkulunkulu. (Joh. 18:37) Okunye asifundisa khona yikuthi uJehova uyasithanda.

UJESU WASIFUNDISA UKUTHI UJEHOVA UYASITHANDA

12. Kungani kumele sikukholwe lokho uJesu ayekufundisa?

¹² UJesu wafundisa abantu ukuthi uYise nguNkulunkulu onjani. (Luk. 10:22) Siyakukholwa konke uJesu ayekufundisa abantu ngoJehova. UJesu wahlala loYise okweminyaka leminyaka. Yikho wazibonela ngawakhe ukuthi uJehova uyabathanda kakhulu abantwabakhe. (Kol. 1:15) Manje uJesu wabancedisa njani abantu ukuthi bakukholwe ukuthi uJehova uyabathanda?

13. UJesu wasifundisani ngoJehova?

¹³ UJesu uyafuna sibili ukuthi sibekwazi ukuthi uJehova uyasithanda. Wakhuluma ngoYise esebenzisa ibala elithi “Baba” okwezikhathi ezedlula ezingu-160. Langesikhathi ekhuluma labalandeli bakhe wayesebenzisa ibala elithi “uYihlo” kumbe amabala athi “uYihlo osezulwini.” (Mat. 5:16; 6:26) Izinceku zikaJehova ezaphila uJesu engakabuyi emhlabeni zazijayele ukubiza uJehova ngokuthi nguSomandla, nguNkulunkulu Ophezukonke langokuthi nguMdali. Kodwa uJesu yena wasebenzisa ibala elithi “Baba” izikhathi ezinengi. Amazwi la atshengisa ukuthi uJesu ufuna sibekwazi ukuthi uJehova nguBaba osithandayo. Asixoxeni ngezibonelo ezimbili lapho uJesu alisebenzisa khona ibala leli.

14. Kuyini okwakhulunywa nguJesu okwenza singathandabuzi ukuthi siqakathekile kuJehova? (UMathewu 10:​29-31) (Khangela lomfanekiso.)

¹⁴ Asixoxeni ngamazwi kaJesu atholakala kuMathewu 10:​29-31. (Bala.) Intaka angeke imthande kumbe imkhonze uJehova. Kodwa uBaba wethu uyayiqakathekisa intaka ngayinye okokuthi uyayibona kungelani lokuthi ingaphi. Lokhu kutshengisa ukuthi uJehova uyakuqakathekisa kakhulu wena njengoba uthembekile kuye futhi umthanda! Amazwi athi “ngitsho lenwele ezisemakhanda enu zibaliwe zonke” atshengisa ukuthi uJehova wazi konke ngathi ngitsho lezinto ezingakhanya angathi kaziqakathekanga. Kuyazicacela ukuthi uJesu ufuna sikukholwe sibili ukuthi ngamunye wethu uligugu kuBaba wethu osezulwini.

15. Amazwi akuJohane 6:44 akutshelani ngoBaba wethu osezulwini?

¹⁵ UJesu waphinda wasebenzisa ibala elithi ‘Baba’ kuJohane 6:44. (Bala) UYihlo osezulwini nguye owakuncedisa ukuthi umazi futhi umthande. Kungani wakudonsela kuye? Kungenxa yokuthi wabona ukuthi wawufuna ukufunda ngaye. (Imiseb. 13:48) Ngesikhathi uJesu ekhuluma amazwi akuJohane 6:44 wayengabe ekhuluma ngalokho uJehova akutshela abantu bakhe kuJeremiya 31:3. Wabatshela wathi: “Ngikuthande ngothando olungapheliyo yikho ngikusondeze kimi ngothando oluqotho.” (Khangela loHos. 11:4.) Lokhu kutshengisa ukuthi uBaba wethu osezulwini uhlala ebona okuhle kuwe lanxa wena ungabe ungakuboni.

16. (a) Kuyini okungenza sikholwe lokho okwakhulunywa nguJesu? (b) Kuyini okungakunceda ukholwe ukuthi uJehova uyakuthanda? (Khangela ibhokisi elithi “UBaba Ongcono Kulabo Bonke.”)

¹⁶ UJesu ukufundisile ukuthi uJehova uyakuthanda lokuthi uyakuqakathekisa. Ukucabangisisa ngalokhu kuzakunceda ubone ukuthi uJehova nguYihlo sibili olendaba lawe. Yikho nxa usubona angathi uJehova kasakuthandi khumbula okwakhulunywa nguJesu ngoba yena uhlala ekhuluma iqiniso futhi akula omunye umuntu omazi ngcono uJehova ukwedlula yena.—1 Phet. 2:22.

UNGATHANDABUZI UKUTHI UJEHOVA UYAKUTHANDA

17. Kungani kungamelanga sithandabuze ukuthi uJehova uyasithanda?

¹⁷ Kumele senze konke okusemandleni ukuze singathandabuzi ukuthi uJehova uyasithanda. Ungakhohlwa ukuthi uSathane usebenza nzima ukuze aphambanise ubungane bakho loJehova. Yikho uzahlala ekuhlezi ibhobho efuna ungakholwa ukuthi uJehova uyakuthanda. Ungavumi ukuthi uSathane anqobe!—Jobe. 27:5.

18. Kuyini okumele uhlale ukwenza?

¹⁸ Kumele ukuthi isihloko lesi sikuncede wabona ukuthi kungani kungamelanga uthandabuze ukuthi uJehova uyakuthanda. Hlala uthandaza ucela ukuthi akuncedise uzwisise ukuthi kungani ekuthanda. Cabangisisa langamavesi atshengisa ukuthi uJehova uyabaqakathekisa labo abamkhonzayo njalo ungalibali lokuthi uzahlala ebathanda labo abamthandayo. Okunye okungamelanga ukukhohlwe yikuthi uJehova wathuma uJesu emhlabeni ukuthi azokufela. Mthembe uJesu nxa esithi uJehova uYihlo osezulwini uyakuthanda. Nxa ungakwenza konke lokho awusoze uthwale nzima ukuphendula nxa abantu bekubuza besithi: “Uyakukholwa yini ukuthi uJehova uyakuthanda?” Uzahle ubaphendule uthi: “Ye, uyangithanda futhi lami ngiyamthanda njalo ngenza konke okusemandleni ami ukuthi ngimtshengise ukuthi ngiyamthanda!”