Ngime Yini Ukutshayela Imota?
MHLAWUMBE usuleminyaka leminyaka utshayela imota futhi uzihambela loba ngaphi ofuna khona. Kodwa khathesi izihlobo labangane sebesithi ngabe uyama ukutshayela ngoba usukhulile. Kungenzakala ukuthi kawubazwisisi.
Sokuke kwenzakala kuwe yini lokhu? Nxa kunjalo kuyini okuzakunceda ubone ukuthi uyiphathe njani indaba le?
Kwamanye amazwe nxa umtshayeli angafikisa iminyaka ethile kuyabe sekumele aqale ahlolwe ngudokotela ukuze kubonakale ukuthi angaqhubeka etshayela yini kumbe sokumele ame. AmaKhristu ahlala emazweni la kuyabe kumele awulandele umthetho lo. (Rom. 13:1) Nxa kuyikuthi lapho ohlala khona awukho umthetho onjalo, amacebo esizaxoxa ngawo esihlokweni lesi azakunceda kakhulu.
HLOLA INDLELA OTSHAYELA NGAYO
Eyinye inhlanganiso encedisa abantu asebekhulile yathi kuhle ukuthi asebekhulile bazibuze imibuzo le:
Kunzima yini ukubala okubhalwe emabhakaneni aseceleni kwemigwaqo njalo angisaboni yini ebusuku?
Sekungumqanso yini ukukhangela izibuko zemota lokunanzelela lokho engiyabe ngingakuboni esibukweni?
Unyawo lwami lusuka nzima yini emafutheni nxa sokumele ngimise imota?
Imota yami iyanyonyoba yini okokuthi ngize ngiphambanise ezinye izimota emgwaqweni?
Kukangaki lapho engiphose ngenza khona ingozi futhi imota yami isike yahluzuka yini?
Sengike ngamiswa ngamapholisa yini ngenxa yokugijima kakhulu?
Sengike ngalala yini ngapha ngitshayela?
Kulamaphilizi engiwanathayo yini aphambanisa indlela engitshayela ngayo?
Kulabanye asebeke basola indlela engitshayela ngayo yini?
Nxa kuyikuthi kulombuzo owodwa kumbe emibili oyiphendule ngo ye, kutsho ukuthi sokumele uhlole ukuthi kusavuma yini ukuqhubeka utshayela. Engxenye ungabona kungcono ukuthi ungasatshayeli ebusuku. Hlala uzihlola futhi ucele labanye ukuthi bakutshele ukuthi utshayela njani. Okunye okungakunceda yikuphinda uqeqetshwe ukutshayela ukuze uthuthukise ukutshayela ngendlela evikela ingozi. Lanxa kunjalo, nxa kuyikuthi imibuzo eminengi uyiphendule ngo ye, kungaba ngcono uhle ume ukutshayela.
LANDELA LOKHO OKUTSHIWO LIBHAYIBHILI
Kwesinye isikhathi ungabe ungananzeleli ukuthi indlela otshayela ngayo isiyingozi. Iqiniso esingeke silibalekele ngelokuthi akulula ukutshiya ukutshayela. Kodwa lokho okutshiwo liBhayibhili kungakunceda kakhulu. Nanku okunye kwakhona:
Thobeka. (Zaga. 11:2) Ukuguga kubuya kubelethe indubo zakho. Amehlo ayabe engasaboni, ungasezwa endlebeni, imisipha iyabe isisala lezinyalo lazo zithi khonapho. Abanye abantu bayama ukudlala imidlalo ethile nxa sebekhulile ngoba bayakwazi ukuthi kuyabe sekulula ukuthi balimale. Kungaba kuhle ukuthi lomtshayeli osekhulile ame ukutshayela ukuze angazifaki engozini. (Zaga. 22:3) Umuntu othobekileyo uyalalela nxa esizwa abanye besola indlela atshayela ngayo.—Khangela lo-2 Samuyeli 21:15-17.
Ungafaki abanye engozini. (Dute. 22:8) Nxa umtshayeli engatshayeli kuhle, angabangela ingozi enkulu abantu balimale kumbe bafe. Le kayisiyondaba encane ngoba nxa kungafa umuntu umtshayeli uyabe eselecala lokubulala.
Nxa kuyikuthi sokumele ume ukutshayela, ungacabangi ukuthi abantu bazaqala ukukukhangelela phansi. UJehova uyakuthanda, uyabona ukuthi uthobekile futhi uyabathanda abanye. Uthembisa ukuthi uzakududuza njalo kasoze akutshiye loba sekutheni. (Isaya. 46:4) Ngakho ungekeli ukucela ukuthi akuncedise ubone ukuthi ungaqhubeka yini ngokutshayela kumbe sokumele ume.