UJesu Khristu NguMphristi Omkhulu Osizwelayo

1-2. (a) Kungani uJehova wathuma iNdodana yakhe emhlabeni? (b) Sizaxoxa ngani esihlokweni lesi? (UHebheru 5:​7-9)

EMINYAKENI engaba ngu-2 000 eyadlulayo, uJehova uNkulunkulu wathuma iNdodana yakhe eligugu emhlabeni. Kanje uJesu wayelandeni emhlabeni? Wayelande ukuzobhidliza imisebenzi kaSathane njalo afele abantu ukuze bakhululwe esonweni okuyiso esibangela ukufa. (Joh. 3:16; 1 Joh. 3:8) UJehova wayekwazi lokuthi ukuthuma uJesu emhlabeni kwakuzamnceda ukuthi abe lozwelo kanye lesihawu njalo awenze kuhle umsebenzi wokuba ngumphristi wethu omkhulu. UJesu waba nguMphristi Omkhulu ngemva kokubhabhathizwa kwakhe ngo-29 C.E.a

² Esihlokweni lesi sizaxoxa ngokuthi izinto uJesu ahlangana lazo emhlabeni zamnceda njani ukuthi abe ngumphristi olozwelo. Kumele sikuzwisise sibili ukuthi uJesu ngumphristi olozwelo ngoba lokho kuzasinceda ukuthi singesabi ukuthandaza kuJehova lanxa singabantu abalesono.—Bala uHebheru 5:​7-9.

UKUBUYA KUKAJESU EMHLABENI

3-4. Impilo kaJesu yatshintsha njani?

³ Kwezinye izikhathi kungabanzima ukwamukela utshintsho oluyabe selwenzakele empilweni yethu. Ngokwesibonelo, akulula ukuthutha usuka endaweni oyithandayo, utshiya izihlobo labangane. Kodwa akula phakathi kwethu ongathi impilo yakhe ike yatshintsha ngendlela impilo kaJesu eyatshintsha ngayo. Phela nguye owokuqala ukudalwa nguJehova futhi waphila loYise okweminyaka leminyaka ezulwini ekukholisa ukusebenza laye. (Hubo. 16:11; Zaga. 8:30) Lanxa kunjalo, “wazidela watshiya konke ayelakho,” wabuya lapha emhlabeni wazophila labantu abalesono.—Flp. 2:7

⁴ Khumbula lokuthi abazali bakaJesu lapha emhlabeni, babengabayanga lokhu kuyazikhanyela ngoba ngesikhathi esanda kuzalwa abazali bakhe banikela ngabantwana benkwilimba ababili. (Levi. 12:8; Luk. 2:24) Lezitha zikaJehova zazimfuna phansi phezulu. Ngokwesibonelo, inkosi embi uHerodi yathi isizwile ukuthi uJesu usezelwe yabumba amaqhinga okumbulala. Lokhu kwenza ukuthi uJosefa abaleke lemuli yakhe bayephephela eGibhithe (Mat. 2:​13, 15) Liqiniso ukuthi impilo kaJesu yatshintsha sibili ngesikhathi eselapha emhlabeni!

5. Kuyini uJesu akubonayo ngesikhathi esemhlabeni futhi lokhu kwamnceda njani? (Khangela lemifanekiso.)

⁵ Ngesikhathi uJesu esemhlabeni wazibonela indlela abantu ababehlupheka ngayo. Wayesebuzwisisa ngcono ubuhlungu abantu ababuzwayo nxa bengafelwa ngoba kumele ukuthi bakhona abantu ayebazi abafa ngesikhathi elapha emhlabeni okugoqela loyise uJosefa. UJesu waphinda wabona abantu ababelobulephero, ababekhubazekile, ababengaboni kanye labazali ababephakathi kosizi ngenxa yokufelwa ngabantwababo. Kumele ukuthi wayebazwela kakhulu abantu laba. (Mat. 9:​2, 6; 15:30; 20:34; Mak. 1:​40, 41; Luk. 7:13) Ngesikhathi esezulwini wayekubona sibili ukuthi abantu bathwele nzima. Kodwa esesemhlabeni wayesekuzwisisa ngcono okwakukhathaza abantu. (Isaya. 53:4) Phela laye wayeke adane, akhathazeke njalo adinwe njengomuntu wonke.

UJESU WAYEBAZWELA KAKHULU ABANTU

6. Yisiphi isiphrofetho esasikhulunywe ngu-Isaya mayelana loJesu? (U-Isaya 42:3)

⁶ UJesu wayebazwela kakhulu abantu ikakhulu labo ababekhangelelwa phansi futhi bephathwa kubi. Lokhu kwagcwalisa isiphrofetho esasikhulunywe ngu-Isaya. (Bala u-Isaya 42:3) Kwesinye isikhathi nxa iBhayibhili likhuluma ngabayanga kumbe abantu abakhangelelwa phansi libafanisa lomhlanga ohlifiziweyo kumbe intambo ebhebha kancane ngoba izinto lezi zikhanya zingancedi ngalutho. Ikanti lifanisa labo abalokholo oluqinileyo lezihlahla ezinkulu kumbe ingadi evundileyo. (Hubo. 92:12; Isaya. 61:3; Jer. 31:12) UJehova nguye owaphefumulela u-Isaya ukuthi akhulume isiphrofetho leso ukuze atshengise indlela uJesu ayezabathanda ngayo abantu futhi abazwele ikakhulu labo ababekhangelelwa phansi.

7-8. Isiphrofetho sika-Isaya sagcwaliseka njani?

⁷ Umlobi weVangeli uMathewu watshengisa ukuthi u-Isaya wayekhuluma ngeNdodana kaNkulunkulu ngesikhathi esithi: “Akulamhlanga owephukileyo ezawuhlifiza njalo akulantambo ebhebha kancane ezayicitsha.” (Mat. 12:20) Zinengi kakhulu izimangaliso ezenziwa nguJesu ukuze ancede abantu ababesebunzimeni njalo bengaselathemba. Ngokwesibonelo, kwelinye idolobho afika kulo kwakulendoda eyayilobulephero. Kumele ukuthi indoda le yayilesizungu futhi idanile ngoba wonke umuntu wayeyininela khatshana ngenxa yomkhuhlane wayo. (Luk. 5:​12, 13) Ngelinye ilanga uJesu waphinda wabona indoda eyayingenelisi ukukhuluma kuhle futhi ingezwa. Kumele ukuthi kwakuyizwisa ubuhlungu ukubona abanye abantu bezixoxela bekholisa kodwa yona isemnyameni ingezwa lokuthi bathini.—Mak. 7:​32, 33).

⁸ AmaJuda amanengi ayekholwa ukuthi umuntu owayegula kumbe owayekhubazekile, wayeyabe ejeziselwa izono ayezenzile kumbe ezenziwe ngabazali bakhe. (Joh. 9:2) Khonalokho kwakusenza ukuthi abanye abantu babahlukuluze babaphathe kubi futhi labo bazibone bengasibantu balutho. Kodwa ngenxa yokuthi uJesu wayebazwela abantu laba wayebelapha aphinde abancedise bakhumbule ukuthi uJehova uyabathanda. Okwenziwa nguJesu kwasigcwalisa sibili isiphrofetho esasikhulunywe ngu-Isaya. Ukukhumbula lokhu kusinceda njani?

9. UJesu watshengisa njani ukuthi ulozwelo? (UHebheru 4:​15, 16)

⁹ Bala uHebheru 4:​15, 16. Amavesi la atshengisa ukuthi uJesu uzahlala esizwela ngoba ulesihawu esikhulu. Umuntu olozwelo uzwa ubuhlungu nxa ebona abanye abantu bephakathi kobunzima futhi uyabe elesifiso sokubanceda. Kuyabe kungani laye uyabuzwa ubuhlungu lowomuntu abuzwayo. (Khangela loHebheru 10:34.) Izimangaliso ezinengi ezenziwa nguJesu zikuveza egcekeni ukuthi wayebazwela sibili abantu ababethwele nzima njalo wayezimisele ukubancedisa. Ngokwesibonelo, wayengenelisa ukwelapha indoda eyayilobulephero eme khatshana kodwa yena wakhetha ukusondela kuyo, wayibamba waseyelapha. Ubona angani indoda le yezwa njani? Phela kungenzeka ukuthi yayisileminyaka leminyaka kungelamuntu osondela eduze kwayo ayithinte! Langesikhathi eselapha indoda eyayingezwa endlebeni wasuka layo ebantwini futhi lokhu kutshengisa ukuthi uJesu wayelozwelo sibili ngoba wayefuna ingethuki isisizwa umsindo wabantu. Ngelinye ilanga uJesu esendlini yomFarisi kwangena owesifazana owayesaziwa ngokwenza izinto ezimbi wafika wamanzisa inyawo zikaJesu ngenyembezi wasezesula ngenwele zakhe. Lokhu akuzange kumphathe ngitsho umFarisi lo kodwa uJesu wamlwela owesifazana lo wasekhuza umFarisi. (Mat. 8:3; Mak. 7:33; Luk. 7:44) UJesu kazange abaninele khatshana abantu ababegula kumbe ababenze izono kodwa watshengisa ukuthi uyabathanda waphinda wabaduduza. Asikuthandabuzi ngitsho lakancane ukuthi lathi uyasizwela kakhulu.

SINGAMLINGISELA NJANI UMPHRISTI WETHU OMKHULU?

10. Kuyini okwenziwe yinhlanganiso yethu? (Khangela lemifanekiso.)

¹⁰ Kumele sizame ukulingisela uJesu ngokuthanda abanye langokubazwela kakhulu. (1 Pet. 2:21; 3:8) Lanxa singeke sizivule izindlebe zezacuthe kumbe amehlo eziphofu siyenelisa ukubancedisa abantu laba ukuthi bafunde ngoJehova. Ngokwesibonelo, inhlanganiso yethu yenza okunengi kakhulu ukuze kuncediswe abantu abasebenzisa ulimi lwezandla ukuthi bafunde ngoJehova emhlabeni jikelele. Kanti njalo sekulezingwalo ze-braille ezitholakala ngendimi ezedlula 60 ukuze kuncediswe labo abangaboni kuhle labangaboniyo ukuthi bafunde ngoJehova. Kulamavidiyo alamazwi achasisa lokho okwenzakalayo ukuze labo abangaboniyo labangabonisisiyo bazwe ukuthi kuyabe kusenzakalani kuvidiyo eyabe idlalwa. Amavidiyo la asetholakala ngezindimi ezedlula 100. Inhlanganiso yenze konke lokhu ukuze incedise abantu abanengi ukuthi bafunde ngoJehova langoJesu.

11. Kuyini okwenziwe yinhlanganiso kaJehova ukuze abantu abanengi bafunde ngaye? (ImiSebenzi 2:​5-7, 33) (Khangela lemifanekiso.)

¹¹ Inhlanganiso kaJehova yenza konke ekwenelisayo ukuze incedise abantu abanengi bafunde ngoJehova kungelani lokuthi bangaphi komhlaba. Uzakhumbula ukuthi uJesu wathi esanda nje kubuyela ezulwini wathululela umoya ongcwele kubafundi bakhe ababebuthene ngePhentekhosti ka-33 CE. Lokho kwenza ukuthi umuntu ngamunye owayelapho azwe izindaba ezinhle ngolimi lwakhe. (Bala imiSebenzi 2:​5-7, 33.) Lalamuhla uJesu ufuna ukuthi abantu bezizwe zonke bazwe iqiniso ngezindimi zabo. Yikho inhlanganiso isebenza nzima ukuze kutholakale amabhuku lezinye izinto ezinceda abantu ukuthi bafunde ngoJehova ngendimi ezedlula 1 000. Ikanti ezinye zalezo ndimi zikhulunywa ngabantu abalutshwana kakhulu. Ngokwesibonelo, kulendimi ezikhulunywa ngabantu abalutshwana kakhulu ezedlula 160 eNorth laseSouth America kodwa amabhuku ethu ayatholakala ngendimi zonalezo ukuze abantu labo bazwe izindaba ezinhle. Amabhuku ethu aphinde atholakale ngezindimi ezedlula 20 ezisetshenziswa ngabantu besiRomany. Sebebanengi kakhulu abantu abafunde ngoJehova kungelani lokuthi ulimi lwabo lukhulunywa ngabantu abalutshwana.

12. Kuyini okunye okwenziwa yinhlanganiso kaJehova?

¹² Inhlanganiso iphinda incedise lalabo abayabe behlelwe ngumonakalo. Banengi kakhulu abafowethu labodadewethu abazinikelayo ukuyancedisa lapho okuyabe kube lomonakalo khona. Kuphinda kwakhiwe izindawo zokukhonzela uJehova lapho abantu ababuthana khona ukuze bafunde ngaye.

UMPHRISTI WETHU OMKHULU UZAHLALA EKUNCEDISA

13. UJesu angakuncedisa njani?

¹³ UJesu uzahlala ekuncedisa ukuthi uqhubeke ungumngane kaJehova. (Joh. 10:14; Efe. 4:7) Kungenzakala ukuthi ngezinye izikhathi uzibone angani ungumhlanga ohlifiziweyo kumbe uyintambo ebhebha kancane. Lokho kungabangelwa yikuthi uyabe ugula, loba uzisola ngento owayiphambanisayo kumbe usuke waxabana lomunye ebandleni. Ngezikhathi ezinjalo singabe silokhe sicabanga ngobuhlungu esiyabe sibuzwa langenhlupho zethu besesikhohlwa ukucabanga ngalokho uJehova asithembise khona. Lanxa kunjalo ungakhohlwa ukuthi uJesu uyakubona konke okwenzakala kuwe lokuthi uyazwisisa ukuthi kukwenza uzwe njani. UJesu uyakuzwela kakhulu futhi uzakuncedisa. Ngokwesibonelo, angakuqinisa ngomoya ongcwele ngesikhathi usizwa ungaselamandla. UJesu angaphinda asebenzise abadala bebandla kumbe abanye ebandleni ukuze bakukhuthaze, bakuqinise njalo bakududuze.—Efe. 4:8.

14. Kumele wenzeni nxa udanile?

¹⁴ Kungelani lokuthi uphakathi kobunzima obunganani kumbe kulento ekudanisileyo, ukuhlala ukhumbula ukuthi uJesu ulozwelo kuzakunceda kakhulu. Phela okunye okwenza uJehova wathuma uJesu emhlabeni yikuthi wayefuna azwisise ngcono inhlupho zabantu abalesono lobuhlungu ababuzwayo. Ngakho ungavumi ukuthi amaphutha owenzayo akuqede amandla. Hlala ukhumbula ukuthi uJesu uzakuncedisa.—Heb. 4:​15, 16.

15. Kuyini okwanceda uStefano ukuthi aphenduke ebandleni?

¹⁵ UJesu uphinda asincedise ekudingeni asebephambukile ekukhonzeni uJehova ukuze sibancedise baphenduke ebandleni. (Mat. 18:​12, 13) Omunye umfowethu okuthiwa nguStefanob wayeseleminyaka engu-12 esusiwe ebandleni kodwa ngelinye ilanga wacabanga ukuthi ake aye eWolu. Uthi: “Ngangisesaba ukuphinda ngilugxobe eWolu kodwa ngangifuna ukuphinda ngibe labafowethu labodadewethu. Abadala bangamukela ngazo zombili. Ngangike ngidaniswe yikuthi kanti vele ngangimelani ukukhonza uJehova kodwa abadala bangikhumbuza ukuthi uJehova loJesu bafuna ngingakhalali. Ngathi sengibuyiselwe ibandla lonke langitshengisa ukuthi liyangithanda futhi layamukela kuhle imuli yami. Umkami waqalisa ukufunda iBhayibhili futhi kuyangithokozisa ukuthi sesikhonza uJehova sindawonye.” Kufanele ukuthi umphristi wethu omkhulu uyathokoza kakhulu nxa esibona sincedisa abanye ukuthi baphenduke ebandleni!

16. Kungani simbonga kakhulu uJehova?

¹⁶ UJesu wancedisa abantu abanengi kakhulu ngesikhathi elapha emhlabeni futhi asithandabuzi ukuthi lathi uzasincedisa lamuhla. Sisilindele ngabomvu isikhathi lapho esizaphila khona emhlabeni omutsha uJesu esesiqede du isono esilaso. Siyambonga kakhulu uJehova uNkulunkulu wethu ngoba wasitshengisa ukuthi uyasithanda kakhulu waze wakhetha iNdodana yakhe elozwelo ukuthi ibe ngumphristi wethu omkhulu!