CIJIJO 25
Mwari Wakatisika ano Cinangwa Cenyi?
Bhaibheri rinobhuya kuti vandhu vanorarama nguva doko, uye upenyu hwavo wakazara ngo matambujiko. (Jobho 14:1) Kubhuya kuti nga uwu upenyu waaida Mwari katiri here? Ngacipi cainga cinangwa ca Mwari paakasika vandhu? Cinangwa ca Mwari caakasikira vandhu cinozoitika here? Munozodakala maningi ngo kuziva mupingulo yo muvhunjo iyi mu Bhaibheri.
1. Jehovha unoda kuti tirarame upenyu wakadini?
Jehovha unoda kuti tirarame upenyu wakanakisisa. Paakasika vandhu vokutanga Adhamu na Evha, wakavakanda mu paradhiso yainga yakanaka maningi mumunda wo Edheni. Ngo kudalo ‘Mwari wakavakomborera, ovavhunja kuti: ‘Barananyi muwande, muzaje nyika, muitonge.’’ (Genesisi 1:28) Jehovha waida kuti ivona vave no vana, vacinje nyika yese kuti ive paradhiso, nokungwarira zvinyama. Cinangwa cake cainga cokuti vandhu vave no utano wakanaka uye vararame nokusingaperi.
Icokwadi kuti zviro azvito kuitika inga zvaaida Mwari,a asi cinangwa ca Mwari acito kucinja. (Isaya 46:10, 11) Mwari usiri kuda kuti vandhu vese vanomuzwira vararame nokusingaperi vasina matambujiko.—Verenganyi Zvakazarurwa 21:3, 4.
2. Tingaitenyi kuti tive no upenyu wakanaka mazuva ano?
Jehovha wakatisika no cido ‘cokumunamata’, kana kuti cido cokuda kunasa kumuziva. (Verenganyi Mateu 5:3-6.) Iyena unoda kuti tive no ushamwari wakavanga naye, ‘no kuhamba mumakwanja ake nguva yese,’ uye ‘timude no kumunamata ngo mweyo wese.’ (Dheuteronomi 10:12; Mapisarema 25:14) Kana tikadalo, tinozova no mudakalo wocokwadi kunyange patinosangana no matambujiko. Kunamata Jehovha kunopa cinangwa upenyu wedu.
JIJANYI ZVIZINJI
Jijanyi ngo rudo wa Jehovha waakakhombija ngo kutisikira nyika. Jijanyizve kuti Bhaibheri rinojijisenyi ngo cinangwa co upenyu.
3. Jehovha unoda kuti vandhu vave no upenyu wakanaka maningi
Wonanyi VHIDHIYO, mapeja bhuisananyi ngo muvhunjo unotevera:
Mwari wakasikirenyi nyika ino yakaseja kudai?
Verenganyi Muparidzi 3:11, mapeja bhuisananyi ngo muvhunjo jinotevera:
Inga zvinobhuiwa mu vhesi iyi, Jehovha wakakandenyi mu mweyo medu? Vhesi iyi inotijijisenyi ngo zvaanoda Jehovha katiri?
4. Cinangwa ca Jehovha katiri acito kucinja
Verenganyi Mapisarema 37:11, 29 na Isaya 55:11, mapeja bhuisananyi ngo muvhunjo unotevera:
Tinozvizivisa kudini kuti cinangwa cotakasikirwa ndi Jehovha acito kucinja?
Nyumba inonga isito kucengetwa zvakanaka inganasiriswazve nga papsa. Mukutojanawo vandhu avaripi kunasa kucengeta nyika, asi Mwari unozoivakisazve kuti igarwe nga vaya vanomuda
5. Kunamata Jehovha kunoita kuti tive no upenyu unocinangwa
Kuziva cinangwa co upenyu kungatipa mudakalo. Wonanyi VHIDHIYO, mapeja bhuisananyi ngo muvhunjo unotevera:
Kujija ngo zvo cinangwa co upenyu kakabeseresa kudini Terumi?
Verenganyi Muparidzi 12:13, mapeja bhuisananyi ngo muvhunjo unotevera:
Zvesiwoneka kuti Jehovha ndiyena wakatisika, hino tingakhombijisa kudini kuti tinobonga zvaakatiitira?
VANDHU VANGAMUVHUNJISA KUDAI: “Mwari wakatisikirenyi?”
Maizovadavirisa kudini?
TAJIJENYI
Tajija kuti Jehovha unoda kuti tirarame nokusingaperi tesidakala, uye tive no upenyu wakanaka nguva yese. Tajijazve kuti patinonamata Jehovha ngo mweyo wese upenyu wedu unova no cinangwa kunyange mazuva ano.
Muvhunjo Jokuhwirijira
Ngacipi cainga cinangwa ca Jehovha paakasika Adhamu na Evha?
Tinozvizivisa kudini kuti cinangwa ca Mwari caakasikira vandhu acito kucinja?
Mungaitenyi kuti upenyu wenyu uve no cinangwa?
JIJANYI ZVIMWENI
Verenganyi zvinotiita kuti tithembe kuti munda wo Edheni waingeyo kamare.
“Munda wo Edheni Waingeyo Here Kana Kuti Ingano?” (Nharireyomurindi, 1 ya Janeiro yo 2011)
Verenganyi zvinotiita kuti tithembe kuti nyika inozolamba iriyo nokusingaperi.
Wonanyi kuti Bhaibheri rinoti kudini ngo zvo cinangwa co upenyu.
Johani wailangarira kuti wainga na zvese muupenyu, asi wonanyi kuti ngazvipi zvaakaziva kuti wainga asina.
a Mucijijo cinotevera tinozowona kuti ngenyi vandhu vesitambujika.