Jehovha Wakatibesa Kuti Tijaere uye Tidakare Pese Potainga Tiri.

Varoorani Kassholms, vakajija Cikora co Giriyedhi muna 1979 uye ngo kuhamba ko makore, “vakagajwa” kuti vaende koshandira ku Irá, Maurisiyo, Mianmari, Tanzánia, Uganda uye Zaire. Ku Giriyedhi vakapuwa mbhangiro ngo mujijisi Jack Redford, yakavabesa kuti vatendere kugajwa no kuvhiswa mu ndau jakasiyana-siyana kese kovainga vari. Ngativasiye vatsanangure.

Mats, ungativhunjawo kuti wakawanisa kudini cokwadi.

Mats: Potairarama ku Poloniya paaitika Hondo yo Cipiri yo Nyika yese, abangu vakawona kunamata ko kunyepa mu Ceci yo Katolika. Kunyange zvakadaro, ivona vaibhuya kuti: “Cokwadi cingadai cesiwanika ndau imweni!” Ngo kuhamba ko nguva, ndakazwisisa kuti vaibhuya cokwadi. Ndakatenga mabhuku akawanda akamboshandiswa kuti ndiverenge. Rimwe rakona rainga bhuku rinozwi: Zivo Inotungamirira Kuupenyu Husingaperi. Musoro wo bhuku iri wakandibaya mwoyo, uye ndakaverenga bhuku iri rese muusiku wondakariwana. Pondakapeja kuverenga bhukuro, inini ndakaziva kuti ndainga ndawana cokwadi!

Kuvhira muna Abril wo 1972, ndakaverenga mabhuku akawanda o Zvapupu zva Jehovha uye ndakawana mupinguro jo muvhunjo jangu ngo pamusoro po Bhaibheri. Ndakazvizwa inga mutengesi wakabhuya Jesu pa muezaniso wake, pasure pokuwana upfumi wo mutengo mukuru wakatengesa zvese zvaainga anazvo kuti autenge. Inini “ndakatengesa” urongwa wandainga nawo, wo kuda kuita jijo yo pamusoro kuti ndiite medhiko, ndakaita zvese izvi kuti nditenge “upfumi” wo cokwadi wondainga ndawana. (Mateu 13:45, 46) Ndakabhabhatijwa mu dhiya 10 ya Dezembro yo 1972.

Mukati mo gore rimwe, vabereki vangu no munukuna wangu, vakatendawo kujija cokwadi uye vakabhabhatijwa. Mu mweji wa Julho wo gore ra 1973, ndakatanga basa ro nguva yakazara. Pakati po mapiyona o nguva jese ainga mu ungano yedu, painga no hanzvaji imweni yaishamisa inozwi Ann-Catrin yaida maningi Jehovha. Takadanana uye takacadha mu gore ra 1975, takagara makore marongomuna tiri mu thaundi ro Stromsund, mu ndau yakanaka maningi ino mucero ku Suwesiya.

Ann-Catrin: Baba vangu vakajija cokwadi povainga voopeja univherisidhadhe ku Stockholm. Ndainga no mweji mutatu basi panguva iyi, asi ivona vainditora kuenda neni ku musangano no kooparijira. Mamaa avato kuzvidakarira uye vakaeja kuwonesa kuti Zvapupu zva Jehovha zvainga zvisiripi vanamati vo cokwadi. Asi ivona avato kuzvikwanisa, ngo kuhamba ko nguva vakazobhabhatijwa. Ndakabhabhatijwa ndino makore 13, uye ndakaita piyona ndino makore 16. Pasure po kushandira ku Umeå, kaidiwa maningi vapariji vo Umambo, ndakava piyona anokosha.

Pasure po kucadha no mwamunangu Mats, takava no mudakaro wo kubesa vandhu vakawanda kuti vajije cokwadi. Pakati po vandhu vataijijari navo, painga na Maivhori wakasiya basa ro kutamba bhora akazova piyona waishanda pamwepo no munukuna wangu. Ivona vakapinda Cikora co Giriyedhi mu gore ra 1984 uye vari kushanda inga ma misiyonariyo ku Ekwadhori.

Zvicinyi zvakamubesa kuti murambe makadakara pa “mabasa ese amaigajwa oumisiyonariyo”?

Mats: Tairamba “tesigajwa” mabasa mapsa. Asi ciro cakatibesa maningi kuti tienderere mberi no kucinjwa uku, cainga co kueja kutevejera muezaniso wa Jesu, manigi-ningi kuzvidodokesa kaaita. (VaK. 2:6, 7) Inga muezaniso, kunja ko kuemera kuti hama jo mundaumo jiite zvatinoda, taieja kuzwisisa kuti ngenyi ivona vaiita zviro ngo njira imweni. Taida kuzwisisa murangariro wavo uye no tsika. Potaitevejera muezaniso wa Jesu, zvaireruka maningi kuti ticinje no kudakarira mabasa ese ataigajwa.—Ps. 1:2, 3.

Ann-Catrin: Kuti ukure mumbuti wasimikirwa, unoda kujiirwa ngo zuva. Jehovha nguva yese wakava “zuva” katiri. (Ps. 84:11) Iyena wakatipa hama no hanzvaji jino rudo uye jakanaka jinoda Jehovha. Inga muezaniso, ku Tehran, Iran, hama no hanzvaji jakatiashira uye jakatikhombijira rudo. Izvi zvinotieujira kuashirwa kaaizwa vamweni mu nguva jo Bhaibheri. Taidakarira maningi kugara ku Iran, asi muna Julho wo gore ra 1980, Zvapupu zva Jehovha zvakarambijwa kuparijira ngo hurumende uye takazwi tibude mukati mo mazuva maviri. Takagajwa kuti tiende ku Zaire, zvino kuri kuzivikanwa kuti ku Khongo mu Afrika.

Pondakaziva kuti ndagajwa kuti tiende ku Afrika, ndakacema. Zvondainga ndakazwa ngo pamusoro po nyoka no ndhendha ku Afrika, zvakandityisa. Asi shamwari mbiri jo pa mwoyo jainga jakamboshanda konayo ko makore akawanda jakati: “Ngenyi iwewe unotya usati wakamboendeyo! Zvipei mukana uye unozowona kuti Afrika inozokura ndiwe.” Uye zvakaitika! Hama no hanzvaji vano rudo uye vano ushamwari. Kubhuya cokwadi, potaida kuvha ku Zaire pasure po makore 6, ngo ndava yokuti basa redu rairambijwa, ndakanyemwerera pacangu ngokuti ndaiita mukumbiro kuna Jehovha ndesiti: “Ndapota ngatigare mu Afrika.”

Mudakaro upi wamakawana pa makore ese aya?

Mats: Ngo ndava yo mabasa atakagajwa, tino ushamwari wakavanga no mamisiyoriyo amweni akavha ku ndau jakasiyana-siyana. Kunja ka izvi, pamabasa ataigajwa, taiwana mudakaro wo kujijisa zvijijo zvakawanda zvo Bhaibheri nguva jimweni umwe nga umwe wedu waijijisa zvijijo 20! Rudo no kuashirwa kotaiizwa ngo hama no hanzvaji jo ku Afrika ndisiri kuzvirangarira maningi. Potaivhakacira ungano jo ku Tanzaniya, shamwari jakawanda jakatiashira kudarika “zvajaikona”, “potaiemesa nyumba yedu inotwarwa ngo karu”, inozwi Volkswagen Kombi phedo no nyumba javo. (2 VaK. 8:3) Zviro zvinokosha maningi katiri, nga zviya zvatinodanija kuti nguva yo ndhorovondho. Zvataiita mukupera ko zuva ngo zuva, inini no mukaji wangu Ann-Catrin, taigara tobhuisana ngo pamusoro pozvaitika zuvero uye tobonga Jehovha ngo kuva nesu.

Ann-Catrin: Kandiri mudakaro mukuru wandakava nawo ngo wokuzivana no hama no hanzvaji jo munyika yese. Takajija ndumi ipsa jakadai inga Farsi, Frases, Luganda, uye Swahili. Teieja kujijira tsika jakawanda. Takajijisa hama no hanzvaji ipsa kuti jizive zvakawanda, takazova no ushamwari wakanaka navo uye takadakara maningi ngo kushandira Jehovha pamwepo.—Zaf. 3:9.

Takawonawo zvinoshamisa pa zvisikwa zvakasiyana-siyana zvakanaka zvakasikwa ndi Jehovha. Pese pataitendera basa rataigajwa pakushandira Jehovha, taizwa inga kuti taaita rwendo naye esititungamirira. Iyena wakatijijisa zviro zvokuti atisaizozvikwanisa tiri tega.

Zvineso zvipi zvamakasangana nazvo uye zvicinyi zvakamubesa kuti mucungirire?

Mats: Nguva imweni taimbowaja ngo ndhendha jakasiyana-siyana kubatanijawo no malariya. Uye Ann-Catrin wakaizwa operasau zvatainga tisingasotereri. Tainesekawo ngo vabereki vedu vainga vakura, ngo kudaro tiri kudakara maningi ngokuti hama jedu jakava vangwariri vavo vo phedo. Ivona vakangwarira vabereki vedu ngo kusengerera, ngo mudakaro uye ngo rudo wese. (1 Tim. 5:4) Kunyange zvakadaro, nguva jimweni tinomborwisana no mazwiro akashata okuda kuita zvakawanda kupinda kuvabesa tiri ngo ndhambo.

Ann-Catrin: Mu gore ra 1983, potaishandira ku Zaire ndakawaja maningi ndhendha yo khorera. Medhiko wakavhunja mwamunangu Mats kuti: “Mutorei uende kunja ko nyika ino nyamasi!” Pazuva rakazotevera, takazokhwira ndeki yainga isingakhwiji vandhu ngokuti yainga yo kutwara zviro, ndiyona yega yainga iripo yaienda ku Suwesiya.

Mats: Takarangarira kuti basa redu ro misiyonariyo rainga rooguma kumbhiri, ngo kudaro takacema maningi. Asi kunyange kuti medhiko wakabhuya kuti Ann-Catrin aasaizoita nane, asi iyena wakaita nane. Uye gore rakazotevera takahwirira ku Zaire, pa rwendo uwu takaenda ku ungano doko yo Swahili mu Lubumbashi.

Ann-Catrin: Potainga ku Lubumbashi ndakavhirwa ngo mimba. Kunyange kuti tainga tisingazvirangariri kuva no vana, kuruza kotakaita mwana wedu takasuruvara maningi. Potainga takasuruvara, takaashira cipo cotainga tisingasotereri kuvha kuna Jehovha. Takatangisa zvijijo zvo Bhaibheri zvatisati tamboita. Pasati papera gore ungano yakaengejeka kuvha pa 35 kuenda 70 vapariji, uye civerengero co musangano cakakwirira kuvha pa 40 kuita 220. Potakabatikana maningi ngo basa ro kuparijira, Jehovha wakazvikomborera uye izvi zvakaviisa nyarajo yakakura maningi. Kunyange zvakadaro, nguva yakawanda tinorangarira no kubhuisana ngo pamusoro po mwana wedu watakaruzaya uye tinoemera kuwona kuti Jehovha unozoitisa kudini kuti anyaraje mwoyo jedu.

Mats: Pano nguva yokuti Ann-Catrin, wakatanga kuzwa kuremba maningi. Ndakabatwa ngo kanseri uye zvaitoda kuti ndiizwe operasau yakakura. Zvino ndiri kuzwa zviri nane uye Ann-Catrin uri kuita zvaanokona pakushandira Jehovha.

Takazwisisa kuti atiripi tega tiri kusangana no matambujiko. Pasure po kuuraiwa ko vandhu mu gore ra 1994 ku Ruwanda, takavhakacira shamwari jedu jakawanda jainga ku ndau yo kutizira. Potakawona rutendo wavo, kucungirira uye kutiashira kovakatiita, kunyange vairarama mundau inonesa, izvi zvakatijijisa kuti Jehovha uno simba ro kungwarira vandhu vake pa mugariro uri wese unonesa.—Ps. 55:22.

Ann-Catrin: Cineso cimweni cakatanga patakawona kupirwa ko Bheteri ro ku Uganda mu gore ra 2007. Pakapera urongwa uwu, takaita rwendo no cikwata co 25 o mamisiyonariyo no mabheterita kuenda ku Nairobi, Khenya. Tisati taguma kumugano wo kuKhenya, khwandamu doko yakaviya kuzotakira karu yedu ngo mberi. Dhiraivha no shamwari jedu shanu jakafirepo uye hanzvaji imweni yakazofira ku cipitari. Tiri kuemera no cidakadaka kuwonazve shamwari jedu pajinomuswa kuvha ko vakafa!—Job. 14:13-15.

Ndakazoita nane kuvha pandakaremara. Asi inini no mwamuna wangu Mats uye no vamweni vainga mukaru, takaramba tesineseka ngo ngozi yakaitikari. Pacangu, kuneseka kakatanga usiku uye zvaaita inga ndino citenda co mu mwoyo. Izvi zvaindityisa. Asi kuita mukumbiro kuna Jehovha no kuverenga mavhesi ari mu Bhaibheri atinodakarira, zvakatibesa kuti tizvizwe takagajana. Takaendawo ka medhiko kuti atibese uye zvakatibesa. Zvino kuneseka kedu kaanane, tiri kuramba tisikumbira Jehovha kuti abesewo vaya vari kusanganawo no zvakadai.

Pomaibhuya ngo zvakamubesa kuti mukwanise kurwisana no zvineso izvi, mabhuya kuti Jehovha wakamubata “inga mazanda asito kuivha.” Mainga mesida kubhuyenyi?

Mats: Masoko aya anovha pamasoko o ci Swahili anobhuya kuti: “Tumebebwa kama mayai mabichi,” anobhuya kuti: “Takabatwa inga mazanda.” Kudai inga mundhu wakatwara mazanda unonasa kumangwarira zvakanaka kuti asapwanyika, Jehovha unotibesa pa mabasa ese atinogajwa. Nguva yese tainga no zvataida mbhera kutodarika zvataida. Njira yo takawona ndiyona kuti Jehovha unotida, ngo yo kuti Dare Rinotungamirira raineseka tisu.

Ann-Catrin: Ndaidakarira kumuvhunja muezaniso wo besero ro ndakapuwa ndi Jehovha. Zuva rimweni, ndakafonerwa ndovhunjwa kuti baba vangu vainga ku Suwesiya, vari kucipitari vari kuwaja maningi. Mats wainga asandovha kuita nane paakawaja maningi malariya, uye tainga tisina mare yo kuhwirira kanyi. Takakheta kuti tinodikana kutengesa karu yedu. Tevere takafonerwa kaviri imwe yainga yo varovorani vamweni, vainga vazwa zvatainga tesisangana nazvo uye vaida kutibhadharira pasajhi. Yo cipiri yanga hanzvaji imweni yainga yakura, iyona yainga yakacengeta mare “kuitira kubesa vanoda besero.” Ngo ci nguva cidoko, Jehovha wakaviya kuzotibesa!—VaH. 13:6.

Zvicinyi zvamakajija pa makore 50 amakapeja muri mu nguva yakazara?

Ann-Catrin: Ndakaguma pakuziva kuti simba redu ngo ‘rokuramba takagajana uye tesikhombija kuthemba Jehovha.’ Kudai tikathemba Jehovha unozotibesa pa hondo yatiri kurwisana nayo. (Isa. 30:15; 2 Mk. 20:15, 17) Kudai tikashandira Jehovha pa mabasa ese atinogajwa, tinozoashira makomborero kudarika zvatairangarira.

Mats: Cijijo cikuru candakawana, ngo co kuthemba Jehovha pa mugariro uri wese no kuwona mangwaririre aakandiita. (Ps. 37:5) Iyena nguva yese uri kundibesa inga zvaakathembesa. Tisiri kuwona kuti Jehovha usiri kutibesa pa basa ipsa ratakagajwa ku Bheteri ro ku Mianmari.

Tino cokwadi cokuti majaha ari kuda kuita zvakawanda mu basa ra Jehovha, vanozokhombijirwawo rudo inga makhombijire aakatiita. Tinothemba kuti munozotendera kuti Jehovha amubese kuti murambe mesivangisira pa mabasa ese aanomugaja.