Muvhunjo jo Vaverengi

Munyori wa Zvirevo 30:18, 19 wakati: “Gwanja ro mwanarume ano musikane” ‘rinondinesa kuzwisisa.’ Iyena waida kubhuyenyi?

Vandhu vakawanda vanozvivhunjisa kuti vhesi iyi inoda kubhuyenyi, kunyange vamweni vanoziva zvakawanda ngo pamusoro po Bhaibheri. Vhesi yese Musandujo yo Nyika Ipsa inoti: “Kuno zviro zvitatu zvinondinesa kuzwisisa kana kuti zvinobhuiwa pa masoko opasi, “zviro zvinoshamaisa maningi kandiri”. Uye zviro zvirongomuna zvandisikazwisisi: Gwanja ro hokotora kudenga, gwanja ro nyoka pamusoro po buwe, gwanja ro piketi pamusoro po kumwa, no gwanja ro mwanarume ano musikane.”—Zvi. 30:18, 19.

Isusu kare, taizwisisa kuti magama okuti “gwanja ro mwanarume ano musikane” aibhuya inga zviro zvakashata. Fundo rakona rinotsangura zviro zvakashata zvisingabhuyi kuti “zvakwana.” (Zvi. 30:15, 16) Uye vhesi 20 inobhuya ngo “mwanakaji anohura” asingatendi kuti waita zviro zvakashata. Ngo kudaro, zvairangarirwa inga hokotora inomburuka mudenga, nyoka ino hamba pa musoro po buwe, no piketi ino hamba pa musoro po kumwa, zvinohamba zvisikasiyi magwezva, zvingaitikawo kuti mundhu oita zvakashata zvotama kuwoneka. Tesishandisa pfungwa iyi, taizwisisa kuti magama okuti: “Gwanja ro mwanarume ano musikane” raibhuya ngo pamusoro po mujaha anocengeja musikane kuti avate naye.

Ngo kudaro, tino cikonzero cinoita kuti tithembe kuti vhesi iji jinobhuya zviro zvakanaka. Munyori uwu wainga esida kubhuya zviro zvaimushamisa.

Zvinyorwa zvo ciHebheru zvinotenderanawo nazvo kuti magama ovhesi iji anobhuya zviro zvakanaka. Mukuzwirana no bhuku Léxico Teológico do Velho Testamento, magama o ciHebheru akasandujwa okuti “zvinondinesa kuzwisisa” pana Zvi. 30:18 “anokhombija kuti mundhu ungarangarira zviro zvakakura maningi . . . zvisingaitiki uye zvinoshamisa.”

Tica Crawford H. Toy wo Universidade yo Harvard yo kuEstadhu Unidhu, unotenderanawo nazvo zvokuti vhesi iyi aibhuyi zviro zvakashata. Iyena wakati: “Icokwadi kuti munyori uwu waieja kunyora kuti zviro izvi zvaimushamisa.”

Ngo kudaro, zvinoita inga zviri nane kubhuya kuti magama ari pana Zvirevo 30:18, 19 anobhuya zviro zvinoshamisa kamare kana kuti zviro zvinonesa kuzwisisa. Inga munyori uwu wa Zvirevo, isusu tingashamisikawo ngo mamburukire anoita hokotora, mahambire anoita nyoka isina makumbo pa buwe, inga piketi inorema inohamba padera po kumwa uye inga mujaha no musikane vanodanana uye vogara vese vakadakara.