Jesu “Wakajija Kuzwira”

Jesu nguva yese waizwira Jehovha. (Johani 8:29) Hino ngenyi Bhaibheri rinoti: “Iyena wakajija kuzwira kuvha ku zviro zvaakatambujika”?—VaH. 5:8.

Paainga pasi pano, Jesu wakasangana no zviro zvaasito kumbowona kudenga. Iyena wakabarwa ngo vabereki vainga vakazvipira kuna Jehovha asi vainga no cishaishi. (Ruka 2:51) Iyena wakacungirira paaibatwa zvisito kunaka ngo vatungamiriri vo maceci vano utsinye uye vatungamiriri vo hurumende. (Mateu 26:59; Mako 15:15) Kunja ka izvi, iyena wakafa zvinowaja maningi. Bhaibheri rinoti: “Jesu wakazvidodokesa no kuzwira mbhera koofa”.—VaF. 2:8.

Zviitiko izvi zvakajijisa Jesu kuzwira, ngo njira yaainga asati ambojija kudenga. Ngo kudaro, iyena ungava Mambo asina cishaishi uye Mupristi Mukuru ungakwanisa kutizwira unyasha. (VaH. 4:15; 5:9) Jesu wakava anokosha kuna Jehovha kuvha paakazwira pa zviro zvaakatambujika ndizvona. Isusuwo tingava vanokosha maningi kuna Jehovha uye tikava vakagondeka pamabasa ese aanotigaja kudai tikaramba teizwira pa mugariro wese unonesa.—Jak. 1:4.