Nduyo

144 Jehovha Buwe rangu, ngaasimbwe,

Wiya anojijisa nyara jangu kuti ndiyende ku hondo,

Wiya anojijisa zvikunwe zvangu kuti ndiyende ku hondo.

 2 Iyena indau yangu yakavanga, anonditaja ngo rudo hucikacinji,

Iyena, citiziro cangu cakangwaririka no muponesi wangu,

Iyena imuvhiko wangu, inini ndinotizira kwaari,

Iyena anoita kuti vandhu vanyiswe, vova mu nyara jangu.

 3 Jehovha Mwari wangu, mundhu ndiyani kuti imwimwi mumutaje?

Ndiyani mwana wo mundhu kuti imwimwi mumupurukire?

 4 Upenyu hwo mundhu wakadodoka maningi;

Njiku jake jokupona jakadari inga munvuriri unopinda.

 5 Jehovha Mwari wangu, kotamisanyi matenga enyu mubzuke;

Psasanyi matundhu muite kuti iwona aphunge usi.

 6 Tumiranyi mbheni kuti vavengi vandhandhanike;

Khandiranyi mupasha jenyu kuti ivona vavhiringijike.

 7 Muri kudenga, tambanujanyi nyara jenyu;

Ndisujunurenyi no kundiponesa mu kumwa ino simba,

No munyara jo vandhu vonyikanja.

 8 Muromo yavo inobhuya manyepo

Ivona vanomusa mukono wavo wo muho kuti vapike zviro zvokunyepa.

Ndinozomuimbira ndumbo jo kumusimba ndino cinorijwa cino gumi ro shinda,

10 Ngokuti munoita kuti majimambo awine,

Imwimwi munoita kuti mushandiri wenyu Dhavhidhi atame kuuraiwa ngo banga.

11 Ndisujunurenyi no kundiponesa mu nyara jo vonyikanja,

Muromo yavo inobhuya manyepo

Ivona vanomusa mukono wavo wo muho kuti vapike zviro zvokunyepa.

12 Vana vedu vorume vanozoita inga muti mudoko inokura ngo kukasika,

Vana vedu vokaji vanozoita inga njiki jakavezwa jo pacikina* jo pa nyumba ya mambo.

13 Ndau jedu jinogara zvokuha, jinozozara ngo zvokuha zvo mushovo wese;

Mavhuta edu ari mumaminda, anozowanda maningi, oita gumi ro zviuru zvo mazana.

14 N’gombe jedu jino mimba ajizosongani no ngozi nee ajizosvoji;

Mu mabazari edu amuzovi no vandhu vanokhuwa ngo ndava yo kutambujika.