Nduyo
Ku mutungamiriri. Masikiri.* Nduyo ya Dhavhidhi. Pa mukuvo wokuti Dhowegi wakaenda koozivisa Sauri kuti Dhavhidhi wainga akaenda ku nyumba ya Ahimereki.
52 Ngenyi iwewe unodada ngo ndava yo zviro zvakashata zvawakaita?
Rudo hwa Mwari hucikacinji hunogara njiku jese.
2 Rurumi hwako wakapinja inga cirezi;
Unoronga kuita zvakashata, no kuita mabasa okucengeja.
3 Iwewe unoda maningi zviro zvakashata kupinda zviro zvakanaka,
Unodakarira kunyepa, kupinda kubhuya cokwadi. (Sera)
4 Unodisisa masoko ese akashata,
Iwewe uno rurumi unocengeja!
5 Ndizvona zvinoita kuti Mwari azokuparaje mbhera narini;
Iyena anozokubata, okuvhisa mu tende yako;
Iyena anozokuvhita, iwewe auzogarizve pakati po vandhu vanopona. (Sera)
6 Vandhu vakarurama vanozozvivona, vozoshamaisika,
Ivona vanozomuseka, veciti:
7 “Uwu ndiyena mundhu acizivi kutizira kuna Mwari,
Iyena wakathemba kuwanda ko upfumi hwake
Othembazve mazano ake akashata.”
8 Asi inini ndinozoita inga muti wo maorivhe wakapfara pa nyumba ya Mwari;
Ndinozothemba rudo hucikacinji hwa Mwari mbhera narini, kwenda no kwenda.
9 Ndinozomusimba mbhera narini ngo zvamakaita;
Pamberi po vandhu venyu vakagondeka,
Ndinozoimira zina renyu, ngokuti irona rakanaka.