Varoma
13 Umwe nga umwe wenyu ngaazwire vatongi, ngokuti akuna utongi huripo hucizivi kutendehwa ndi Mwari. Utongi huripo wari, hwakadihwa pa ndau yaho ndi Mwari. 2 Asi, wiya anohwisana no utongi ari kuhwisana na Mwari; vaya vanohwisana no nasiriro yake, vanojipsakira kutongwa. 3 Vatongi avathyiwi ngo vandhu vanoita zvakanaka, asi vanothyiwa ngo vanoita zvakashata. Unoda kugara ucikathyi vatongi here? Garai weciita zvakanaka, unozosimbhwa ngo vatongi; 4 ngokuti ivona vanoshandira Mwari kuti ubeseke. Asi kudari weciita zvakashata, vathyei, ngokuti ivona vakapuwa simba, votendehwa kutambuja vanoita zvakashata. Ivona vari kushandira Mwari kuti vatambuje anoita zvakashata.
5 Imwimwi munodikana kuzwira vatongi. Mucavazwira ngo ndava yo ushungu hwavo asi vazwirenyi ngo ndava yo hana yenyu. 6 Ndizvona zvinomuitisa kuti mushabe; ngokuti ndivona vashandiri va Mwari vanogara vecimushandira ngo kuda kuita zvondhozvo. 7 Ipanyi mundhu wese zvaanofanera: wiya anomukumbira kuti mushabe, imwimwi shabanyi; wiya anomukumbira muhengo, mupenyi muhengo; wiya anomukumbira kuti mumuthye, munodikana kumuthya; wiya anokumbira kukujwa, munodikana kumukuja.
8 Mucafiyari ciri cese ku mundhu. Imwimwi munodikana kudisana ngo cenyu ngokuti wiya anoda mudoni wake, anokwanirisa mutemo. 9 Ngokuti mutemo unonanga kuti: “Ucaita upombo, ucauraya, ucaba, ucaemura,” no mupango uri wese hawo unowanika, unogurisihwa ngo magama okuti: “Idai mudoni wako inga madire aunojiita.” 10 Rudo ahuitiri zvakashata mudoni; rudo ndihwona kukwanirisika ko mutemo.
11 Imwimwi munodikana kuita izvi ngokuti yakwana nguva yo kumuka muhope. Ngokuti ruponeso hwedu hwaaphedo maningi kupinda patakava vatendi. 12 Usiku hwoda kupera; kunja koda kueja. Ngo kudaro, ngatiregere kuita zviro zvo cidima, ngatisimire zvijito zvo ruvheneko. 13 Ngative no mufambiro wo vandhu vanoita zviro no masikati. Itusu atidikani kuita mabuso akanyanyisa, kumwa maningi doro, kuita uhure, mufambiro unopseruja, umbavha no ushanje. 14 Asi teveranyi ngo phedo muezaniso wa Mambo Jesu Kristu, motama kurangarira kuzoita zvido zvo nyama.