1 Johani
4 Hama jinodiwa, mucatenda masoko ari ese akafemehwa,* asi sotesesanyi masoko akafemehwa* kuti muvone dangani anovha ka Mwari, ngokuti kuno vaporofeti vazinji vo kunyepa vakavoneka mu nyika.
2 Mukadaro, munozoziva kuti masoko akafemehwa, anovha kuna Mwari, kudari masoko aya ecitenda kuti Jesu Kristu wakaviya pasi pano inga mundhu. 3 Asi masoko ari ese akafemehwa acikatendi Jesu, aavhi kuna Mwari. Asi iwona, masoko akafemehwa o muvengi wa Kristu wamakazwaya kuti waizoviya, wari wazoguma munyika.
4 Vana vangu, imwimwi muri vana va Mwari, makavanyisa, ngokuti wiya wakabatana na imwimwi ano simba maningi kupinda wiya wakabatana no nyika. 5 Ivona vanovha mu nyika; ngo kudaro vanobhuya ngo zviro zvinovha mu nyika, nyika yecivazwira. 6 Itusu tinovha ka Mwari. Wiya anoziva Mwari anotipurutana; asi acikavhi ka Mwari aatizwiri. Ngo kudaro tinokwanisa kusiyanisa masoko akafemehwa okadi no masoko akafemehwa o kunyepa.
7 Hama jinodiwa, ngatirambe tecidisana ngocedu, ngokuti rudo hunovha ka Mwari, wese ano rudo ndiyena mwana wa Mwari, iyena anoziva Mwari. 8 Wiya acina rudo aazivi Mwari, ngokuti Mwari i rudo. 9 Ngo njira iyi, Mwari wakatatija rudo hwake kotiri: Ngo kutumira Mwana wake umwe ega, aviye pa nyika kuti tiwane upenyu ngo ndava yake. 10 Rudo nga uhu: Asipi itusu takada Mwari. Asi iyena wakatida wotitumira Mwana wake, kuti ave muripiri wo zvishaishi zvedu kuti tiviirane na Mwari.
11 Hama jinodiwa, kudari Mwari wakatida ngo njira iyi, waro itusuvo tinodikana kudisana ngocedu. 12 Apana mundhu wakambovona Mwari. Kudari tikaramba tecidisana ngocedu, Mwari anogara motiri; rudo hwake hunoita hwakaperera motiri. 13 Nga izvi tinoziva kuti tinoramba takabatana naye, iyena wakabatana na itusu, ngokuti wakatipa mujimu wake. 14 Kunja kwa izvi, itusu takavona, toita ucapupu hwokuti Baba vakatuma Mwana wavo kuti ave muponesi wo nyika. 15 Wiya anotenda kuti Jesu Mwana wa Mwari, Mwari anoramba akabatana naye, iyena wakabatana na Mwari. 16 Itusu takaziva kare rudo hwa Mwari kotiri, tohutenda.
Mwari i rudo, wiya anoramba ano rudo, anoramba akabatana na Mwari, Mwari anoramba akabatana naye. 17 Ngo njira iyi, rudo hwakaithwa kuti huve hwakaperera kotiri, kuti tiverekete tecithemba* pa njiku yo kutongwa, ngokuti magariro ake* anoezana no magariro edu mu nyika ino. 18 Pano rudo apana kuthya, asi rudo hwakaperera hunonyisa kuthya, ngokuti kuthya kunotiviisa sure. Zvokadi, mundhu anothya aana rudo hwakaperera. 19 Itusu tinomuda, ngokuti ndiyena wakatanga kutida.
20 Mundhu wese anonanga kuti: “Ndinoda Mwari,” wozonda hama yake, ari kunyepa. Ngokuti wiya acingadi hama yake, yaanovona, aakwanisi kuda Mwari waacikavoni. 21 Itusu takaashira mutemo uwu kwaari: kuti wiya anoda Mwari anodikanavo kuda hama yake.