2 Timoti

3 Asi zivai izvi kuti, mu njiku jo kupejisira kunozowanika mukuvo unonesa kucungirira. 2 Ngo kuti vandhu vanozojida pacavo, vanozodisisa mare, vanojitundhumaja, vanojikuja, vatuki, vacikazwiri vabari, vacikabongi, vacikagondeki, 3 vacikadi ukama, vacikadi kuzwirana no vamweni, vashori, vacikajibati, vanothyisa, vacingadi zvakanaka, 4 vacikathembeki ku vamweni, vano ndhija, vakazara ngo kujikuja, vanodisisa zvinodakajisa muviri kupinda kuda Mwari, 5 ivona vanojiita inga vanonamata Mwari asi vanokonehwa kurarama* mukuzwirana no simba rakwo. Iwewe reyai kwavari. 6 Pakati pavo panobuda vandhu vanonghwinira mu mamuzi mo vamweni ngo cifise-fise, vecicengeja vanakaji vacina simba, vakaremehwa ngo zvishaishi, vecitungamirihwa ngo zvido zvakawanda. 7 Ivona vari kundojija nguva jese asi avakwanisi kuwana zivo yakarungama yo cokwadi.

8 Ivona vanoramba vecishora cokwadi inga zvakaithwa ndi Jane na Jambre, vaizonda Mosi. Vandhu ava vano murangariro wakashata kamare, rutendo hwavo ahutendehwi. 9 Ngo kudaro apana kwavanoguma, ngo kuti upenji hwavo hunozozivika ngo vandhu vese inga zvakaitika no vanarume vaviri vaya. 10 Asi iwewe wakatevera ngo phedo jijiso yangu, mararamiro angu, cidisiso cangu, rutendo hwangu, kusengerera kwangu, rudo hwangu, kucungirira kwangu, 11 kuteverehwa kwangu no matambujiko andakasongana nawo akadari inga o ku Antiyokiya, Ikoniyo no Ristra. Inini ndakacungirira kuteverehwa kwese uku, na Mambo wakandiponesa pa zvese izvi. 12 Zvokadi, vese vaya vanoda kurarama* mu kujipira kuna Mwari, mukubatana na Kristu Jesu, vanozoteverehwa. 13 Asi vandhu vakashata no vacengejeri vanozoenda mberi kuvha mu kushata kwenda mukushatisisa, vecipausa no kupauswa.

14 Asi iwewe, endererai mberi uri mu zviro zvowakajija no zvakakukhohwesa kuti utende, ngokuti unozviziva kuti wakazvijijiswa ndiyani. 15 Kuvhira pa udoko hwako unoziva matahwa akacena, anokuita wakangwara kuti uwane ruponeso ngo pamusoro po kutenda Kristu Jesu. 16 Matahwa ese akafemehwa ndi Mwari. Iwona anobesera pa kujijisa, kupangira, kurungamisa* no kutiroveja kuti tiite zvakanaka, 17 kuti mundhu wa Mwari anase kukwanisa, ano zvese kuti aite mabasa ese akanaka.