Jobe
29 Jobe wakaenderera mberi eciti:
2 “Nokwainga kuti ndahwirira hangu ku mweji jakapera
Mu njiku jandaitajwa ndi Mwari,
3 Paaivheneka pa musoro wangu ngo ruvheneko hwake
Pandaifamba mucidima ndecivhenekehwa ngo ruvheneko hwake,
4 Pandainga ndiciri no simba,
No mu njiku jandainga no ushamwari hwakavanga na Mwari,
5 Womasimba Ese paainga aciri na inini,
No vana* vangu pavainga vakanditendeneja,
6 Pandainga ndecisamba soka* ngo mukaka,*
Mapuwe paaindibudisira mafuta.*
7 Pandaienda ku musuvo wo dhorobha,
Inini ndaigara pa kadera yangu mu ndau yaiungana vandhu,
8 Majaha paaindiona aireya,*
Pikija madhodha aitomuka, oima.
9 Vatongi vainyarara;
Vaifunga muromo ngo nyara.
10 Izwi ro vandhu vainga no nduma, rainyarajwa;
Rurumi hwavo hwainamirira mukanwa mavo.
11 Vaindizwa, vaindiinikira,
Vaindivona, vaindiitira ucapupu hwakanaka.
12 Inini ndaiponesa varombo vaida besero,
Inini ndaibeserazve ndherera*
No mundhu ari wese wainga acina mubeseri.
13 Mundhu wainga ecida kufa, waindikomborera,
Inini ndaidakajisa mwoyo wo noni.
14 Ndaisimira urungami inga nguvo;
Kutonga kwangu kwaiita inga dhuku,
Kwaiitazve inga nguvo yakareba icina mukono.
15 Ndainga majiso o bofu.
Ndainga murenje jo cigono.
16 Ndainga baba wo varombo.
Ndainasa kupopora shwiro jo vandhu vandainga ndicikanasi kuziva.
17 Ndaiphwanya cirevhu co mundhu wakashata.
Ndomuvhukira nyama yaainga akaruma.
18 Inini ndainanga kudari: ‘Ndinozofira pamuzi pangu,
Njiku jangu jinozowanda inga musanga.
19 Muji jangu jinoenda mbhera mukumwa.
Cando cinozowa usiku hwese panyezuru po matavi angu.
20 Kukujwa kwangu kunoenderera mberi kweciithwa kupsa.
Uta hwangu unoenderera mberi wecifura.’
21 Vese vainasa kundipurutana,*
Vecivetera mbhangiro yangu vakanyararisa.
22 Pandaipera kuvereketa, vaisara vacina zvimweni zvokuengejera.
Masoko angu ainasa kuzika ushoni mu njeve javo.
23 Vaindiimira inga varikuimira nvhura kuti ine.
Vaifunungura muromo javo kuti vamwe masoko angu inga vari kumwa kumwa yo nvhura.
24 Pandainyemwerera* kwavari, avacaizvitendepi.
Ivona vaivangiswa ngo kuvona kumeso kwangu kwadakara.
25 Ndaivapa ndhungamiriro inga mutungamiriri wavo.
Ndaivoneka inga mambo pakati po masoca avo
Inga mundhu anoembezera vanocema.*