Nduyo
Nduyo ya Dhavhidhi.
א [Arefi]
37 Ucanyangajwa ngo ndava yo vandhu vanoita zvakashata
Nee auvhiri kunyenya vaya vanoita zvakashata.
2 Ivona vanozovoma ngo kukasika inga sora
No kufota inga sora riciri vishi.
ב [Bheti]
3 Thembai Jehovha, itai zviro zvakanaka;
Garai panyika, itai zviro wakagondeka.
4 Wanai mudakaro mukuru ngo kushandira Jehovha,
Iyena anozokupa zvinoda mwoyo wako.
ג [Gimeri]
5 Tenderai kuti Jehovha akutungamirire;
Muthembei, iyena anozokubesa.
6 Iyena anozoita kuti urungami wako umonikire inga kubuda ko zuva,
Anozoitazve kuti ururami wako umonikire inga zuva ro masikati.
ד [Dhareti]
7 Imirai Jehovha ngo kusengerera kwese
Nasai kumuimira.
Ucanyangajwa ngo ndava yo mundhu anonasa
Kubudirira pa kuita zviro zvakashata zvaakaronga.
ה [He]
8 Ucanyangajwa, siyai hasha;
Ucatendera kuti ushungu hwako ukuite kuti uite zvakashata.
9 Ngokuti vandhu vanoita zvakashata vanozoparajwa,
Asi vese vaya vanoimira Jehovha vanozogara panyika.
ו [Wau]
10 Sambiri pano,* vandhu vanoita zvakashata avazowanikizve;
Iwewe unozosota pavaigara,
Asi ivona vanozonga vacipo.
11 Asi vandhu vakapfava vanozogara pa nyika,
Vozodakara maningi vano runyararo hwakakura.
ז [Zayini]
12 Vandhu vakashata vanoitira vandhu vakarurama zviro zvakashata;
Ivona vanonyangajwa maningi pavanovona vandhu vakarurama.
13 Jehovha anozoseka vandhu vanoita zvakashata,
Ngokuti iyena anoziva kuti njiku yavo inozoguma.
ח [Heti]
14 Vandhu vanoita zvakashata vanovhisa banga no kukwanya uta
Kuti vawise mundhu anotambujika no murombo,
Kuti vauraye vandhu vanofamba mu gwanja rakarungama.
15 Asi banga ravo rinozobovora mwoyo yavo;
Uta wavo unozoguhwa.
ט [Tete]
16 Zviri nane mururami kuva no zviro zvishoma
Kupinda upfumi wo vandhu vanoita zvakashata.
17 Ngokuti mukono jo vandhu vanoita zvakashata jinozoguhwa,
Asi Jehovha anozobesera varurami.
י [Yodhi]
18 Jehovha anoziva zviri kusongana no vandhu vakagondeka,
Ndhaka yavo inozogara kwenda no kwenda.
19 Ivona avazonyowejwi pa mukuvo wo dambujiko,
Pa mukuvo wo njara, ivona vanozowana zvokuha zvakawanda.
כ [Kafe]
20 Asi vandhu vanoita zviro zvakashata vanozofa;
Vavengi va Jehovha vanozongara-ngara inga kuseja ko maruva o mubani;
Ivona vanozongara-ngara inga usi.
ל [Ramedhi]
21 Mundhu wakashata anoshonga, asi aahwiriji
Asi mururami anokova ngo mwoyo wese.
22 Vaya vakakomborehwa ndi Mwari vanozogara panyika,
Asi vaya vakatongehwa kuurawa ndi Mwari vanozopejwa.
מ [Memi]
23 Jehovha anotungamirira upenyu wo mundhu
Kudari akadakarira zviito zvake.
24 Pikija akasejemuka, iyena aazowi,
Ngokuti Jehovha anomubata ngo nyara yake.
נ [Nuni]
25 Ndakava mujaha, wari ndaamusharuka,
Asi andito ndikavona mururami wakasiiwa,
Nee vana vake vecipsaka zvokuha.
26 Mukuvo wese iyena anopa ngo mwoyo wese,
Vana vake vanozokomborehwa.
ס [Sameki]
27 Rambai zvakashata, itai zvakanaka,
Iwewe unozogara mbhera narini.
28 Ngokuti Jehovha anoda ururami,
Iyena aazosii vaya vakagondeka kwaari
ע [Ayini]
Ivona vanozongwaririhwa mukuvo wese;
Asi mubarihwana wo vandhu vanoita zvakashata unozopejwa.
29 Vandhu vakarurama vanozogara pa nyika,
Ivona vanozogaremo mbhera narini.
פ [Pe]
30 Muromo wo mururami unobhuya ngo pamusoro po uzivi,
Rurumi wake unobhuya ngo pamusoro po ururami.
31 Mutemo wa Mwari wake, uri mu mwoyo mwake,
Paanonga ecifamba soka jake ajisejemuki.
צ [Tsadhe]
32 Mundhu anoita zviro zvakashata anorindira mururami,
Ecipsaka kumuuraya.
33 Asi Jehovha aazomusii mu nyara jo mundhu anoita zvakashata
Nee kumupa ndava paanonga ecitongwa.
ק [Kofe]
34 Veterai Jehovha, ufambe mu gwanja rake
Iyena anozokukuja kuti ugare pa nyika.
Vandhu vanoita zvakashata pavanozourawa, iwewe unozozvivona.
ר [Reshi]
35 Ndakavona mundhu anonesa, mundhu wakashata
Ecibudirira pa zviito zvake inga muti wakapfara uri pa mavhu ano ndimo.
36 Asi iyena wakangarangaka ngo kukasika wotama kuvonekazve;
Inini ndaimupsaka, asi iyena aacaiwanikazve.
ש [Sini]
37 Vonai mundhu wakagondeka,
Nasai kuvona mundhu wakarungama,
Ngokuti vetero yo mundhu uwu, inozova yo runyararo.
38 Vandhu vese vacikazwiri mutemo ya Mwari vanozopejwa;
Vetero yo vandhu vanoita zviro zvakashata ngo yo kuzouraiwa
ת [Tawi]
39 Ruponeso wo vandhu vakarurama unovha kuna Jehovha;
Iyena indau yavo yakavanga yokutizira pa mukuvo wo kutambujika.
40 Jehovha anozovabesera no kuvasujunura.
Iyena anozovasujunura ku vandhu vanoita zvakashata no kuvaponesa,
Ngokuti vakatizira kwaari.