Novembro

Kudari muri mubari, beseranyi vana venyu vanasirire mupinguro jo mupira wavo. Nguva jimweni, shwiro jinonesa jakadari inga zvineso zvo pa mbhuri, shwiro jinobhuya ngo pamusoro po mufambiro watinodikana kuva nawo, jingajijwa pa musongano. Asi kangaije pangava no ndima imwe kana mbiri jingashandiswa kuti vana vadoko vakwanise kupa mupinguro javo. Cimwenizve, beseranyi vana venyu vazwisise kuti ngenyi avazokhombijwi pa vhaza jese javanomusa mukono. Kuvasanangurira izvi kunovabesera kuti vatame kunyangajwa pavanovona vamweni vacikhombijwa kusiyapo ivona. (1 Tim. 6:18) Tese tinganasirira mupinguro jinokuja Jehovha no jinovangisa hama no hambzaji jedu. (Maz. 25:11) Pikija nguva jimweni tingatodikana kunanga zviro zvakatiitikira, tinodikana kungwarira kuti titame kubhuya maningi ngo pamusoro pedu. (Maz. 27:2; 2 Vak. 10:18) Kusiyapo zvondhozvo, tinodikana kubhuya maningi ngo pamusoro pa Jehovha, Soko rake no vandhu vake.—Apok. 4:11. w23.04 24-25 ¶17-18

Rudo unosisira maningi kuti tive vandhu vakarinda. (Mat. 22:​37-39) Kuda kwatinoita Mwari kunotibesera kucungirira patinonga tecicumaera pikija no zvineso zvingaviya. (2 Tim. 1:​7, 8) Tinokhombijira rudo hwedu kuno vandhu vacikashandiri Jehovha, pikija tecishandisa foni kana karata. Atiruzi vetero yo kuti vatinocumaera vanozocinja, voda kuita zvaushoni. (Ezek. 18:​27, 28) Kuda kwatinoita vamweni kunobatanija kuda hama no hambzaji jedu. Tinokhombija rudo uhu ngo ‘kuvangisana no kubesana ngocedu.’ (1 Vat. 5:11) Inga masoca anovangisana pavanonga veciita hondo, itusu tinovangisana ngocedu. Aticaizokhuvaza hama jedu tecizviziva kana kuhwirijira zvavakatiitira. (1 Vat. 5:​13, 15) Cimwenizve, tinokhombija rudo hwedu tecireremeja hama jese jinotungamirira mu ungano.—1 Vat. 5:12. w23.06 10 ¶6; 11 ¶10-11

Njira imwe yo kuvangisa rutendo hwedu ngo yo kurangarijisisa ngo muripo. Muripo ndi ciro cinotigondesa kuti zvigondiso zva Jehovha ngo zvokadi. Patinorangarijisisa no kungwarira kwese ngo pamusoro po muripo uwu, tinozovangisa rutendo hwedu pa cigondiso ca Mwari co upenyu ucikaperi no nyika yakanakisisa. Ngenyi tinonanga kudaro? Ngozvapi zvinobatanijwa pa muripo? Jehovha wakatumira Mwana wake anodiwa wo dangwe, shamwari yake yo phedo kuvha kudenga kuviya kobahwa pasi pano inga mundhu wakakwana. Paainga pasi pano, Jesu wakacungirira mushovo wese wo zvineso. Iyena wakatambujika no kufa mu njira inosuruvarisa. Jehovha wakaripa mutengo wakakura maningi. Mwari wedu ano rudo aacaizotendera kuti Mwana wake atambujike no kufa kuitira kuti tive no upenyu hwaushoni ko mukuvo mushoma basi. (Joh. 3:16; 1 Ped. 1:​18, 19) Zvecivoneka kuti Jehovha wakatipa Mwana wake anodiwa kuitira kutibesera, iyena anotigondesa kuti tinozokwanisa kurarama no kucingaperi mu nyika imbza. w23.04 27 ¶8-9

Kunanga kuti Jehovha ano cido co kumusa vakafa? Pacina kukana-kana, hina. Iyena wakafemera vanarume vakawanda kuti vatare mu Bhaibheri ngo pamusoro po cigondiso cake co rumuko. (Isa. 26:19; Apok. 20:​11-13) Jehovha paanogondesa zviri zvese, nguva jese anozvikwanirisa. (Josh. 23:14) Iyena ano cidaka-daka co kumusa vese vakafa. Amborangariranyi basi zvakanangwa ndi Jobe. Iyena wainga no cokwadi co kuti pikija akafa, Jehovha waizomumusa. (Job. 14:​14, 15) Jehovha ano mazwiro ondhoo ku vanamati vake vakafaya. Iyena anoda kamare kumusa vandhu no upenyu hwaushoni no vakadakara. Tingativo kudini kuno zviuru no zviuru zvo vandhu vakafa vacizivi kuwana mukana wo kujija ngo pamusoro pa Jehovha? Mwari wedu ano rudo anodavo kuvamusa. (Maba. 24:15) Iyena anoda kuvapa mukana kuti vakwanise kuva shamwari jake no kukwanisa kupona no kucingaperi pa nyika pano.—Joh. 3:16. w23.04 9 ¶5-6

Mungavangisa kudini vetero yenyu? Inga muezaniso, kudari vetero yenyu ngo yo kupona pasi pano mu Paradhiso, verenganyi ngo zviitiko zvinobhuya ngo Paradhiso no kurangarijisisa ngo pamusoro pazvo. (Isa. 25:8; 32:​16-18) Rangariranyi kuti upenyu unozova wakadini mu nyika imbza. Ejanyi kuzvivona muri kondhoyo kamare. Patinopeja nguva tecirangarijisisa ngo pamusoro po vetero yedu yo mu nyika imbza, zvineso zvedu zvinozova zvo ‘nguva shomani no zvakareruka.’ (2 Vak. 4:17) Vetero yatakapuwa ndi Jehovha ndiyona inozotivangisa. Iyena anotipa zvese zvatinoda kuti tiwane simba rinovha kwaari. Kudari munoda besero kuti mukwanirise basa ramakagajwa, kunyisa zvineso zvamuri kusongana nazvo, kana kuenderera mberi muno mudakaro, itanyi mukumbiro kuna Jehovha mecimuvhunja zvese zvamuri kuzwaro no kupsaka ndhungamiriro jake ngokuita jijo yo mundhu ega. Tenderanyi besero no vangiso inovha kuno hama no hambzaji jedu. Psakanyi nguva yokurangarijisisa manera unozova upenyu kumbejiyo. Ngo kuita kudaro imwimwi ‘munozovangiswa ngo simba rese, mukuzwirana no simba rake guru kuti munase kucungirira no kusengerera no mudakaro.’—Vako. 1:11. w23.10 17 ¶19-20

Tino mathangwe akawanda maningi anotiita kuti tibongesere Jehovha, patinonga teciita mukumbiro. Tingamubongazve ngo zviro zvese zvakanaka zvatinazvo, ngokuti cipo cese cakanaka cinovha kwaari. (Jako. 1:17) Inga muezaniso, tingabongesera ngo kuseja kwakaita nyika yedu no zviro zvakasikwa zvinoshamaisa. Tingabongeserazve ngo upenyu hwedu, mbhuri yedu, shamwari jedu no vetero yedu. Tingabongeserazve Jehovha ngo kutitendera kuti tive shamwari jake. Kangaije tingatodikana kuvangisira kuti tikwanise kurangarira mathangwe atinawo pacedu kuti tibongesere Jehovha. Tiri kupona mu nyika ino vandhu vacikabongi. Vandhu vazinji mu nyika ino vari kubatikana maningi pa zviya zvavanoda, kusiyapo kubongesera ngo zviya zvavanazvo. Kudari tikatevejera mugariro uwu, mukumbiro jedu jinozodari inga rista yo zvatinoda kukumbira basi. Kuti izvi zvitame kuitika, tinodikana kuenderera mberi tecibongesera ngo zvese zvatinoitihwa ndi Jehovha.—Ruk. 6:45. w23.05 4 ¶8-9

Inga Baba wedu vano rudo, Jehovha aadakariri kutivona tecitambujika. (Isa. 63:9) Pikija zvakadaro, iyena aaiti kuti titame kusongana no zvineso zvinonesa mu upenyu hwedu, zvingaezaniswa no murambo kana no murazvu. (Isa. 43:2) Ngo kudaro, iyena anotigondesa kutibesera ‘patinozopinda ngo mukumwa.’ Jehovha aazotenderi kuti zvineso zvedu zvigare kwenda no kwenda. Kusiyapo zvondhozvo, Jehovha anozotipekeja mujimu wake mucena kuti uzotibesere kuti tienderere mberi tecicungirira. (Ruk. 11:13; Vafi. 4:13) Ngo iyo ndava, tingava no cokwadi cokuti tinozova no zvese zvatinoda kuti ticungirire no kuramba takagondeka kuna Jehovha. Jehovha anovetera kuti timuthembe. (Vahe. 11:6) Nguva jimweni itusu tingavona kuti zvineso zvedu zvinganesa maningi kucungirira. Mukuvo umweni tingatanga kukana-kana kuti Jehovha anozotibeseradi kana kuti haiwa. Asi Bhaibheri rinonanga kuti simba ra Mwari ringatiita kuti tikwanise ‘kukhwira pa mupfimbiji.’ (Nduy. 18:29) Ngo kudaro, kusiyapo kugara tecikana-kana kuti Jehovha anotibesera, tinodikana kuita mukumbiro no rutendo wakavanga wo kuti iyena anozodavira mukumbiro jedu.—Jako. 1:​6, 7. w23.11 22 ¶8-9

Magama aya anonasa kusanangura rudo hwokadi! Iwona anovangisa kamare vandhu vakarovorana: Imwimwi mungakwanisavo kuva no rudo ucikaperi. Kudari varovorani vanodavo kuva no rudo ucikaperi vecipona vese, zvinofira kwavari. Inga muezaniso, muriro unogara wecibwaka ushoni kudari ukaenderera mberi wecikhwindijihwa. Kudari iwona ukatama kukhwindijihwa unojima. Mu njira yakaezana, rudo wo mukaji no mwamuna kuti uenderere mberi wakavanga, vanodikana kushanda vese vakabatana. Nguva jimweni, varovorani vangavona kuti rudo hwavo uri kutondhora, maningi-ningi kudari vano zvineso zvo mare, kuhwaja no manera ovangarera vana vavo. Kuti “murazvu wa Jehovha” urambe uripo, mwese munodikana kushanda ngo simba kuti muve no ushamwari hwakavanga na Jehovha. w23.05 20-21 ¶1-3

Ngozvapi zvatinodikana kuita kuti tive no cicunge? Vabari vedu vangatotivhunja kuti tive no cicunge, asi avangakwanisi kuita kuti tive no cicunge ngokuti ivona vakacunga. Kuva no cicunge kwakadari inga kujijira kuita zviro zvipsa. Kuti tikwanise kuita zviro izvi, tinodikana kunasa kusotesesa mundhu anokwanisa ushoni kuzviita perapo tomutevejera. Mukuezanavo, tingakwanisa kuva no cicunge ngo kusotesesa vandhu vanokhombija mugariro uwu, perapo toutevejera. Inga ndi Dhanyeri, tinodikana kunasa kuziva Soko ra Mwari. Tinodikana kuva no ushamwari wo phedo na Jehovha ngo kubhuya naye takasujunuka no kutozviita mukuvo wese. Tinodikana kumuthemba, tojikhohwesa kamare kuti mukuvo wese anozotibesera. Perapo, rutendo hwedu paunozoejwa, tinozokwanisa kuva no cicunge. Vandhu vano cicunge kazinji vanoreremejwa ngo vamweni. Vangatoitazve kuti vandhu vano mwoyo wakanaka vade kuziva Jehovha. Zvokadi kamare, tinova no muviyo jaushoni ngo kuva kwedu vandhu vano cicunge. w23.08 2 ¶2; 4 ¶8-9

Gama ro Cigiriki rakashandiswa ro kuti “ivanyi no cokwadi,” wari rinoshandiswa ngo vandhu vanoeja simbi jakadari inga, goridhi no sirivha kuti vavone kuti dangani irona ngo rokadi. Ngo kudaro, tinodikana kueja zviya zvatinozwa no zvatinoverenga kuti tivone dangani ngozvokadi. Izvi zvinozovavo zvinosisira maningi kwatiri dambujiko guru parinonga recikhwedera. Kusiyapo kutendera zvese zvinonangwa ngo vamweni, tinoshandisa kukwanisa kwedu kurangarira kuti tiezanise zvatinoverenga no zvatinozwa na zviya zvinonangwa ngo Bhaibheri no sangano ra Jehovha. Patinoita izvo atizocengejwi ngo masoko anoziviswa ngo madhimoni. (Maz. 14:15; 1 Tim. 4:1) Inga cikwata cimwe, vandhu va Jehovha vanozopona pa dambujiko guru. Umwe nga umwe wedu atizivi zviro zvinozoitika mangwana. (Jako. 4:14) Pikija zvakadaro, azvinenyi dangani tinozopona pa dambujiko guru kana kuti tinofa dambujiko guru ricito ratanga, tinozokomborehwa ngo upenyu ucikaperi kudari tikaenderera mberi takagondeka. Itusu tese, tinodikana kubatikana pa vetero yedu inoshamaisa no kuva takanasiririka kuitira njiku ya Jehovha. w23.06 13 ¶15-16

Itusu atizvizivi kuti zviporofita zvimweni zvo Bhaibheri zvinozokwanirisika kudini. (Dhan. 12:​8, 9) Asi kutama kuziva manera anozokwanirisika ciporofita ciri cese, azvirevi kuti icona acizokwanirisiki. Ngative no cokwadi cokuti Jehovha anozotibesera kuti tinase kuzwisisa zvese zvatinodikana kuziva pa nguva kwayo kamare inga manera aakaita mu nguva yokare. Sambiri pano ciziviso co kuti “tiri kugara mu runyararo ticina ngozi iri yese” cinozoithwa. (1 Vat. 5:3) Tevere, utongi hwo nyika ino unozohwisana ngocawo woparaja mukuperera ciyara cokunyepa. (Apok. 17:​16, 17) Ivona vanozohwisa vandhu va Mwari. (Ezek. 38:​18, 19) Zviitiko zvese izvi zvinozoita kuti Armagedhoni itange. (Apok. 16:​14, 16) Ngative no cokwadi cokuti zvese izvi zvinozokwanirisika sambiri pano. Mbhera izvi zviitike, ngatienderere mberi tecivonesa kubongesera kwedu kuna Jehovha ngo kunasa kujija zviporofita zvo Bhaibheri no kubesera vamweni kuti vaitevo zvakafanana. w23.08 13 ¶19-20

Mupostori Pauro paaibhuya ngo pamusoro po rutendo, vetero no rudo, iyena wakapejisa ngo kunanga kuti “asi cikuru pa zvese, i rudo.” (1 Vak. 13:13) Ngenyi Pauro waidikana kunanga izvi? Ngokuti kumbejiyo, zvese zvakagondeswa ndi Mwari ngo pamusoro po nyika imbza zvinonga zvakwanirisika. Asi itusu mukuvo wese tinozodikana kukhombijira rudo kuna Jehovha pomwe no vandhu. Kunasa kunanga, rudo hwedu kwavari unozoenderera mberi wecikura. Ngokuti patinokhombija rudo kuno umwe no umweni itusu tinokhombija kuti tiri Makristu o cokwadi. Jesu wakati kuno vajiji vake: “Mukaita kudaro, vese vanozoziva kuti imwimwi muri vajiji vangu: Kudari mukadisana ngo cenyu.” (Joh. 13:35) Kusiyapo zvondhozvo, rudo unobesera kuti tive takabatana. Pauro wakati rudo “ndihwona cisungo cakakwana co rubatano.” (Vako. 3:14) Mupostori Johani wakatara kudari: “Wiya anoda Mwari anodikanavo kuda hama yake.” (1 Joh. 4:21) Patinokhombijirana rudo kuno umwe no umweni tinovonesa kuti itusu tinoda Mwari. w23.11 8 ¶1, 3

Bhaibheri rinoezanisa upenyu hwedu inga Makristu no upenyu wo mugogomi. Vagogomi vanoguma mbhera ku magumo vanozoashira upenyu ucingaperi. (2 Tim. 4:​7, 8) Tinodikana kuita zvese zvatinokwanisa kuti tienderere mberi tecigogoma, ngokuti taaphedo kamare kuti tigume kumbhiri. Mupostori Pauro, wakananga zviro zvinozotibesera kuti tikwanise kuguma kumbhiri. Iyena wakati: “Ngativhise zviro zvese zvinorema togogoma ngo simba rese tecienda pambeji.” Pauro wainga ecinanga kuti Makristu aadikani kuthwara zviri zvese? Haiwa, andizvopi zvaaida kunanga. Iyena waida kunanga kuti tinodikana kuvhisa zviro zvinorema zvaticikadikani kuthwara. Kurema kwakadari kwaizotiita kuti tigumire pakuremba. Kuti tikwanise kucungirira, tinodikana kuvhisa ngo kukasika zviro zvese zvaticikadikani kuthwara. Asi pa mukuvo wondhowo, atidikani kuvhisa zviro zvatinodikana kuthwara. Ngokuti izvo zvaizoita kuti titame kufanerazve kwenderera mberi tecigogoma kuti tiwane upenyu.—2 Tim. 2:5. w23.08 26 ¶1-2

Kuva mundhu anozwisisa kunozotibesera kuti tireremeje mavonero o vamweni. Inga muezaniso, hambzaji jimweni jinodakarira kudira makiajhi asi jimweni ajidakariri. Makristu amweni anodakarira kumwa acikapindiriji mudida asi amweni anovona zviri nane kutama kutomwa kamare. Tese tinoda kuva no uhomi hwaushoni, asi tinosana marapihwe akasiyana. Kudari tikajivona inga kuti tino razawu basi, toda kuti vamweni vaite zviro ngo manera atinoda, tingagumira pakukhugunya vamweni zvoita kuti tiparajane mu ungano. (1 Vak. 8:9; 10:​23, 24) Nguva jimweni Jehovha aativhunji kuti i nguvo japi jatinodikana kusimira asi anotipekeja ndhungamiriro kuti titevere. Itusu tinodikana kusimira mu njira inokuja Mwari, inovonesa kuti tiri vandhu vanozwisisa, vanojidodokesa no vano “murangariro wakanaka.” (1 Tim. 2:​9, 10) Atidi kusimira mu njira yokuti vandhu vanogara vecitiringisa basi. Ndhungamiriro jo mu Bhaibheri jinozobesera vakuru kuti vatame kudira zvimutemo-mutemo ngo pamusoro po masimirire no kujinemesa. w23.07 23-24 ¶13-14

Jehovha wakaronga zvese kuitira kutikhombija kuti tingaitisa kudini kuti tive no kumbeji kunodakajisa. Vaya vanotendera mukoka wo mwanakaji wo “upenji” vanoeja kudakajihwa ngo kuita uhure. Kunasa kunanga, ivona vari kupona kuti vadakajihwe wari uno, vecikanganwa kuti vari kuruza kumbeji kunodakajisa. Zvovari kuitaro zvinoita kuti ivona vawire mu “Guva rakajika.” (Maz. 9:​13, 17, 18) Izvi zvakasiyana maningi no vaya vanotendera mukoka wo mwanakaji “wo uzivi.” (Maz. 9:1) Tiri kujijira kuda zvinoda Jehovha no kunyenya zvaanonyenya. (Nduy. 97:10) Cimwenizve, tinodakara ngo kukoka vamweni kuti vaviyevo kozwa ngo pamusoro po “uzivi hwokadi.” Zvakadari inga tiri kukhuwa “mu ndau yakakhwirira yo dhorobha tecinanga kudari: ‘Vese vacina uzivi, viyanyi kuno.’” Makomborero atinoashira no anozoashira vaya vanotendera mukoka watiri kupari asipi o wari uno basi, iwona ngo wo ‘kuzorarama’ kwenda no kwenda ngokuti anotitendera kuti ‘tirarame patinonga teciteveja gwanja ro uzivi.’—Maz. 9:​3, 4, 6. w23.06 24 ¶17-18

Mugaitisa kudini kudari mudoni wenyu wokubasa kana wo kushikora akamuita muvhunjo ngo pamusoro po zviro zvamunotenda? Imwimwi munothimwa-thimwa? Vazinji vanozwa kudaro. Asi muvhunjo jakadari, jinotiita kuti tizwisise zviri kurangarihwa ngo mundhuwo no kutipa mukana wo kumuvhunja masoko akanaka. Nguva jimweni, vandhu vanoita muvhunjo kuti vavereketesane. Izvi azvitishamaisi. Vamweni vanozwa masoko okunyepa ngo pamusoro po zviro zvatinotenda. (Maba. 28:22) Kunasa kunanga, tiri kupona “mu njiku jo kupejisira,” mukuvo wokuti vandhu vazinji avadi ‘kuzwirana no vamweni’ no “vanothyisa.” (2 Tim. 3:​1, 3) Kangaije mungajivhunjisa kudari: ‘Ndingaitisa kudini kuti ndirambe ndakathiva vamweni pavanoda kuvereketesana ngo zvinonangwa mu Bhaibheri?’ Ngozvapi zvingamubesera? Ikuva mundhu wakapfava. Mundhu wakapfava aakasiki kunyangajwa, mukusiyana anojibata paanonga ecishohwa no paanongaya acina cokudavira. w23.09 14 ¶1-2

Nguva jimweni itusu tinoashira ndhungamiriro inovha ku sangano ra Jehovha inotijivirira pakutama kuzwira mutemo ja Mwari. Patinoteverera ndhungamiriro iji tinozokwanisa kuvona manera azviri ushoni kwatiri kuzwira ndhungamiriro ja Jehovha. (Isa. 48:​17, 18; 1 Tim. 6:​9, 10) Pacina kukana-kana, Jehovha anozoenederera mberi ecishandisa vandhu kuti atipe ndhungamiriro pa mukuvo wo dambujiko guru no pamukuvo wokutonga ko ciuru co makore. Kureva kuti itusu tinozoteverera ndhungamiriro iyi? Zvinozova zvakareruka kuzwira ndhungamiriro ja Jehovha kudari tikatangira wari tecijizwira. Ngo kudaro, mukuvo wese tinoda kuteverera ndhungamiriro ja Jehovha. Izvi zvinobatanija ndhungamiriro jese jaanotipekeja ecishandisa vanarume vaakagaja kuti vatitungairire. (Isa. 32:​1, 2; Vahe. 13:17) Kudari tikateverera Mutungamiriri wedu wakakwana Jehovha, itusu tinozokwanisa kuthemba kuti iyena angazotiponesa pa ngozi iri yese nokutizve tinozoenderera mberi tiri shamwari jake ko upenyu hwedu hwese mu nyika imbza. w24.02 25 ¶17-18

Mupostori Pauro waidakara maningi ngo kushandira Jehovha, asi asipi mukuvo wese wozvaireruka. Iyena waidikana kuita hwendo ko mumango wakareba, izvi zvainesa maningi pa mukuvo wondhowo. Nguva jimweni, waidikana kusongana no “ngozi jo mumurambo” no “ngozi jo mbavha.” Mukuvo umweni, vavengi vake vaitomutaka. (2 Vak. 11:​23-27) Nguva jimweni, hama ajicaibongesera ngo zvese zvaithwari ndiyena kuti avabesere. (2 Vak. 10:10; Vafi. 4:15) Ngozvapi zvakabesera Pauro kuti aenderere mberi ecishandira Jehovha? Wakajijira zvakawanda maningi ngo pamusoro po undhu hwa Jehovha kuvha mu Matahwa no kuvha ku zviya zvakamuitikira. Iyena waithembazve kuti Jehovha Mwari waimuda maningi. (Varo. 8:​38, 39; Vaef. 2:​4, 5) Wakaguma pa kuda maningi Jehovha. Pauro wakakhombija kuti waida Jehovha ‘ngo kushandira vakasanwa no kuenderera mberi ecivashandira.’—Vahe. 6:10. w23.07 9 ¶5-6

Vandhu vazinji vanozviziva kuti vanoda besero ro vatongi, nokutizve zvinosisira kuzwira mutemo munganani jinodihwa ngo “vatongi.” Asi vandhu vondhovo vanodakarira kutama kuzwira mutemo javanovona kuti ajizivi kurungama. Bhaibheri rinonanga kuti utongi hwo vandhu unotongwa ndi Sathana no kuviisa matambujiko kuno vandhu, unozoparajwa sambiri pano. (Nduy. 110:​5, 6; Muc. 8:9; Ruk. 4:​5, 6) Irona rinonangazve kuti “wiya anohwisana no utongi ari kuhwisana na Mwari.” Jehovha ari kutendera kuti utongi huwanike kuti zviro zvive zvakarongeka iyena anotenderazve kuti tiuzwire. Ngo kudaro, tinodikana kuvapa ‘zvavanofanera,’ kubatanijavo mushabo, nderemejo no kuvazwira. (Varo. 13:​1-7) Kangaije nguva jimweni tingavona kuti mutemo javanodira ajizivi kurungama, ajisisiri kana jinonesa kuzwira. Asi itusu tinozwira Jehovha nokutizve iyena anotivhunja kuti tinodikana kuzwira vatongi, asi atizovazwiri kudari ivona vakatikumbira kuita zviro zvicikazwirani no mutemo jake.—Maba. 5:29. w23.10 8 ¶9-10

Samusoni paakabahwa, Vafiristi ndivona vainga vecitonga jinja ro Vaiziraeri, vecivashupha. (Vato. 13:1) Vaiziraeri vakatambujika ngokuti Vafiristi vainga vandhu vakashata. Jehovha wakasana Samusoni “kuti aponese Vaiziraeri mu nyara yo vaFiristi.” (Vato. 13:5) Kuti Samusoni akwanise kuita basa iri, waidikana kuthemba Jehovha. Pa vhaza imweni, cikwata co masoca co Vafiristi cakaenda ku dhorobha ro Rehi, kangaije ku Judha kuti vaende kosunga Samusoni. Vanarume vo Judha vainga vecithya, ngo kudaro, vakatema civaringo cokupa Samusoni mu nyara jo vavengi vavo. Vandhu va Samusoni kamare ndivona vakamusunga ngo mapote maviri mapsa vomuendesa kuno Vafiristi. (Vato. 15:​9-13) Asi “mujimu wa Mwari wakaderuka panyezuru” pa Samusoni, mapote ayani odajuka. Iyena wakawana “muxathi muvixi wo mbongoyo,” woubata woushandisa kuti auraye ciuru co Vafiristi.—Vato. 15:​14-16. w23.09 2 ¶3-4

Jehovha wakativhunja “cidisiso cake co kwenda no kwenda,” mu Bhaibheri. Mu njira yakasiyana-siyana, Jehovha anokwanisa kuita zvese zvaanoda, “zvese” zvaanoita zvinomubesera kuti akwanirise cidisiso cake. (Maz. 16:4) Zvese zvaanoita zvinogara kwenda no kwenda. Ngocapi cidisiso ca Mwari nokutizve ngojapi cinjo jaakaita kuti cidisiso ici cikwanirisike? Jehovha wakavhunja varovorani vokutanga kuti ngocapi cainga cidisiso cake kwavari. Iyena wakavavhunja kudari: “Barananyi muwande muzaje nyika no kuitonga . . . Mutonge zvese zvinogwezva” pa nyika. (Gen. 1:28) Ngokutama kuzwira kwa Adhamu na Evha, vandhu vese vakava vashaishi, asi izvi azvizivi kucinja cidisiso ca Jehovha. Iyena wakashandisa njira imweni kuti akwanirise cidisiso cake. Ngokukasika, Jehovha wakatema civaringo co kuviisa Umambo hwake kuti azokwanirisa cidisiso cake kuno vandhu no nyika inga manera aaidaya pakutanga.—Mat. 25:34. w23.10 20 ¶6-7

Jehovha angatibesera kuti ticungirire. Zvinganesa kuti tienderere mberi patinonga tecihwisana no muejo ko mukuvo wakati kuti. Nguva jimweni zvineso zvedu zvingaengejeka maningi kupinda zvakasongana na mupostori Pedhru. Asi Jehovha anotipekeja simba ratinoda kuti ticungirire. (Nduy. 94:​18, 19) Vonanyi muezaniso wo hama imweni yokuti icito yajija cokwadi yaivatana no mwanarume doni. Iyona yakacinja kamare manera oyaipona, yopona mukuzwirana no zvinojijiswa ngo Bhaibheri. Pikija zvakadaro, yakadikana kwenderera mberi yecihwisana no zvido zvicikaripi zvaushoni. Zvicinyi zvakaibesera kuti icungirire? Iyona yakananga kudari: “Jehovha anondivangisa.” Yakaengejera yeciti: “Ngo besero ro mujimu mucena . . . , ndinokwanisa kwenderera mberi ndiri mu cokwadi . . . pikija no kutama kukwana kwangu Jehovha ari kwenderera mberi ecindishandisa no kundivangisa.” w23.09 23 ¶12

Majaha, zvinoda kuvangisira kuti muve Makristu akaivha ku mujimu. Imwimwi munodikana kutevejera muezaniso jaushoni, kuva no zvikwaniriso, kuva vanothembeka, kujijira mugariro jaushoni kuitira upenyu hwenyu no kujinasirira kuitira mabasa amunozowana kumbejiyo. Kangaije muri kuthimwa-thimwa ngo mabasa amunozova nawo kumbejiyo. Asi imwimwi munozozvikwanisa. Ceukijanyi kuti Jehovha anoda kumubesera. (Isa. 41:​10, 13) Zvakajeka kuti hama no hambzaji jo mu ungano jinozomubesera. Kudari imwimwi mukaita zvese zvamunokwanisa kuti muve Mukristu wakaivha, upenyu hwenyu hunozova hunodakajisa. Itusu tinomuda maningi hama jiri majaha. Mungava no cokwadi cokuti Jehovha anozomukomborera maningi pamunovangisira kuti muve Mukristu wakaivha. w23.12 29 ¶19-20

Rangariranyi kuti muri pamabuso no cikwata co hama no hambzaji. Imwimwi muri kutobungaija, pakupera ko mabusowo mobudisa foto. Imwimwi mapera kuvhisa foto jakawanda. Asi pa imwe yakona imwimwi mazwisisa kuti pano imwe hama yabuda ino hope yakashata. Imwimwi munopfujura foto iyi ngokuti muno jimweni jinokwana kuita mbiri. Asi pa foto iji hama jese jiri pondhopo kubatanijavo no hama iya jiri kuseka. Ngozvokadi kuti imwimwi muno zviro zvaushoni zvokuceukija pamukuvo wamakapeja no hama no hambzaji. Zvinoitika kuti pa njiku yondhoyo hama kana kuti hambzaji yakabhuya zviro zvokuti azvicaingepi zvaushoni. Ngozvapi zvamaizoita no zviro zvakaitikaro? Ngenyi amuzvipfujuri inga manera amunopfujura foto icikaripi ushoni? (Vaef. 4:32) Itusu tingakanganwa zvakaposwa ngo hama kana hambzaji yedu ngo kuceukija mukuvo jaushoni jotakapeja nayo. Izvi ndizvona zviro zvaushoni zvatingagara teciceukija ngo pamusoro po hama jedu. w23.11 12-13 ¶16-17

Gama ro Cigiriki rakashandiswa apa riri kunangira kuti nguvo jo vanakaji vo Cikristu jinodikana kuva jakareremera no jinokhombija nderemejo ku vamweni. Kuti vakhombije izvi, ivona vanodikana kukhombija kuti vanoreremeja mazwiro no mavonero o vamweni. Ngo iyo ndava, tinodada ndimwi hambzaji munoshandisari ndhungamiriro iyi ngo kusimira nguvo jakareremera. Kunasa kurangarira ndi mugariro waushoni maningi unodikana kutatijwa ngo hambzaji jo Cikristu. Icinyi kunasa kurangarira? Zvinoreva kukwanisa kusiyanisa zvakanaka no zvakashata perapo kakuita zvakanaka. Vonanyi muezaniso wa Abhigairi. Mwamunake wakatema civaringo cakashata maningi cakadira pangozi vopamuzi pake no vashandiri vake. Asi Abhigairi wakaita zviri zvese ngokukasika. Iyena wakanasa kuziva zvaidikana kuita, ngokuita kudaro wakaponesa vandhu vazinji. (1 Sam. 25:​14-23, 32-35) Kunasa kurangarira kunotibesera kuti tivone kuti ngoyapi nguva yokuvereketa no yokutama kuvereketa. Kusiyapo izvi, tinovonesa kuti tinoneseka ngo vamweni asi totama kunghwinira mu shwiro jo upenyu hwavo.—1 Vat. 4:11. w23.12 20 ¶8-9

Mupostori Pauro wakatara masoko aya ku ungano yo ku Roma. Hama jo ku ungano iyi, jakajija ngo pamusoro pa Jehovha na Jesu jovangisa rutendo hwajo ngo kuva Makristu. Ngo kudaro, Mwari wakananga kuti ivona vainga “varurami ngo ndava yo rutendo” hwavo perapo ovazoja ngo mujimu mucena. (Varo. 5:1) Ivona vaivetera kupocera mupocero unoshamaisa nokutizve vaidikana kuva no cokwadi co kuti izvi zvaizotika. Pauro wakatarira Makristu o kuzojwa o ku Efeso ngo pamusoro po vetero yavo yavainga vakaashira. Vetero iyi yaibatanija kuashira “zvaakagondesa ku vatendi doni.” (Vaef. 1:18) Cimwenizve, Pauro paakatarira Vakorose iyena wakavavhunja kuti vaizoashira kwapi mupocero uwu. Pauro wakananga kuti ‘vetero yavo yainga yakavigwa ku denga.’ (Vako. 1:​4, 5) Ngo kudaro, vetero yo Makristu okuzojwa ngo yo kuzomuswa kuti vaende korarama kudenga na Kristu.—1 Vat. 4:​13-17; Apok. 20:6. w23.12 9 ¶4-5

Gama ro Cigiriki rakasandujwa kuti “kungwarira” raishandiswa recinangira masoca aingwarira dhorobha no kurijivirira ku vavengi. Ngo kudaro, vagari vo dhorobha iri vaivata vacikathyi veciziva kuti masoca akangwarira musuvo jese. Mu njira yakaezana, runyararo pahunongwarira mwoyo no murangariro jedu tinojizwa takajiviririka teciziva kuti takangwaririka. (Nduy. 4:8) Ndizvona zvakaitikavo na Ana, pikija kuti mugariro wake auzivi kucica ngokukasika iyena wakava no runyararo. (1 Sam. 1:​16-18) Patinova takathiva tinozokwanisa kurangarira ushoni no kutema zvivaringo zvakanaka. Ngozvapi zvatinodikana kuita? Pamunohwisana no mugariro unonesa maningi, daninjanyi “mungwariri” mu njira yo kuezanisira. Kuitisa kudini? Itanyi mukumbiro kuna Jehovha mbhera muzwe runyararo hwake. (Ruk. 11:9; 1 Vat. 5:17) Pamunonga mecisongana no mugariro jinonesa maningi mu upenyu hwenyu itanyi mukumbiro. Mukaita kudaro munozovona runyararo hwa Jehovha no kungwarira kwaanoita mwoyo wenyu no murangariro.—Varo. 12:12. w24.01 21 ¶5-6

Kuti akwanise kucenesa zina ra Baba wake, Jesu wakatambujwa, kutukwa no kupumbhwa manyepo. Iyena waiziva kuti wainga akazwira Baba wake mu zvese nokutizve wainga acina ciri cese caizomuita kuti anyowejeke. (Vahe. 12:2) Iyena waiziva kuti Sathana waimuhwisa pa mukuvo jiya jokunesa. (Ruk. 22:​2-4; 23:​33, 34) Sathana waida kuita zvese zvaaikwanisa kuti Jesu atame kuva akagondeka, asi iyena aazivi kuzvikwanisa! Jesu wakavonesa kuti Sathana ndi munyepi mukuru nokutizve Jehovha ano vashandiri vake vakagondeka vanoenderera mberi vecimushandira pikija vecihwisana no zvineso zvinonesa maningi. Imwimwi munoda kusiya kuti Mambo wenyu Jesu ave akadakara? Endereranyi mberi mecikuja zina ra Jehovha, mecibesera vamweni kuziva mugariro jinoshamaisa ja Mwari wedu. Pamunoita izvi, munonga mecitevejera Mambo wenyu Jesu Kristu. (1 Ped. 2:21) Kudari inga ndi Jesu, muri kuitavo kuti Jehovha adakare no kuvonesa kuti muvengi Wake Sathana ndi munyepi wakashatisisa. w24.02 11-12 ¶11-13

Pamakore mashanu apera, vandhu vanopindirija zviuru vakabhabhatijwa inga Zvapupu zva Jehovha. Imwimwi pamunonga majipira kuna Jehovha, munonga makheta kuti muve mujiji wa Jesu Kristu nokuita kuti kuda ka Jehovha kuve ciro cinosisira maningi mu upenyu hwenyu. Kujipira ko Cikristu kunobatanijenyi kwamuri? Jesu wakati: “Wiya anoda kunditevera, ngaajirambe.” (Mat. 16:24) Gama rakasandujwa ro Cigiriki rokuti “ngaajirambe” rikasandujwa rinoreva “kutama kuita kuda kwako.” Inga mushandiri wa Jehovha wakajipira, imwimwi munodikana kuramba ciri cese cicikazwirani no kuda kwake. (2 Vak. 5:​14, 15) Izvi zvinobatanija kuramba “mabasa o nyama,” akadari inga kuita uhure. (Vaga. 5:​19-21; 1 Vak. 6:18) Kuzwira ndhungamiriro iji, kungavisa cineso mu upenyu hwenyu? Kudari imwimwi munoda Jehovha nokuthemba kuti mutemo jake kuitira kugara ushoni kwenyu azvizoviisi cineso.—Nduy. 119:97; Isa. 48:​17, 18. w24.03 2 ¶1; 3 ¶4

Jehovha anopa mujimu wake mucena kuna vaya vaanotendera. (Mat. 12:18) Tingajivhunjisa kudari: ‘Ndakakwanisa kukhombija mucero wo mujimu mucena wa Mwari mu upenyu hwangu here?’ Ndiri kuzwisisa kuti wari uno ndiri kusengerera maningi ku vamweni kupinda pandainga ndicito ndaziva Jehovha? Kunasa kunanga, pamunoenderera mberi mecikwanisa kukhombija mucero yo mujimu mucena wa Mwari, munozokwanisa kuvonavo kuti muri kutendehwa ndi Jehovha. Jehovha anoshandisa kusisira ko muripo kuna vaya vaanotendera. (1 Tim. 2:​5, 6) Asi tingati kudini kudari ticikavoni kuti tinotendehwa ndi Jehovha pikija tino rutendo ku muripo no kubhabhatijwa? Ceukijanyi kuti asipi mukuvo wese watinodikana kuthemba mazwiro edu, asi tinodikana kuthemba Jehovha. Iyena anovona vaya vano rutendo ku muripo inga vandhu vakarurama pa meso pake nokutizve anogondesa kuvakomborera.—Nduy. 5:12; Varo. 3:26. w24.03 30 ¶15; 31 ¶17