Zvinodakajisa zve Zvinotondhoja Zvinowanika ngo Ucapupu hwo Pambhene
1. Ungano jino ndharaunda inoita maningi minye-minye vandhu jakavangiswa kuitenyi?
1 Ungano jino ndharaunda inoita maningi minye-minye vandhu jakavangiswa kuti jinasirire ucapupu hwo pa mbhene, jecishandisa zvimeza zvino marodha. Kudari zvirodha zvinomarodha zvinoshandiswa, zvingaita mucumaeri umwe aime kana kugara phedo naco. Asi, vacumaeri vaviri vangava pa cimeza. Vaya vakagajwa kuita basa iri vanodikana kuvangisira kuva vano rudo, ushamwari zve kukoka. Kudari mundhu ecivonesa kudakarira zviri kutatijwa, mucumaeri umwe angatanga kubhuisana nae, kangaije ngo kunanga kuti: “Makamborangarira kuti Bhaibheri rinonangenyi ngo pamusoro po shwiro iyi?” Mucumaeri umweni kana vaviri vangagara vecisoterera cimeza vecibatikana kuita ucapupu hucizivi kurongwa.
2. Nanganyi zvakaitika zvinovonesa kudikana ko kucumaira ko pambhene.
2 Izvi zvakava no muvio wo kutanga jijo zinji maningi jo Bhaibheri. Umwe mujiji womawanakaji, wo cikora co kolejhio (Cikora cinojijisa basa vandhu vapeja cikora) wakakheta kutara phepha ku zvapupu zva Jehovha, asi waikonehwa kuwana Nyumba yo Umambo. Pa bviki rakatevera iyena wakavona cimeza cokutatija mabhuku pa ndharaunda ino nyumba jo univhersidhadhe. Pakatangwa jijo yo Bhaibheri zve wari mujiji uu waamucumaeri wakabhabhatijwa zve wari ari mu basa iri ro kucumaera mu ndau jinoita minye-minye vandhu.
3. Vamweni vanozwa kudini ngo pamusoro po njira iyi yo kupa ucapupu?
3 Habzaji imweni ari kudakajihwa maningi ngo ucapupu uhu hwo pambhene wakati: “Vamweni vanoima pa cimeza kuti vatore marevhista abva kubuda. Vamweni cingozvo avazivi kumbozwa ngo Zvapupu zva Jehovha. Ndinokwanisa kuvona kuti ucapupu uhu hunogumira maningi vandhu vazinji.” Hambzaji imweni yakati: “Iyi i njira inodakajisa, inotondhoja yo kupa ucapupu ngo kuti vandhu vanovia pauri zve, pikija vacikadakariri maningi, ivona vanoda kuvona.”
4. Ngenyi zvecibesera kudira cimeza cokudira mabhuku okuvonesa vandhu pa mukuvo wondhowo zve pa ndau yondhoyo pa bviki ngo bviki?
4 Zvinobesera kudira cimeza pa mbuto yondhoyo, pa njiku jese zve pamukuvo wondhowo pa bviki ngo bviki. Inga muvio, vandhu vanovia kuzovona cimeza zve vanozwa vakasujunuka maningi kuti vakhwederere zve vabvunjise mubvunjo kana kuwana mabhuku. Ungano yenyu yanasirira kuitira ucapupu hwo pambhene? Kana zvakadaro, ungakwanisa kunghwina mu njira iyi inodakajisa zve ino bara mucero kuitira ‘kutokotesa Umambo hwa Mwari.’—Luka 9:60.