Wat kan dij helpe wen’s duu ain slim krankhët häst?

Büst duu mit ais krank woore? Wen jå, duu wätst dat krank ware kan dij muir un traurig låte, un uk dai dokterig kan sër düür sin. Den, wosoo kast duu dij dårmit drëge? Wosoo kast duu aim fründ urer air woo’s duu gaure ümgang mit häst helpe wat krank is? Dai Bijbel is ni air bauk oiwer krankhëte, åwer dai gaure formånen wat dårin ståe koine dij helpe dij drëgt krijge wen’s duu urer air wat’s duu kenst krank is.

Wosoo dij drëgt krijge mit ain krankhët?

• Dau doktershülp suike

  Ine Bijbel stäit: “Dai wat gesund sin bruuke kaine dokter, åwer dai kranke jå.” (Mateus 9:12)

  Wat lëre wij? Suik aine dokter wen’s duu dat bruuke däist.

  Forsuik soo måke: Suik dai best dokterig wat’s duu krijge kast. Kan gaud sin mër as mit aim dokter fortele. (Provérbios 14:15) Dau mit dijn dokter t’hoopfortele. Häw sicherhët dat’s duu gaud forståe däist wat hai dij säge däit un dau tau em säge ales wat’s duu forneeme däist. (Provérbios 15:22) Dau upsuiken måke oiwer dai krankhët wat’s duu häst un uk oiwer dai dokterig. Wen’s duu genau forståe däist ales wat besägen hät mit dai krankhët wat’s duu häst, duu warst ruig un dat däit dij helpe dai daile gaud uutsuike.

• Måk daile wat gesund tau dijn körper sin

  Ine Bijbel stäit: “Sich beweege is gaud tau dem körper”. (1 Timóteo 4:8, Contemporary English Version, up englisch)

  Wat lëre wij? Gaure daile måke, soo as dijne körper beweege, is gaud tau dij.

  Forsuik soo måke: Dau dijne körper oft upe week beweege, dau gaure eeten eete un dau naug slåpe. Kan sin duu däist dij nog anware mit dijn krankhët, åwer dai uutgelërte lüür säge is gaud dij anstrenge dës gaure daile måke tau dijn körper. Åwer duu must dij uuppasse taum nischt måke wat dijne dokterig wat schåre kan.

• Dau andrer sijn hülp suike

  Ine Bijbel stäit: “Dai wat gaure ümgang wirklig mit dij hät lijbt dij al tijd oiwer un wart air braurer ine nood tijd.” (Provérbios 17:17)

  Wat lëre wij? Dai woo’s duu gaure ümgang mit häst koine dij helpe swår daile oiwerståe.

  Forsuik soo måke: Dau mit aim fortele woo’s duu dij upforlåte kast un säg wosoo as duu dij befijnst. Dat måke kan dij helpe dij ruig un fröölig befijne. Kan sin dai woo’s duu gaure ümgang mit häst un dijn fründe wile dij helpe, åwer sai waite ni wosoo. Den, dau tau eer klår säge wosoo as sai dat måke koine. Dau ni taufeel fon eer luure un uk dau eer ümer danke for ales wat sai måke tau dij. Dai woo’s duu gaure ümgang mit häst wile dij helpe, åwer kan sin duu must tau eer säge wat sai måke koine urer ni. Wen’s duu muir büst, duu kast tau eer säge woo oft un wolang koine sai dij besuike.

• Sai dai daile up ain gaur årt

  Ine Bijbel stäit: “Ain fröölig härts is ain gaur melicin, åwer dai traurigkët nimt der mësch sijn kraft weg.” (Provérbios 17:22)

  Wat lëre wij? Wen’s duu krank büst, hofnung häwe un dai daile saie up ain gaur årt, kan dij helpe sich gaud befijne un sich dårmit drëge.

  Forsuik soo måke: Solang as duu dij anwene däist mit dijn krankhët, dau dij anhule an dat wat’s duu måke kast un ni an dat wat’s duu ni måke kast. Dau dij ni t’hoopmaine mit dai andrer. Dau uk ni taufeel denke an dat wat’s duu airste måkt krëgst, airer as duu krank woore büst. (Gálatas 6:4) Suik daile uut taum måken wat’s duu måkt krijgst. Dat wart dij helpe dai daile saie up ain gaur årt. (Provérbios 24:10) Duu kast dai andrer helpe. Dat måke löt dij fröölig un helpt dij ni bloosig an dijn aigen problems denke. (Atos 20:35)

Däit God dij wirklig helpe dij drëgt krijge mit dijn krankhët?

Dai Bijbel wijst Jehovaa Goda kan aim mësche helpe ain krankhët doirsete. Wij waite, God däit ni air bewunrig dail måke taum oos kurijre, åwer wat fon hülps giwt hai oos?

Freere. Jehovaa kan “dai freere fon God, wat oiwer al forståen is” geewe. (Filipenses 4:6 un 7) Dës freere wat wij inwarts forneeme, kan oos helpe ni taudul unruig ware. God giwt dëse freere tau dai wat tau em beere un tau em säge al eer kopbreeken. (1 Pedro 5:7)

Klaukhët. Jehovaa kan aim mësche klaukhët geewe taum gaur uutsuiken måke. (Tiago 1:5) Taum dës klaukhët häwe, dai mësch mut lëre wat dai Bijbel inlërt un dårnå leewe.

Hofnung tau dai tijd wat nog kümt. Jehovaa hät forspråke dat in dai tijd foiruut, “kair wat upe Ër wånt wart säge: ‘Ik bün krank’”. (Isaías 33:24) Dës hofnung helpt feel lüür dai daile saie up ain gaur årt, lijkerst wen sai krankhëte doirsete. (Jeremias 29:11 un 12)