यर्मिया
४४ मिश्रको+ मिग्दोल,+ तपनेस+ र नोफमा*+ अनि पाथ्रोसको इलाकामा+ बसिरहेका यहुदीहरूका लागि यर्मियाकहाँ यस्तो सन्देश आयो: २ “सेनाहरूका यहोवा, इस्राएलका परमेश्वर यसो भन्नुहुन्छ, ‘यरुसलेममाथि र यहुदाका सबै सहरमाथि मैले ल्याएको एक-एक विपत्ति तिमीहरूले देखेका छौ।+ ती ठाउँहरू अहिले उजाड भएका छन् र त्यहाँ कोही बस्दैन।+ ३ किनकि तिमीहरूले अरू देवतालाई पुज्यौ र ती देवताहरूको नाममा बलिदान चढायौ। यस्तो दुष्ट काम गरेर तिमीहरूले मलाई रिस उठायौ।+ ती देवताहरूलाई न तिमीहरूले न त तिमीहरूका पितापुर्खाले नै कहिल्यै चिनेका थियौ।+ ४ मैले मेरा सबै सेवक, मेरा सबै भविष्यवक्तालाई बारम्बार तिमीहरूकहाँ पठाएँ र “मैले घृणा गर्ने यस्तो घिनलाग्दो काम गर्न बन्द गर” भनेर आग्रह गर्न लगाएँ।+ ५ तर तिमीहरूले सुन्दै सुनेनौ। तिमीहरूले आफ्नो कान थापेनौ। तिमीहरूले आफ्नो दुष्ट काम त्यागेनौ र अरू देवताको नाममा बलि चढाइरह्यौ।+ ६ त्यसैले यहुदाका सहरहरू र यरुसलेमका बाटोहरूमाथि मेरो रिस दन्कियो र ती ठाउँहरू तहसनहस भए। आजसम्म पनि ती ठाउँहरूको हालत त्यस्तै छ।’+
७ “सेनाहरूका परमेश्वर, इस्राएलका परमेश्वर यहोवा यसो भन्नुहुन्छ, ‘तिमीहरू किन आफैमाथि यत्ति ठूलो विपत्ति निम्त्याउँछौ? के तिमीहरू भएभरका यहुदी पुरुष, स्त्री, केटाकेटी र दूधे-बालक नाश होऊन् र यहुदामा कोही पनि बाँकी नहोस् भन्ने चाहन्छौ? ८ तिमीहरू बस्न गएको मिश्रमा अरू देवताको नाममा बलि चढाएर किन मलाई रिस उठाउँछौ? आफ्नो हातको कामले किन मेरो अपमान गर्छौ? तिमीहरू नामेट हुनेछौ, पृथ्वीका सबै जातिसामु तिमीहरू श्रापित हुनेछौ र घृणाको पात्र हुनेछौ।+ ९ यहुदामा र यरुसलेमका बाटोहरूमा तिमीहरूका पितापुर्खाले, यहुदाका राजाहरूले,+ तिनीहरूका पत्नीहरूले,+ तिमीहरू आफैले र तिमीहरूका पत्नीहरूले गरेका दुष्ट कामहरू+ के तिमीहरूले बिर्स्यौ? १० अझैसम्म तिमीहरू नम्र भएका छैनौ। तिमीहरूले मेरो डर मानेका छैनौ।+ मैले तिमीहरूलाई र तिमीहरूका पितापुर्खालाई दिएको नियमकानुन पनि तिमीहरूले पालन गरेका छैनौ।’+
११ “त्यसकारण सेनाहरूका यहोवा, इस्राएलका परमेश्वर यसो भन्नुहुन्छ, ‘म तिमीहरूमाथि विपत्ति ल्याएरै छोड्नेछु। हो, म पूरै यहुदालाई सखाप पार्नेछु। १२ मिश्र गएर त्यहीँ बस्ने निश्चय गरेका यहुदाका बाँकी सबै मानिस मिश्रमै नाश हुनेछन्।+ तिनीहरू तरबारले काटिनेछन् र अनिकालले मर्नेछन्। सानादेखि ठूला सबै जना तरबार र अनिकालले मर्नेछन्। तिनीहरू श्रापित हुनेछन्, तिनीहरूलाई देख्नेजति सबै डरले थरथर काँप्नेछन् र उनीहरूले तिनीहरूको निन्दा गर्नेछन्।+ १३ जसरी मैले यरुसलेममा बस्नेहरूलाई तरबार, अनिकाल र महामारी* पठाएर दण्ड दिएँ, त्यसैगरि मिश्रमा बस्नेहरूलाई पनि म दण्ड दिनेछु।+ १४ मिश्रमा बस्न गएका यहुदाका बाँकी मानिसहरू बच्नेछैनन्। तिनीहरू यहुदा फर्कन पाउनेछैनन्। तिनीहरूलाई यहुदाको झलझली याद आउनेछ र तिनीहरू त्यहाँ फर्कन खोज्नेछन् तर पाउनेछैनन्। तिनीहरूमध्ये थोरै मात्र त्यहाँबाट उम्केर यहुदा फर्कन पाउनेछन्।’”
१५ ती पुरुषहरू, जसलाई आ-आफ्नी पत्नीले अरू नै देवीदेवताको नाममा बलि चढाइरहेका छन् भनेर थाह थियो, तिनीहरू अनि ठूलो जमातमा त्यहाँ भेला भएका तिनीहरूका पत्नीहरू र मिश्रको+ पाथ्रोसमा+ बसिरहेका सबै मानिसले यर्मियालाई यसो भनेर जवाफ दिए: १६ “तपाईँले यहोवाको नाममा हामीलाई भन्नुभएको कुरा हामी सुन्नेछैनौँ। १७ बरु हामी स्वर्गकी रानीको* नाममा बलिदान चढाउनेछौँ र उनकै लागि मद्यभेटी चढाउनेछौँ।+ हो, हामी त्यसै गर्नेछौँ; हामी आफ्नो मुखको बोलीअनुसारै गर्नेछौँ। यहुदाका सहरहरूमा र यरुसलेमका बाटोहरूमा हामी र हाम्रा पुर्खाहरू, हाम्रा राजाहरू र भारदारहरूले त्यसै गर्दै आएका थियौँ। त्यतिखेर हाम्रो भलो भएको थियो, हामीले प्रशस्तै खान पाएका थियौँ र हामीले कुनै विपत्ति भोग्नुपरेको थिएन। १८ जबदेखि हामीले स्वर्गकी रानीको* नाममा बलिदान चढाउन र उनको नाममा मद्यभेटी चढाउन छोड्यौँ, तबदेखि हामीलाई अभावै अभाव भएको छ अनि हामी तरबार र अनिकालले नाश भएका छौँ।”
१९ ती स्त्रीहरूले अझै यसो भने: “के हामीले आ-आफ्ना पतिलाई नभनीकनै पीठो मुछेर स्वर्गकी रानीको* आकारको रोटी बनाएका, उनको नाममा बलिदान र मद्यभेटी चढाएका हौँ र?”
२० त्यसपछि यर्मियाले ती पुरुषहरू, तिनीहरूका पत्नीहरू र तिनीसित कुरा गर्ने सबै मानिसलाई यसो भने: २१ “तपाईँहरू, तपाईँहरूका पितापुर्खा, राजाहरू, भारदारहरू र मानिसहरूले यहुदाका सहरहरू र यरुसलेमका बाटोहरूमा चढाएका बलिदानहरूलाई+ यहोवाले बिर्सनुभएन! उहाँले ती सब याद गर्नुभयो। २२ तर तपाईँहरूले अति नै गर्नुभयो, तपाईँहरूको दुष्ट काम र घिनलाग्दा रीतिथिति यहोवालाई असह्य भयो। त्यसैकारण उहाँले तपाईँहरूको देशलाई तहसनहस पार्नुभयो। तपाईँहरूको देश श्रापित र निर्जन भयो अनि मानिसहरू त्यो ठाउँलाई देखेर डरले थरथर काँपे। आजसम्म पनि त्यस ठाउँको हालत त्यस्तै छ।+ २३ तपाईँहरूले अरू नै देवीदेवताको लागि बलिदान चढाउनुभयो। तपाईँहरूले यहोवाको कुरा नसुनेर, यहोवाको व्यवस्था, विधिविधान र सम्झौटा पालन नगरेर उहाँविरुद्ध पाप गर्नुभयो। त्यसकारण आज तपाईँहरूले यो विपत्ति भोग्नुपरेको हो।”+
२४ यर्मियाले सबै मानिस र सबै स्त्रीलाई अझै यसो भने: “मिश्रमा बसिरहेका यहुदाका सबै मानिस हो, यहोवाको कुरा सुन्नुहोस्। २५ सेनाहरूका यहोवा, इस्राएलका परमेश्वर यसो भन्नुहुन्छ, ‘तिमीहरू र तिमीहरूका पत्नीहरूले आफ्नो मुखले जे कुरा बोल्यौ, आफ्नो हातले पनि त्यही काम गऱ्यौ। तिमीहरूले यसो भनेका थियौ: “हामीले स्वर्गकी रानीको* निम्ति बलिदान चढाउने र मद्यभेटी चढाउने शपथ खाएका छौँ। हामी त्यो शपथ पूरा गरेरै छोड्नेछौँ।”+ ए स्त्रीहरू हो, तिमीहरूले जे शपथ खाएका छौ, त्यो तिमीहरूले पूरा गरेरै छोड्नेछौ।’
२६ “त्यसैले मिश्रमा बसिरहेका यहुदाका सबै मानिस हो, यहोवाको कुरा सुन्नुहोस्: ‘यहोवा भन्नुहुन्छ, “म आफ्नै महान् नामको शपथ खाएर भन्छु, सारा मिश्रभरि यहुदाको कुनै पनि मानिसले अब उपरान्त मेरो नाममा शपथ खानेछैन।+ ‘ब्रह्माण्डका मालिक यहोवाको कसम’ भन्दै शपथ खानेहरूले अब त्यसो भन्नेछैनन्।+ २७ तिनीहरूको भलो गर्नलाई होइन तर तिनीहरूमाथि विपत्ति ल्याउनलाई मैले तिनीहरूमाथि आफ्नो नजर लगाएको छु।+ मिश्रमा बसिरहेका यहुदाका सबै मानिस नाश नहोउन्जेल तिनीहरूलाई तरबार र अनिकालले छोड्नेछैन।+ २८ तिनीहरूमध्ये थोरै मात्र तरबारको प्रहारबाट बच्नेछन् र यहुदा फर्कनेछन्।+ अनि मात्र मिश्रमा बस्न आएका यहुदाका बाँकी मानिसहरूले मैले बोलेको कुरा पूरा हुँदो रहेछ कि तिनीहरूले बोलेको, त्यो थाह पाउनेछन्।”’”
२९ “यहोवा यस्तो घोषणा गर्नुहुन्छ, ‘मैले तिमीहरूमाथि ल्याउँछु भनेका सबै विपत्ति म अवश्य ल्याउनेछु र म तिमीहरूलाई यही ठाउँमा सजाय दिनेछु। त्यो कुरा तिमीहरूले थाह पाओ भनेर म तिमीहरूलाई एउटा चिन्ह दिनेछु। ३० यहोवा यसो भन्नुहुन्छ: “जसरी मैले यहुदाका राजा सिदकियाहलाई तिनको ज्यान लिन चाहने तिनको शत्रु, बेबिलोनका राजा नबुकद्नेजरको* हातमा सुम्पिएँ, त्यसैगरि मिश्रका राजा फारो होप्रालाई पनि तिनको ज्यान लिन चाहने तिनका शत्रुहरूको हातमा सुम्पनेछु।”’”+