व्यवस्था
१९ “यहोवा तिमीहरूका परमेश्वरले तिमीहरूलाई दिन लाग्नुभएको देशका मानिसहरूलाई यहोवाले नाश गर्नुभएपछि तिमीहरूले तिनीहरूको देश अधिकार गर्नेछौ। अनि तिमीहरू त्यहाँका सहरहरू र घरहरूमा बसोबास गर्न थाल्नेछौ।+ २ तब यहोवा परमेश्वरले तिमीहरूलाई जुन देश अधिकार गर्न दिनुहुन्छ, त्यस देशको बीचमा तिमीहरूले तीन वटा सहर छुट्ट्याउनू।+ ३ यहोवा परमेश्वरले तिमीहरूलाई अधिकार गर्न दिन लाग्नुभएको देशलाई तिमीहरूले तीन भागमा बाँड्नू र हरेक भागमा एउटा-एउटा सहर छुट्ट्याउनू। हत्या गर्ने कुनै पनि मानिस ती सहरहरूमध्ये एउटामा भागेर जान सकोस् भनेर ती सहरहरूमा जाने बाटो पनि बनाउनू।
४ “तर ध्यान देओ, कसैले कुनै मानिसलाई अनजानमा माऱ्यो र त्यस मानिससित उसको कुनै दुस्मनी थिएन भने त्यस्तो हत्यारालाई मात्र ती सहरहरूमा बस्न दिनू।+ ५ जस्तै, यदि कुनै मानिसले आफ्नो साथीसँगै जङ्गलमा गएर दाउरा काट्दा वा रूख ढाल्दा बिँडबाट बन्चरो खुस्केर साथीलाई लाग्यो र ऊ मऱ्यो भने त्यस्तो हत्यारा ती सहरहरूमध्ये कुनै एउटामा भागेर जाओस् र आफ्नो ज्यान बचाओस्।+ ६ तर भाग्नुपर्ने सहर एकदमै टाढा छ भने रगतको साटो फेर्ने व्यक्तिले+ तातो रिसको झोँकमा त्यस हत्यारालाई लखेट्ला अनि बीच बाटोमै भेट्टाएर मार्ला। वास्तवमा मरेको त्यस मानिससित हत्याराको पहिला कुनै दुस्मनी नभएकोले त्यो हत्यारा मारिनु उचित होइन।+ ७ त्यसैले म तिमीहरूलाई यस्तो आज्ञा दिन्छु, ‘तीन वटा सहर छुट्ट्याओ।’
८ “यहोवा परमेश्वरले तिमीहरूका पुर्खाहरूसित शपथ खानुभएझैँ तिमीहरूको इलाका बढाउनुहुनेछ+ र तिमीहरूका पुर्खाहरूसित प्रतिज्ञा गरिएको सम्पूर्ण देश तिमीहरूलाई दिनुहुनेछ।+ ९ तर यसको लागि तिमीहरूले आज मैले दिएका उहाँका सबै आज्ञा वफादार हुँदै पालन गर्नुपर्छ, यहोवा आफ्ना परमेश्वरलाई प्रेम गर्नुपर्छ अनि सधैँभरि उहाँले देखाउनुभएको बाटोमा हिँड्नुपर्छ।+ परमेश्वरले तिमीहरूको इलाका बढाइदिनुभएपछि तिमीहरूले पहिलेको जस्तै अरू तीन वटा सहर पनि थप।+ १० यसरी यहोवा तिमीहरूका परमेश्वरले तिमीहरूलाई पैतृक सम्पत्तिको रूपमा दिनुहुने देशमा निर्दोषहरूको रगत बग्नेछैन+ र तिमीहरूलाई रगतको दोष लाग्नेछैन।+
११ “तर कसैले कुनै मानिसलाई घृणा गर्छ+ र ढुकिबसेर उसलाई हिर्काएर मार्छ अनि ती सहरहरूमध्ये एउटामा भागेर जान्छ भने १२ त्यो हत्यारा जुन सहरको हो, त्यहाँका नाइकेहरूले त्यसलाई बोलाउन मान्छेहरू पठाऊन् र रगतको साटो फेर्ने व्यक्तिको हातमा त्यसलाई सुम्पिदेऊन् अनि त्यो मारियोस्।+ १३ तिमीहरूले त्यस हत्यारालाई फिटिक्कै दया नदेखाउनू। तिमीहरूले इस्राएलबाट निर्दोषहरूको रगतको दोष मेटिदिनू।+ यसो गऱ्यौ भने तिमीहरूको भलो हुनेछ।
१४ “यहोवा तिमीहरूका परमेश्वरले तिमीहरूलाई पैतृक सम्पत्तिको रूपमा दिनुहुने भूमिमा आ-आफ्नो अंश पाइसकेपछि तिमीहरूले आफ्नो छिमेकीको साँध-सिमाना नमिच्नू।+ पुर्खाहरूले तोकिदिएको सिमाना तिमीहरूले नमिच्नू।
१५ “एक जना मात्र साक्षीले दिएको बयानको आधारमा कसैले गरेको गल्ती वा अपराधको फैसला नसुनाइयोस्।+ दुई वा तीन जना साक्षीको बयानको आधारमा मात्र त्यसको फैसला सुनाइयोस्।+ १६ यदि कसैले कुनै मानिसलाई हानि पुऱ्याउने हिसाबले झूटो साक्षी दिन्छ र उसलाई अपराधको आरोप लगाउँछ भने+ १७ त्यस मामिलामा मुछिएका ती दुवै जना मानिस यहोवा परमेश्वर, पुजारीहरू र त्यसबेला सेवा गरिरहेका न्यायकर्ताहरूसामु हाजिर होऊन्।+ १८ त्यस विषयमा न्यायकर्ताहरूले राम्ररी छानबिन गरून्।+ यदि साक्षी दिने मानिस झूटो रहेछ र उसले झूटो आरोप लगाएको रहेछ भने १९ उसले आफ्नो भाइलाई जे गर्ने षड्यन्त्र रचेको थियो, उसलाई त्यसै गर्नू।+ यसरी तिमीहरूले आफ्नो माझबाट जे खराब छ, त्यो हटाउनै पर्छ।+ २० जब अरू मानिसहरूले यो घटनाबारे सुन्नेछन्, तब तिनीहरू डराउनेछन् र तिमीहरूबीच कसैले यस्तो खराब काम दोहोऱ्याउनेछैन।+ २१ तिमीहरूले झूटो आरोप लगाउने मानिसलाई फिटिक्कै दया नदेखाउनू।+ बरु बदलास्वरूप ज्यानको साटो ज्यान, आँखाको साटो आँखा, दाँतको साटो दाँत, हातको साटो हात र खुट्टाको साटो खुट्टा लिनू।+