इजकिएल
५ “हे मानिसको छोरा, अब एउटा धारिलो तरबार लेऊ। अनि हजामको छुरीले खौरेझैँ त्यसले आफ्नो कपाल अनि दाह्रीजुँगा खौर। त्यसपछि एउटा तराजु लेऊ र खौरेको कपाल र दाह्रीजुँगा जोखेर भाग-भाग लगाऊ। २ सहरलाई घेरेर राख्ने दिन पूरा भएपछि+ रौँको एक भाग सहरभित्र जलाऊ। त्यसपछि दोस्रो भाग सहरको चारैतिर लैजाऊ र त्यसलाई तरबारले टुक्राटुक्रा पार।+ अनि तेस्रो भागचाहिँ हावामा हुर्ऱ्याऊ। त्यसपछि म एउटा तरबार थुतेर त्यसलाई लखेट्नेछु।+
३ “तेस्रो भागबाट अलिकता रौँ लेऊ र आफ्नो लुगाको किनारामा पोको पारेर राख। ४ अनि त्यसबाट अझै केही रौँ लेऊ र आगोमा फालेर जलाइदेऊ। अनि त्यसको आगो इस्राएलको सम्पूर्ण घरानामा फैलनेछ।+
५ “ब्रह्माण्डका मालिक यहोवा यसो भन्नुहुन्छ: ‘यो यरुसलेम हो। मैले यस सहरलाई जातिजातिको बीचमा बसालेको छु र त्यसको चारैतिर अरू देश छन्। ६ तर यो सहर विद्रोही भयो। तिनीहरू मेरा फैसलाहरू र विधिविधानअनुसार चलेनन्। वरपरका अरू जाति र देशभन्दा पनि तिनीहरू धेरै दुष्ट भए।+ किनकि तिनीहरूले मेरा फैसलाहरू तिरस्कार गरे र मेरा विधिविधानअनुसार चलेनन्।’
७ “त्यसैले ब्रह्माण्डका मालिक यहोवा यसो भन्नुहुन्छ: ‘तिमीहरू वरपरका अरू जातिभन्दा विद्रोही भएका छौ। तिमीहरूले मेरा फैसलाहरू पालन गरेनौ, तिमीहरू मेरा विधिविधानअनुसार पनि चलेनौ। बरु तिमीहरूले वरपरका जातिहरूकै चलन पछ्यायौ।+ ८ त्यसकारण ब्रह्माण्डका मालिक यहोवा यसो भन्नुहुन्छ: “हे सहर, म तँविरुद्ध उठेको छु।+ अरू जातिले देख्नेगरि म तँलाई दण्ड दिनेछु।+ ९ तैँले असाध्यै घिनलाग्दा कामहरू गरेकोले म तँलाई कठोर सजाय दिनेछु। यस्तो सजाय, जुन मैले तँलाई अहिलेसम्म दिएको थिइनँ र पछि पनि दिनेछैनँ।+
१० “‘“त्यसैले आमाबुबाले आफ्नै छोराछोरीलाई खानेछन्+ र छोराछोरीले पनि आफ्नै आमाबुबालाई खानेछन्। म तिमीहरूलाई दण्ड दिनेछु र बाँकी सबैलाई चारैतिर तितरबितर पार्नेछु।”’+
११ “‘त्यो मेरो पवित्र स्थान* थियो। तर तिमीहरूका घिनलाग्दा मूर्तिहरू र तिमीहरूका घिनलाग्दा कामहरूले गर्दा त्यो बिटुलो भएको छ।’+ त्यसैले ब्रह्माण्डका मालिक यहोवा घोषणा गर्नुहुन्छ, ‘म आफ्नै कसम खाएर भन्छु, म पनि तिमीहरूलाई तिरस्कार गर्नेछु;* म तिमीहरूलाई पटक्कै दयामाया देखाउनेछैनँ र अफसोस मान्नेछैनँ।+ १२ तिमीहरूमध्ये एक तिहाइ महामारीले* वा अनिकालले मर्नेछौ। अर्को एक तिहाइ तरबारले काटिनेछौ।+ अनि बाँकी रहेको एक तिहाइलाई म चारैतिर तितरबितर पार्नेछु र तिनीहरूलाई तरबार थुतेर लखेट्नेछु।+ १३ त्यसपछि मेरो रिस थामिनेछ। तिनीहरूलाई सजाय दिएपछि म शान्त र सन्तुष्ट हुनेछु।+ जब तिनीहरूमाथि म आफ्नो रिस खन्याउनेछु, तब तिनीहरूले थाह पाउनेछन् कि मैले यो सब यसकारण भनेको हुँ किनकि म यहोवा मेरो बाहेक अरू कसैको भक्ति गरिएको पटक्कै सहँदिनँ।+
१४ “‘म तिमीहरूको सहरलाई उजाड पार्नेछु अनि अरू जातिहरूका बीचमा र तिमीहरूको छेउबाट भएर जानेहरूको नजरमा तिमीहरूलाई खिसीको पात्र बनाउनेछु।+ १५ अति नै क्रोधित भएर मैले तिमीहरूलाई कठोर सजाय दिँदा वरपरका जातिले तिमीहरूको निन्दा गर्नेछन्।+ तिमीहरू खिसीको पात्र हुनेछौ। तिमीहरू तिनीहरूको लागि चेतावनी हुनेछौ र तिनीहरू तिमीहरूलाई देखेर डरले खङ्ग्रङ्ग हुनेछन्। म यहोवाले नै यसो भनेको हुँ।
१६ “‘म तिनीहरूलाई नाश गर्न अनिकालको घातक बाण हान्नेछु। मैले तिमीहरूविरुद्ध हान्ने बाणले तिमीहरूलाई नाश गर्नेछ।+ म तिमीहरूको खानेकुराको भण्डार नष्ट गरेर* तिमीहरूमाझ घोर अनिकाल ल्याउनेछु।+ १७ म तिमीहरूविरुद्ध अनिकाल र हिंस्रक जङ्गली जनावरहरू पठाउनेछु,+ जसले तिमीहरूका छोराछोरीलाई तिमीहरूबाट खोस्नेछन्। महामारी र रक्तपातले गर्दा तिमीहरूको बेहाल हुनेछ। म तिमीहरूविरुद्ध तरबार पठाउनेछु।+ म यहोवाले नै यसो भनेको हुँ।’”