इजकिएल
८ छैटौँ वर्षको* छैटौँ महिनाको पाँचौँ दिनमा म आफ्नो घरमा बसिरहेको थिएँ र यहुदाका नाइकेहरू पनि मेरो सामुन्ने बसिरहेका थिए। त्यहाँ ब्रह्माण्डका मालिक यहोवाको हात ममाथि आयो। २ मैले हेर्दै गर्दा बलिरहेको आगोजस्तै रूप भएको कोही देखेँ; उहाँको कम्मरजस्तो देखिने+ भागको मुनि आगो थियो र कम्मरमास्तिरको भाग चम्किलो धातुजस्तै*+ उज्यालो थियो। ३ उहाँले मतिर केही पसार्नुभयो, जुन हातजस्तै देखिन्थ्यो अनि उहाँले मेरो कपाल समातेर मलाई उठाउनुभयो। अनि परमेश्वरले देखाउनुभएको दर्शनमा* एउटा शक्तिले* मलाई उचालेर जमिन र आकाशको बीचमा राख्यो र यरुसलेममा मन्दिरको उत्तरतिर फर्केको भित्री चोकको ढोकामा+ पुऱ्यायो। त्यहाँ परमेश्वरलाई रिस उठाउने मूर्ति थियो।+ ४ अनि हेर! बेँसीमा देखेझैँ+ मैले इस्राएलका परमेश्वरको महिमा त्यहाँ पनि देखेँ।+
५ त्यसपछि उहाँले मलाई यसो भन्नुभयो: “हे मानिसको छोरा, आँखा उठाएर उत्तरतिर हेर।” अनि मैले आँखा उठाएर उत्तरतिर हेरेँ अनि वेदीको ढोकाको उत्तरतिर परमेश्वरलाई रिस उठाउने त्यो मूर्ति देखेँ। ६ अनि उहाँले मलाई यसो भन्नुभयो: “हे मानिसको छोरा, इस्राएलको घरानाले कस्ता-कस्ता घिनलाग्दा कुराहरू गरिरहेका छन्, तिमीले देख्यौ?+ यी नै कुराहरूले गर्दा म आफ्नो पवित्र स्थानबाट* टाढा जान बाध्य भएको छु।+ तर तिमीले यीभन्दा अझ घिनलाग्दा कुराहरू देख्नेछौ।”
७ त्यसपछि उहाँले मलाई चोकको ढोकानेर पुऱ्याउनुभयो र मैले भित्तामा एउटा प्वाल देखेँ। ८ उहाँले मलाई यसो भन्नुभयो: “हे मानिसको छोरा, त्यो प्वाल अझै ठूलो बनाऊ।” तब मैले त्यो प्वाललाई ठूलो बनाएँ र त्यहाँ भित्र पस्ने एउटा बाटो देखेँ। ९ उहाँले मलाई यसो भन्नुभयो: “जाऊ, भित्र गएर तिनीहरूले कस्तो घोर दुष्ट र घिनलाग्दा काम गरिरहेका छन्, हेर।” १० अनि भित्र पसेर हेर्दा मैले भित्तामा अनेक किसिमका घस्रने जन्तु र घिनलाग्दा पशुका आकृतिहरू+ अनि इस्राएलको घरानाको सबै खालका घिनलाग्दा मूर्तिहरूको*+ आकृति देखेँ; ती चारैतिर भित्ताभरि कुँदिएका थिए। ११ अनि ती सबैको अगाडि इस्राएलको घरानाका ७० जना नाइके उभिरहेका थिए। तिनीहरूसँगै सापानका छोरा याजन्याह+ पनि थिए। तिनीहरू सबैको हातमा धुपौरो थियो र धुपौरोबाट सुगन्धित धूपको धुवाँ बादलसरह उठिरहेको थियो।+ १२ उहाँले मलाई भन्नुभयो: “हे मानिसको छोरा, इस्राएलको घरानाका नाइकेहरू आ-आफ्ना मूर्तिहरू राखेको भित्री कोठाहरूमा गएर अँध्यारोमा के गरिरहेका छन्, तिमीले देख्यौ? तिनीहरू यसो भनिरहेका छन्, ‘यहोवाले हामीलाई देख्नुहुन्न। यहोवाले यस भूमिलाई छोडेर गइसक्नुभयो।’”+
१३ अनि उहाँले मलाई यसो भन्नुभयो: “तिनीहरूले यीभन्दा पनि घिनलाग्दा कुराहरू गरिरहेको तिमीले देख्नेछौ।” १४ त्यसैले उहाँले मलाई यहोवाको मन्दिरको उत्तर ढोकामा ल्याउनुभयो र त्यहाँ मैले स्त्रीहरू बसेर तम्मुज देवताको लागि रोइरहेका देखेँ।
१५ उहाँले मलाई सोध्नुभयो: “हे मानिसको छोरा, यहाँ भइरहेको कुरा तिमीले देख्यौ? तिमीले यीभन्दा अझ घिनलाग्दा कुरा देख्नेछौ।”+ १६ त्यसैले उहाँले मलाई यहोवाको मन्दिरको भित्री चोकमा पुऱ्याउनुभयो।+ त्यहाँ यहोवाको मन्दिरको ढोकामा वेदी र दलानको बीचमा २५ जनाजति पुरुष आफ्नो ढाड यहोवाको मन्दिरतिर अनि आफ्नो अनुहारचाहिँ पूर्वतिर फर्काएर उभिरहेका थिए। तिनीहरूले पूर्वतिर सूर्यलाई ढोगिरहेका थिए।+
१७ उहाँले मलाई यसो भन्नुभयो: “हे मानिसको छोरा, तिमीले देख्यौ? यहुदाको घरानाले यस्ता घिनलाग्दा काम गर्नु, देशभरि हिंसा मच्चाउनु+ र मलाई रिस उठाइराख्नु के चानचुने कुरा हो? तिनीहरूले मेरो नाकैमा हाँगा* झोसिरहेका छन्। १८ त्यसैले तिनीहरूमाथि मेरो क्रोध दन्कनेछ। म तिनीहरूलाई पटक्कै दयामाया देखाउनेछैनँ र म अफसोस मान्नेछैनँ।+ तिनीहरूले मेरो कानैमा ठूलो स्वरले कराएर गुहार मागे तापनि म सुन्नेछैनँ।”+