इजकिएल

३७ यहोवाको हात ममाथि आयो अनि यहोवाले आफ्नो पवित्र शक्‍तिद्वारा मलाई एउटा बेँसीको बीचमा लैजानुभयो।+ त्यो बेँसी हाडैहाडले भरिएको थियो। २ उहाँले मलाई त्यो बेँसीलाई एक फन्को मार्न लगाउनुभयो। त्यहाँ जताततै हाडैहाड मात्र देखिन्थे र ती हाडहरू एकदमै सुकिसकेका थिए।+ ३ तब उहाँले मलाई सोध्नुभयो: “हे मानिसको छोरा, के यी हाडहरू फेरि जीवित हुन सक्लान्‌?” मैले भनेँ: “हे ब्रह्‍माण्डका मालिक यहोवा, तपाईँ नै जान्‍नुहुन्छ।”+ ४ अनि उहाँले मलाई भन्‍नुभयो: “यी हाडहरूबारे भविष्यवाणी गर र तिनीहरूलाई भन, ‘ए सुकेका हाडहरू, यहोवाको यो वचन सुन:

५ “‘ब्रह्‍माण्डका मालिक यहोवा यसो भन्‍नुहुन्छ: “म तिमीहरूमा सास हालिदिनेछु र तिमीहरू जिउँदो हुनेछौ।+ ६ म तिमीहरूलाई नसा र मासुले भरिदिनेछु अनि त्यसलाई छालाले ढाकिदिनेछु। त्यसपछि म तिमीहरूमा सास फुकिदिनेछु र तिमीहरू जीवित हुनेछौ। तब तिमीहरूले म नै यहोवा हुँ भनेर जान्‍नेछौ।”’”

७ अनि परमेश्‍वरले आज्ञा गर्नुभएअनुसारै मैले भविष्यवाणी गरेँ। मैले भविष्यवाणी गर्नेबित्तिकै कट्‌याककुटुक आवाज सुनिन थाल्यो र ती हाडहरू एकअर्कासित जोडिन थाले। ८ त्यसपछि ती हाडहरूमा नसा र मासु भरिएको र त्यसलाई छालाले ढाकेको मैले देखेँ। तर तिनीहरूमा सास भने थिएन।

९ त्यसपछि उहाँले मलाई भन्‍नुभयो: “हे मानिसको छोरा, बतासलाई हुकुम गर र यसो भनेर भविष्यवाणी गर, ‘ब्रह्‍माण्डका मालिक यहोवा भन्‍नुहुन्छ, “ए बतास,* चारै दिशाबाट आइज र मारिएका यी मानिसहरूभित्र पस्‌ र तिनीहरू जीवित होऊन्‌।”’”

१० अनि परमेश्‍वरले आज्ञा गर्नुभएअनुसारै मैले भविष्यवाणी गरेँ। त्यसपछि तिनीहरूमा सास पस्यो र तिनीहरू जिउँदो भएर आ-आफ्नो खुट्टामा उभिए+ अनि तिनीहरू एउटा अत्यन्तै ठूलो फौज भए।

११ त्यसपछि परमेश्‍वरले मलाई भन्‍नुभयो: “हे मानिसको छोरा, यी हाडहरू इस्राएलको पूरै घराना हुन्‌।+ तिनीहरू यसो भन्दै छन्‌, ‘हाम्रा हाडहरू सुकेका छन्‌ र हामीसित अब कुनै आशा छैन।+ हामी पूरै त्यागिएका मानिसहरू हौँ।’ १२ त्यसैले भविष्यवाणी गर र तिनीहरूलाई यसो भन, ‘ब्रह्‍माण्डका मालिक यहोवा भन्‍नुहुन्छ: “ए मेरा मानिसहरू हो, म तिमीहरूको चिहान खनेर+ तिमीहरूलाई त्यहाँबाट बाहिर निकाल्नेछु र इस्राएलमा ल्याउनेछु।+ १३ ए मेरा मानिसहरू हो, जब म चिहान खनेर तिमीहरूलाई बाहिर निकाल्नेछु, तब तिमीहरूले म नै यहोवा हुँ भनेर जान्‍नेछौ।”’+ १४ यहोवा घोषणा गर्नुहुन्छ, ‘म तिमीहरूमा मेरो पवित्र शक्‍ति हालिदिनेछु र तिमीहरू जीवित हुनेछौ।+ अनि म तिमीहरूलाई तिमीहरूकै देशमा लैजानेछु। तब म यहोवाले नै यसो भनेको हुँ र मैले नै यसो गरेको हुँ भनेर तिमीहरूले जान्‍नेछौ।’”

१५ यहोवाको वचन फेरि मकहाँ आयो। उहाँले मलाई भन्‍नुभयो: १६ “हे मानिसको छोरा, तिमीले चाहिँ एउटा लौरो लेऊ र त्यसमा यस्तो लेख, ‘यहुदा र तिनको साथमा भएका इस्राएलका मानिसहरूको लागि।’+ त्यसपछि अर्को एउटा लौरो पनि लेऊ र त्यसमा यस्तो लेख, ‘एप्रैमको लौरो, युसुफ र तिनका साथमा भएका इस्राएलका सम्पूर्ण घरानाको लागि।’+ १७ अनि ती दुवै लौरोलाई एकअर्काको नजिक ल्याऊ र एउटै हुनेगरि जोडेर आफ्नो हातमा समाऊ।+ १८ तिम्रा मानिसहरूले ‘यी कुराहरूको अर्थ के हो’ भनेर सोध्दा १९ तिमीले यसो भन्‍नू, ‘ब्रह्‍माण्डका मालिक यहोवा भन्‍नुहुन्छ: “म एप्रैमको हातबाट युसुफको लौरो लिनेछु र युसुफसित भएका इस्राएलका सबै कुललाई पनि लिनेछु। अनि त्यसलाई म यहुदाको लौरोसित जोड्‌नेछु र एउटै लौरो बनाउनेछु।+ अनि त्यो मेरो हातमा एउटै लौरो हुनेछ।”’ २० तिमी जुन लौरोहरूमा लेख्छौ, ती लौरोहरू मानिसहरूले देख्नेगरि आफ्नो हातमा समाऊ।

२१ “अनि तिनीहरूलाई भन, ‘ब्रह्‍माण्डका मालिक यहोवा यसो भन्‍नुहुन्छ: “म इस्राएलीहरूलाई चारैतिरबाट जम्मा गर्नेछु। तिनीहरू तितरबितर भएर जहाँ-जहाँ गए, म तिनीहरूलाई त्यहाँ-त्यहाँबाट फर्काएर तिनीहरूकै देशमा ल्याउनेछु।+ २२ तब म तिनीहरूलाई एउटै जाति बनाउनेछु+ र इस्राएलका डाँडाहरूमा राख्नेछु। तिनीहरू सबैलाई एकै जना राजाले शासन गर्नेछन्‌।+ त्यस उपरान्त तिनीहरू दुइटा जाति होइन, एउटै जाति हुनेछन्‌ र तिनीहरू दुई राज्यमा विभाजित हुनेछैनन्‌।+ २३ तिनीहरूले घिनलाग्दा मूर्तिहरू,* घिनलाग्दा कामहरू अनि कुकर्मद्वारा आफूलाई अशुद्ध पार्नेछैनन्‌।+ तिनीहरूले मलाई विश्‍वासघात गरेर जे-जति पाप गरेका छन्‌, ती सबैबाट म तिनीहरूलाई शुद्ध पार्नेछु। तिनीहरू मेरा मानिसहरू हुनेछन्‌ र म तिनीहरूका परमेश्‍वर हुनेछु।+

२४ “‘“मेरो सेवक दाउद* तिनीहरूका राजा हुनेछन्‌+ र एउटै गोठालोले तिनीहरूलाई डोऱ्‍याउनेछ।+ तिनीहरू मेरा फैसलाहरूअनुसार चल्नेछन्‌ र मेरो विधिविधान मनैदेखि पालन गर्नेछन्‌।+ २५ मेरो सेवक याकुबलाई दिएको देशमा तिनीहरू बस्नेछन्‌, जहाँ तिनीहरूका पुर्खा बसेका थिए।+ तिनीहरू, तिनीहरूका छोराछोरी* र तिनीहरूका नाति-पनाति+ त्यहाँ सधैँभरि बस्नेछन्‌;+ मेरो सेवक दाउदचाहिँ सधैँभरिका लागि तिनीहरूका शासक हुनेछन्‌।+

२६ “‘“अनि म तिनीहरूसित सदाको लागि शान्तिको करार गर्नेछु।+ म तिनीहरूलाई तिनीहरूको देशमा राख्नेछु र तिनीहरूको वृद्धि गराउनेछु+ र मेरो मन्दिर सधैँभरि तिनीहरूमाझ हुनेछ। २७ मेरो निवासस्थान तिनीहरूसित हुनेछ। म तिनीहरूका परमेश्‍वर हुनेछु र तिनीहरू मेरा मानिस हुनेछन्‌।+ २८ जब मेरो मन्दिर सदाको लागि इस्राएलीहरूमाझ हुनेछ, तब तिनीहरूलाई शुद्ध पार्ने म यहोवा नै हुँ भनेर जातिजातिले जान्‍नेछन्‌।”’”+