यर्मिया
३५ यहुदाका राजा योसियाहका छोरा यहोयाकिमको+ पालामा यहोवाको यो वचन यर्मियाकहाँ आयो। उहाँले यसो भन्नुभयो: २ “रेकाबीहरूको+ घरमा जाऊ र तिनीहरूसित कुरा गर। अनि तिनीहरूलाई यहोवाको भवनमा ल्याऊ र भोजनकक्षहरूमध्ये एउटामा बसाऊ। त्यसपछि तिनीहरूलाई मद्य पिउन देऊ।”
३ तब मैले हाबसिन्याहका नाति, यर्मियाका छोरा याजन्याहलाई, तिनका दाजुभाइलाई, तिनका सबै छोरालाई र रेकाबीहरूको सम्पूर्ण घरानालाई ४ यहोवाको भवनमा लगेँ। मैले उनीहरूलाई साँचो परमेश्वरका जन, इग्दल्याहका छोरा हानानका छोराहरूको भोजनकक्षमा ल्याएँ। त्यो भोजनकक्ष भारदारहरूको भोजनकक्षको छेवैमा थियो अनि भारदारहरूको भोजनकक्षचाहिँ द्वारपाल साल्लुमका छोरा मासेयाहको भोजनकक्षको माथिपट्टि थियो। ५ अनि मैले रेकाबीहरूको घरानाका छोराहरूसामु मद्यले भरिएका कचौराहरू राखेँ र भनेँ: “पिउनुहोस्।”
६ तर उनीहरूले यस्तो जवाफ दिए: “हामी पिउँदैनौँ किनकि हाम्रा पुर्खा रेकाबका छोरा यहोनादाबले*+ हामीलाई यस्तो आदेश दिएका थिए: ‘तिमीहरूले अनि तिमीहरूका छोरानातिले मद्य कदापि नपिउनू। ७ तिमीहरूले घर नबनाउनू, खेतीकिसानी नगर्नू, अङ्गुर बगान नलगाउनू वा नकिन्नू। बरु पालमा जीवन बिताउनू। यसो गऱ्यौ भने तिमीहरू अहिले परदेशीसरह बसिरहेको यो देशमा वर्षौँसम्म बस्न पाउनेछौ।’ ८ अनि हामीले हाम्रा पुर्खा रेकाबका छोरा यहोनादाबले दिएका सबै आदेश पालन गरिरहेका छौँ। हामीले, हाम्रा पत्नीहरूले र हाम्रा छोराछोरीले अहिलेसम्म मद्य मुखमा हालेका छैनौँ। ९ साथै बस्नलाई घर बनाएका छैनौँ, अङ्गुर बगान लगाएका छैनौँ, खेतीकिसानी पनि गरेका छैनौँ। १० हामी पालहरूमै बसिरहेका छौँ। यसरी हामीले हाम्रा पुर्खा यहोनादाबले दिएका सबै आदेश पालन गरिरहेका छौँ। ११ तर जब बेबिलोनका राजा नबुकद्नेजर* यस देशविरुद्ध युद्ध गर्न आए,+ तब हामीले आपसमा यसो भन्यौँ, ‘लौ! अब यरुसलेमतिर जाऔँ! कल्दियाली र सिरियाली फौजको आक्रमणबाट जोगिने हो भने त्यतातिर लागौँ!’ त्यसैले हामी अहिले यरुसलेममा बसिरहेका छौँ।”
१२ त्यसपछि यहोवाको यो वचन यर्मियाकहाँ आयो: १३ “सेनाहरूका यहोवा, इस्राएलका परमेश्वर यसो भन्नुहुन्छ, ‘जाओ र यहुदाका मानिसहरूलाई अनि यरुसलेमका बासिन्दाहरूलाई यसो भन: “के तिमीहरूलाई मेरो आज्ञा पालन गर्नू भनेर बारम्बार आग्रह गरिएको थिएन?”+ यहोवा घोषणा गर्नुहुन्छ। १४ “रेकाबका छोरा यहोनादाबले आफ्ना सन्तानलाई मद्य नपिउनू भनेर आदेश दिएका थिए र तिनीहरूले आजको दिनसम्म मद्य पिएका छैनन्। यसरी तिनीहरूले आफ्नो पुर्खाले दिएको आदेश पालन गरिरहेका छन्।+ तर मैले तिमीहरूलाई बारम्बार सम्झाउँदा पनि तिमीहरूले मेरो आज्ञा पालन गरेनौ।+ १५ अनि मैले तिमीहरूकहाँ मेरा सबै दासलाई अर्थात् भविष्यवक्ताहरूलाई पटक-पटक पठाएँ+ र यस्तो आग्रह गर्न लगाएँ: ‘फर्क! तिमीहरू प्रत्येकले आफ्नो दुष्ट चाल त्याग।+ जे सही छ, त्यही गर। अरू देवताको पछि नलाग, तिनीहरूको पूजा नगर। तब मात्र तिमीहरू मैले तिमीहरूका पुर्खालाई दिएको यस देशमा बसिरहन पाउनेछौ।’+ तर तिमीहरूले मेरो कुरा सुनेनौ, मेरो कुरा सुन्न कान थापेनौ। १६ रेकाबका छोरा यहोनादाबका सन्तानले आफ्नो पुर्खाले दिएको आदेश पालन गरेका छन्।+ तर यी मानिसहरूले भने मेरो आज्ञा पालन गरेका छैनन्।”’”
१७ “त्यसैकारण सेनाहरूका परमेश्वर, इस्राएलका परमेश्वर यहोवा यसो भन्नुहुन्छ: ‘मैले यहुदा र यरुसलेमका बासिन्दाहरूमाथि जे-जे विपत्ति ल्याउँछु भनेको थिएँ, म ती सब ल्याउनेछु।+ किनकि मैले तिनीहरूलाई सम्झाउँदा पनि तिनीहरूले सुनेनन्। मैले तिनीहरूलाई बोलाइरहेँ तर तिनीहरूले जवाफ दिएनन्।’”+
१८ तब यर्मियाले रेकाबीहरूको घरानालाई यसो भने: “सेनाहरूका यहोवा, इस्राएलका परमेश्वर यसो भन्नुहुन्छ, ‘तिमीहरूले आफ्नो पुर्खा यहोनादाबले दिएका सबै आदेश पालन गऱ्यौ र तिनले जे अह्राएका थिए, त्यही गरिरह्यौ। १९ त्यसैकारण सेनाहरूका यहोवा, इस्राएलका परमेश्वर यसो भन्नुहुन्छ: “रेकाबका छोरा यहोनादाबको वंश कहिल्यै नाश हुनेछैन। तिनीहरूले सधैँ मसामु हाजिर भएर मेरो सेवा गर्नेछन्।”’”