यर्मिया
२६ योसियाहका छोरा, यहुदाका राजा यहोयाकिमको+ शासनकालको सुरुमा यहोवाको यो वचन आयो: २ “यहोवा यसो भन्नुहुन्छ, ‘यहोवाको भवनको चोकमा उभिऊ र यहोवाको भवनमा उपासना गर्न आउने यहुदाका सहरहरूका सबै मानिसबारे* बोल। मैले भन्नू भनेर अह्राएको सबै कुरा तिनीहरूलाई सुनाऊ; एउटै कुरा फरक नपरोस्। ३ सायद तिनीहरूले सुन्लान् र आफ्नो खराब मार्ग त्यागेर फर्कलान्। अनि म आफ्नो मन बदल्नेछु* र तिनीहरूको दुष्ट कामको सजायस्वरूप जुन विपत्ति तिनीहरूमाथि ल्याउने विचार गरेको थिएँ, त्यो ल्याउनेछैनँ।+ ४ तिनीहरूलाई भन: “यहोवा यसो भन्नुहुन्छ, ‘यदि तिमीहरूले मेरो कुरा बेवास्ता गर्दै मैले दिएको नियम* पालन गरेनौ ५ अनि मैले तिमीहरूकहाँ बारम्बार पठाएका मेरा दासहरू अर्थात् मेरा भविष्यवक्ताहरूको कुरा अहिलेजस्तै सुन्न मानेनौ भने+ ६ म यो भवनको हालत सिलोको जस्तै बनाइदिनेछु+ अनि यस सहरलाई नाश गर्नेछु र पृथ्वीका सबै जातिले अरूलाई सराप्नुपर्दा यस सहरको उदाहरण दिँदै सराप्नेछन्।’”’”+
७ यहोवाको भवनमा यर्मियाले भनेको यो कुरा पुजारीहरू, भविष्यवक्ताहरू र अरू सबैले सुने।+ ८ यहोवाले सबै मानिसलाई भन्नू भनी आदेश दिनुभएको एक-एक कुरा जब यर्मियाले भनिसिद्ध्याए, तब पुजारीहरू, भविष्यवक्ताहरू र अरू सबै मिलेर तिनलाई पक्रे र यसो भने: “हामी तँलाई नमारी छोड्दैनौँ। ९ किनकि तैँले यहोवाको नाममा यस्तो भविष्यवाणी गरिस्, ‘यो भवनको हालत सिलोको जस्तै हुनेछ, यो सहर नाश हुनेछ र एक जना पनि यसमा बसोबास गर्नेछैन।’” तब यहोवाको भवनमा आएका सबै मानिस यर्मियाको वरिपरि जम्मा भए।
१० जब यहुदाका शासकहरूले यो कुरा सुने, तब तिनीहरू राजाको महलबाट यहोवाको भवनमा आए र यहोवाको भवनको नयाँ ढोकामा बसे।+ ११ अनि पुजारीहरू र भविष्यवक्ताहरूले ती शासकहरूलगायत अरू सबैलाई यसो भने: “यो मान्छे मृत्युदण्ड पाउन लायकको छ।+ किनकि यस सहरमा विपत्ति आउनेछ भनेर यसले भविष्यवाणी गऱ्यो। अनि तपाईँहरू सबैले आफ्नै कानले त्यो सुन्नुभएको छ।”+
१२ त्यसपछि यर्मियाले ती शासकहरू र अरू सबैलाई यसो भने: “यो भवन र सहरविरुद्ध मैले जे-जे भविष्यवाणी गरेको तपाईँहरूले सुन्नुभयो, ती सब भन्न मलाई यहोवाले नै पठाउनुभएको हो।+ १३ त्यसैले अब आफ्नो काम र चालचलन सुधार्नुहोस्। आफ्ना परमेश्वर यहोवाको आज्ञा मान्नुहोस्। तब यहोवाले आफ्नो मन बदल्नुहुनेछ* अनि तपाईँहरूमाथि जुन विपत्ति ल्याउने विचार गर्नुभएको छ, त्यो ल्याउनुहुनेछैन।+ १४ तर जहाँसम्म मेरो कुरा छ, म त तपाईँहरूकै हातमा छु। मसित जस्तो व्यवहार गर्न तपाईँहरूलाई उचित लाग्छ, त्यस्तै गर्नुहोस्। १५ तर याद राख्नुहोस्, मेरो ज्यान लिनुभयो भने तपाईँहरूले आफैमाथि, यस सहरमाथि र यहाँका बासिन्दाहरूमाथि निर्दोष व्यक्तिको रगतको दोष थोपरिरहनुभएको हुनेछ। किनकि वास्तवमा यहोवाले नै मलाई यो कुरा भन्न तपाईँहरूकहाँ पठाउनुभएको हो।”
१६ त्यसपछि ती शासकहरूलगायत अरू सबै मानिसले पुजारीहरू र भविष्यवक्ताहरूलाई यसो भने: “यिनलाई मृत्युदण्ड दिनु उचित हुँदैन। किनकि यिनले हाम्रा परमेश्वर यहोवाकै नाममा हामीसित बोलेका छन्।”
१७ साथै देशका केही नाइकेहरू उठे र मानिसहरूको पूरै समुदायलाई यसो भन्न थाले: १८ “यहुदाका राजा हिजकियाहको+ पालामा मोरेसेथका मिकाले+ भविष्यवाणी गरे र यहुदाका सारा मानिसलाई भने, ‘सेनाहरूका यहोवा यसो भन्नुहुन्छ:
“सियोन खेतजस्तै जोतिनेछ,
यरुसलेम भग्नावशेषको थुप्रो हुनेछ+
अनि भवन* बसालिएको डाँडाचाहिँ जङ्गलमा भएका अग्ला डाँडाहरूजस्तै हुनेछ।”’+
१९ “के त्यसबेला यहुदाका राजा हिजकियाहले र यहुदाका मानिसहरूले तिनलाई मारे? राजा हिजकियाहले यहोवाको डर मानेनन् र? अनि यहोवासित दयाको भीख मागेनन् र? त्यसैले त यहोवाले आफ्नो मन बदल्नुभयो* र तिनीहरूमाथि जुन विपत्ति ल्याउने विचार गर्नुभएको थियो, त्यो ल्याउनुभएन।+ त्यसकारण यर्मियालाई माऱ्यौँ भने हामीले आफैमाथि ठूलो विपत्ति निम्त्याइरहेका हुनेछौँ।
२० “त्यसैगरि यहोवाको नाममा भविष्यवाणी गर्ने अर्का एक जना मानिस थिए, किर्यथ-येरिममा+ बस्ने सेमायाहका छोरा उरियाह। तिनले पनि यो सहर र यस देशविरुद्ध यर्मियाले जस्तै भविष्यवाणी गरेका थिए। २१ राजा यहोयाकिम,+ उनका पराक्रमी मानिसहरू र सबै भारदारले उरियाहले भनेको कुरा सुने। तब राजाले तिनलाई मार्ने विचार गरे।+ यो सुन्नेबित्तिकै उरियाह निकै डराए र मिश्रतिर* कुलेलाम ठोके। २२ त्यसपछि राजा यहोयाकिमले आक्बोरका छोरा एल्नातानलाई+ र तिनीसित अरू केही मानिसलाई मिश्र पठाए। २३ तिनीहरूले उरियाहलाई मिश्रबाट ल्याए र राजा यहोयाकिमसामु हाजिर गराए। अनि राजाले तिनलाई तरबारले काटे+ र तिनको लासलाई आम मानिसहरूको चिहानमा फ्याँकिदिए।”
२४ तर सापानका+ छोरा अहिकामले+ यर्मियाको पक्ष लिए। त्यसैले यर्मियालाई मानिसहरूको हातमा सुम्पिइएन र तिनको हत्या गरिएन।+