अय्युब
१५ एलिपज+ तेमानीले यस्तो जवाफ दिए:
२ “के बुद्धिमान् मानिसले फोस्रा तर्कहरू गर्छ र?
अथवा आफ्नो मन कुइच्छाले* भर्छ र?
३ अर्थहीन शब्दहरू बोलेर कसैलाई सच्याउन खोज्नु बेकार छ
अनि ठूलठूला कुरा गर्नुमा कुनै फाइदा छैन।
४ किनकि तपाईँले गर्दा मानिसहरूले परमेश्वरको डर मान्न
र उहाँको वास्ता गर्न छोडिदिएका छन्।
५ तपाईँको पापले तपाईँलाई यस्ता कुराहरू बोल्न सिकाउँछ,
अनि तपाईँ छली कुरा गर्न रुचाउनुहुन्छ।
६ मैले होइन, तपाईँकै मुखले तपाईँलाई दोषी ठहराउँछ,
तपाईँकै ओठले तपाईँविरुद्ध साक्षी दिन्छ।+
७ के तपाईँ सबैभन्दा पहिला जन्मेको मानिस हो?
अथवा तपाईँको जन्म पहाडहरूभन्दा पहिले भएको थियो?
८ के तपाईँ परमेश्वरको गोप्य कुरा सुन्न सक्नुहुन्छ?
अथवा के तपाईँ आफू मात्रै बुद्धिमान् छु भन्ठान्नुहुन्छ?
९ हामीलाई थाह नभएको कुनचाहिँ कुरा तपाईँलाई थाह छ?+
हामीले नबुझेको कुनचाहिँ कुरा तपाईँले बुझ्नुभएको छ?
१० कपाल फुलेका र पाको उमेरका व्यक्तिहरू हामीमाझ छन्।+
तपाईँको बुबाभन्दा वृद्ध मानिसहरू हामीसित छन्।
११ के परमेश्वरले दिनुभएको सान्त्वना तपाईँलाई पुगेन?
अथवा उहाँको कोमल बोलीले तपाईँको चित्त बुझेन?
१२ तपाईँ किन भावनामा बहनुहुन्छ?
अनि तपाईँ किन रिसले आफ्नो आँखा रातो पार्नुहुन्छ?
१३ तपाईँ परमेश्वरसित रिसाउनुहुन्छ
र आफ्नो मुखबाट तीता शब्दहरू निकाल्नुहुन्छ।
१४ मानिस के हो र? ऊ कसरी शुद्ध रहन सक्छ?
अथवा स्त्रीबाट जन्मेको मानिस के हो र? ऊ कसरी धर्मी ठहरिन सक्छ?+
१५ हेर्नुहोस्! परमेश्वर त पवित्र जनहरूलाई समेत भरोसा गर्नुहुन्न,
स्वर्ग पनि उहाँको नजरमा शुद्ध छैन।+
१६ झन् खराबीलाई पानीझैँ पिउने दुष्ट र भ्रष्ट मानिसलाई
के उहाँले पवित्र ठान्नुहोला र?+
१७ मेरो कुरा सुन्नुहोस्! म तपाईँलाई बताउँछु,
आफूले देखेको कुरा म तपाईँलाई सुनाउँछु,
१८ जुन कुरा बुद्धिमान् मानिसहरूले आफ्ना बाबुबाजेबाट सिके,+
जुन तिनीहरूले लुकाएर राखेनन्।
१९ तिनीहरूका बाबुबाजेलाई यो देश दिइएको थियो,
कोही विदेशी त्यहाँबाट भएर गएन।
२० दुष्ट मानिसले जीवनभर दुःख पाउँछ,
निष्ठुर मानिसले जीवनमा कुनै पनि दिन सुख पाउँदैन।
२१ उसको कानमा डरलाग्दो आवाज गुञ्जिरहन्छ,+
शान्ति छाएको बेलामा पनि ऊमाथि डाँकाहरू आइलाग्छन्।
२२ आफू अन्धकारबाट उम्कन्छु जस्तो उसलाई लाग्दैन।+
ऊ तरबारले काटिने कुरा निश्चित छ।
२३ ऊ खानेकुराको खोजीमा भौँतारिन्छ र यसो भन्छ: ‘खै, खानेकुरा कहाँ छ?’
अन्धकारको दिन नजिकै छ भनेर उसलाई राम्ररी थाह हुन्छ।
२४ दुःख र चिन्ताले उसलाई घरीघरी तर्साउँछ
र युद्ध गर्न तम्तयार राजाले झैँ उसलाई आक्रमण गर्छ।
२५ किनकि ऊ परमेश्वरलाई हाँक दिन्छ
र सर्वशक्तिमान्सित जोरी खोज्छ।*
२६ ऊ हठी हुँदै आफ्नो मोटो र बलियो ढाल लिएर
परमेश्वरविरुद्ध जाइलाग्छ।
२७ उसको गाला बोसोले भरिएको छ
र उसको भुँडी लागेको छ।*
२८ जुन सहरहरूमा ऊ बसेको छ, ती विनाश हुनेछन्।
उसका घरहरू उजाड हुनेछन्
र ती भत्केर ढुङ्गाको थुप्रो हुनेछन्।
२९ ऊ कहिल्यै धनी हुनेछैन र उसले कहिल्यै सम्पत्ति जोड्न पाउनेछैन।
उसले देशमा आफ्नो धनसम्पत्ति बढाउन पाउनेछैन।
३० ऊ अन्धकारबाट उम्कन सक्नेछैन।
ऊ त्यो रूखजस्तै हुनेछ, जसको डाँठ आगोको रापले सुकेर जान्छ।*
अनि परमेश्वरको सासले उसलाई नाश गर्नेछ।+
३१ व्यर्थका कुराहरूमा भर परेर उसले आफैलाई धोका नदेओस्
किनकि त्यसको सट्टामा उसले केही पाउनेछैन।
३२ उसको दिन सिद्धिनुअघि नै यी सब हुनेछन्।
अनि ऊ त्यो रूखजस्तै हुनेछ, जसको हाँगाबिँगा कहिल्यै सप्रँदैन।+
३३ ऊ त्यो अङ्गुरको बोटजस्तै हुनेछ, जसको फल पाक्न नपाउँदै झर्छ।
ऊ त्यो जैतुनको रूखजस्तै हुनेछ, जसको फूल फक्रन नपाउँदै खस्छ।
३५ तिनीहरू गर्भमा अरूको हानि गर्ने विचार पाल्छन् अनि खराब कुरालाई जन्माउँछन्।
तिनीहरूको कोखबाट कपटबाहेक केही जन्मँदैन।”