यर्मिया
३६ यहुदाका राजा योसियाहका छोरा यहोयाकिमको शासनकालको चौथो वर्षमा+ यहोवाको यो वचन यर्मियाकहाँ आयो: २ “एउटा मुठा लेऊ अनि त्यसमा इस्राएल, यहुदा+ र सम्पूर्ण राष्ट्रविरुद्ध+ मैले तिमीलाई बताएका सबै कुरा लेख। योसियाहको शासनकालमा तिमीसित पहिलो पटक बोलेको दिनदेखि आजसम्म मैले तिमीलाई जे-जे बताएँ, ती सबै त्यसमा लेख।+ ३ सायद यहुदाको घरानाले मैले तिनीहरूमाथि जे-जे विपत्ति ल्याउने विचार गरेको छु, त्यसबारे सुनेपछि खराब काम गर्न छोड्लान्। अनि म तिनीहरूको अपराध र पाप क्षमा गरिदिनेछु।”+
४ त्यसपछि यर्मियाले नेरियाहका छोरा बारुकलाई बोलाए+ र यहोवाले तिनलाई भन्नुभएको एक-एक कुरा बारुकलाई लेख्न लगाए। अनि उनले ती सबै कुरा मुठामा लेखे।+ ५ त्यसपछि यर्मियाले बारुकलाई यस्तो आदेश दिए: “मलाई यहोवाको भवनमा जान निषेध गरिएको छ। ६ त्यसैले तिमी त्यहाँ जाऊ र मैले तिमीलाई मुठामा लेख्न लगाएको यहोवाको सन्देश ठूलो स्वरमा पढेर सुनाऊ। उपवासको दिन यहोवाको भवनमा गएर सबै मानिसले सुन्नेगरि त्यो पढ्नू। आ-आफ्नो सहरबाट आएका यहुदाका सबै मानिसले सुन्नेगरि त्यो पढ्नू। ७ सायद तिनीहरूले यहोवासित दयाको भीख माग्लान्। तिनीहरू प्रत्येक आफ्नो दुष्ट चाल त्यागेर फर्कलान् किनकि यहोवाले यी मानिसहरूमाथि जुन रिस र क्रोध पोखाउने घोषणा गर्नुभएको छ, त्यो निकै भयङ्कर छ।”
८ त्यसैले नेरियाहका छोरा बारुकले भविष्यवक्ता यर्मियाले अह्राएअनुसार सबै गरे। तिनी यहोवाको भवनमा गए र मुठामा लेखिएको यहोवाको वचन ठूलो स्वरमा पढेर सुनाए।+
९ यहुदाका राजा योसियाहका छोरा यहोयाकिमको+ शासनकालको पाँचौँ वर्षको नवौँ महिनामा यरुसलेमका सबै बासिन्दाले र यहुदाका सहरहरूबाट यरुसलेम आएका सबै मानिसले यहोवासामु उपवास बस्ने घोषणा गरे।+ १० त्यसपछि बारुकले यहोवाको भवनमा गएर मुठामा लेखिएको यर्मियाका शब्दहरू ठूलो स्वरमा पढेर सुनाए। तिनले प्रतिलिपिक* सापानका+ छोरा गेमर्याहको+ कोठामा सबैले सुन्नेगरि त्यो मुठा पढे, जुन यहोवाको मन्दिरको नयाँ ढोकानजिकै माथिल्लो चोकमा थियो।+
११ जब सापानका नाति, गेमर्याहका छोरा मिकायाहले मुठामा लेखिएको यहोवाको सबै सन्देश सुने, १२ तब तिनी राजाको महलमा सचिवको कोठामा गए। त्यहाँ सबै भारदार: सचिव एलिसामा,+ सेमायाहका छोरा दलायाह, आक्बोरका+ छोरा एल्नातान,+ सापानका छोरा गेमर्याह, हानन्याहका छोरा सिदकियाह र बाँकी सबै भारदार थिए। १३ बारुकले मानिसहरूसामु मुठाबाट पढेको एक-एक कुरा मिकायाहले ती भारदारहरूलाई सुनाए।
१४ तब सबै भारदारले कुसिका पनाति, सेलेम्याहका नाति, नेथन्याहका छोरा यहुदैलाई बारुककहाँ यसो भनी पठाए: “सबै मानिसले सुन्नेगरि तिमीले जुन मुठा पढेका थियौ, त्यो लिएर यहाँ आऊ।” नेरियाहका छोरा बारुक त्यो मुठा लिएर तिनीहरूकहाँ गए। १५ तिनीहरूले तिनलाई यस्तो आग्रह गरे: “यहाँ बस र मुठामा लेखिएको कुरा हामीलाई सुनाऊ।” त्यसैले बारुकले तिनीहरूसामु त्यो मुठा पढे।
१६ त्यस मुठामा लेखिएका सबै कुरा सुन्नेबित्तिकै तिनीहरू डराए र एकअर्कालाई हेर्न थाले। तिनीहरूले बारुकलाई यसो भने: “हामीले यी सबै कुरा राजालाई बताउनै पर्छ।” १७ अनि तिनीहरूले बारुकलाई सोधे: “भन त, यी सबै कुरा के तिमीले नै लेखेका हौ? अथवा यर्मियाले लेख्न लगाएका हुन्?” १८ तब बारुकले जवाफ दिए: “हो, उहाँले नै मलाई यस मुठाका एक-एक शब्द लेख्न लगाउनुभयो र मैले मसीले ती लेखेँ।” १९ त्यसपछि ती भारदारहरूले तिनलाई यसो भने: “जाऊ! तिमी र यर्मिया दुवै गएर कतै लुक। अनि तिमीहरू कहाँ लुकेका छौ भनेर कसैलाई थाह नदेऊ।”+
२० अनि ती भारदारहरू चोकमा राजाकहाँ गए र सचिव एलिसामाको कोठामा त्यो मुठा राखे। तिनीहरूले राजालाई आफूले सुनेको सबै कुरा बताए।
२१ त्यसपछि राजाले यहुदैलाई+ त्यो मुठा लिन पठाए। यहुदैले सचिव एलिसामाको कोठाबाट त्यो मुठा ल्याए। अनि राजा र राजासँगै उभिरहेका सबै भारदारले सुन्नेगरि त्यो मुठा पढे। २२ त्यो नवौँ महिना* थियो र राजा आफ्नो हिउँद काट्ने महलमा आगो तापेर बसिरहेका थिए। २३ यहुदैले तीन-चार हरफ पढेपछि उनले पढिसकेको भागलाई राजाले सचिवको छुरीले काटिदिन्थे र आगोमा हालिदिन्थे। पूरै मुठा आगोमा जलेर खरानी नभएसम्म तिनले यसै गरिरहे। २४ राजा र तिनका नोकरचाकर त्यस मुठामा लेखिएको कुरा सुनेर रतीभर डराएनन्। तिनीहरूमध्ये कसैले आफ्नो लुगा च्यातेन। २५ एल्नातान,+ दलायाह+ र गेमर्याहले+ राजालाई त्यो मुठा आगोमा नजलाउन बिन्ती गरे पनि तिनले पटक्कै सुनेनन्। २६ बरु राजाले सचिव बारुक र भविष्यवक्ता यर्मियालाई पक्रेर ल्याउन राजकुमार यरहमेल, अज्रिएलका छोरा सिरायाह र अब्दिलका छोरा सेलेम्याहलाई हुकुम गरे। तर यहोवाले यर्मिया र बारुकलाई लुकाउनुभयो।+
२७ यर्मियाले लेख्न लगाएअनुसारै बारुकले लेखेको मुठा राजाले जलाएपछि यहोवाको यो वचन फेरि यर्मियाकहाँ आयो:+ २८ “अर्को एउटा मुठा लेऊ र त्यसमा पहिलेको मुठामा भएका सबै कुरा लेख, जुन यहुदाका राजा यहोयाकिमले जलाएका थिए।+ २९ यहुदाका राजा यहोयाकिमलाई यसो भन्नू, ‘यहोवा यसो भन्नुहुन्छ: “तिमीले यसो भन्दै त्यो मुठा जलायौ, ‘तिमीले किन मुठामा बेबिलोनका राजा अवश्य आउनेछन् र यस देशलाई नाश गर्नेछन् अनि कुनै मानिस वा जनावर बाँकी नरहनेगरि यसलाई उजाड पार्नेछन् भनेर लेख्यौ?’+ ३० त्यसैले यहुदाका राजा यहोयाकिमविरुद्ध यहोवा यसो भन्नुहुन्छ, ‘दाउदको सिंहासनमा बस्नलाई उसको कोही पनि सन्तान बाँकी रहनेछैन।+ उसको लास त्यसै छोडिनेछ अनि त्यसलाई दिनमा घामको रापले र रातमा तुसारोले खानेछ।+ ३१ म ऊसित, उसका सन्तानसित र उसका नोकरचाकरसित तिनीहरूले गरेका अपराधको हिसाब लिनेछु। मैले तिनीहरूविरुद्ध, यरुसलेमका बासिन्दाविरुद्ध र यहुदाका मानिसहरूविरुद्ध जे-जे विपत्ति ल्याउँछु भनेको थिएँ, ती सब म ल्याउनेछु+ किनकि तिनीहरूले मेरो कुरा सुनेनन्।’”’”+
३२ तब यर्मियाले अर्को मुठा लिए र नेरियाहका छोरा सचिव बारुकलाई दिए।+ यहुदाका राजा यहोयाकिमले जलाइदिएको मुठामा भएका सबै कुरा यर्मियाले बारुकलाई त्यस मुठामा लेख्न लगाए।+ साथै त्यस्तै अरू थुप्रै शब्द पनि त्यस मुठामा थपिए।