दोस्रो राजा
१५ इस्राएलका राजा यरोबामको* शासनकालको २७ औँ वर्षमा यहुदाका राजा अमस्याहका+ छोरा अजर्याह*+ राजा भए।+ २ राजा हुँदा तिनी १६ वर्षका थिए र तिनले यरुसलेममा ५२ वर्ष शासन गरे। तिनकी आमाको नाम यकोल्याह थियो। उनी यरुसलेमकी बासिन्दा थिइन्। ३ तिनले आफ्ना बुबा अमस्याहले जस्तै यहोवा परमेश्वरको नजरमा जे सही छ, त्यही गरिरहे।+ ४ तर उपासनाको लागि बनाइएका अग्ला थानहरू* भने हटाइएनन्+ र मानिसहरूले ती अग्ला थानहरूमा माथिसम्म धुवाँ उठ्नेगरि बलि चढाइरहे।+ ५ यहोवा परमेश्वरले राजालाई कुष्ठरोगले प्रहार गर्नुभयो र जीवनभर तिनको रोग निको भएन।+ तिनी अलग्गै एउटा घरमा बस्थे+ र तिनका छोरा योतामले राजमहलको रेखदेख गर्थे।+ प्रजाको न्याय पनि योतामले नै गर्थे।+ ६ अजर्याहको+ जीवनकालका बाँकी घटनाहरू र तिनले गरेका सबै काम यहुदाका राजाहरूको इतिहासको पुस्तकमा लेखिएका छन्। ७ अजर्याह आफ्ना पितृहरूसितै सुते+ र तिनलाई दाउदनगरमा तिनका पितापुर्खाको चिहानमा गाडियो। तिनीपछि तिनका छोरा योताम राजा भए।
८ यहुदाका राजा अजर्याहको शासनकालको ३८ औँ वर्षमा+ यरोबामका छोरा जकरिया+ सामरियामा इस्राएलका राजा भए। उनले छ महिना शासन गरे। ९ उनले आफ्ना पितापुर्खाले जस्तै यहोवा परमेश्वरको नजरमा जे खराब छ, त्यही गरे। नबातका छोरा यरोबामले इस्राएललाई जुन पाप गर्न लगाएका थिए, उनले त्यो पाप गर्न छोडेनन्।+ १० याबेसका छोरा साल्लुमले जकरियाविरुद्ध षड्यन्त्र रचे र इब्लाममा+ उनको हत्या गरे।+ त्यसपछि उनको ठाउँमा साल्लुम राजा भए। ११ जकरियाको जीवनकालका बाँकी घटनाहरू इस्राएलका राजाहरूको इतिहासको पुस्तकमा लेखिएका छन्। १२ यसरी यहोवा परमेश्वरले येहुलाई भन्नुभएको यो कुरा पूरा भयो: “म तिम्रो चार पुस्तालाई+ इस्राएलको सिंहासनमा बस्न दिनेछु।”+
१३ यहुदाका राजा उज्जियाहको+ शासनकालको ३९ औँ वर्षमा याबेसका छोरा साल्लुम राजा भएका थिए। तिनले सामरियामा एक महिना शासन गरे। १४ तब गादिका छोरा मनहेम तिर्जाहबाट+ सामरिया आए अनि याबेसका छोरा साल्लुमको+ हत्या गरे। त्यसपछि साल्लुमको ठाउँमा मनहेम राजा भए। १५ साल्लुमको जीवनकालका बाँकी घटनाहरू र तिनले रचेको षड्यन्त्रबारे इस्राएलका राजाहरूको इतिहासको पुस्तकमा लेखिएका छन्। १६ त्यही समयतिर मनहेम तिर्जाहबाट तिफ्सा गए अनि तिफ्सा र त्यसवरपरको इलाकामा भएका सबैलाई नाश गरे। तिफ्साका बासिन्दाहरूले उनको निम्ति सहरको मूलढोका खोल्न नमानेको हुनाले उनले त्यसो गरेका थिए। उनले तिफ्सालाई ध्वस्त पारे र गर्भवती स्त्रीहरूको पेट चिरिदिए।
१७ यहुदाका राजा अजर्याहको शासनकालको ३९ औँ वर्षमा गादिका छोरा मनहेम इस्राएलका राजा भएका थिए। उनले सामरियामा १० वर्ष शासन गरे। १८ उनले यहोवा परमेश्वरको नजरमा जे खराब छ, त्यही गरिरहे। नबातका छोरा यरोबामले इस्राएललाई जुन पाप गर्न लगाएका थिए, उनले जीवनभरि त्यो पाप गरिरहे।+ १९ अस्सेरियाका राजा पुल+ इस्राएललाई आक्रमण गर्न आए। तब मनहेमले पुललाई १ हजार टालेन्ट* चाँदी दिए र राजसत्तामा आफ्नो पकड मजबुत बनाउन तिनको सहायता मागे।+ २० मनहेमले यी सबै चाँदी इस्राएलका ठूलाबडा र धनी मानिसहरूबाट उठाएका थिए।+ उनले हरेकसित ५०-५० शेकेल* चाँदी उठाएर अस्सेरियाका राजालाई दिएका थिए। त्यसपछि अस्सेरियाका राजा इस्राएलबाट फर्के। २१ मनहेमको+ जीवनकालका बाँकी घटनाहरू र उनले गरेका सबै काम इस्राएलका राजाहरूको इतिहासको पुस्तकमा लेखिएका छन्। २२ मनहेम आफ्ना पितृहरूसितै सुते। उनीपछि उनका छोरा पेकहिया राजा भए।
२३ यहुदाका राजा अजर्याहको शासनकालको ५० औँ वर्षमा मनहेमका छोरा पेकहिया सामरियामा इस्राएलका राजा भएका थिए। तिनले दुई वर्ष शासन गरे। २४ तिनले यहोवा परमेश्वरको नजरमा जे खराब छ, त्यही गरिरहे। नबातका छोरा यरोबामले इस्राएललाई जुन पाप गर्न लगाएका थिए, तिनले त्यो पाप गर्न छोडेनन्।+ २५ पेकहियाको सेनाका सहायक अफिसर पेकह,+ जो रमल्याहका छोरा थिए, उनले पेकहियाविरुद्ध षड्यन्त्र रचे। उनले गिलादका ५० जना मानिस लिएर सामरियामा राजमहलको किल्लामा अर्गोब र अरिहसँगै पेकहियाको हत्या गरे। त्यसपछि पेकह तिनको ठाउँमा राजा भए। २६ पेकहियाको जीवनकालका बाँकी घटनाहरू र तिनले गरेका सबै काम इस्राएलका राजाहरूको इतिहासको पुस्तकमा लेखिएका छन्।
२७ यहुदाका राजा अजर्याहको शासनकालको ५२ औँ वर्षमा रमल्याहका छोरा पेकह+ सामरियामा इस्राएलका राजा भएका थिए। उनले २० वर्ष शासन गरे। २८ उनले यहोवा परमेश्वरको नजरमा जे खराब छ, त्यही गरिरहे। नबातका छोरा यरोबामले इस्राएललाई जुन पाप गर्न लगाएका थिए, उनले त्यो पाप गर्न छोडेनन्।+ २९ इस्राएलका राजा पेकहको शासनकालमा अस्सेरियाका राजा तिग्लाथ-पिलेसरले+ इस्राएलमा आक्रमण गरे अनि इयोन, हाबिल-बेथ-माकाह,+ यानोह, केदेस,+ हजोर र गिलादका+ साथै गालिल अर्थात् नप्तालिको+ कुलको पूरै इलाका कब्जा गरे। तिनले त्यहाँका बासिन्दाहरूलाई बन्दी बनाएर अस्सेरिया+ लगे। ३० पछि एलाहका छोरा होसियाले+ रमल्याहका छोरा पेकहविरुद्ध षड्यन्त्र रचे अनि उनको हत्या गरे। त्यसपछि होसिया उनको ठाउँमा राजा भए। त्यसबेला उज्जियाहका छोरा योतामको+ शासनकालको २० औँ वर्ष चलिरहेको थियो। ३१ पेकहको जीवनकालका बाँकी घटनाहरू र उनले गरेका सबै काम इस्राएलका राजाहरूको इतिहासको पुस्तकमा लेखिएका छन्।
३२ रमल्याहका छोरा इस्राएलका राजा पेकहको शासनकालको दोस्रो वर्षमा यहुदाका राजा उज्जियाहका+ छोरा योताम+ राजा भएका थिए। ३३ राजा हुँदा तिनी २५ वर्षका थिए। तिनले यरुसलेममा १६ वर्ष शासन गरे। तिनकी आमाको नाम यरुसा थियो। उनी सादोककी+ छोरी थिइन्। ३४ योतामले आफ्ना बुबा उज्जियाहले जस्तै यहोवा परमेश्वरको नजरमा जे सही छ, त्यही गरिरहे।+ ३५ तर उपासनाको लागि बनाइएका अग्ला थानहरू भने हटाइएनन् र मानिसहरूले ती अग्ला थानहरूमा माथिसम्म धुवाँ उठ्नेगरि बलि चढाइरहे।+ योतामले नै यहोवा परमेश्वरको भवनको माथिल्लो ढोका बनाएका थिए।+ ३६ योतामको जीवनकालका बाँकी घटनाहरू र तिनले गरेका कामहरू यहुदाका राजाहरूको इतिहासको पुस्तकमा लेखिएका छन्। ३७ त्यही समयतिर यहोवा परमेश्वरले सिरियाका राजा रजिन र रमल्याहका छोरा पेकहलाई+ यहुदालाई आक्रमण गर्न पठाउनुभयो।+ ३८ त्यसपछि योताम आफ्ना पितृहरूसितै सुते र तिनलाई दाउदनगरमा तिनका पितापुर्खाको चिहानमा गाडियो। तिनीपछि तिनका छोरा आहाज राजा भए।