इजकिएल
१७ यहोवाको वचन फेरि मकहाँ आयो। उहाँले मलाई भन्नुभयो: २ “हे मानिसको छोरा, एउटा अड्को थाप र इस्राएलको घरानाबारे एउटा दृष्टान्त बताऊ।+ ३ तिमीले भन्नू, ‘ब्रह्माण्डका मालिक यहोवा यसो भन्नुहुन्छ: “ठूला-ठूला र लामा-लामा पखेटा भएको अनि रङ्गीबिरङ्गी प्वाँख भएको एउटा ठूलो चील+ लेबनानमा आयो+ र देवदारको रूखको टुप्पो चुँडायो।+ ४ त्यसले टुप्पोको कलिलो डाँठ चुँडायो र व्यापारीहरूको देशमा* त्यो लग्यो अनि त्यहाँको एउटा सहरमा रोप्यो।+ ५ त्यसले लेबनानबाट केही बिउ पनि ल्यायो+ र मलिलो माटोमा लगेर रोप्यो। प्रशस्त पानी भएको ठाउँमा बैँसको रूख सप्रेझैँ त्यो पनि सप्रोस् भनेर त्यसले त्यो बिउ रोप्यो। ६ त्यो बिउ अङ्कुरायो र बढेर अङ्गुरको होचो बोट बन्यो।+ त्यसका पातहरू मुन्तिर फर्केका थिए र त्यसका जरा पनि जमिनमुनि फैलिए। यसरी त्यो बढ्यो र अङ्गुरको बोट बन्यो। त्यसमा मुनाहरू पलाए र त्यसका हाँगाहरू झाङ्गिए।+
७ “‘“त्यसपछि ठूला-ठूला र लामा-लामा पखेटा भएको+ अर्को ठूलो चील+ त्यहाँ आयो। चीलले पानी देओस् भनेर त्यो अङ्गुरको बोटले आतुर हुँदै आफ्नो जरा त्यो चीलतिर फर्कायो। आफ्ना हाँगाहरू र पातहरू पनि त्यसले त्यही चीलतिरै फर्कायो।+ ८ तर त्यसमा प्रशस्त हाँगा लागोस्, लटरम्म फल फलोस् र त्यो झ्याम्म परेको बोट बनोस् भनेर त्यसलाई पहिले नै प्रशस्त पानी भएको मलिलो जमिनमा रोपिएको थियो।”’+
९ “तिमीले भन्नू, ‘ब्रह्माण्डका मालिक यहोवा यसो भन्नुहुन्छ: “त्यो अब फस्टाउँछ र? कसैले त्यसका जराहरू उखेल्दैन र?+ त्यसका फलहरू कुहिएर अनि मुनाहरू सुकेर जाँदैनन् र?+ त्यो सुकेर खङ्ग्रङ्ङ हुनेछ। त्यसलाई जरैदेखि उखेल्न न बलियो पाखुरा न त थुप्रै मान्छे नै चाहिनेछ। १० त्यसलाई अन्तै सारे पनि त्यो सप्रन्छ र? पूर्वको बतासले हिर्काउँदा त्यो सुकेर खङ्ग्रङ्ङै हुनेछैन र? त्यो त उम्रिएकै ठाउँमा सुकेर जानेछ।”’”
११ यहोवाको वचन फेरि मकहाँ आयो। उहाँले मलाई भन्नुभयो: १२ “त्यो विद्रोही घरानालाई यसो भन, ‘के तिमीहरू यसको अर्थ बुझ्दैनौ? हेर, बेबिलोनका राजा यरुसलेम आए र त्यहाँका राजा र भारदारहरूलाई आफूसितै लिएर गए।+ १३ तिनले राजघरानाकै एक जनासित+ करार गरे र तिनलाई शपथ खान लगाए।+ त्यसपछि तिनले यरुसलेमका गण्यमान्य मानिसहरूलाई आफूसितै लगे।+ १४ त्यो राज्य बलियो हुन नसकोस् भनेर तिनले त्यसो गरेका थिए। तिनीसित गरेको करार पूरा गरेर मात्र त्यो अस्तित्वमा रहन सक्थ्यो।+ १५ तर पछि यरुसलेमका राजाले विद्रोह गरे।+ तिनले मिश्रमा सन्देशवाहकहरू पठाएर युद्धको निम्ति घोडाहरू+ र विशाल सेना+ मगाए। तर तिनी सफल होलान् र? यस्तो काम गर्नेले सजाय पाउँदैन र? आफूले गरेको करार तोडेर के तिनी उम्कन सक्लान् र?’+
१६ “‘ब्रह्माण्डका मालिक यहोवा यसो भन्नुहुन्छ, “म आफ्नै कसम खाएर भन्छु: राजा* बेबिलोनमै मर्नेछन्। तिनलाई राजा बनाउने राजाकै* देशमा तिनी मर्नेछन्। किनकि तिनले त्यहाँका राजाको शपथलाई तुच्छ ठाने र करार तोडे।+ १७ जब युद्धको बेला धेरैको ज्यान लिन यरुसलेमवरिपरि पर्खाल र घेरा-मचानहरू* बनाइनेछ, तब फारोको* शक्तिशाली र असङ्ख्य सेनाले पनि केही गर्न सक्नेछैन।+ १८ राजाले शपथलाई तुच्छ ठाने र करार तोडे। तिनले वचन दिएर पनि त्यो पूरा गरेनन्। तिनी त्यसै उम्कनेछैनन्।”’
१९ “‘त्यसैकारण ब्रह्माण्डका मालिक यहोवा यसो भन्नुहुन्छ, “म आफ्नै कसम खाएर भन्छु: मेरो शपथलाई तिनले तुच्छ ठानेकोले+ र मसित गरेको करारलाई तोडेकोले म त्यसको दोष तिनकै थाप्लोमा खन्याइदिनेछु। २० म तिनीमाथि आफ्नो जाल फिँजाउनेछु र तिनी मेरो जालमा पर्नेछन्।+ मलाई धोका दिएकोले म तिनलाई बेबिलोनमा पुऱ्याउनेछु र त्यहाँ तिनलाई दण्ड दिनेछु।+ २१ ज्यान जोगाएर तिनको सेनाबाट भागेकाहरू सबै तरबारले काटिनेछन्। बाँकी रहेकाहरूचाहिँ चारैतिर तितरबितर पारिनेछन्।+ तब म यहोवाले नै यसो भनेको हुँ भनेर तिमीहरूले थाह पाउनेछौ।”’+
२२ “‘ब्रह्माण्डका मालिक यहोवा यसो भन्नुहुन्छ: “म देवदारको अग्लो रूखको टुप्पोको हाँगा भाँच्नेछु+ र त्यसलाई रोप्नेछु। त्यसको टुप्पोबाट म एउटा कलिलो डाँठ लिनेछु+ र म आफै एउटा अग्लो डाँडामा त्यसलाई रोप्नेछु।+ २३ म त्यसलाई इस्राएलको एउटा अग्लो डाँडामा लगेर रोप्नेछु। त्यसमा हाँगा पलाउनेछन्, फल लाग्नेछन् र त्यो झ्याम्म परेको देवदारको ठूलो रूख बन्नेछ। अनि सबै किसिमका चराचुरुङ्गी त्यसमा बास बस्नेछन् र त्यसको छहारीमा आउनेछन्। २४ अनि मैदानका सबै रूखले यो कुरा जान्नेछन् कि ठूलो रूखलाई ढाल्ने र सानो रूखलाई बढाउने+ अनि हरियो रूखलाई सुकाउने र सुकेको रूखलाई हरियो पार्ने+ म यहोवा नै हुँ। म यहोवाले नै यसो भनेको र गरेको हुँ।”’”