दोस्रो इतिहास
९ सेबाकी महारानीले+ सुलेमानको ख्यातिबारे सुनिन्। त्यसैले उनी सुलेमानको परीक्षा लिन गाह्रा-गाह्रा प्रश्नहरू* लिएर यरुसलेम आइन्। उनी ठूलो लावालस्करसहित त्यहाँ आइपुगिन्। उनले उँटमा बाल्सम तेल* अनि प्रशस्त मात्रामा सुन+ र बहुमूल्य रत्न ल्याएकी थिइन्। उनी सुलेमानकहाँ हाजिर भइन् र आफ्नो मनमा भएका सबै कुरा सुलेमानलाई सोधिन्।+ २ सुलेमानले उनका सबै प्रश्नको जवाफ दिए। उनले सोधेको कुनै पनि प्रश्नको जवाफ दिन सुलेमानलाई गाह्रो भएन।
३ सेबाकी महारानीले सुलेमानको बुद्धि,+ तिनले बनाएको राजमहल,+ ४ तिनको टेबुलको भोजन,+ तिनका सेवकहरूको आसन, खाना पस्कनेहरूले गरेको सेवासुसार र उनीहरूको विशेष पहिरन, तिनका मद्य टक्य्राउनेहरू र तिनीहरूको विशेष पहिरन अनि तिनले यहोवा परमेश्वरको भवनमा नियमित रूपमा चढाउने+ गरेको अग्निभेटी देखेपछि उनी चकित भइन्, केही बोल्नै सकिनन्। ५ त्यसैले उनले राजालाई भनिन्: “मैले आफ्नो देशमा तपाईँको सफलता र तपाईँको बुद्धिबारे सुनेको कुरा सत्य रहेछ। ६ यहीँ आएर आफ्नै आँखाले नदेखेसम्म मलाई पत्यारै लागेको थिएन।+ साँच्चै! मलाई त तपाईँको बुद्धिको महानताबारे+ आधा पनि बताइएको रहेनछ। मैले तपाईँबारे जे सुनेकी थिएँ, त्यो त केही पनि होइन रहेछ।+ ७ तपाईँसँगै रहेर सधैँ तपाईँको बुद्धिका कुरा सुन्न पाउने तपाईँका मानिसहरू र तपाईँका सेवकहरू धन्यका हुन्! ८ तपाईँसित प्रसन्न भएर तपाईँलाई आफ्नो सिंहासनमा बसाल्नुहुने र आफ्नो तर्फबाट शासन गर्न तपाईँलाई नियुक्त गर्नुहुने तपाईँका परमेश्वर यहोवाको प्रशंसा होस्! यहोवा इस्राएललाई प्रेम गर्नुहुन्छ+ र यसलाई सधैँभरिको लागि स्थिर गर्न चाहनुहुन्छ। त्यसैले उहाँले तपाईँलाई इस्राएलमा न्याय र धार्मिकता कायम राख्न राजा नियुक्त गर्नुभएको छ।”
९ त्यसपछि उनले राजालाई १२० टालेन्ट* सुन+ अनि प्रशस्त बाल्सम तेल र बहुमूल्य रत्न दिइन्। सेबाकी महारानीले राजा सुलेमानको लागि जति बाल्सम तेल ल्याएकी थिइन्, त्यति धेरै त पछि कसैले पनि कहिल्यै ल्याएन।+
१० हिरामका सेवकहरू र सुलेमानका सेवकहरूले ओपिरबाट+ सुन ल्याउँथे। तिनीहरूले सुनका साथै बहुमूल्य रत्नहरू र चन्दनका काठहरू पनि ल्याउँथे।+ ११ राजा सुलेमानले ती चन्दनका काठहरूबाट यहोवा परमेश्वरको भवन+ र आफ्नो महलका+ लागि भऱ्याङहरू बनाए। तिनले त्यसबाट गायकहरूको लागि वीणा र तारे बाजा पनि बनाए।+ त्यस्ता काठहरू यहुदामा पहिला कहिल्यै देखिएको थिएन।
१२ राजा सुलेमानले सेबाकी महारानीलाई उनले चाहेको र मागेको सबै कुरा दिए। उनले राजाको लागि जति उपहार ल्याएकी थिइन्, त्योभन्दा धेरै उपहार राजाले उनलाई दिए।* त्यसपछि सेबाकी महारानी आफ्ना सेवकहरूलाई लिएर आफ्नो देश फर्किन्।+
१३ राजा सुलेमानकहाँ हरेक वर्ष ६६६ टालेन्ट सुन आउँथ्यो।+ १४ यसबाहेक व्यापारीहरू, व्यवसायीहरू, अरबका सबै राजा र देशका राज्यपालहरूले पनि सुलेमानकहाँ सुन र चाँदी ल्याउँथे।+
१५ राजा सुलेमानले सुनलाई अरू धातुसित मिसाएर २०० वटा ठूलठूला ढाल बनाए।+ (प्रत्येक ढाल बनाउन ६०० शेकेल* सुन लागेको थियो।)+ १६ तिनले त्यसरी नै ३०० वटा साना ढाल* पनि बनाए। (प्रत्येक सानो ढाल बनाउन तीन मीना* सुन लागेको थियो।) त्यसपछि तिनले ती हतियारहरू ‘लेबनानको वन-भवन’-मा राखे।+
१७ राजाले हस्तिदन्तको एउटा भव्य सिंहासन पनि बनाए र त्यसलाई निखुर सुनले मोहोरे।+ १८ सिंहासनमा जान छ वटा खुट्किला बनाइएको थियो। अनि सिंहासनसितै जोडेर एउटा पाउदान पनि बनाइएको थियो। सिंहासनको दुवैपट्टि हात बिसाउने बाहु थिए। अनि दुवै बाहुको छेउमा सिंहको एउटा-एउटा मूर्ति थियो।+ १९ ती छ वटा खुट्किलामा सिंहका १२ वटा मूर्ति थिए;+ प्रत्येक खुट्किलाको दुवै छेउमा सिंहको एउटा-एउटा मूर्ति थियो। अरू कुनै पनि देशमा यस्तो सिंहासन थिएन। २० राजा सुलेमानका सबै प्याला सुनका थिए अनि ‘लेबनानको वन-भवन’-का सबै भाँडाकुँडा पनि निखुर सुनकै थिए। कुनै पनि सामान चाँदीको थिएन किनकि राजा सुलेमानको पालामा चाँदीको केही मोल नै थिएन।+ २१ राजा सुलेमानसित तर्सिस+ जाने जहाजहरू पनि थिए र ती जहाजहरू हिरामका+ सेवकहरूले चलाउँथे। प्रत्येक तीन वर्षमा तर्सिसका जहाजहरू प्रशस्तै सुन, चाँदी, हस्तिदन्त,+ बाँदर र मयूर लिएर आउँथे।
२२ त्यतिबेलाका अरू सबै राजाभन्दा राजा सुलेमान महान् थिए। तिनीजस्तो बुद्धिमान्+ र सम्पन्न राजा अरू कोही थिएन। २३ पृथ्वीका कुनाकुनाबाट राजाहरू सुलेमानको बुद्धिका कुराहरू सुन्न आउँथे, जुन बुद्धि तिनलाई साँचो परमेश्वरले दिनुभएको थियो।+ २४ सुलेमानकहाँ आउने सबैले उपहार ल्याउँथे। तिनीहरूले सुलेमानको लागि सुन र चाँदीका सरसामान अनि लुगाफाटा,+ हातहतियार, बाल्सम तेल, घोडा र खच्चरहरू लिएर आउँथे। हरेक वर्ष यस्तै हुन्थ्यो। २५ सुलेमानका रथहरू र घोडाहरू राख्न ४ हजार तबेला थिए र तिनका १२ हजार घोडा* थिए।+ अनि ती सबैलाई तिनले रथ राख्ने सहरहरूमा अनि आफूसितै यरुसलेममा राखे।+ २६ सुलेमानले युफ्रेटिस नदीदेखि पलिस्तियालीहरूको देश र मिश्रको सिमानासम्म भएका सबै राजामाथि शासन गरे।+ २७ राजा सुलेमानले यरुसलेममा यत्ति धेरै चाँदी जम्मा गरे कि ती ढुङ्गासरह प्रशस्त भए। अनि देवदारको काठचाहिँ सेफेलाहका+ खनिउँका रूखहरूसरह प्रशस्त भयो। २८ सुलेमानको लागि मिश्र र अरू देशहरूबाट घोडाहरू ल्याइन्थ्यो।+
२९ सुलेमानको जीवनकालका बाँकी घटनाहरू+ अर्थात् सुरुदेखि अन्तसम्मको तिनको इतिहास भविष्यवक्ता नातानको+ लेखोटमा, सिलोमा बस्ने अहियाहको+ भविष्यवाणीको पुस्तकमा अनि दर्शी इद्दोको+ लेखोटमा पाइन्छ, जसमा नबातका छोरा यरोबामबारे+ इद्दोले देखेको दर्शन* लेखिएको छ। ३० सुलेमानले यरुसलेमबाट पूरै इस्राएलमाथि ४० वर्ष शासन गरे। ३१ त्यसपछि सुलेमान आफ्ना पितृहरूसितै सुते र तिनलाई तिनका बुबाको सहर दाउदनगरमा गाडियो।+ तिनीपछि तिनका छोरा रहबाम राजा भए।+